വിഭാഗം :

SPORTS

ബിയനേച്ചോ അർജന്റീന

1986 ലെ കിരീടത്തിന് ശേഷമുള്ള അർജന്റീനയുടെ കാച്ചിക്കുറുക്കിയ കാത്തിരിപ്പിന് വിരാമമായി. ഖത്തറിലെ ലൂസയിൽ സ്റ്റേഡിയത്തിൽ നടന്ന ത്രില്ലർ ഫൈനലിൽ ടൈബ്രേക്കറിൽ ഫ്രാൻസിനെ മറി കടന്ന് ലോകകപ്പ് ചരിത്രത്തിലെ അർജന്റീനയുടെ മൂന്നാം കിരീടം മെസ്സിയും കൂട്ടരും നേടി. കോച്ച് സ്‌കാലോണിയ്ക്കും അഭിമാന നേട്ടം.
അർജന്റീന പൂർണ്ണമായും മേൽക്കൈ നേടിയാണ് ആദ്യ പകുതിയും രണ്ടാം പകുതിയുടെ തുടക്കവും. പെനാൽറ്റിയിലൂടെ മെസ്സി നേടിയ ആദ്യ ഗോളും, ലെഫ്റ്റ് ഫോർവേഡ് ആയി നിറഞ്ഞു കളിച്ച ഡീ മാരിയയുടെ രണ്ടാം ഗോളും കൊണ്ട് 2-0 ന്റെ ലീഡ്.

ഡീമാരിയയ്ക്ക് പകരം അക്വിനോ വന്നതോടെ ഇടത് വിങ്ങിലൂടെയുള്ള മുന്നേറ്റം കുറഞ്ഞു. ഗ്രീസ്മാനേയും ജിറോദിനേയും പിൻവലിപ്പിച്ച് തുറാമും കോലോ മുവാനിയും ഇറങ്ങി.ആക്രമണത്തിന് അതോടെ വേഗത കൂടി. അത്‌ വരെ ബോൾ ലഭിക്കാതിരുന്ന എംബാപ്പേയ്ക്ക് ബോൾ കിട്ടിത്തുടങ്ങി. എൺപതാം മിനിറ്റിൽ എംബാപ്പേ പെനാൽറ്റിയിലൂടെ ആദ്യ ഗോൾ നേടി. തൊട്ടടുത്ത മിനിറ്റിൽ എംബാപ്പെയുടെ സിഗ്‌നച്ചർ ഷോട്ടിലൂടെ മറ്റൊരു ഗോൾ. ഫൈനൽ ഒരു ത്രില്ലർ ആയി മാറുകയായിരുന്നു. എക്സ്ട്രാ ടൈമിൽ രണ്ടാം പകുതി തുടങ്ങിയപ്പോൾ മെസ്സിയുടെ ഗോളിലൂടെ അർജന്റീന മുന്നിലെത്തി. എന്നാൽ 118 മത്തെ മിനിറ്റിൽ എംബാപ്പെയുടെ പെനാൽറ്റിയിലൂടെ ഫ്രാൻസ് തുല്യത പാലിച്ചു. എംബാപ്പെയുടെ ഹാട്രിക്. എക്സ്ട്രാ ടൈമിന്റെ അന്ത്യ നിമിഷങ്ങളിൽ ഫ്രാൻസിന്റ ആക്രമണം ഗോൾ കീപ്പർ മാർട്ടിനസ് തടഞ്ഞു നിർത്തി.

പിന്നീട് അനിവാര്യമായ പെനാൽറ്റി. ആദ്യ പെനാൽറ്റി എംബാപ്പേ ഗോൾ ആക്കി മാറ്റി. മെസ്സിയാണ് അർജന്റീനയ്ക്ക് വേണ്ടി ആദ്യ പെനാൽറ്റി എടുത്തത്. അതും ഗോൾ. ഫ്രാൻസിന് വേണ്ടി രണ്ടാം പെനാൽറ്റി എടുത്ത കോമന്റെ ഷോട്ട് മാർട്ടിനസ് തടഞ്ഞു. മൂന്നാം ഷോട്ട് എടുത്ത ചൗമനിയുടെ ഷോട്ട് പുറത്തേക്ക്. അർജന്റീന പെനാൽറ്റി ഒന്നും പാഴാക്കാതെ കിരീടത്തിലേക്ക് നീങ്ങി.2018 ലെ പ്രീ ക്വാർട്ടർ ഫൈന
ലിൽ ഫ്രാൻസിനോട് ഏറ്റു വാങ്ങിയ തോൽവിക്കൊരു പ്രതികാരം കൂടിയായി. ഏകപക്ഷീയമായി നീങ്ങിയ ഫൈനലിൽ എംബാപ്പേ ആവേശം നിറച്ചു. ഹാട്രിക്കോടെ ഗോൾഡൻ ബൂട്ടും സ്വന്തമാക്കി. പത്താം നമ്പർ ജേഴ്സിയിൽ ലോക ഫുട്ബോളിൽ നിറഞ്ഞു നിൽക്കാനൊരു താരം.

2014 ൽ ഫൈനലിൽ നഷ്ടപ്പെട്ട കിരീടം മെസ്സിയും കൂട്ടരും വീണ്ടെടുത്തു.കളിയുടെ കമനീയത കൊണ്ട് കാണികളുടെ ഹൃദയം കവർന്ന മെസ്സിയ്ക്ക് ലോക കിരീടത്തിന്റെ പൊൻ തൂവൽ കൂടി. 13 ലോക കപ്പ് ഗോളുകളോടെ ( ഇപ്രാവശ്യം 7 ഗോളുകൾ )കൗമാരത്തിലും ഇരുപതുകളിലും മുപ്പതുകളിലും ലോകകപ്പ് ഗോളുകൾ നേടുന്ന ചരിത്രത്തിലെ ആദ്യ കളിക്കാരൻ കൂടിയായി മെസ്സി.

ഗ്രൂപ്പ് സ്റ്റേജ്,റൗണ്ട് ഓഫ് 16, ക്യാർട്ടർ ഫൈനൽ, സെമി ഫൈനൽ, ഫൈനൽ – അങ്ങനെ എല്ലാ ഘട്ടത്തിലും ഗോളുകൾ നേടുന്ന ആദ്യത്തെ താരവും മെസ്സിയാണ്.

ബിയനേച്ചോ അർജന്റീന!
ബിയനേച്ചോ ഖത്തർ! ( Well done Argentina & Well done Qatar )

കവർ ഡിസൈൻ : വിത്സൺ ശാരദാ ആനന്ദ്

അനുഭവം SPORTS

ഖത്തർ ലോകകപ്പ് : കൊടിയിറങ്ങുമ്പോൾ

മെതിലാജ് എം. എ. 9 months ago

ഏതാണ്ട് നാലു വർഷങ്ങൾക്കു മുൻപ് ആയിരുന്നു ആ മൈക്രോസോഫ്റ്റ് ടീംസ് കോൺഫറൻസ് കോൾ. മറുവശത്തു കുവൈറ്റിൽ നിന്ന് ഓപ്പറേഷൻസ് ഡയറക്ടറും എച്ച് ആർ പ്രതിനിധിയും. ” ഖത്തറിൽ ലോകകപ്പ് വരുന്നു, നീ അവിടെ ഉണ്ടാകണം”അതായിരുന്നു കോളിന്റെ രത്നച്ചുരുക്കം. വൈകുന്നേരം വീട്ടിൽ പോയി. ഭാര്യയും മക്കളുമായി ഇരുന്നു സംസാരിച്ചു. അവസാന ട്രാൻസ്ഫർ 14 വർഷങ്ങൾക്കു മുൻപായിരുന്നു, ബഹ്‌റൈനിൽ നിന്ന് തിരികെ യൂ എ ഇ യിലേക്ക്. അന്ന് മുതൽ കുടുംബം യൂ എ ഇ യിൽ സെറ്റിൽഡ് ആണ്. മക്കൾ ആണെങ്കിൽ യൂ എ ഇ യിൽ അല്ലാതെ മറ്റെവിടെയും സ്ഥിരമായി ജീവിച്ചിട്ടുമില്ല. എന്നെ പോലെ തന്നെ ഭാര്യക്കും മക്കൾക്കും നിറയെ കൂട്ടുകാരുണ്ട് യൂ എ ഇ യിൽ. സ്‌കൂൾ, വീട്, സൗഹൃദങ്ങൾ എല്ലാം ഇട്ടെറിഞ്ഞു പോകണം നന്നായി അറിയാത്ത ഒരു രാജ്യത്തേക്ക്. രണ്ടു ദിവസം കൂലങ്കഷമായ ചർച്ച നടന്നു, കുട്ടികൾക്ക് ആദ്യമൊന്നും തീരെ ഇഷ്ടമായിരുന്നില്ല. ആദ്യം ഭാര്യ സമ്മതിച്ചു ദിവസങ്ങൾ കഴിഞ്ഞപ്പോൾ കുട്ടികളും. അടുത്തയാഴ്ചയിലെ ഫോളോ അപ്പ് മീറ്റിങ്ങിൽ ” അതെ. ഞാൻ പോകാൻ തയ്യാറാണ്” എന്നറിയിച്ചപ്പോൾ അവരും അൽപം ഞെട്ടിയോ എന്ന് സംശയം. പിന്നെ എല്ലാം അതിവേഗമായിരുന്നു.മാസങ്ങൾക്കുള്ളിൽ കൂടും കുടുക്കയുമെടുത്തു ഖത്തറിലേക്ക്. യാത്ര തുടങ്ങുമ്പോഴേക്കും കുടുംബം പെട്ടു പോയി ഇന്ത്യയിൽ. അപ്പോഴേക്കും കോവിഡ് കാറ്റ് അടിച്ചു തുടങ്ങിയിരുന്നു. ഞാൻ ഒറ്റയ്ക്ക് പുതിയൊരു രാജ്യത്തു പൂട്ടിക്കെട്ടിയിരുന്നു. ഖത്തർ ലോകകപ്പ് എനിക്കും കുടുംബത്തിനും അന്നേ തുടങ്ങിയിരുന്നു.

മൂന്നു വർഷം മുൻപാണ് ഓഫീസിൽ ലോകകപ്പ് സംബന്ധിയായ ആദ്യ മീറ്റിങ്ങിൽ പങ്കെടുക്കുന്നത്. അന്ന് തുടങ്ങി ലോകകപ്പിനുള്ള ഞാൻ ജോലി ചെയ്യുന്ന സ്ഥാപനത്തിന്റെ തയ്യാറെടുപ്പുകൾ. രാജ്യമെങ്ങും കൂടുതൽ ബ്രാഞ്ചുകൾ തുറക്കണം, ഫിഫ ഫാൻ സോണുകളിൽ സ്റ്റോറുകൾ തുറക്കണം, അതിനുളള കൺസ്ട്രക്ഷൻ മെറ്റിരിയലുകളും മറ്റും ചൈനയില് നിന്നും മറ്റും വരണം, വിവിധ രാജ്യങ്ങളിൽ നിന്ന് എഞ്ചിനീയര്മാരടക്കം സവിശേഷ സ്കില്ലുകൾ ഉള്ളവർ വരണം അതിനൊക്കെയുള്ള വിസയും മറ്റു സൗകര്യങ്ങളും അറേഞ്ച് ചെയ്യണം.

ഐടി ഇൻഫ്രാസ്ട്രക്ച്ചർ ശേഷി വർധിപ്പിക്കണം.സെക്യൂരിറ്റി, മെയിന്റനൻസ്, ബിൽഡിങ് നവീകരണങ്ങൾ അങ്ങനെ എല്ലാ വശവും പരിശോധിക്കണം.

ഫിഫ ലൈസൻസ്ഡ് പ്രോഡക്ടുകൾ വാങ്ങണം, ഫുട്‌ബോൾ തീമിൽ മറ്റെന്തൊക്കെ ചെയ്യാൻ കഴിയുമെന്ന് ആലോചിക്കണം…
15 ലക്ഷം സന്ദർശകർ ആണ് വരുന്നത് അത്രയും പേരെ സെർവ് ചെയ്യാൻ വേണ്ടത്ര സ്റ്റാഫ് ഉണ്ടാകണം.

റിക്രൂട്ട്മെന്റ് ഒരു വർഷം മുൻപേ തുടങ്ങി. സ്റ്റാഫിംഗ് 2022 ഓഗസ്‌റ്റോടെ ഫുൾ സ്ട്രെങ്ങ്തിൽ എത്തണം.

2019 ജൂലൈ പകുതിയോടെ ഞാൻ ഖത്തറിൽ എത്തുമ്പോൾ രാജ്യം മുഴുവൻ ഏതാണ്ട് ഒരു കൺസ്ട്രക്ഷൻ സൈറ്റ്‌ പോലെ ആയിരുന്നു. എവിടെ തിരിഞ്ഞാലും നിർമ്മാണ പ്രവർത്തനങ്ങൾ മാത്രം. എവിടെ നോക്കിയാലും ക്രെയിനുകൾ. എല്ലാ റോഡും പുനർ നിർമ്മിക്കുന്നു. ഗൂഗിൾ മാപ്പ് നോക്കി എവിടെയും പോകാൻ കഴിയില്ല ഓരോ ദിവസവും ഓരോ റോഡ് ഡൈവേർഷൻസ് ആവും. ഡൈവേർട്ട് ചെയ്യപ്പെടാത്ത, നിർമ്മാണ പ്രവർത്തനങ്ങൾ നടക്കാത്ത ഒരു റോഡ് പോലുമുണ്ടായിരുന്നില്ല ഖത്തറിൽ അന്ന്. പുതിയ ഹോട്ടലുകൾ, ബ്രിഡ്ജുകൾ, സ്റ്റേഡിയങ്ങൾ… രാജ്യം മുഴുവനും എഞ്ചിനിയേഴ്സും നിർമ്മാണ തൊഴിലാളികളും. കോവിഡ് ആഞ്ഞടിക്കുമ്പോഴും നിർമ്മാണ പ്രവർത്തനങ്ങൾ ഏതാനും മാസങ്ങൾ മാത്രമാണ് നിലച്ചത്, കോവിഡ് എല്ലാ തയ്യാറെടുപ്പുകളെയും പിന്നിലേക്ക് വലിച്ചിരുന്നു. 2022 മാർച്ചോടു കൂടി മുഴുവൻ നിർമ്മാണ പ്രവർത്തനങ്ങളും കഴിയും എന്ന് പറഞ്ഞിരുന്നെങ്കിലും ജൂലൈ/ ഓഗസ്റ് എത്തി ഏതാണ്ട് മുഴുവൻ നിർമ്മാണങ്ങളും കഴിയാൻ. മറ്റൊരു രാജ്യത്തിനും കഴിയുമായിരുന്ന ഒന്നായിരുന്നില്ല അത്. ഖത്തറിന്റെ മണി പവർ ഒന്ന് കൊണ്ട് മാത്രം കഴിഞ്ഞത്. ലോകത്തിലെ മൂന്നാമത്തെ ഏറ്റവും വലിയ നാച്ചുറൽ ഗ്യാസ് റിസേർവ് ഉള്ള ഒരു രാജ്യത്തിനു മാത്രം കഴിയുന്ന ഒന്ന്, ഫിഫ ലോകകപ്പ് ലോകത്തെ ഞെട്ടിച്ചു കൊണ്ട് ഈ കുഞ്ഞു രാജ്യത്തിലേക്ക് കൊണ്ട് വന്നത് പോലെ ഒന്ന്.

സംശയങ്ങൾ എല്ലാവർക്കുമുണ്ടായിരുന്നു. ഇതൊക്കെ എങ്ങിനെ നടത്താൻ കഴിയുമെന്ന സംശയം. നമ്മൾ കൂട്ടിയാൽ കൂടുമോ എന്ന സംശയം രാജ്യത്തെ ഓരോ പൗരനും താമസക്കാരനും ഉണ്ടായിരുന്നു, സ്വദേശിക്കും വിദേശിക്കും. ചിലർ രഹസ്യമായി അത് പരസ്പരം ചോദിച്ചു ചിലർ പരസ്യമായി. ഒരുപാടു തടസ്സങ്ങൾ ഉണ്ടായിരുന്നു. നിയമങ്ങൾ, കൾച്ചറൽ സെന്സിറ്റിവിറ്റി, വേണ്ട സമയത്തു വേണ്ട ഇൻഫർമേഷൻ കിട്ടാതിരിക്കൽ, അവസാന നിമിഷ തീരുമാനങ്ങൾ അങ്ങനെ പലതും പലപ്പോഴും തടസ്സങ്ങളായി

ഖത്തറിലെ മുഴുവൻ മനുഷ്യരും, സ്വദേശിയും വിദേശിയും, മുതലാളിയും തൊഴിലാളിയും, സമ്പന്നനും സാധാരണക്കാരനും ഒരുമിച്ചാണ് ഇത്തരം തടസ്സങ്ങളെയൊക്കെ നേരിട്ടത്, ഒരൊറ്റ ലക്ഷ്യമേ ഏവരുടെയും മുന്നിൽ ഉണ്ടായിരുന്നുള്ളൂ വിജയകരമായി നടക്കുന്ന ലോകകപ്പ്. നവംബർ 20നു ഉദ്‌ഘാടന ചടങ്ങ് അവസാനിക്കുമ്പോൾ ലോകകപ്പ് നടത്തിപ്പിനായി രൂപീകരിക്കപ്പെട്ട സുപ്രീം കമ്മിറ്റിയുടെ സെക്രട്ടറി ഹസ്സൻ അൽ തവാദിയുടെ മുഖത്ത് വിരിഞ്ഞ പുഞ്ചിരി സത്യത്തിൽ ഖത്തറിൽ ജിവിക്കുന്ന ഓരോ മനുഷ്യന്റെയും മുഖത്ത് വിരിഞ്ഞ പുഞ്ചിരിയാണ്. ഓരോ പ്രവാസി തൊഴിലാളിയുടെയും മുഖത്ത് വിരിഞ്ഞ പുഞ്ചിരിയാണ്, കാരണം കഴിഞ്ഞ ഏതാനും വർഷങ്ങളായുള്ള അവന്റെ കൂടി അധ്വാനത്തിന്റെ ഫലമായിരുന്നു ആ ഉദ്‌ഘാടന ചടങ്ങ്. ഖത്തറിന്റെ സന്തോഷത്തിൽ അവൻ ഒപ്പം സന്തോഷിച്ചിട്ടുണ്ട് അത് നിങ്ങളിൽ ചിലർ ബ്രാൻഡ്‌ ചെയ്യുന്നത് പോലെ രാജാധിപത്യത്തോടുള്ള അടിമത്തമോ, അന്നം തരുന്ന രാജ്യത്തോടുള്ള സ്‌നേഹം കൊണ്ടോ ഏതെങ്കിലും മതത്തോടുള്ള പ്രത്യെക കൂറോ കൊണ്ടല്ല ( ഖത്തറിലെ ഇന്ത്യൻ സമൂഹത്തിൽ നല്ലൊരു ശതമാനം ഹിന്ദുക്കളും ക്രിസ്ത്യൻസും ഒക്കെയാണ് കേട്ടോ) അത് അവന്റെ കൂടി അദ്ധ്വാന ഫലം ആകാശം മുട്ടെ ഉയർന്നു നിൽക്കുന്നത് കാണുന്നതിന്റെ സന്തോഷമാണ്. ഉയർന്നു നിൽക്കുന്ന ഓരോ സ്റ്റേഡിയത്തിനു പിന്നിലും മലയാളി ഉൾപ്പെടെ ഉള്ളവരുടെ അധ്വാനമുണ്ട്. റോഡും ബ്രിഡ്ജും ഹോട്ടലുകളും ഓഫീസുകളും ആശുപത്രികളും മെട്രോയും ബസ്സുകളും എയർപോർട്ടും വ്യാപാര സ്ഥാപനങ്ങളും ഒക്കെ ലോകമെങ്ങുമുള്ള രാജ്യങ്ങളിൽ നിന്നായി ഒഴുകിയെത്തിയ 15 ലക്ഷം സന്ദർശകരെ സ്വീകരിക്കാനായി അവരെ ആഹ്ലാദത്തിൽ ആറാടിക്കാനായി ഒരുങ്ങിയതിൽ അവന്റെ വിയർപ്പുമുണ്ടായിരുന്നു

വര്ഷങ്ങളായി ഖത്തറിലുള്ള, ഉണ്ടായിരുന്ന ഓരോ മനുഷ്യന്റെയും സംശയങ്ങൾക്കുള്ള മറുപടി കൂടിയാണ് നവംബർ 20 മുതൽ കണ്ടു തുടങ്ങിയത്. ഇത്രയധികം സന്ദർശകർ വന്നിട്ടും ഈ കൊച്ചു രാജ്യത്തു ഒരു ട്രാഫിക് ബ്ലോക്കും അനുഭവപ്പെട്ടില്ല എന്നതാണ് അവനുണ്ടായ ആദ്യത്തെ അത്ഭുതം. ഓഫിസിലെ ഒരു ലെബനീസ് സുഹൃത്തു മത്സരങ്ങൾ തുടങ്ങി ആദ്യ ദിനങ്ങളിൽ എന്നോട് ചോദിച്ചത് ” എവിടെ? ഈ പതിനഞ്ചു ലക്ഷം പേർ എവിടെ? ” എന്നാണു. ഞാൻ അയാളോട് അവരെല്ലാം ഭൂമിക്കടിയിലുണ്ട് എന്ന് മറുപടി പറഞ്ഞു. ഭൂമിക്കടിയിലൂടെ ഈ ദിനങ്ങളിൽ ഖത്തറിലെ നാഡീ ഞരമ്പുകളായി മാറിയ മെട്രോയിലൂടെ അവർ നഗരത്തിന്റെ സ്വാഭാവിക ജീവിതത്തിനു യാതൊരു വിഘാതവും വരുത്താതെ സഞ്ചരിച്ചു കൊണ്ടേയിരിക്കുകയാണ്‌. ഈ ദിനങ്ങളിൽ ഖത്തറിലെ മെട്രോ സ്റ്റേഷനുകളിൽ ലോക സാംസ്‌കാരിക സമ്മേളനങ്ങൾ നടക്കുകയായിരുന്നു. ലോകത്തിന്റെ വിവിധ ഭാഗങ്ങളിൽ നിന്നെത്തിയ മനുഷ്യർ, ലിംഗഭേദവും നിറഭേദവും രാജ്യ ഭേദവും മതഭേദവും ഇല്ലാതെ ഒന്നിച്ചൊന്നായി ആടിയും പാടിയും ഒഴുകുകയായിരുന്നു

അവരെ നിങ്ങൾക്ക് സ്റ്റേഡിയത്തിനു സമീപം കാണാം, സൂക്ക് വാഖിഫിൽ കാണാം, ഫാൻ ഫെസ്ടിവലുകളിൽ കാണാം മെട്രോ സ്റ്റേഷനുകളിലും ബസ്സുകളിലും ബീച്ചുകളിലും റസ്റോറന്റുകളിലും ഷോപ്പിംഗ് മാളുകളിലും കാണാം. അവർ കൂട്ടം കൂട്ടമായി ഒഴുകിയെത്തും. തവിട്ടു നിറമുള്ളവർ, കറുത്ത നിറമുള്ളവർ, വെളുത്ത നിറമുള്ളവർ, മഞ്ഞ നിറമുള്ളവർ, പൊക്കം കൂടിയവർ, പൊക്കം കുറഞ്ഞവർ, മൂക്ക് ചപ്പിയവർ, മൂക്ക് നീണ്ടവർ, ചെറിയ കണ്ണുകളുള്ളവർ, വലിയ വിടർന്ന കണ്ണുകളുള്ളവർ, നീല കണ്ണുകളുള്ളവർ അങ്ങിനെയങ്ങിനെ ലോകത്തിന്റെ നാനാഭാഗത്തുമുള്ള വ്യത്യസ്‍ത തരം മനുഷ്യർ വ്യത്യസ്‌ത സംസ്കാരം പിന്തുടരുന്നവർ വ്യത്യസ്‌ത ഭക്ഷണം കഴിക്കുന്നവർ, ഉറക്കെ സംസാരിക്കുന്നവർ, പതിയെ സംസാരിക്കുന്നവർ, അപരിചിതരോട് അടുത്ത സുഹ്രുത്തുക്കളെ പോലെ മിണ്ടുന്നവർ, ഒന്നും മിണ്ടാത്തവർ, സന്തോഷം വന്നാൽ നൃത്തം ചെയ്യുന്നവർ, സങ്കടം വന്നാൽ നൃത്തം ചെയ്യുന്നവർ, വഴിയരുകിൽ വെച്ച് കെട്ടി പിടിക്കുന്നവർ, പ്രണയ പരവശർ ആകുന്നവർ, തൻറെ രാജ്യം തോറ്റാൽ വഴിയിലൂടെ നടന്നു കരയുന്നവർ, ജയിച്ചാൽ സന്തോഷം കൊണ്ട് ഇരിപ്പുറയ്ക്കാത്തവർ അങ്ങനെ ലോകത്തിന്റെ ഒരു പരിച്ഛേദം തന്നെ ഈ ദിനങ്ങളിൽ ഖത്തറിൽ എത്തിയിരുന്നു. അതിമനോഹരമായ സ്റേഡിയങ്ങളിലിരുന്നു,മനോഹരമായ കളികൾ കണ്ടു, ഖത്തറിന്റെ ആതിഥേയത്വം സ്വീകരിച്ചു, സംഗീത നൃത്ത നിശകളിൽ പങ്കെടുത്തു മനസ്സു നിറഞ്ഞാണ് ഓരോ ഫുട്‌ബോൾ ഫാനിന്റേയും മടക്ക യാത്ര. മുഴുവൻ സന്ദർശകർക്കും ഫോൺ സിം കാർഡും ലോക്കൽ കോളുകളും സൗജന്യമായിരുന്നു, ബസ്സ്‌, മെട്രോ യാത്രകൾ സൗജന്യമായിരുന്നു. ഖത്തറിനെ പോലെ എണ്ണപ്പണമുള്ള ഒരു രാജ്യത്തിനു മാത്രം ചെയ്യാനാകുന്ന ഒന്ന്

കളി കഴിഞ്ഞു എഡ്യൂക്കേഷൻ സിറ്റി സ്റ്റേഡിയത്തിനു സമീപത്തു കൂടി കാർ പാർക്കിലേക്ക് പോകാനായി ട്രാമിൽ കയറാനായി നടക്കുകയായിരുന്നു ഞാൻ. അതാ അവിടെ ഒരു ചെറിയ സ്റ്റേജിൽ എന്തോ നൃത്തം നടക്കുന്നു, ചുറ്റും കുറച്ചാളുകളും കൂടിയിട്ടുണ്ട്. ഞാനും പയ്യെ ആൾക്കൂട്ടത്തിലേക്ക് കയറി. മനോഹരമായ വെസ്റ്റേൺ ഡാൻസ്, അൽപനേരം കഴിഞ്ഞാണ് മനസ്സിലായത് നൃത്തം ചെയ്യുന്നവർക്കും പാട്ടുകാർക്കും ഒക്കെ എന്തൊക്കെയോ വ്യത്യാസങ്ങൾ. കൂടുതൽ അടുത്തേക്ക് നിന്നു. പാടുന്നതും ആടുന്നതും എല്ലാം ഭിന്ന ശേഷിക്കാരാണ്. ബാൻഡിന്റെ പേര് No limits. അവരുടെ അതിമനോഹരമായ ശരീര ചലനങ്ങൾ കണ്ടു ഒന്നും മിണ്ടാനാവാതെ നിൽക്കുമ്പോൾ മനസ്സിൽ അത്ഭുതവും ആവേശവും ജീവിതത്തോടുള്ള പ്രണയവും ഒക്കെ അതിരുകളില്ലാതെ ഒഴുകി

ഖത്തർ ലോകത്തോട് പറയുകയാണ് NO LIMITS

കവർ ഡിസൈൻ : വിത്സൺ ശാരദാ ആനന്ദ്

SPORTS

രണ്ട് വിജയങ്ങൾക്ക് അരികെ ലോക കപ്പ്

മുരളി മീങ്ങോത്ത് 10 months ago

ഖത്തർ ലോക കപ്പിൽ ഇന്ന് സെമിഫൈനൽ മത്സരങ്ങൾ ആരംഭിയ്ക്കുമ്പോൾ അഡിഡാസ് ഒരുക്കിയ ‘അൽ ഹി
ൽമ് ‘അഥവാ സ്വപ്നം എന്ന് അർത്ഥം വരുന്ന പന്തുകൾ ആണ് ഉപയോഗിക്കുന്നത്. രണ്ട് വിജയങ്ങൾ കൈ വരിക്കുന്ന ടീമിന് ലോക കപ്പ് സ്വന്തമാക്കാം.2018 ലെ വിജയിയായ ഫ്രാൻസും, റണ്ണേഴ്സ് ആയ ക്രോയേഷ്യയും സെമിയിലെത്തിയിട്ടുണ്ട് .രണ്ടും യൂറോപ്യൻ രാജ്യങ്ങൾ.ലാറ്റിൻ അമേരിക്കൻ രാജ്യമായ അർജെന്റിനയും , ആഫ്രിക്കൻ രാജ്യമായ മൊറൊക്കയും സെമിയിലെത്തിയിട്ടുണ്ട്.

ആരാധകരെ ദുഖത്തിലാഴ്ത്തിയ ക്വാർട്ടർ മത്സരങ്ങളാണ് അരങ്ങേറിയത്. മിഡ് ഫീൽഡ് നിയന്ത്രിക്കുന്ന ക്രോയേഷ്യയുടെ നായകൻ ലൂക്കാ മോഡ്രിച്ച് ബ്രസിൽ ടീമിനെ എക്സ്ട്രാ ടൈം വരെ ഗോളടിക്കാൻ വിട്ടില്ല. ഗോൾ കീപ്പറേയും കബളിപ്പിച്ച നെയ്മറിന്റെ ഗോൾ ഒടുവിൽ പിറന്നു. പക്ഷെ കൗണ്ടർ അറ്റാക്കിൽ പെട്കോവിച്ചിന്റെ ഗോൾ ബ്രസീൽ നിരയുടെ താളം തെറ്റിച്ചു. സമനിലയായ കളി ടൈ ബ്രേക്കറിലേക്ക് നീണ്ടു.റോഡ്രിഗോ, മാർക്വിഞ്ഞോസ് എന്നിവരുടെ പെനാൽറ്റി ഷോട്ടുകൾ ക്രോയേഷ്യൻ ഗോൾ കീപ്പർ ലിവാക്കോവിച്ച് തടഞ്ഞു. കാനാറികൾ കണ്ണീരോടെ മൈതാനം വിട്ടു. ആരാധകർക്ക് അവിശ്വസനീയമായിതോന്നി.

അർജെന്റിന ഹോളണ്ട് മൽസരത്തിൽ, ഡച്ച് പ്രതിരോധം തുളച്ച് മൊലിനോയ്ക്ക് മെസ്സി നൽകിയ പാസ് ഗോളായി. പിന്നീട് മെസ്സിയ്ക്ക് കിട്ടിയ പെനാൽറ്റിയും ഗോളായി. എന്നാൽ വെഗ് ഗോസ്റ്റിന്റെ രണ്ട് ഗോളുകൾ 2-2 ലേക്ക് കാര്യങ്ങൾ നീക്കി. പെനാൽറ്റി എടുത്തപ്പോൾ ഗോൾകീപ്പർ മാർട്ടിനെസ് രക്ഷകനായി 4-3 ന് അർജെന്റിന ജയിച്ചു. കളിയുടെ ഒടുവിൽ പരുക്കൻ കളിയായി മാറി. റഫറി സകലർക്കും മഞ്ഞക്കാർഡ് നൽകി.
റൊണാൾഡോയെ പുറത്തിരുത്തിയാണ് പോർച്ചുഗൽ ക്വാർട്ടറിൽ മൊറൊക്കോയ്ക്കെതിരെ പടയ്ക്കിറങ്ങിയത്.ഉയർന്നു ചാടി നെസിരി നേടിയ ഹെഡ്ഡർ ഗോളിലൂടെ മോറോക്ക ലീഡ് നേടി. ആ ലീഡ് അവർ പ്രതിരോധത്തിലൂടെ നില നിർത്തി. പോർച്ചുഗൽ അക്രമണങ്ങൾക്ക് മൂർച്ച കുറവായിരുന്നു. മോറോക്ക ഗോളി ബോനോ മികച്ചു നിന്നു. കളി കഴിഞ്ഞ് വേദനയോടെ പുറത്തിറങ്ങിയ റോണോ യുടെ ശരീര ഭാഷ ആരാധകർക്ക് വേദനയായി. പോർച്ചുഗൽ താരം ഫിഗോ തന്നെ പറഞ്ഞു,’ റൊണാൾഡോയെ പുറത്തിറക്കി നിങ്ങൾക്ക് വേൾഡ് കപ്പ് ജയിക്കാൻ കഴിയില്ല.’

ഇംഗ്ലണ്ട്- ഫ്രാൻസ് ക്വാർട്ടർ ഫൈനലിന് മുമ്പുള്ള ഫൈനൽ പോലെ, ആവേശകരമായിരുന്നു. സുന്ദര പാസുകൾ. ഗ്രീസ്മാന്റെ പാസിൽ ചൗമേനി ഫ്രാൻസിന് ലീഡ് നൽകി. ജിറൂഡിന്റെ വക രണ്ടാം ഗോൾ.ഇംഗ്ലണ്ട് നായകൻ ഹാരി കെയ്ൻ പെനാൽറ്റിയിലൂടെ 2-1 ആക്കി. പക്ഷെ തുടർന്ന് ലഭിച്ച പെനാൽറ്റി ഹാരി ബാറിനു പുറത്തേക്ക് അടിച്ചത് ടീമിന് പുറത്തേക്കുള്ള വഴിയായി. ഹാരി പെയിൻ ആയി അത്‌.
അർജന്റീന ക്രോയേഷ്യയെയും ഫ്രാൻസ് മൊറൊക്കോയെയും സെമിയിൽ നേരിടുമ്പോൾ ജയം ആർക്കുമാകാം. മെസ്സിയുടെ അവസാന ലോക കപ്പിൽ കപ്പുയർത്തുന്നത് അർജെന്റിനയുടെ ആരാധകർ കാത്തിരിക്കുകയാണ്. ഫ്രാൻസിന്റ തുടർച്ചയായ രണ്ടാം ജയവും കാത്തിരിക്കുന്നു ഫ്രാൻസ് ആരാധകർ.എംബാപ്പേ മിന്നും ഫോമിലാണ്. ക്രോയേഷ്യയോ മൊറൊക്കോയോ ജയിച്ചാൽ അതും ചരിത്രമാകും.

കവർ : നിയ മെതിലാജ്

SPORTS

കൈലിയൻ എംബാപ്പെ എന്ന അസാധാരണമായ വേഗത

ഫൈസൽ ബാവ 10 months ago

ആരൊരാളെൻ കുതിരയെ കെട്ടുവാൻ
ആരൊരാളതിൻ മാർഗ്ഗം മുടക്കുവാൻ?
:- വയലാർ

ഈ ലോകകപ്പിൽ പുതുതലമുറ ചുവടുറപ്പിക്കുകയാണ്.ഇതുവരെ ഉണ്ടായിരുന്ന ഇതിഹാസങ്ങളൊക്കെ ഏതാണ്ട് ഇത്തവണത്തോടെ ഇറങ്ങി തീരുമ്പോൾ ലോകകപ്പിന്റെ അടുത്ത വരവിനുള്ള ആരവം ഒരുക്കാൻ ഒരു പുതുനിര വരവറിയിച്ചു കഴിഞ്ഞു. കഴിഞ്ഞ ലോകകപ്പിൽ തന്നെ താരമായ കൈലിയൻ എംബാപ്പെ ആണ് അതിൽ ഒന്നാം നിരയിൽ. ഫ്രാൻസിന്റെ അശ്വവേഗം. ഈ അശ്വത്തെ അത്രപെട്ടെന്നൊന്നും തടയാൻ ആർക്കുമാകില്ല.ഈ കളം തനിക്ക് പോരാ എന്ന രീതിയിലാണ് ആ കുതിപ്പ്. ആ അത്ഭുത പാദുകത്തിൽ നിന്നും തൊടുത്തുവിടുന്ന ശരങ്ങൾ മൂർച്ചയുള്ളതാണ് . ലക്ഷ്യത്തിലേക്ക് കുതിക്കുന്ന പന്തുകൾ എതിരാളികളെ ഭയപ്പെടുത്തുന്നു. ഓരോ കുതിപ്പും എതിരാളികൾ അത്ഭുതത്തോടെ നോക്കിനിൽക്കേണ്ടി വരുന്നു. പതിനെട്ടാം വയസ്സിൽ തുടങ്ങിയ ഈ കുതിപ്പ് തന്റെ രണ്ടാം ലോകകപ്പിലും തുടരുന്നു. ഒപ്പം ഗോൾ വേട്ടയും. ഇതുവരെ എല്ലാവരേക്കാളും മുമ്പിൽ തന്നെ.

ഏറെകാലമായി യൂറോപ്പിനെ ചുറ്റിപ്പറ്റി നിന്നിരുന്ന ഒരു ദുരന്തമാണ് എംബാപ്പയിലൂടെ പിഴുതെറിയപ്പെട്ടത്. ഇറ്റലിക്ക് ശേഷം ആരും തുടർച്ചയായി ലോകകപ്പ് എടുത്തിട്ടില്ല എന്നത് മാത്രമല്ല 1990ന് ശേഷം ലോകകപ്പ് എടുത്ത ചാമ്പ്യന്മാർ അടുത്ത ലോകകപ്പിൽ ആദ്യ റൗണ്ടിൽ പുറത്താവുന്നു എന്നതാണ് കുറച്ചുകാലായി നാം കേട്ടുവരുന്നത് . ഫ്രാൻസിന്റെ തന്നെ ചരിത്രം പരിശോധിച്ചാൽ നമുക്കത് കാണാം. 1990ലും 1994ലും ലോകകപ്പിൽ യോഗ്യത പോലും കിട്ടാതെ പോയ ഫ്രാൻസാണ് 1998ൽ സിനദിൻ സിദാന്റെ നേതൃത്വത്തിൽ ലോകകപ്പിൽ ആദ്യമായി മുത്തമിട്ടത്. 1986ൽ മെക്സിക്കോ ലോകകപ്പിൽ മൂന്നാം സ്ഥാനം ലഭിച്ചതാണ് അതുവരെ എത്തപ്പെട്ട ഏറ്റവും ഉയർന്ന സ്ഥാനം, മിഷേൽ പ്ലേറ്റിനിയുടെ സ്വപ്നത്തെയാണ് സിദാൻ യാഥാർഥ്യമാക്കി കൊടുത്തത് . എന്നാൽ ചാമ്പ്യന്മാരായി വന്ന് 2002 ൽ ആദ്യ റൗണ്ടിൽ തന്നെ പുറത്തേക്ക് പോകേണ്ടി വന്നു. 2006 ൽ റണ്ണറപ്പ് ആകുന്നു, 2010 ൽ വീണ്ടും ആദ്യറൗണ്ടിൽ അതിവേഗത്തിൽ പുറത്തുപോകുന്നു. 2014ൽ ക്വർട്ടറിൽ ജർമനിയോട് അടിയറവ് പറയുന്നു. പിന്നെയതാ 2018ൽ എംബാപ്പെയുടെ അശ്വവേഗത്തിലൂടെ വീണ്ടും ഫൈനലിൽ എത്തുന്നു. സിദാന്റെ പിൻഗാമി എംബാപ്പെയുടെ അതിവേഗത്തിന് മുന്നിൽ ലൂക്കാ മോൺട്രിച്ചിന്റെ സ്വപ്നങ്ങൾ തകരുന്നു. ആദ്യമായി ഫൈനൽ കണ്ട കറുത്ത കുതിരകൾ എന്ന് വിശേഷിപ്പിച്ച ക്രൊയേഷ്യ പിടഞ്ഞു വീഴുന്നു. ആ ലോകകപ്പിലാണ് എംബാപ്പെ എന്ന താരം ജനിക്കുന്നത്. ചാമ്പ്യന്മാർ അടുത്ത ലോകകപ്പിൽ ആദ്യറാണ്ടിൽ വീഴും എന്ന യൂറോപ്പിന്റെ തലയിലെഴുത്താണ് ഇപ്പോൾ മാറിമറിയുന്നത്. ഇതിനകം എംബാപ്പെയുടെ വരവോടെ ആർക്കും തടുക്കാനാവാത്ത ശക്തിയെന്നപോലെ മുന്നേറുന്നത്.

ഈ ലോകകപ്പോടെ ലയണൽ മെസ്സി ക്രിസ്ത്യാനോ റൊണാൾഡോ, നെയ്മർ, സുവാരസ്, തുടങ്ങിയ ഇതിഹാസ താരങ്ങൾക്ക് യാത്രയപ്പ് ആയേക്കും .എന്നാൽ ഇത്തവണ വലിയൊരു യുവനിര എല്ലാ ടീമിലും ഉണ്ടായി വരുന്നു എന്നത് ഒരു ആശ്വാസമാണ്. ഈ ടൂർണമെന്റിന്റെ താരം എംബാപ്പെ തന്നെ. വേഗതകൊണ്ട് വിസ്മയിപ്പിക്കുന്നു ഈ ഫ്രഞ്ച് താരം. എംബാപ്പെയുടെ കാലുകളിൽ പന്ത് എത്തുമ്പോൾ എതിർടീമിന്റെ ഉള്ള് പിടക്കുന്നുണ്ടാകും. ആരാണീ കുതിരയെ കെട്ടുക എന്ന് ഗ്യാലറികളിൽ നിന്നും ചോദ്യങ്ങൾ ആർപ്പുവിളികളായി വരുമ്പോൾ വർദ്ധിത വീര്യത്തോടെ ഈ ചെറുപ്പക്കാരൻ കുതിക്കുന്നു “തിയറി ഹെൻറിയുമായി സാമ്യമുള്ള ഒരു വലിയ ഫുട്ബോൾ പ്രതിഭ” എന്നാണ് മുൻ ഫ്രഞ്ച് താരവും ഫുട്ബോൾ മാനേജരുമായിരുന്ന ആർസെൻ വെംഗർ (Arsène Wenger) എംബാപ്പെയെ വിശേഷിപ്പിച്ചത്.
ഒരു ബഹുമുഖ മുന്നേറ്റക്കാരനാണ് എംബാപ്പെ. ഒരു വിംഗറായി കളിക്കുകയും, എതിർടീമിന്റെ പോസ്റ്റിലേക്ക് അവസരം കിട്ടുമ്പോഴൊക്കെ അതി ശക്തമായ ഷോട്ടുകൾ പായിക്കുകയും ചെയ്യുന്നു. രണ്ട് കാലുകൾകൊണ്ട് ഒരേ വേഗത്തിൽ ഷോട്ടുകൾ പായിപ്പിക്കാനുള്ള അപാര ശേഷി പ്രതിരോധക്കാരെ വട്ടം കറക്കുന്നു. ഗോൾകീപ്പർക്ക് ഭീഷണി ഉയർത്തുന്നു. ഇടത് വിംഗിൽ നിന്ന് വലതുകാലിലേക്ക് പന്ത് മാറ്റി മധ്യഭാഗത്തേക്ക് കുതിക്കാനും അസാമാന്യ ശക്തിയിൽ ഷോട്ട് പായിക്കാനും അദ്ദേഹത്തിന് കഴിയുന്നു. ലക്ഷ്യത്തിലേക്കുള്ള വേഗതയും, കൃത്യമായ ഫിനിഷിങ്ങും അദ്ദേഹത്തിന്റെ ഗുണകരമായ നീക്കങ്ങളാണ്. അതുപോലെ മനോഹരമായി, വേഗത്തിൽ ഡ്രിബ്ലിംഗ് ചെയ്യുമ്പോൾ ബോൾ കൺട്രോളിങ്ങും, തന്ത്രപരമായ ബുദ്ധിയും, ഷോട്ടിന്റെ വേഗതയും സൂക്ഷ്മതയും എല്ലാം അയാളിലെ സമർത്ഥനായ കളിക്കാരനെ വരച്ചുകാട്ടുന്നു. ഒപ്പം എതിർടീമിന്റെ പേടിസ്വപ്നമായി മാറുന്നു.
“പ്രതിരോധത്തിൽ വിള്ളൽ വീഴ്ത്തി അവരെ കബളിപ്പിച്ചു ഓടാനുള്ള എംബാപ്പെയുടെ കഴിവ് 1996 ഒളിമ്പിക്‌സിലെ
റൊണാൾഡോയെ ഓർമ്മിപ്പിച്ചുവെന്നും, എംബാപ്പെക്ക് ഒരു ലോകോത്തര കളിക്കാരന്റെ
എല്ലാ പ്രത്യേകതകളും ഉണ്ടെന്നും” ഫ്രാൻസ് കഴിഞ്ഞ തവണ
ലോകകപ്പ് നേടുന്നതിന് മുമ്പ് തന്നെ ഫ്രഞ്ച്താരം നിക്കോളാസ് അനെൽക്ക അഭിപ്രായപ്പെട്ടിരുന്നു.

വലിയ പ്രതിസന്ധികളിൽ നിന്നാണ് എംബാപ്പെ ഈ ലോകകപ്പിലേക്ക് എത്തുന്നത്. 2021 യൂറോയിൽ
സ്വിറ്റ്‌സർലൻഡിനെതിരായ അവസാന 16 ഷൂട്ടൗട്ട് തോൽവിയിൽ നിർണ്ണായക പെനാൽറ്റി നഷ്‌ടമായതിന്
ശേഷം ലെസ് ബ്ലൂസിനായി ഒരു ഗോൾ പോലും സ്‌കോർ ചെയ്യാത്തതിന് ഏറെ പഴികേൾക്കേണ്ടി വന്നു.
“ഇനി 23-കാരന് സ്വയം വീണ്ടെടുക്കേണ്ടി വരും, 2018-ൽ ചെയ്‌തതുപോലെ ഈ ലോകകപ്പിൽ ശ്രമിക്കണം കളിക്കണം”
ഫ്രഞ്ച് ഫുട്‌ബോൾ ജേർണലിസ്റ്റ് ജൂലിയൻ ലോറൻസിന്റെ വാക്കുകളാണ്. അദ്ദേഹത്തിന്റെ ആശങ്കക്കുള്ള മറുപടിയായിരുന്നു എംബാപ്പെയുടെ പ്രകടനങ്ങൾ.
കബിലിയയിൽ നിന്നുള്ള അൾജീരിയക്കാരി ഫയ്‌സ ലാമാരിയുടെ പ്രിയ പുത്രന്റെ ഫുട്‌ബോൾ പ്രണയം അമ്മയുടെ
ജീവിതവുമായി ബന്ധപെട്ടു കിടക്കുന്നു. 23 കാരന്റെ ശക്തമായ നിലയിൽ അമ്മയുടെ നിലപാടുകൾക്ക് ഏറെ സ്വാധീനമുണ്ട്. എംബാപ്പെ കളിയിലൂടെ
കൂടുതൽ ഉയർച്ച ലക്ഷ്യം വെച്ചപ്പോൾ, അമ്മ അതിലുംകൂടിയ ഉയരങ്ങൾ ലക്ഷ്യമാക്കി. ഒപ്പം അവൻ തന്റെ വേരുകൾ മറക്കുന്നില്ലെന്ന്
അവർ ഉറപ്പുവരുത്തുകയും ചെയ്തു. ഉദാരമതിയായ അവർ തന്റെ മകന്റെ നിറത്തിൽ അഭിമാനം കൊണ്ടു.
ആ അൾജീരിയൻ സ്ത്രീ തന്റെ എല്ലാ ബോണസുകളും ഒരു ചാരിറ്റി പ്രോജക്റ്റിലേക്ക് മാറ്റാൻ നിർദ്ദേശിച്ചു. അവർ അസാധാരണമായ
ധാർമ്മികതയുള്ള ആളുകളാണെന്ന് അനുദിനം തെളിയിക്കപ്പെട്ടുകൊണ്ടിരിക്കുന്നു. തന്നെ ഇന്നത്തെ
നിലയിലാക്കിയ അമ്മയോട് അനുസരണയും നന്ദിയുമുള്ള മകനായി പുൽത്തകിടിയിൽ കൂടുതൽ വേഗത്തിൽ
ലക്‌ഷ്യം കണ്ടു തുടങ്ങി.” ആരൊരാളെൻ കുതിരയെ കെട്ടുവാൻ ആരൊരാളതിൻ മാർഗ്ഗം മുടക്കുവാൻ?”

SPORTS

എട്ടിൽ തൊട്ടവരും എട്ടിന്റെ പണി കിട്ടിയവരും

ഫൈസൽ ബാവ 10 months ago

ലോകകപ്പ് ചിത്രം ഏതാണ്ട് വന്നു കഴിഞ്ഞു. തുടക്കത്തിലേ അട്ടിമറികളൊക്കെ കഴിഞ്ഞു പതിവുപോലെ യൂറോപ്പ്- ലാറ്റിൻ അമേരിക്ക പോരിലേക്ക് ചുരുങ്ങി. ആഫ്രിക്കൻ കരുത്ത് അറിയിച്ച് മൊറോക്കോ മാത്രമാണ് അതിൽ വേറിട്ട് നിൽക്കുന്നത് . അവസാന എട്ടിൽ തൊട്ടവരിൽ അഞ്ചു ടീമുകളും മുമ്പ് ലോകകപ്പ് തൊട്ടവർ തന്നെ. 5 യൂറോപ്യൻ ടീമുകൾ, 2 ലാറ്റിൻ അമേരിക്കൻ ടീമുകൾ, ഒരു ആഫ്രിക്കൻ ടീമും. അവസാന എട്ടിൽ ഏഷ്യൻ കോൺ കാഫ് ടീമുകളില്ല. ഇതിൽ 4 ടീമുകൾ മുമ്പു ചാമ്പ്യന്മാരായവരാണ്. ക്രോയേഷ്യ, നെതർലാൻഡ് ഫൈനൽ കണ്ടവർ, സെമി വരെയെത്തിയ പോർച്ചുഗൽ, ആദ്യമായി ക്വാർട്ടറിൽ എത്തുന്ന മൊറോക്കോ. ഈ എട്ടിലെ മറ്റൊരു കൗതുകം ഒരു കളിയും തോൽക്കാതെ വന്നവരും ഓരോ കളി തോറ്റവരും തമ്മിലാണ് മത്സരിക്കുക എന്നതാണ്.

മൂന്നാം റാങ്കുകാരായ അർജന്റീന അമ്പത്തിമൂന്നാം റാങ്കുകാരായ സൗദിയോട് രണ്ട്- ഒന്നിന് ഞെട്ടിക്കുന്ന തോൽവിയോടെയാണ് തുടക്കം കുറിച്ചത് എങ്കിൽ തോൽവിയറിയാതെയാണ്, വാൻഡെക് നയിക്കുന്ന ഓറഞ്ചു പട നെതർലാൻഡ് അവസാന എട്ടിൽ എത്തിയത്. പ്രീ ക്വാർട്ടറിൽ അമേരിക്കയെ മൂന്ന് -ഒന്നിന് തോൽപ്പിച്ചാണ് ഓറഞ്ചുപട എത്തിയത്ത് എങ്കിൽ ആസ്ത്രേലിയയെയാണ് അർജൻറ്റീന നേരിട്ടത്. ആൻഡ്രൂ റെഡ്മെയൻ എന്ന സമർത്ഥനായ ഗോൾ കീപ്പറുടെ ചിറകിലേറിയാണ് ആസ്‌ത്രേലിയ ലോകകപ്പിൽ എത്തിയത്. പിന്നെ മാത്യു ലെക്കിയുടെ മികച്ച പ്രകടനത്തിൽ പ്രീ ക്വാർട്ടറിൽ എത്തി. ഗ്രഹാം അർനോൾഡ് എന്ന ഓസ്ട്രേലിയൻ പരിശീലകന്റെ തന്ത്രങ്ങളിൽ അവർ കളിച്ചു. എന്നാൽ അർജന്റീന ആദ്യ തോൽവിയുടെ പഴിയും ട്രോളും ഏറ്റുവാങ്ങിയതിനാൽ ജയം അനിവാര്യമാണെന്ന് മെസ്സി തന്നെ തിരിച്ചറിഞ്ഞതോടെ മെസ്സിയിലെ നായകൻ ഉണർന്നു. മെസ്സിയുടെ തന്ത്രങ്ങൾക്ക് മുന്നിൽ ആസ്‌ത്രേലിയക്ക് പിടിച്ചു നില്ക്കാനായില്ല. മെസ്സിയുടെ ഗോളോടെ ആരവം ഉയർന്നു.

ഗോൾകീപ്പർ മാർട്ടിനെസിന്റെ കൈകളിലേക്ക് കുരുങ്ങേണ്ട പന്ത്ഫെർണാണ്ടസിന്റെ തലയിൽ തട്ടി സ്വന്തം ഗോൾപോസ്റ്റിലേക്ക് പതിച്ചത് പ്രഹരമായി എങ്കിലും രണ്ട് -ഒന്നിന് അർജന്റീന എട്ടിൽ എത്തി. ഇനി മെസ്സിയുടെ പടയും വാൻഡിക്കിന്റെ ഓറഞ്ചു പടയും നേർക്കുനേർ. സെമിയിലേക്ക് കുതിക്കാനുള്ള മുന്നൊരുക്കത്തിന് ആരെന്നതേ ഇനി ബാക്കിയുള്ളൂ.

ലോക ഒന്നാം നമ്പറും ഏറ്റവും അധികം ലോക കപ്പ് നേടിയ ടീമുമായി ബ്രസീൽ അവസാന എട്ടിൽ നേരിടുന്നത് കഴിഞ്ഞ തവണത്തെ റണ്ണർ അപ്പ് ആയ ക്രോയേഷ്യയെയാണ്. മോൺഡ്രിച്ചിന്റെ പടയെ സിൽവയുടെ പട നേരിടുമ്പോൾ തോറ്റവരും തോൽക്കാതെ എത്തിയവരും തമ്മിലാണ് കളി. രണ്ടു കളിയിൽ മികച്ച വിജയം നേടി കാമറൂണിന്റെ വില്യം അബോക്കറിന്റെ വേഗതയ്ക്ക് മുന്നിൽ ബ്രസീൽ വീണിരുന്നു. പക്ഷെ ഫീനിക്സ് പക്ഷിയെപ്പോലെ അവർ ഉയർത്തെഴുന്നേറ്റ്, ഏഷ്യൻ ശക്തിയായ കറുത്ത കുതിരയാകുമോ എന്ന് സംശയിച്ച കൊറിയയെ നിഷ്‌പ്രഭരാക്കിയാണ് എട്ടിലേക്കുള്ള വരവ് അറിയിച്ചത് ഏതു പൊസിഷനിലും മികച്ച യുവതാരങ്ങൾ ഉള്ള ബ്രസീൽ- ക്രോയേഷ്യ മത്സരം തീ പാറും. ഏഷ്യൻ പ്രതീക്ഷയായിരുന്ന ജപ്പാനെ ഷൂട്ടൗട്ടിൽ പരാജയപ്പെടുത്തിയാണ് റണ്ണറപ്പായ ക്രൊയേഷ്യ വരുന്നതും. മത്സരത്തിന്റെ ചൂട് കൂടും എന്നത് ഉറപ്പാണ്.

തോൽക്കാതെ വന്ന മറ്റൊരു യൂറോപ്യൻ ടീമാണ് ഇംഗ്ലണ്ട്. ഈ ലോകകപ്പിലെ അരങ്ങേറ്റം തന്നെ ഇറാനെ അഞ്ചുഗോളുകൾക്ക് തോൽപ്പിച്ചു കൊണ്ടാണ്. പിന്നെ സമനില വരെ എത്തി എങ്കിലും തോൽവി അറിഞ്ഞില്ല. പ്രീ ക്വാർട്ടറിൽ ആഫ്രിക്കൻ പ്രതീക്ഷയായിരുന്ന സെനഗലിനെ മറുപടിയില്ലാത്ത മൂന്നു ഗോളുകൾക്ക് തറപറ്റിച്ചാണ് ഹരിക്കെയ്‌നും സംഘവും അവസാന എട്ടിൽ എത്തിയത്.

പ്രതിരോധത്തിലൂന്നി കളിച്ചു, ഗോളടിക്കാൻ മറന്നു പോകുന്ന പോളണ്ടിനെതിരെയാണു എമ്പാപ്പെയുടെ കുതിപ്പിൽ ഏറെ മുന്നിലുള്ള ഫ്രാൻസിന്റെ പടയോട്ടം. ജയിച്ചിട്ടും സൗദി അടിച്ച ഒരൊറ്റ ഗോളിന്റെ സൗകര്യത്തിൽ എത്തിയ പോളണ്ടിനെ ഒന്നിനെതിരെ മൂന്നു ഗോളുകൾ കൊടുത്താണ് ഫ്രാൻസ്,ഫൈനലിലേക്കുള്ള വഴി വെട്ടികൊണ്ടിരിക്കുന്നത്. ഇംഗ്ലണ്ടും ഫ്രാൻസും ഏറ്റുമുട്ടുമ്പോൾ ഈ ലോകകപ്പിലെ ഏറ്റവും മികച്ച മാച്ചുകളിൽ ഒന്നാകും അത്.
ഈ ലോകകപ്പിലെ യഥാർത്ഥ അട്ടിമറിയിൽ നിന്നും അവസാന എട്ടിൽ ബാക്കിയായ ആഫ്രിക്കൻ ടീമായ മൊറോക്കോ തോൽവി അറിയാതെ ഗ്രൂപ്പ് ചാമ്പ്യൻ മാരായി വന്ന്, പ്രീ ക്വാർട്ടറിൽ എത്തി ലോക ചാമ്പ്യന്മാരായ സ്പെയിനിന്റെ ഗോളടിയാത്ര തടഞ്ഞു. കുറിയ പാസുകൾ ഇട്ട് എതിർ ടീമിന്റെ ഗോൾപോസ്റ്റിലേക്ക് ഗോളടിച്ചു വീറോടെ വന്ന സ്‌പെയിൻ പക്ഷെ ആദ്യ റൗണ്ടിൽ തോൽവി അറിഞ്ഞു.ഗാവിയും പെഡ്രെയും ഒക്കെ നിറഞ്ഞാടിയ മത്സരങ്ങൾക്ക് പ്രീ ക്വാർട്ടറിൽ പെനാൽറ്റി ഇത്തവണയും സ്പെയിനിന് കടമ്പയായി. ഇത് നാലാം തവണയാണ് ലോകകപ്പിൽ ഷൂട്ടൗട്ടിലൂടെ പുറത്തുപോകുന്നത്. ഹക്കീമിയുടെ പട വിജയം ആഘോഷിക്കുമ്പോൾ ഗാലറിയിൽ ഉമ്മ ആവേശത്തോടെ ഹക്കീമിയെ പുണരുന്ന കാഴ്ച നാം കണ്ടു.ചരിത്രപരമായ മറ്റൊരു കാഴ്ച്ച ലോക രണ്ടാംനമ്പർ ടീമായ ബെൽജിയത്തെ ഗ്രൂപ്പ് മത്സരത്തിൽ മൊറോക്കോ തോല്പിച്ചപ്പോഴാണ് നാം കണ്ടത്. ബെൽജിയത്തിൽ വീട്ടുജോലിക്കാരിയായി ജോലിചെയ്ത ഉമ്മയുടെ മകനാണ് അന്ന് ബെൽജിയത്തെ ലോക കപ്പിൽ തോല്പിച്ചത്. ഏറ്റവും മനോഹരമായ നിമിഷങ്ങളിൽ ഒന്നായിരുന്നു അത്. മൊറോക്കൻ ഗോൾകീപ്പർ യാസീൻ ബോണോയാണ് മൊറോക്കോയെ അവസാന എട്ടിലേക്ക് എത്തിച്ചത്.

പീറ്റർ ഹാൻകെയുദിന്റെ നോവൽ ടൈറ്റിൽ “പെനാൽറ്റി കിക്ക് കാത്തുനിൽക്കുന്ന ഗോളിയുടെ ഏകാന്തത “എന്നാണ്. എന്നാൽ അതിനു കടകവിരുദ്ധമായ രീതിയാണ് ബോണോയുടെത്. മുഴുവൻ സമയവും പുഞ്ചിരിയോടെ കളിയെ നേരിട്ട് ഒട്ടും സമ്മർദ്ദമില്ലാതെ പെനാൽറ്റിയിൽ നിന്ന്നേരിട്ട് ഗോൾ കിക്ക് എടുക്കുന്നവരെ സമ്മർദ്ദത്തിലാക്കുന്ന തരത്തിൽ ചുവടുകൾ വെച്ചുള്ള ആ പ്രകടനം ലോകം മുഴുവൻ കാണുന്നത് ഇതാ ഒരു ലോകഗോൾകീപ്പർ പിറക്കുന്നു എന്നാണ്.

ഗോളടി വീരന്മാരായ സ്‌പെയിൻ കളിയുടെ ഭൂരിഭാഗം സമയവും പന്ത് കയ്യിൽ വെച്ചിട്ടും, ഒരു പെനാൽറ്റിയിലൂടെ പോലും ബോണോയെ മറികടന്ന് വല ചലിപ്പിക്കാൻ മുൻ ലോക ചാമ്പ്യന്മാർക്ക് ആയില്ല ഇത്തവണ ടിക്കി ടാക്ക പാളിപ്പോയി. മൊറോക്കോയോട് നേർക്കുനേർ വരുന്നത്,സാക്ഷാൽ ക്രിസ്ത്യാനോ റൊണാൾഡോയുടെ പോർച്ചുഗൽ. അവസാന എട്ടിലേക്കുള്ള വരവറിയിച്ചത് ആഘോഷത്തോടെ ആയിരുന്നു. ഷക്കീരിയുടെ സ്വിസ്സ് പടയെ അരഡസൻ ഗോളുകൾ നൽകി പറഞ്ഞയച്ചു. അതും നിർണ്ണായക മത്സരത്തിൽ റൊണാൾഡോയെ ബെഞ്ചിലിരുത്തി ടീമിനെ ഇറക്കാനുള്ള കോച്ച് ഫെർണാണ്ടോ സാൻ്റോസിൻ്റെ ധൈര്യം എന്തായാലും സമ്മതിക്കണം. എന്നാൽ ആ പരീക്ഷണം ഫലം കണ്ടു റാമോസ് എന്ന താരം ഹാട്രിക്ക് നേടി തിളങ്ങി പോർച്ചുഗൽ ടീമിന്റെ തുടർച്ച അറിയിച്ചു.

അങ്ങനെ അവസാന എട്ടിൽ എത്തിയ ടീമുകൾ ഇനി വീറോടെ പോരാടി നാലുപേരെ പറഞ്ഞയക്കും. ഈ പ്രീ ക്വാർട്ടറിൽ എട്ടിന്റെ പണി കിട്ടിയത് ജപ്പാനും സ്പെയിനുമാണ്. ഇരു കൂട്ടരും ഷൂട്ടൗട്ടിൽ പണി പാളി പുറത്തേക്ക്. ഇനിവരുന്ന ദിനങ്ങൾ കടുത്ത പോരാട്ടത്തിന്റെതാണ്. എട്ടിൽ ജയിക്കുന്ന നാലാര് എ ട്ടിൽ പൊട്ടുന്ന നാലാര് എന്നാണ് ഇനി ലോകം ഉറ്റുനോക്കുന്നത്.

പുതിയ പോസ്റ്റുകൾ

പഴയ പോസ്റ്റുകൾ