സാമൂഹ്യം

തകഴിയുടെ ചെമ്മീൻ സിനിമയാക്കിയപ്പോൾ കറുത്തമ്മയുടെ കഥാപാത്രത്തെ അവതരിപ്പിക്കാനെത്തിയ നടിയെ കണ്ട് കഥാകൃത്ത് ‘ഇത് കറുത്തമ്മയല്ലല്ലോ വെളുത്തമ്മയല്ലേ’യെന്ന് ചോദിച്ചതായി കേട്ടിട്ടുണ്ട്.

സ്ത്രീ സൗന്ദര്യത്തിന്റെ അടയാളങ്ങളിൽ നിറത്തിന് അമിത പരിഗണന കിട്ടുന്നില്ലേയെന്ന് ചോദിച്ചാൽ ഉണ്ടെന്ന് തന്നെ പറയേണ്ടി വരും. പൊന്നിന്റെ ചന്തമെന്നും, ഗോതമ്പിന്റെ നിറമെന്നും, കസ്തൂരി മഞ്ഞളിന്റെ കാന്തിയെന്നും വർണ്ണിച്ചവർ, കാട്ടുതേനിന്റെ നിറമുള്ളവളെ മനഃപൂർവ്വം വിട്ടുകളഞ്ഞതാകാനേ വഴിയുള്ളൂ.

കരിംകൂവളത്തിന്റെ അഴകൊത്ത കണ്ണുകളുണ്ടായിരുന്ന, കാട്ടുതേനിന്റെ നിറമുണ്ടായിരുന്ന, പനങ്കുല തോൽക്കുന്ന മുടിയുണ്ടായിരുന്ന സ്ത്രീകൾ അരിയോട്ടുകോണത്തിന്റെ പെണ്ണഴകായിരുന്ന കാലത്തിന് അത്രയും പഴക്കമില്ല.

കറുപ്പഴകായിരുന്ന സുന്ദരികളുടെ പരമ്പര ഒരു കഥപോലെയാണ്‌. ചെമ്പു അമ്മയും അവരുടെ സഹോദരപുത്രി കൃഷ്ണമ്മയും അവരുടെ സഹോദരപുത്രിയും ഈ കണ്ണികളിലെ ഇഴകളാണ്.

ഐതിഹാസിക പ്രണയകഥയിലെ നായികയായിരുന്നു കൃഷ്ണമ്മ അമ്മ, പാച്ചൻ മുതലാളിയുടെ പ്രിയപുത്രി പ്രണയിച്ചു കല്ല്യാണം കഴിച്ചത് നാടിളക്കിയ സംഭവമായിരുന്നു.

മോറീസ്മൈനർ കാറിൽ കയറി കോളേജിൽ പോകുന്ന കൃഷ്ണമ്മഅമ്മയെ കാണാൻ ഏറക്കടയിലെ പെണ്ണുങ്ങൾ മുതൽ നാട്ടിലെ പുരുഷകേസരികൾ വരെ കാത്തുനിന്നിരുന്നത് പഴയതലമുറ ഇപ്പോഴും ഓർക്കാറുണ്ട്. എം. ജി കോളേജിലെ സുന്ദരിമാർക്കിടയിൽ കറുത്തമുത്തായി തിളങ്ങിയിരുന്ന കൃഷ്ണമ്മയെന്ന സുന്ദരിയെ നാട്ടുകാരനായ സോമൻ നായർ പ്രണയിക്കാൻ തുടങ്ങിയതെന്ന് മുതലാണെന്ന് കൃത്യമായി നാട്ടുകാർക്ക് അറിയില്ല.

അതിസുന്ദരനും, അതികായനുമായ സോമൻ നായരും അക്കാലത്ത് എം ജി കോളേജിലെ വിദ്യാർത്ഥിയായിരുന്നു. മറ്റേതൊരു സുന്ദരിയേയും പ്രണയിക്കാൻ അവസരമുണ്ടായിട്ടും കൃഷ്ണമ്മയെന്ന സുന്ദരിയിൽ അലിഞ്ഞു പോവുകയായിരുന്നു അദ്ദേഹം.

ഐതിഹാസികമായ പ്രണയജീവിതത്തിനിടയിൽ വീട്ടുകാരെ മുഴുവൻ ഉപേക്ഷിച്ചുകൊണ്ട് കൃഷ്ണമ്മ അമ്മ സോമൻ നായരോടൊപ്പം ഇറങ്ങിപ്പോയതോടെ പാച്ചൻ മുതലാളിയും ഭാര്യയും മക്കളും അവരെ പടിക്ക്പുറത്താക്കി ഉപേക്ഷിച്ചു.

ജീവിതം സമരമാണെന്ന് പ്രണയിതാക്കൾക്ക് മനസ്സിലായത് കെട്ടുറപ്പുള്ള ദാമ്പത്യം കെട്ടിപ്പടുക്കുവാൻ തുടങ്ങിയപ്പോഴാണ്. ആദർശവും സാമൂഹ്യസേവനവും സ്വാഭിമാനവും കൂടുതലായപ്പോൾ സോമൻനായർ കൈയിൽ കിട്ടിയ സർക്കാർ ജോലി തട്ടിത്തെറിപ്പിച്ചു, കൂട്ടത്തിൽ പഠിച്ചു നേടിയ സർട്ടിഫിക്കറ്റുകളും ഉപേക്ഷിച്ചു. കണിയാപുരം മുസ്‌ളീം ഹൈസ്ക്കൂളിൽ അദ്ധ്യാപിക ആകുവാനുള്ള കൃഷ്ണമ്മ അമ്മയുടെ അവസരവും അദ്ദേഹം നിഷേധിച്ചതോടെ സ്ഥിരവരുമാനമുള്ള തൊഴിലെന്ന പ്രതീക്ഷ കഴിഞ്ഞു.

ആഡംബര പ്രിയവും ധാരാളിത്തവും കൈമുതലാക്കിയ സോമൻനായർ മദ്യപാനസദസ്സുകളിൽ ജീവിതം ഘോഷിച്ചു, അരിയോട്ടുകോണത്തെ റോഡരികിലുള്ള വീടിന്റെ അരികിൽ നിരന്നു കിടക്കുന്ന കാറുകളും സുഹൃത്തുക്കളും കൂടി അദ്ദേഹത്തെ ധൂർത്തനും മദ്യപാനാസക്തനുമാക്കി.

മകളുടെ ജീവിതം സന്തോഷമായിരിക്കുവാൻ പാച്ചൻ മുതലാളി രഹസ്യമായും പരസ്യമായും എഴുതി നൽകിയ വസ്തുക്കൾ ഓരോന്നായി വിറ്റിട്ടായിരുന്നു സോമൻനായരുടെ ആഘോഷം. കൈയിലെ കാശ് തീരുമ്പോൾ ഭാര്യയുടെ കൈയിൽ നിന്നും വസ്തുക്കൾ വാങ്ങിയെടുക്കുവാനുള്ള വഴികൾ ധാരാളം മുന്നിലുണ്ടായിരുന്നതും, കൃഷ്ണമ്മ അമ്മയ്ക്ക് അദ്ദേഹത്തോടുള്ള പ്രണയത്തിന്റെ ആഴമറിഞ്ഞു തിരികെ സ്നേഹിച്ചിരുന്നതും കൊണ്ടു സ്വത്തുക്കൾ ഓരോന്നായി തീറെഴുതി കൊണ്ടിരുന്നു.

ഒടുവിൽ എല്ലാം വിറ്റുതീർന്നപ്പോഴും അഞ്ച് മക്കളും ഭാര്യയും ബുദ്ധിമുട്ടിയപ്പോഴും സോമൻനായർ ആഘോഷത്തിന്റെ പടിയിറങ്ങിയില്ല. രോഗിയായ ഭാര്യയ്ക്ക് രക്തം മാറ്റി അടയ്ക്കുവാൻ കടം വാങ്ങേണ്ടി വന്നിട്ടും, അറിഞ്ഞു കൊണ്ടുതന്നെ ആ കാശ് കൊണ്ടുപോയി മദ്യപിച്ചതും, മുക്കിലെ ചാരായ ഷാപ്പിന് മുൻപിൽ ബോധം കെട്ടുറങ്ങിയതും എന്തിനായിരുന്നുവെന്ന് ഒരാൾക്കുമറിയില്ല.

ഭാര്യ പോയതോടെ ചിറകറ്റുപോയ പറവയുടെ അവസ്ഥയായി സോമൻനായരുടേത്, ചെയ്തുകൂട്ടിയതിനെല്ലാം സ്വയം ശിക്ഷിക്കാനിറങ്ങിയത് പോലെയായി പിന്നെയുള്ള ജീവിതം. വിവാഹിതരായ മക്കളുടെ വീടുകളിലൊന്നും പോകാതെയായി. മിക്കവാറും കടത്തിണ്ണകളിലും, ഇടയ്ക്കെല്ലാം ബന്ധുവീടുകളിലുമായിരുന്നു ഉറങ്ങാനിടം കണ്ടെത്തിയിരുന്നത്. കുടുംബസ്വത്തായി കിട്ടിയ വസ്തുക്കൾ ചില്ലറയായി വിറ്റുതീർത്തു. കിട്ടിയ കാശ് മുഴുവൻ മദ്യത്തിനായി ചിലവാക്കി.

വാഹനമിടിച്ച് പരിക്കേറ്റ് മെഡിക്കൽ കോളേജിൽ അനാഥനായി കിടന്നാണ് ജീവിതചക്രം പൂർത്തിയാക്കിയത്. സ്വന്തം ഇഷ്ടങ്ങളിൽ ജീവിച്ചും, പ്രാണൻ പോലെ സ്നേഹിച്ച ഭാര്യയെ പ്രാണനേക്കാൾ സ്നേഹിച്ചും, ലഹരിയുടെ ആഘോഷങ്ങളിൽ ജീവിതം ഹോമിച്ചു തീർത്ത മനുഷ്യനെക്കുറിച്ച് പല അഭിപ്രായങ്ങളുമുണ്ടാകും, അദ്ദേഹത്തിന്റെ ശരികളിൽ ഒരുപാട് തെറ്റുകളുമുണ്ടാകാം.

എല്ലാത്തിനുമപ്പുറം അദ്ദേഹത്തെ സ്നേഹിച്ച കൃഷ്ണമ്മ അമ്മയ്ക്ക് ജീവിതാവസാനം വരെ സോമൻനായർ നായകനായിരുന്നു. സർവ്വഭാഗ്യങ്ങളിൽ നിന്നും കുടിയിറക്കിക്കൊണ്ടുവന്ന പുരുഷൻ ലഹരിയിൽ ആറാടിയപ്പോഴും, ഇല്ലായ്മകൾക്കിടയിലും പ്രിയപ്പെട്ടവന്റെ ഒപ്പമിരുന്ന് വെറ്റിലമുറുക്കി വർത്തമാനം പറയുന്നത് സൗഭാഗ്യമായി കരുതിയ സ്ത്രീയുടെ ജീവിതം എങ്ങനെയാണ് അടയാളപ്പെടുത്തേണ്ടത്, ദുഃഖപുത്രിയെന്നോ നായികയെന്നോ..

ചിത്രങ്ങൾ : പ്രസാദ് കാനത്തുങ്കൽ

കവർ ഡിസൈൻ : വിത്സൺ ശാരദാ ആനന്ദ്

ഭക്തിയും വിശ്വാസവും ആചാരവുമൊക്കെ രാഷ്ട്രീയവത്കരിക്കപ്പെട്ടത് മലയാളിയുടെ സാംസ്‌കാരിക ജീവിതത്തിന്റെ കെട്ടുറപ്പില്ലായ്മയെ ചൂഷണം ചെയ്തുകൊണ്ടാണ്. കഴിഞ്ഞുപോയ കാലത്തിന്റെ അടയാളങ്ങളായിരുന്ന ചില മനുഷ്യരുണ്ട്, ഒരിടത്തും ഒരടയാളവും അവശേഷിപ്പിക്കാതെ കടന്നു പോയവർ, അത്തരം മനുഷ്യരുടെ സാമൂഹ്യ ജീവിതത്തിന്റെ അകത്തളങ്ങളും ചരിത്രമാകണം.

കറുത്ത് കുറുകിയ ചെറിയ കൂനുള്ള ബാലയണ്ണനെ കാണാൻ തുടങ്ങിയതെന്ന് മുതലാണെന്ന് കൃത്യമായി ഓർമ്മയില്ല, കോവിൽവിളാകത്ത് വന്ന നാൾ മുതൽ കാണാൻ തുടങ്ങിയയൊരാൾ അദ്ദേഹമാണ്. നിറം മങ്ങിയ തോർത്ത് മുണ്ടുമുടുത്ത് കോവിലിന്റെ ചുറ്റുമെല്ലാം ഓടിനടക്കുന്നൊരാൾ, അനുസരണയില്ലാതെ നിവർന്നു നിൽക്കുന്ന തലമുടിയും മുന്നിലേക്ക് കടന്നു നിൽക്കുന്ന പല്ലുകളുമായിരുന്നു ബാലയണ്ണന്റെ രൂപത്തിലെ പ്രത്യേകത. എല്ലാപേരും പ്രായഭേദമന്യേ ബാലയണ്ണനെന്ന് വിളിക്കുന്നതിൽ ഏതൊരു പരിഭവവും പ്രകടിപ്പിക്കുകയോ കളിയാക്കപ്പെടുന്ന അവസരങ്ങളിൽ പോലും പ്രതികരിക്കാൻ മിനക്കെടുകയോ ചെയ്യാത്ത മനുഷ്യൻ, അദ്ദേഹം അപൂർവ്വമായി ശുണ്ഠിയെടുത്ത് കണ്ടിട്ടുള്ളത് ചിലരൊക്കെ മറഞ്ഞും പതുങ്ങിയും നിന്ന് ബാലായെന്ന് വിളിക്കുമ്പോൾ മാത്രമാണ്.

ബാലയണ്ണൻ ഔദ്യോഗികമായി സ്വന്തമാക്കിയിരുന്ന അവകാശങ്ങളിൽ പോലും കടന്നു കയറിയിരുന്നവർ ക്ഷേത്രത്തിലെത്തുന്ന കുട്ടികളായിരുന്നു, മുതിർന്നവരുടെ മത്സരയിടങ്ങളിലൊന്നും വെല്ലുവിളിയുയർത്താൻ പ്രാപ്തിയില്ലാത്തൊരു വൃദ്ധൻ തോറ്റു തന്നിരുന്നതും കുട്ടികളോടാണ്. ഗണപതിയുടെ നടയിലുടക്കുന്ന തേങ്ങകളിലും ക്ഷേത്ര പറമ്പിലെ താളിമാവിലെ മാങ്ങകളിലും ക്ഷേത്രകമ്മിറ്റിക്ക് സാമ്പത്തിക താല്പര്യമുണ്ടായതോടെ ബാലയണ്ണൻ തേങ്ങയും മാങ്ങയും ലേലമെടുത്ത മുതലാളിയായെങ്കിലും മൊത്തത്തിൽ ലാഭകരമല്ലാത്ത പരിപാടിയായിരുന്നു.

ക്ഷേത്രത്തിലെത്തുന്ന ഭക്തരിൽ പലരും ഗണപതിക്ക് ഉടക്കാനായി കൈയിൽ കരുതുന്ന തേങ്ങകൾ കുട്ടികളുടെയും ബാലയണ്ണന്റെയും പ്രധാന ലക്ഷ്യമാകുന്നതോടെ മത്സരത്തിനുള്ള സാധ്യതകൾ തെളിയും, തേങ്ങയുടക്കുന്ന കല്ലിനുചുറ്റും ചിതറി വീഴുന്ന തേങ്ങയുടെ ഉടഞ്ഞ ഭാഗങ്ങളിൽ ഭൂരിഭാഗവും കുട്ടികളുടെ കൈയിലെത്തിയാൽ ബാലയണ്ണൻ മത്സരരംഗത്ത് നിന്നും പിന്മാറുകയും അടുത്തു വരുന്ന ഭക്തരുടെ കൈയിലെ നാളികേരങ്ങളിൽ പ്രതീക്ഷയർപ്പിക്കയും ചെയ്യും. താളിമാവിലെ മാങ്ങകളിൽ ആധിപത്യം സ്ഥാപിക്കാൻ ബാലയണ്ണൻ പരമാവധി ശ്രമിച്ചിരുന്നുവെങ്കിലും മുഴുവൻ സമയവും മാവിൻചുവട്ടിൽ ചിലവഴിക്കാനുള്ള സാഹചര്യം അനുവദിക്കാത്തത് കൊണ്ടാകാം അവിടെയും ലാഭമെന്ന സാഹചര്യം അനുഭവിക്കാൻ കഴിഞ്ഞിരുന്നില്ലായെങ്കിലും അദ്ദേഹത്തിന് പരാതികളില്ലായിരുന്നു.

നിറയെ കണ്മഷിയെഴുതിയ കണ്ണുകളും തിരുപ്പനിൽ പൊതിഞ്ഞു ഉയർത്തികെട്ടിയ തലമുടിയുമായി ക്ഷേത്രത്തിനുള്ളിൽ നടന്നു കൊണ്ടേയിരുന്ന കറുത്ത് മെലിഞ്ഞ പങ്കജാക്ഷി അമ്മച്ചിയുടെ വായ്ക്കുരവകളുടെ അകമ്പടിയോടെയായിരുന്നു തമ്പുരാന്റെ നടയിലെ ആരാധനകളെല്ലാം. തിടപ്പള്ളിയിൽ നിന്നും കിണറിൻകരയിലേക്കും തിരികെയും ദിവസവും എത്രപ്രാവശ്യം നടക്കുമെന്ന് പലവട്ടം ചോദിക്കണമെന്ന് കരുതിയിട്ടുണ്ട്. പ്രദക്ഷിണ വഴികളും പടികെട്ടുകളും തൂത്തും തുടച്ചും പരാതികളില്ലാതെ വെളുക്കെ ചിരിച്ച്‌ നടന്നു കൊണ്ടേയിരുന്ന പങ്കജാക്ഷി അമ്മച്ചിയൊരിക്കലും തീവ്രഭക്തകളുടെ ഗണത്തിൽപ്പെടുന്ന സ്ത്രീയായിരുന്നില്ല.

നിറയെ സംസാരിക്കുകയും ഇടവേളകളിൽ പരിചിതമല്ലാത്ത പാട്ടുകളുടെ ഈരടികൾ മൂളുകയും ചെയ്തിരുന്ന പങ്കജാക്ഷിയമ്മച്ചിയുടെ നിശ്ചയദാർഢ്യമുള്ള സ്ത്രീത്വമാണ് അംഗീകരിക്കപ്പെടേണ്ടത്. ബാഹ്യമായതൊന്നും സ്വന്തം പ്രവർത്തിയെ തടസ്സപ്പെടുത്തരുതെന്ന നിർബന്ധമാകാം നിരന്തരമായ സംസാരത്തിനിടയിലൂടെ ജോലികൾ ചെയ്തിരുന്നതിനുള്ള കാരണം. ബഹളവും കുസൃതികളുമായി കടന്നു വന്നിരുന്ന കുട്ടികളുടെ ഇടയിൽ അവരിലൊരാളായി മാറിയിരുന്ന വൃദ്ധയുടെ ബീഡിക്കറയുള്ള ചിരിയിൽ നിറഞ്ഞിരുന്നതാണ് ശരിക്കുമുള്ള സ്വാശ്രയത്വം.

അരിയോട്ടുകോണത്തെ തമ്പുരാന്റെ നിഴലും വെളിച്ചവും വീഴുന്നയിടങ്ങളിലെല്ലാം നിറഞ്ഞു നിന്നവർ, നിരന്തരം പ്രാർത്ഥിക്കാൻ അവസരങ്ങൾ ഉണ്ടായിരുന്നിട്ടും ജീവിതകാലം മുഴുവൻ ക്ഷേത്രത്തിന്റെ ചുറ്റും പരാതികളില്ലാതെ പരിഭവങ്ങളില്ലാതെ നടന്നവർ, അവരുടെ നിതാന്ത ഭക്തിയുടെ ചരിത്രമൊന്നും ഐതീഹ്യമാകാത്തത് അത്ഭുതങ്ങളുടെ പിൻബലമില്ലാത്ത അനുഗ്രഹങ്ങൾ അജ്ഞാതമായത് കൊണ്ടാകാം.

അമ്പലവും തമ്പുരാനും അമ്പലപ്പറമ്പുമൊക്കെയായി കഴിഞ്ഞിരുന്ന മനുഷ്യരുടെ ശേഷിപ്പുകൾ ഇത്തരം ഓർമ്മകളിലെങ്കിലും വാടാതെയിരിക്കണം, അവനവന് വേണ്ടി മാത്രമല്ലാതെ ജീവിച്ച നിസ്വാർത്ഥരായ മനുഷ്യരും വാഴ്ത്തപ്പെട്ടവരുടെ നിരയിലെത്തുമ്പോഴെ ചരിത്രമെന്നത് കഴിഞ്ഞകാലമാണെന്ന യാഥാർഥ്യം അംഗീകരിക്കപ്പെടുകയുള്ളൂ!

കവർ ഡിസൈൻ : വിൽസൺ ശാരദ ആനന്ദ്

വര : പ്രസാദ് കാനത്തുങ്കൽ

എല്ലാ നാടിനും മണ്ണിനും നിറയെ കഥകൾ പറയുവാനുണ്ടാകും. കേൾക്കുവാൻ മനസ്സുണ്ടെങ്കിൽ കാതോർത്താൽ കഥകളിങ്ങനെ കിനിഞ്ഞിറങ്ങും, ചിരിപ്പിച്ചും ചിന്തിപ്പിച്ചും ആകുലപ്പെട്ടും കടന്നുപോയ മനുഷ്യരുടെ ജീവിതങ്ങൾ കഥകളായി തെളിയും.

അരിയോട്ടുകോണത്ത് നിന്നും അപ്രത്യക്ഷമായ ചുമടുതാങ്ങി മുതൽ മുറിച്ചുമാറ്റപ്പെട്ട പുളിമരം വരെ കഥാപാത്രങ്ങളാണ്.

ഇഞ്ചിയും കറിവേപ്പിലയും പച്ചമുളകും ചതച്ചിട്ടാൽ പച്ചമോരിന്റെ രുചി കൂടുമെന്നും, ഇത്തിരി കടുമാങ്ങ കൂടിയുണ്ടെങ്കിൽ തലച്ചുമടുകളുടെ ഭാരം കുറയുമെന്നും നാച്ചിയാരമ്മ പറയുമ്പോൾ ചുമടേറ്റിയ പെണ്ണുങ്ങൾ പാച്ചൻ മുതലാളിയുടെ കടത്തിണ്ണയിലിരുന്ന് തലയാട്ടിക്കൊണ്ട് കുലുങ്ങിച്ചിരിക്കും.

വണ്ടിക്കാർ കാളകളെ മരങ്ങളിലേക്ക് മാറ്റിക്കെട്ടിയിട്ട് ഉപ്പൻ ഗോവിന്ദൻ മുതലാളിയുടെ ചായക്കടയിലിരുന്ന് മുളങ്കുറ്റിയിൽ വേകിച്ച പുട്ടും പയറും പപ്പടവും ചായയും കഴിച്ചുകൊണ്ട് തമാശകൾ പൊട്ടിക്കുമ്പോഴാകും മാധവൻ പിള്ള തേക്കിലകളിൽ പൊതിഞ്ഞെടുത്ത ചാണകവുമായി അടുത്ത കാളവണ്ടി ലക്ഷ്യമാക്കി ഇറക്കം ഇറങ്ങി തുടങ്ങുന്നത്.

ഫർലോംഗ് കുറ്റിയുടെ മുന്നിലുള്ള വണ്ടിക്കടയിൽ മുറുക്കാൻ വാങ്ങാനെത്തുന്ന പറ്റുകാരോട് കുശലം പറയുന്ന കേശവൻ കിളവൻ വർത്തമാനത്തിനിടയിലും കൃത്യതയോടെ പാക്കുവെട്ടി കൈകാര്യം ചെയ്യുന്നതിൽ ചിലരെങ്കിലും അതിശയം ഭാവിക്കും.

ഗ്രാമഫോൺ റേഡിയോയിൽ ആകാശവാണിയും വിവിധഭാരതിയും മാറ്റിമാറ്റി ആസ്വദിക്കുന്ന വാസു കണ്ട്രാക്ക് തന്റെ രണ്ടുനില വീടിന്റെ മുന്നിലൂടെ ജനത ലൈബ്രറി ആന്റ് റീഡിങ് റൂമിലേക്ക് പോകുന്നവരോട് പുതിയ ചലച്ചിത്ര ഗാനങ്ങളുടെ അഭിപ്രായം പറയും.

കോട്ട ശ്രീധരനും കോട്ട വിശ്വംഭരനും കൂടി തല്ലും പിടിയും നടത്തി ആസ്ഥാന ചട്ടമ്പികളുടെ പട്ടം സ്വന്തമാക്കിയിരുന്നതിനാൽ വരത്തന്മാർക്ക് വിലസാൻ അവസരം ഉണ്ടായിരുന്നില്ല. കോട്ടമുക്കിലെ ചട്ടമ്പികളോട് മുട്ടാൻ വന്നവരിൽ പലരും പുളിമരത്തിന്റെ ചുവട്ടിലാണ് ക്ഷീണം തീർത്തിരുന്നത്.

ആമുഖത്തിൽ മുഖം കാട്ടാൻ അവസരം കിട്ടാത്തവരെ കുറിച്ച് ബേജാറാകണ്ട, അവരുടെ കൂടി കഥകളുണ്ടാകും അരിയോട്ടുകോണത്തെ സാമൂഹ്യപാഠങ്ങളിൽ!

കവർ ഡിസൈൻ : വിൽസൺ ശാരദ ആനന്ദ്

2019 ലോക് സഭ ഇലക്ഷന്റെ അവസാന മണിക്കൂറുകളിലേക്ക് കേരളം കടക്കുകയാണ്. ഈ ഇലക്ഷൻ കാലത്ത് കേരളത്തിലെ സ്ഥാനാർത്ഥികളിൽ ഏറ്റവുമധികം വേട്ടയാടപ്പെട്ട വ്യക്തിത്വമാണ് ഡോ.ശശി തരൂരിന്റേത്.തിരുവനന്തപുരം മണ്ഡലത്തിൽ മൂന്നാമൂഴത്തിനായി തരൂർ എത്തിയത് കോൺഗ്രസ് രാഷ്ട്രീയത്തിലെ അതികായന്മാരിലൊരാൾ എന്ന പ്രതിച്ഛായയോടെയാണ്.കഴിഞ്ഞ പത്തു വർഷക്കാലം രണ്ടു സർക്കാരുകൾക്ക് കീഴിൽ എം.പി.യായിരിക്കെ താൻ മണ്ഡലത്തിൽ ചെയ്ത കാര്യങ്ങളെല്ലാം അക്കമിട്ട്, അടിവരയിട്ട്, ചൂണ്ടിക്കാണിച്ച് വോട്ടു ചോദിക്കുക എന്ന രീതിയാണ് അദ്ദേഹം അവലംബിച്ചത് . മാത്രമല്ല തരൂരിനോട് അടുപ്പമുള്ള കേന്ദ്രങ്ങളെല്ലാം ആവർത്തിച്ചു പറഞ്ഞിരുന്നത് 2014 ലെ ഇലക്ഷനായിരുന്നു തരൂരിന്റെ ജീവിതത്തിലെ മോശം ഇലക്ഷൻ.എന്നും 2019 ലേത് അതിനേക്കാൾ വളരെ മെച്ചപ്പെട്ടതാ ണെന്നുമാണ്. അതിൽ കാര്യമുണ്ട്.എൻ.ഡി.എ. വിരുദ്ധ മനോഭാവം വോട്ടറന്മാരിൽ ഉണ്ടാവുക സ്വാഭാവികം.യു.പി.എ ആണ് അധികാരത്തിൽ വരുന്നതെങ്കിൽ തീർച്ചയായും മന്ത്രിസഭയിലെ പ്രമുഖരിലൊരാളാവും തരൂർ. അങ്ങിനെയൊരാളെ കൈവിട്ടു കളയാൻ തിരുവനന്തപുരംകാർ തയ്യാറാകുമോ? പക്ഷേ ഇലക്ഷനു മുമ്പുതന്നെ ഇടതുപക്ഷം തരൂരിനെതിരെയുള്ള കുപ്രചരണങ്ങൾക്കു തുടക്കം കുറിച്ചു.കോൺഗ്രസ് വിരുദ്ധ വികാരത്തിന്റെ പേരിൽ പരിവാർ അജണ്ടകൾക്ക് വളവും വെള്ളവും പകരുക എന്നത് ഇടതുപക്ഷം അറിഞ്ഞോ അറിയാതെയോ ചെയ്യുന്ന സേവനമാണ്.. തരൂരിന്റെ ട്വീറ്റുകൾ, തരൂർ ഓട്ടോയിൽ കയറിയത്, …….അങ്ങനെ, സോഷ്യൽ മീഡിയയിൽ ശശി തരൂർ എന്ന മനുഷ്യന്റെ സ്വകാര്യ ജീവിതവും പൊതുജീവിതവും ധൈഷണിക ജീവിതവും ട്രോളുകൾക്കും വിമർശനങ്ങൾക്കും വ്യക്തിഹത്യക്കും പാത്രമായി. ഇലക്ഷൻ പ്രചരണ സമയത്തെ ആദ്യ പ്രശ്നം മത്സ്യത്തൊഴിലാളികളെ അപമാനിച്ചു എന്ന പ്രചരണമായിരുന്നു.squeamish എന്ന പ്രയോഗത്തിന്റെ അർത്ഥാന്തരങ്ങളിലൂടെ ഇടതു ബു.ജികൾ ഏറെ നീന്തിത്തുടിച്ചു. ഇടതനുകൂലികളായ ഭാഷാവിദഗ്ധർ തന്നെ തരൂരിനെ അനുകൂലിച്ച് രംഗത്തെത്തുന്ന അവസ്ഥ വരെ കാര്യങ്ങൾ എത്തി. ക്രമേണ അതു തണുത്തു.

അടുത്ത വിവാദം തലപൊക്കിയത് തരൂരിന്റെ ഇലക്ഷൻ പ്രചരണത്തിനു ആളില്ലെന്ന പരാതി അദ്ദേഹം ഉന്നയിച്ചു എന്നായിരുന്നു. എൻ.ഡി.എ.സ്ഥാനാർത്ഥിയെ ജയിപ്പിക്കാനായി അടിയൊഴുക്കുകൾ ശക്തമാണ് എന്നായിരുന്നു ആരോപണം. ചാനലുകളുടെ സർവ്വേ റിപ്പോർട്ടുകളും, ‘താമര വിരിയുമേ…’ എന്നു വിളിച്ചു കൂവാൻ തുടങ്ങി..! കേരളത്തിൽ ബി.ജെ.പിയുടെ തനിത്തങ്കമായ രാജഗോപാലിനെ, ഇന്ത്യയാകെ ബി.ജെ.പി.തരംഗം ആഞ്ഞടിച്ചപ്പോൾ പോലും, അതിജീവിച്ച തരൂർ കുമ്മനത്തിനു മുന്നിൽ പരാജയപ്പെടും എന്ന പ്രചരണം അഴിച്ചുവിടുകയായിരുന്നു. പ്രചാരകർക്കു തന്നെ തങ്ങളുടെ അവകാശവാദത്തിന്റെ യുക്തിരാഹിത്യം ബോധ്യമുള്ളതിനാലാവാം കോൺഗ്രസുകാർ കുതികാൽ വെട്ടി തരൂരിനെ തോൽപ്പിക്കും എന്ന മാർഗ്ഗവിവരണം കൂടി വിവാദരൂപത്തിൽ ഉൾപ്പെടുത്തിയത്. ഇങ്ങനെ കലുഷിതമായ സാഹചര്യത്തിലാണ് തുലാഭാരത്തിലെ ത്രാസ് പൊട്ടിവീഴ്ച..! ഇതിനു സമാന്തരമായി സോഷ്യൽ മീഡിയയിൽ പരിവാർ ബന്ധുക്കളും ഇടതുസംഘവും ഒത്തുചേർന്ന് തരൂരിനെ തേജോവധം ചെയ്യാനുള്ള കരുക്കൾ ഖനനം ചെയ്ത് എടുത്തു പ്രചരിപ്പിക്കുന്നുണ്ടായിരുന്നു.മരിച്ചു പോയ നടി ശ്രീദേവി മുതൽ എൻ.ഡി.എ.യുടെ സഹമന്ത്രി വരെ സമൂഹത്തിന്റെ വിവിധ തുറകളിൽ പെട്ട സ്ത്രീകളോടൊത്തുള്ള തരൂർ ചിത്രങ്ങൾ അശ്ളീലച്ചുവയുള്ള അടിക്കുറിപ്പുകളോടെ അനേകരിലേക്ക് ഷെയർ ചെയ്യപ്പെട്ടു.. വിദേശികളായ ജേണലിസ്റ്റുകൾ എഴുത്തുകാർ ആരെയും ഒഴിവാക്കിയില്ല.. തങ്ങളറിയാത്ത എത്രയോ സ്ത്രീകളെ ഇതുവഴി ഇവർ അപമാനിച്ചു.! എത്ര പേരുടെ ചിത്രങ്ങൾ അപകീർത്തികരമായ രീതിയിൽ പ്രചരിപ്പിച്ചു.. ഇലക്ഷൻ പ്രചരണത്തിന്റെ സകല മര്യാദകളും കാറ്റിൽപ്പറത്തി..!

ഏറ്റവുമൊടുവിൽ തരൂരിന്റെ ഇലക്ഷൻ അഫിഡവിറ്റിലെ അക്ഷരത്തെറ്റുകളാണു ചർച്ചയായത്. വാർത്തയാക്കിയ പത്രക്കാർ എല്ലാ സ്ഥാനാർത്ഥികളുടെയും അഫിഡവിറ്റു പരിശോധിച്ച് അക്ഷരത്തെറ്റു വിലയിരുത്തിയോ? ഇല്ല.. ഇവിടെ ഇംഗ്ലീഷിലുള്ള അഫിഡവിറ്റിലെ അക്ഷരത്തെറ്റു കണ്ടെത്തിയ പത്രലേഖകൻ സ്വയം കരുതുന്നത് താൻ തരൂരിനേക്കാൾ വലിയ ഇംഗ്ളീഷ് പണ്ഡിത നെന്ന പദവിയിലേക്ക് ഉയർത്തപ്പെടും എന്നാവും. തീർച്ചയായും ആ അഫിഡവിറ്റ് അദ്ദേഹത്തിന്റെ ഓഫീസ് തയ്യാറാക്കിയതാവും. അവരുടെ അനവധാനത ന്യായീകരിക്കാനുമാവില്ല. പക്ഷേ അതിനു വാർത്താപ്രാധാന്യം കൈവന്നത് അത് തരൂരിന്റേതായതു കൊണ്ടു മാത്രമാണ്.!

എന്തുകൊണ്ടു തരൂർ..?

മേൽപ്പറഞ്ഞ സംഭവങ്ങളെല്ലാം ഉയർത്തുന്ന ചോദ്യം എന്തു കൊണ്ടു തരൂർ ഇങ്ങനെ വേട്ടയാടപ്പെടുന്നു എന്നതാണ്.. ഒറ്റ വാക്കിൽ പറഞ്ഞാൽ എൻ.ഡി.എ.യുടെ നമ്പർ വൺ ശത്രുവാണു തരൂർ. അദ്ദേഹത്തിന്റെ കഴിവും പാണ്ഡിത്യവും വിശകലന പാടവവും എഴുത്തുമെല്ലാം അവരെ അസ്വസ്ഥരാക്കുന്നു. പ്രതിപക്ഷത്തിരുന്നപ്പോൾ പോലും പല കാര്യങ്ങൾക്കും അദ്ദേഹത്തെ അവർക്ക് ആശ്രയിക്കേണ്ടി വന്നു. അംഗീകരിക്കേണ്ടിവന്നു.. പക്ഷേ പരിവാർ അജണ്ടകൾക്കുമേൽ അദ്ദേഹം നടത്തുന്ന ആഴമേറിയ വിശകലനം, പ്രതിരോധം അവർക്ക് താങ്ങാവുന്നതിലപ്പുറമാണ്. ഹിന്ദു എന്ന വിശാലതയെ ഹിന്ദുത്വമെന്ന പരിവാർ അജണ്ട എത്ര വികലവും മലീമസവുമാക്കിയിരിക്കുന്നു എന്ന് അദ്ദേഹം Why | am a Hindu എന്ന പുസ്തകത്തിലൂടെ യുക്തിഭദ്രമായി വിശദീകരിച്ചു.പാരഡോക്സിക്കൽ പ്രൈംമിനിസ്റ്റർ എന്ന കൃതിയിലൂടെ മോദിയെന്ന കാപട്യത്തെയും പൊളിച്ചടുക്കി.. തന്റെ പ്രസംഗങ്ങളിലുടനീളം എൻ.ഡി.എ ഭരണഘടനയെ പൊളിച്ചടുക്കാൻ മടിക്കില്ലെന്ന വിപത് സൂചന കൊടുത്തു കൊണ്ടിരിക്കുന്നു.. തരൂർ അപകടകാരിയാണെന്നു തിരിച്ചറിയാൻ അവർക്ക് കൂടുതലൊന്നും ആവശ്യമില്ല. അങ്ങനെയൊരു നോട്ടപ്പുള്ളിയെ ഒതുക്കാൻ ഏതു മാർഗ്ഗവുമാകാം എന്ന തീരുമാനത്തിൽ നിന്നുമാണ് തരൂരിനെ ജനപ്രിയനാക്കുന്ന ഘടകങ്ങൾക്കുനേരെ ആക്രമണം സംഘടിതമായി ആസൂത്രണം ചെയ്തത് എന്നു കരുതാം. ഉദാഹരണത്തിന് തരൂരിന്റെ ഇംഗ്ളീഷ് പാടവം അദ്ദേഹത്തിന് ഏറെ ആരാധകരെ ഉണ്ടാക്കുന്ന ഘടകമാണ്. അതു കൊണ്ട് അദ്ദേഹത്തിന്റെ ഇംഗ്ലീഷ് പ്രയോഗങ്ങൾക്കു മേൽ വികലാർത്ഥങ്ങളാരോപിച്ച് കരിവാരി തേക്കുക.. ! ഹിന്ദുത്വപരികല്പനയെ ചോദ്യം ചെയ്യുന്ന തരൂരിനെ പ്രതിരോധിക്കാൻ അപ്രശസ്തനായ ഒരു നടനെക്കൊണ്ടു ചെയ്യിച്ച വീഡിയോയിൽ അദ്ദേഹം സ്വയം ഹിന്ദുവല്ല എന്നു പറഞ്ഞയാളാണ് എന്ന് കാണിക്കുന്നു തരൂരിന്റെ പുസ്തകത്തിന്റെ ടൈറ്റിലിന്റെ സ്ഥാനത്ത് അവർ ചേർക്കുന്നത് കാഞ്ചാ ഐലയ്യയുടെ പുസ്തകത്തിന്റെ ടൈറ്റിൽ ആണ്. Why | am not a Hindu. രണ്ട് ഇംഗ്ലീഷ് പുസ്തകങ്ങളുടെ പേരുകൾ വച്ച് മലയാളി വോട്ടറന്മാർക്കിടയിൽ ഒരു കൺഫ്യൂഷനുണ്ടാക്കുക.. !വർഗ്ഗീയത എറിയുക.

മറ്റൊന്നു തരൂർ അവകാശപ്പെട്ടതു പോലെ അദ്ദേഹത്തിന്റെ മെറിറ്റിനെ മുൻനിർത്തിയുള്ള ഇലക്ഷൻ പ്രചരണത്തെ പ്രതിരോധത്തിലാക്കുക. പ്രചരണത്തിന്റെ അജണ്ടയെ അട്ടിമറിക്കുക. രാഷ്ട്രീയം പറയേണ്ട സമയത്ത്, എം.പി.യുടെ പ്രവർത്തനങ്ങൾ വിലയിരുത്തപ്പെടേണ്ട സമയത്ത്, വിവാദങ്ങളുടെ മറുപടികളാൽ സമയം പാഴാക്കിക്കുക, പറയേണ്ടവ പറയിക്കാതിരിക്കുക ഇതൊക്കെ തന്നെയായിരുന്നു ലക്ഷ്യങ്ങൾ.എൻ.ഡി.എയുടെ പ്രചരണ വാഹനത്തിൽ നിന്നും ഇന്നു കേട്ടൊരു വാക്യമിതാണ്.. “എൻ.ഡി.എ.സർക്കാർ തിരുവനന്തപുരത്ത് നടപ്പാക്കിയ വികസന പ്രവർത്തനങ്ങളെ സ്വന്തം പേരിലവതരിപ്പിക്കുന്ന എം.പി.യെ മാറ്റി നിർത്തുക”!… അതേ വികസന പ്രവർത്തനങ്ങൾ ഉണ്ടായി. ഇല്ലെന്നു പറയാനാവില്ല.. പക്ഷേ അത് എം.പി.യുടെ അക്കൗണ്ടിൽ കൂട്ടരുത്..!

തിരുവനന്തപുരം എം.പി. എന്ന സ്ഥാനമില്ലെങ്കിലും അന്താരാഷ്ട്ര തലത്തിൽ ഉന്നതമായൊരു പദവി നേടാൻ ഡോ.ശശി തരൂരിനു നിഷ്പ്രയാസം കഴിയും. പക്ഷേ ലോകമറിയുന്ന, ഭാരതത്തിന്റെ അഭിമാനമായ കേരളപുത്രൻ ശശി തരൂരിനെ പരാജയപ്പെടുത്തിയാൽ അതിന്റെ നഷ്ടം തലസ്ഥാന നഗരിക്കാവും.. അതു നികത്താനാവാത്ത നഷ്ടമാണെന്ന തിരിച്ചറിവ് തിരുവനന്തപുരം നിവാസികൾക്ക് ഉണ്ട്.. അതവർ മൂന്നാമതും തെളിയിക്കട്ടെ..!