രതി പതിശ്ശേരി

വസന്താഗമത്തിന്റെ
കിളിയൊച്ചകൾ
അവർക്കു-
ണർത്തു പാട്ടായപ്പോൾ
അവൾ
ഭീതിയുടെ കരിമ്പടത്തിൽ
തല പൂഴ്ത്തിക്കിടന്നു.

മാൻമിഴിയെന്നും
തേന്മൊഴിയെന്നും
മാറത്തു പൂവുള്ള
കുളിരരുവിയെന്നും
വിളിയുടെ മുന്തിരിച്ചാറുകൾ
അവരുടെ ചുണ്ടുകളിൽ
കൊതിപ്പിക്കുന്ന മധുരമായി
കിനിഞ്ഞിറങ്ങുന്നത്
അവൾ പേക്കിനാവിൽ കണ്ടു.

നെടുവീർപ്പുകൾ
കൂട്ടിയിടിക്കുന്ന
രാത്രിയുടെ യാമങ്ങളിൽ
അവരുടെ ഉറക്കങ്ങൾക്ക്‌
മീതെ തൂങ്ങിയാടിയ
നിറമുള്ള ബലൂണുകൾ
അവൾ ഒച്ചയനക്കമില്ലാതെ
പൊട്ടിച്ചെറിഞ്ഞു.

ഒറ്റയ്ക്ക് മെടഞ്ഞു
കെട്ടിയ വേലികൾ
ചിതലുകൾ തിന്നു
തീർക്കാതിരിക്കാൻ
മരുന്ന് തളിച്ച്
ജന്മം മുഴുവൻ
ഉറങ്ങാതെ കാവലിരുന്നു …

അടുത്ത ബെല്ലിനുമുമ്പ്….

വെണ്ടക്കാത്തോരൻ, സാമ്പാറ്, ,
മോരു കറി,
പാവക്കാ കൊണ്ടാട്ടം,
അവിയൽ, കാബേജ്,
പുതിയിനാച്ചമ്മന്തി,
മോരുകറി, പപ്പടം, ഉപ്പിലിട്ടത്,

പരിപ്പും ചീരയും
ഒന്നിച്ചാക്കാം
അതോ?

പരിപ്പില്ലാതെ സാമ്പാറ്
രുചി ഭംഗമാവുമോ
വാകമത്സ്യത്തെ കറിയാക്കാം,
പുളിയേതാണ് രുചികരം
കൊടപ്പുളിയോ വാളനോ മാങ്ങയോ
ഇരുമ്പാൻ പുളിയോ,
മത്തിപ്പീരയും കൊള്ളാം.

വറവൊന്നും നന്നല്ലെന്ന്
എല്ലാരും പറയുന്നു,
ഊൺമേശ മീശ പിരിക്കുമോ

വേണ്ടെന്ന് വെച്ചാലും
എണ്ണയിൽ ഉറഞ്ഞു തുള്ളും
രുചിയുടെ അനർത്ഥങ്ങൾ….

ആവിയിലും ചൂടിലും
വാടിനിൽപ്പുണ്ട്
കരിമഷിയെഴുതിയ ചുമരുകൾ

ഒതുക്കിവെച്ച ഒരു കത്തി
മൂർച്ഛയോടെ മുരളുന്നതും
മറ(വി)യിൽ നിന്നും
കേൾപ്പാനുണ്ട്.

മഴ നനയുന്നത്
എനിക്കും ഇഷ്ടമാണ്
വിഷമങ്ങളെ നനച്ച്
കരിമ്പനടിപ്പിക്കുമെങ്കിലും

പക്ഷെ,
പുലർച്ചകളിലെ-
യിരുളലകളെ വകഞ്ഞുമാറ്റി
കുന്നുകൂടിക്കിടക്കുന്ന
നിർബന്ധങ്ങളിലേ-
ക്കിറങ്ങേണ്ടി വരുന്നോർക്ക്

ഒറ്റ ജോടി ചെരുപ്പിൽ
വേനലും മഴയും കടക്കാൻ
കഷ്ടപ്പെടുന്നവർക്ക്

കോട്ടൺ സാരി മാറ്റി
ഷിഫോണിൽ കയറി,
കനം വെച്ച അടിപ്പാവാട
പൊക്കിപ്പിടിച്ച്
ബസ്സ് കയറാനോടുന്നവർക്ക്

അഞ്ചാറ് വീട്ടിൽ മുറ്റമടിച്ച്‌,
പിന്നെ പല വീടുകളിൽ
കാവലാളായി പോവേണ്ട
കുഞ്ഞോമനയ്ക്ക്

പുത്തൻകുട
നിവർത്തി നനയ്ക്കാൻ
മടിയുള്ള പിള്ളേർക്ക്

എത്ര തോർത്തിവെച്ചാലും
ഈർപ്പം പടർന്ന അടുപ്പിലൂതി
ഭ്രാന്താവുന്നവർക്ക്

പിന്നെ
തീപ്പെട്ടുപോയ പ്രണയങ്ങൾ
വീണ്ടും തണുപ്പേറ്റുമ്പോൾ
ഒന്ന് തീക്കായാൻ വെമ്പുന്നവർക്ക്
ഒക്കെ ഈ മഴ
ചിലപ്പം കനയ്ക്കും അല്ലേ ?

30 ആണോ
31 ആണോ
ടീച്ചർ ചോദിക്കുമ്പോ
കൈപ്പത്തി കമഴ്ത്തി
ഉയർച്ച താഴ്ചകളെ
തൊട്ടെണ്ണിയിരുന്ന മാർച്ച്.

സ്കൂൾ ആരവങ്ങളിൽ നിന്നും
കൈകാൽ കഴുകി
പമ്പരം കൊത്തുന്നവരെ നോക്കി
കൊഞ്ഞനം കുത്തിയിരുന്നതും മാർച്ച്.

പ്രണയവും
വിരഹവും മാറത്തടുക്കി
വിട്ടുപോകലിന്റെ
വിങ്ങലിൽ വിറയ്ക്കുമ്പോൾ
പരീക്ഷാപ്പനിയെന്ന് അമ്മയോട്
കള്ളം പറയിക്കുന്ന മാർച്ച്‌.

ജനുവരി
ഫെബ്രുവരി
പിന്നെ
മറിച്ചിടാൻ പേടിയാണിപ്പോൾ

പുതുവർഷം
തുടങ്ങുകയല്ല
ഗതികേടുകൾ ഒടുങ്ങിയില്ലേൽ
കുടിയിറക്കപ്പെടുമെന്ന
അറിയിപ്പിന്റെ ചെണ്ടമേളങ്ങൾ.

നടപ്പു വർഷം
സാമ്പത്തിക വർഷം
പേരുകളിൽ പുതുങ്ങണം
രീതികളിലും.

കണക്കെടുപ്പിൽ
കണ്ണ് തള്ളണം.

നെടുവീർപ്പുകൾ ഇടയുന്ന
പലിശ കൂമ്പാരങ്ങളിൽ
വീർപ്പുമുട്ടി
അസാധുവാകുന്ന
ഇത്തിരി ജീവിതങ്ങളെ
ഒറ്റത്തവണ തീർപ്പിൽ
ഒതുക്കിക്കളയുന്ന മാർച്ച്…

പ്രലോഭനങ്ങളുടെ
വൈകുന്നേരങ്ങൾ

കണ ഒടിഞ്ഞ കയിൽക്കൊട്ട
തീപ്പൊരി പാറാത്ത
ഗ്യാസ് ലൈറ്റർ
അപ്പപൊടി തീർന്ന ടിന്നുകൾ
ചുളിഞ്ഞിരുന്ന നൂറുകൾ
ആവേശത്തോടെ നിവരുന്നു.

കപ്പലണ്ടിക്കാരനും
മുട്ട പഫ്‌സും
നൂറിനെ മാറ്റാൻ
ഒരുങ്ങുന്നു.

നാളെത്തേയ്ക്കു
ഇന്നേ മരിച്ചു വീഴുന്ന നൂറുകൾ

ഞാനോ നീയോ എന്ന
കൺഫ്യൂഷനിൽ ഉഴുന്നും റവയും
പരസ്പരം പാളുന്നു.

എല്ലാ ആവശ്യങ്ങളും
നൂറിനെ ഉഴിയുന്നു

എല്ലാ വൈകുന്നേരങ്ങളിലും
ഒരു 100 എങ്കിലും മരിയ്ക്കുന്നു

ഒഴിഞ്ഞ പഴ്സിൽ
നാളേയ്ക്ക് നിറയ്ക്കാൻ
ഞാനും വേവുന്നു….​