കായികം

ലോകമെമ്പാടുമുള്ള ഫുടബോൾ പ്രേമികൾക്ക് നിദ്രാ വിഹീനമായ രാത്രികളായിരുന്നു കഴിഞ്ഞ കുറെ നാളുകൾ. രാത്രിയിൽ യൂറോ കപ്പും അതി രാവിലെ കോപ്പാ അമേരിക്കൻ കപ്പും നേരിട്ടും, ടെലിവിഷന് മുന്നിലും സ്മാർട്ട് ഫോണിലും ലോകമെമ്പാടുമുള്ള ഫുടബോൾ ആരാധകർ കണ്ടു. ബെർലിനിലെ ഒളിമ്പിക് സ്റ്റേഡിയത്തിൽ നടന്ന യൂറോകപ്പ് ഫൈനലിൽ സ്പാനിഷ് വസന്തം വിരിഞ്ഞു. 2012 ന് ശേഷം അവർ ചാമ്പ്യന്മാരായി. നാലു തവണ യൂറോ കിരീടം എന്ന റെക്കോർഡ് നേട്ടമാണ് ഡെലാഫു എൻഡെയുടെ കുട്ടികൾ നേടിയത്. കഴിഞ്ഞ കുറെ വർഷങ്ങളായി ടിക്കി ടാക്കയുടെ പേരിൽ പഴി കേട്ട ടീമായിരുന്നു സ്‌പെയിൻ. പാസിന്റെ ആധിക്യം മൂലം ഗോളടിക്കാൻ മറന്നു പോകുന്നവർ എന്നൊരു കുറ്റവും ചാർത്തിയിരുന്നു. ലൂയിസ് ഡെ ലാ ഫോയിന്റെ എന്ന പരിശീലകൻ ടിക്കി ടാക്കയെ പരിഷ്കരിച്ച് പ്രായോഗിക ഫുടബോളിലേക്ക് സ്‌പെയിൻ എന്ന ടീമിനെ സജ്ജമാക്കി എന്ന് വേണമെങ്കിൽ പറയാം. തികച്ചും ആധികാരികമായി 15 ഗോളുകളടിച്ചാണ് അവർ കപ്പുയർത്തിയത്. (യൂറോ കപ്പിൽ മറ്റൊരു റെക്കോർഡ്. മിഡ്ഫീൽഡിലെ ഭാവനാസമ്പന്നമായ കളി കൊണ്ട് റോഡ്രി മികച്ച താരമായി. അവരുടെ വിംഗുകൾക്ക് അസാമാന്യ വേഗത കൊടുത്തത് കൗമാര താരങ്ങളായ നിക്കോ വില്യംസും ലാമിൻ യമാലുമാണ്. യൂറോ കപ്പ് ഫൈനലിന് തലേ ദിവസം 17 വയസ്സ് തികഞ്ഞ യമാൽ സെമിയിൽ ഫ്രാൻസിനെതിരെയുള്ള ഗോളോട് കൂടി യൂറോ കപ്പിലെ ഏറ്റവും പ്രായം കുറഞ്ഞ ഗോളടിക്കാരനുമായി. യമാലിന് ടൂർണമെന്റിലെ മികച്ച കൗമാരതാരമെന്ന ബഹുമതിയും കിട്ടി. ഫൈനലിൽ നിക്കോ വില്യംസ് അടിച്ച ഗോളിന് അസിസ്ററ് ചെയ്തതും ബാഴ്സലോണയുടെ യുവ അക്കാദമി ലാ മസിയയുടെ വാഗ്ദാനമായ യമാലാണ്. ടൂർണമെന്റിൽ 3 ഗോളുകൾ നേടിയ ഓൽമ ,ഫൈനലിന്റെ രണ്ടാം പകുതിയിൽ പ്രതിരോധത്തിൽ തിളങ്ങി നിന്ന കുക്കുറോച്ച അങ്ങനെ കാളക്കൂറ്റന്മാരിൽ പലരും കരുത്ത് കാട്ടി. കുക്കുറോച്ചയുടെ പാസിൽ, പകരക്കാരനായി എത്തിയ യെർസബോലിന്റെ ഗോൾ കപ്പിലേക്കുള്ള വഴിയൊരുക്കി.

തുടർച്ചയായ രണ്ടാം തവണയും ഇംഗ്ലണ്ടിനെ ഭാഗ്യം തുണച്ചില്ല. നായകൻ ഹാരി കെയ്ൻ അതിന്റെ ഭാരവും പേറേണ്ടി വരും. കോച്ച് സൗത്ത് ഗേറ്റ് വിരമിക്കുകയാണ്. പ്രതിഭാസമ്പന്നമായിരുന്നു ഇംഗ്ലണ്ട് ടീമും. സെമിഫൈനൽ വരെ തട്ടിമുട്ടി എത്തിയതാണെങ്കിലും സെമിയിൽ ഡച്ച് പടയെ അവർ തുരത്തി. ഇംഗ്ലണ്ടിന് ലഭിച്ച പെനാൽറ്റി ഗോളോടെ ഡച്ച്കാർ തളർന്നു പോയിരുന്നു. സ്‌പെയിൻ ടീമിന്റെ വീര്യം തുടക്കം തൊട്ട് മറ്റ് ടീമുകൾക്ക് ബോധ്യമായി. ക്രൊയേഷ്യ ,ഇറ്റലി (കഴിഞ്ഞ തവണത്തെ ചാമ്പ്യൻമാർ) ടീമുകൾക്ക് ആദ്യ റൌണ്ട് പോലും കടക്കാൻ കഴിഞ്ഞില്ല. പുതുക്കിപ്പണിത് തോൽക്കാതെയെത്തിയ ജർമനിയെ, സ്പെയിൻ ക്വാർട്ടറിൽ മറി കടന്നു. ആക്രമ പ്രത്യാക്രമണങ്ങൾ കൊണ്ട് ഉജ്ജ്വലമായിരുന്നു ഈ ക്വാർട്ടർ മത്സരം. സെമിയിൽ ഫ്രാൻസ് ആയിരുന്നു എതിരാളികൾ. പരിക്കിന് ശേഷം എംബാപ്പെ നിറം മങ്ങി. ഗ്രീസ്മാനും ഫോമിൽ ആയിരുന്നില്ല. കാന്റെ മാത്രം അധ്വാനിച്ച് കളിച്ചു. സെൽഫ് ഗോളുകളുടെ ആധിക്യം. അങ്ങനെ ഫ്രാൻസ് ഓർക്കാൻ ആഗ്രഹിക്കാത്ത ഒരു യൂറോ കപ്പ് ആയിരിക്കും ഇത്. ക്വാർട്ടറിൽ ഫ്രാൻസിനോട് ടൈ ബ്രേക്കറിൽ തോറ്റു പുറത്തായപ്പോൾ റൊണാൾഡോയും പെപ്പേയും വേദനിച്ച് കെട്ടിപിടിക്കുന്ന ചിത്രവും ആരാധകർ മറക്കില്ല. ഇനിയൊരു യൂറോ കപ്പിന് അവരുണ്ടാകാനുള്ള സാധ്യതയില്ല. കന്നിയങ്കത്തിനെത്തിയ ജോർജിയ മികച്ച പ്രകടനം നടത്തി.

അമേരിക്കയിലെ ഫ്ലോറിഡയിലെ ഹാർഡ് റോക്ക് സ്റ്റേഡിയത്തിൽ ടിക്കറ്റ് എടുക്കാത്ത കാണികളുടെ തള്ളിക്കയറ്റം കാരണം ഒന്നര മണിക്കൂർ വൈകിത്തുടങ്ങിയ കോപ്പാ അമേരിക്കൻ ഫുട്ബോൾ ഫൈനലിൽ കൊളംബിയ അർജന്റീനയെ വിറപ്പിച്ചു നിർത്തിയെങ്കിലും എക്സ്ട്രാ ടൈമിലെ 112 ആം മിനുട്ടിൽ ലൗറാറ്റൊ മാർട്ടിനസ് അടിച്ച ഗോളിൽ അർജന്റീന തുടർച്ചയായി രണ്ടാം തവണയും ചാമ്പ്യന്മാരായി. ഈ ടൂർണമെന്റിൽ ലൗറാറ്റൊയുടെ അഞ്ചാമത്തെ ഗോൾ. ലൗറ്റാറോയിക്ക് ഗോൾഡൻ ബൂട്ടും കിട്ടി. സ്കലോണി വിജയങ്ങൾ രചിക്കുന്ന പരിശീലകനായി. ലോക കപ്പ്, 2 കോപ്പാ കിരീടങ്ങൾ, ഫൈനലസീമ അങ്ങനെ നാല് കിരീടങ്ങൾ. ഫൈനലിൽ പരിക്കേറ്റ മെസ്സിയ്ക്ക് 67 ആം മിനുട്ടിൽ പുറത്തു പോകേണ്ടി വന്നു.കൊളംബിയയുടെ അക്രമണങ്ങളെ ഫലപ്രദമായി തടഞ്ഞത് അർജന്റീനയുടെ പ്രതിരോധ നിരയിലെ ലിസൻഡ്രോയും റൊമാരിയോയുമാണ് .ഡീപ്പോളും കളം നിറഞ്ഞു കളിച്ചു.

നീലത്തിരമാലകളുടെ മാലാഖ ഡീ മാരിയോയുടെ അവസാന മത്സരമാണെന്ന് പ്രഖ്യാപിച്ചത് കൊണ്ട് ഈ കിരീടം അദ്ദേഹത്തിന് വേണ്ടി നേടണമെന്ന് ടീം അദമ്യമായി ആഗ്രഹിച്ചിരുന്നു. ക്വാർട്ടറിൽ ഇക്കോഡോറിനോട് സമനില പാലിച്ചപ്പോൾ പെനാൽറ്റി ഷൂട്ട് ഔട്ടിൽ ഇക്കുറിയും ഗോൾ കീപ്പർ എമിലിയാനോ മാർട്ടിനസ് രക്ഷകനായി. മെസ്സിയുടെ ആദ്യ കിക്ക് പിഴച്ചിട്ടും ഇക്കോഡോറിന്റെ രണ്ട് കിക്കുകൾ തടുത്ത് മാർട്ടിനസ് തന്റെ ടീമിന്റെ സെമി ബർത്ത് ഉറപ്പിച്ചു. സെമിയിൽ കിട്ടിയത് കാനഡയെ ആയിരുന്നു. അതിൽ മെസ്സിയ്ക്കും ഗോൾ നേടാനായി . കൊളംബിയ വരവറിയിച്ചത് ബ്രസീലിനെതിരെയുള്ള സമനിലയോടെയാണ്. റോഡ്രിഗ്രസിന്റെ തിരിച്ചു വരവ് ടീമിനെയും ഉണർത്തി. സെമിയിൽ ഭീഷണിയായ ഉറുഗ്വയെ ലെർമ്മയുടെ ഹെഡർ ഗോളിന് മുട്ട് കുത്തിച്ചു. ബ്രസീൽ നിറം മങ്ങിയിരുന്നു. വിനീഷ്യസ് 2 ഗോളുകൾ നേടിയത് ഒഴിച്ചാൽ കാര്യമായി ആരും തിളങ്ങിയില്ല. ക്വാർട്ടറിൽ ഉറുഗ്വയോട് പെനാൽറ്റി ഷൂട്ട് ഔട്ടിൽ പിഴച്ച് പുറത്തായത് ബ്രസീൽ ആരാധകരെ നിരാശരാക്കി.

കോപ്പാ അമേരിക്കൻ കപ്പിന് ടെലിവിഷൻ ബ്രോഡ്കാസ്റ്റിംഗ് കുറവായിരുന്നെങ്കിലും അമേരിക്കൻ സ്റ്റേഡിയങ്ങളിൽ കാണികൾ തിങ്ങി നിറഞ്ഞിരുന്നു. അർജന്റീന ടീമിന്റെ വിജയാഘോഷത്തിനിടയിൽ കളിക്കാരനായ എൻസോ ഫെർണണ്ടസ്, ഫ്രാൻസിന്റ എംബാപ്പേയെ വംശീയമായി അധിക്ഷേപിച്ച് പാട്ട് (racist chants) വലിയ വിവാദമായിരിക്കുകയാണ്. സംഭവത്തിൽ ഫെർണാണ്ടസ് ക്ഷമ പറഞ്ഞെങ്കിലും ഫ്രാൻസ് പരാതിയുമായി ഫിഫയെ സമീപിച്ചിട്ടുണ്ട്. കളിയുടെ സ്പോർട്സ് മാൻ സ്പിരിറ്റിനെ ബാധിക്കുന്നതാണ് ഇത്തരം സംഭവങ്ങൾ. കളിമികവും വേഗതയും മാനദണ്ഡമാകുമ്പോൾ തന്നെ വലിയ ടൂർണമെന്റിൽ,നിർണ്ണായക മാച്ചുകളിൽ എക്സ്ട്രാ ടൈമിലേക്കും ടൈ ബ്രെക്കറിലേക്കും കളി നീങ്ങുമ്പോൾ,സമ്മർദ്ദം അതിജീവിക്കാനുള്ള കഴിവും ടീമിന്റെ ഒത്തിണക്കവും ഏറെ പ്രാധാന്യമർഹിക്കുന്നു. യൂറോ കപ്പിലും കോപ്പയിലും കളിമികവ് കാട്ടിയവരെ സ്വന്തമാക്കാൻ വൻകിട ക്ലബ്ബുകൾ മത്സരിക്കുകയാണ്. ആരാധകർക്ക് ഇനി അടുത്ത ലോകകപ്പ് വരെ ക്ലബ്‌ മത്സരങ്ങൾ ആസ്വദിയ്ക്കാം.

_{കവര്‍: ജ്യോതിസ് പരവൂര്‍}

ഞങ്ങളുടെ കുട്ടിക്കാലം ഫുട്ബോളിന്റേതായിരുന്നു. ക്രിക്കറ്റ് അന്ന് ജനപ്രിയമായിരുന്നില്ല. നാട്ടിൻപുറം മുഴുവൻ ഫുട്ബോൾ ക്ലബ്ബുകൾ കൊണ്ട് നിറഞ്ഞിരുന്നു. ഒരു ഗ്രാമത്തിൽ ഒരു ക്ലബ്ബ് എന്നത് ഒരാചാരം പോലെ ഏതെങ്കിലുമൊരു’ ചരിത്ര സന്ദർഭ’ത്തിൽ പിറന്നു വീഴും. പിന്നീട് അത് വളർന്ന് പിളർന്ന് പലതായി മാറുന്നതിന് പ്രത്യേക കാരണങ്ങളൊന്നുമുണ്ടായിരുന്നില്ല. ഒരു നോട്ടപ്പിശക്, ഒരു വാക്ക് പിഴ, ഒരു ചെറു പിണക്കം ഇത്രയൊക്കെ മതിയായിരുന്നു ഒരു ക്ലബ്ബ് പിളരാൻ. വളരുംതോറും പിളരുകയും പിളരുംതോറും വളരുകയും ചെയ്യുന്ന പ്രതിഭാസം, കേരള കോൺഗ്രസ്സിനും മുമ്പ് കേരളത്തിൽ നിലനിന്നിരുന്നത് ഫുഡ്ബോൾ ക്ലബ്ബിന്റെ രൂപത്തിലായിരുന്നു.

ലോകഫുഡ് ബോളിന്റെ കളി നിയമങ്ങളിൽ പലതും അന്ന് ‘നാട്ടുഫുഡ്ബോളി’ന് ബാധകമായിരുന്നില്ലെന്നു പറഞ്ഞാൽ പുതുതലമുറ വിശ്വസിക്കാനിടയില്ല. ഒരു ടീം തുടർച്ചയായി മൂന്ന് കോർണർ കിക്കുകൾ വഴങ്ങിയാൽ അത് ഒരു ഗോളായി കണക്കാക്കുമെന്നതൊക്കെ അന്ന് ഞങ്ങളുണ്ടാക്കിയ കളി നിയമങ്ങളിൽ പ്രധാനമായിരുന്നു! തീരെ കളി അറിയാത്ത ഒരാളായിരുന്നു അന്നത്തെ ഗോളി! വേഗത്തിൽ ഓടാനും കളിക്കാനുമറിയാത്തവർക്കുള്ള ശിക്ഷയായിരുന്നു അത്. അതിനും കൊള്ളാത്ത ഒരാളാണ് റഫറി! അത് മിക്കവാറും കളി കാണാൻ വന്ന ആരെങ്കിലുമായിരിക്കും.

തോന്നിയേടത്തൊക്കെ വിസിൽ മുഴക്കി,ഒടുവിൽ കളിക്കാർ ചേർന്ന് റഫറിയെ പുറത്താക്കിയതിന്റെ അനുഭവമൊക്കെ അന്ന് ധാരാളമായിരുന്നു. അസാധരണ സന്ദർഭങ്ങളിൽ റഫറി പന്ത് മുകളിലേക്കെറിഞ്ഞ് കളി തുടരുന്ന ഏർപ്പാടിന് ‘ഓമന്ത്രം’ എന്നായിരുന്നു പറഞ്ഞിരുന്നത്. എന്തോ ഒരു മന്ത്രം ചൊല്ലി റഫറി മുകളിലേക്കെറിയുന്നതുകൊണ്ടാണ് അതിന് ആ പേര് വന്നത് എന്നാണ് വളരെക്കാലം ഞങ്ങൾ ധരിച്ചിരുന്നത്. പിന്നീടെപ്പൊഴോ ആണ് അത് ‘കോമൺ ത്രോ’ എന്ന ഇംഗ്ലീഷ് വാക്കിന് ഏതോ നിരക്ഷരൻ നൽകിയ നാട്ടുതർജ്ജിമയാണെന്ന് മനസ്സിലായത്. ഫുട്ബോൾ അങ്ങനെയാണ്. ഓരോ കാലവും സ്ഥലവും അതിന്റെ കയ്യൊപ്പോടുകൂടിയാണ് അത് ഗ്രാമങ്ങളിൽ നിലനിർത്തിയിരുന്നത്. അങ്ങനെ നോക്കിയാൽ അന്നത്തെ നാട്ടിൻ പുറങ്ങളിൽ ഒരു ഫുട്ബോൾ ഫോക് ലോർ തന്നെ നിലനിന്നിരുന്നുവെന്ന് പറയാം. ലോകത്തിനു മുഴുവൻ ബാധകമായ കളി നിയമങ്ങളൊക്കെ വരുന്നത് ടിവിയിൽകളികണ്ടുതുടങ്ങിയതിൽപ്പിന്നെയാണ്. അതോടെയാണ് വലിയ വലിയ ടൂർണമെൻറുകളൊക്കെ വ്യാപകമാകുന്നതും. അന്ന് ഞങ്ങൾ കോരിത്തരിച്ചിരുന്നത് ഫുട്ബോളിന്റെ എനൗൺസ്‌മെന്റ് കേൾക്കുമ്പൊഴാണ്. ജീപ്പിന് മുകളിൽ കെട്ടിയ കോളാമ്പിയിൽ നിന്ന് ഒരു പ്രത്യേക താളത്തിന്റെ ചടുലതയിൽ അതങ്ങനെ ഒഴുകി വരുമ്പോൾ ഒപ്പം ഊർന്നുവീഴുന്ന നോട്ടീസുകൾക്കായി ജീപ്പിനു പിറകെ ഓടിയതുപോലെ മറ്റൊരു കാര്യത്തിനും ഞങ്ങൾ ഓടിയിട്ടില്ല. ആ എനൗൺസ്മെന്റ് ഭാഷയിലെ ഒരു സവിശേഷ വ്യവഹാര രൂപമായി ഒരു പടപ്പുറപ്പാടിന്റെ ഗൗരവത്തിൽ ഭാഷയിൽ ഇന്നും നിലനിൽക്കുന്നുണ്ട്! ഇങ്ങനെ നാട്ടിൻ പുറത്തിന്റെ സ്വാഭാവിക ജീവിതത്തോടൊപ്പം ഇഴുകിച്ചേർന്ന ഒരു കായിക രൂപം എന്ന നിലയിലാണ് മലയാളിയുടെ രക്തത്തിൽ ഫുഡ്ബോൾ അലിഞ്ഞു ചേർന്നത്. അത് പുറത്ത് നിന്നും വന്ന ഒന്നായിട്ടല്ല, അകത്ത് നിന്നും വികസിച്ചു വന്ന ഒരു കായിക സംസ്കാരമായിട്ടാണ് മലയാളി തിരിച്ചറിയുന്നത്. ക്രിക്കറ്റ് അങ്ങനെയല്ല. അത് ഒരു പ്രത്യേക ഘട്ടത്തിൽ ചില പ്രത്യേക വിഭാഗം മനുഷ്യർ മറ്റുള്ളവർക്ക് പരിചയപ്പെടുത്തിയ ഒരു കളിയാണ്. നമ്മൾ അത് മെനക്കെട്ട് മനസ്സിലാക്കിയെടുത്തതാണ്. ഓലമെടലുകൊണ്ട് എത്ര ബാറ്റുണ്ടാക്കിയാലും, ഫുഡ് ബോളിനോളം അത് നമ്മൾ സ്വാംശീകരിച്ചിട്ടില്ല. മനസ്സിലാക്കുക എന്നതും സ്വാംശീകരിക്കുക എന്നതും വിദ്യാഭ്യാസത്തിലെ പ്രധാനമായ രണ്ട് സങ്കല്പനങ്ങളാണ്. ഇത് പഠിക്കാനുള്ള മികച്ച ഉദാഹരണങ്ങളാണ് ക്രിക്കറ്റും ഫുഡ്ബോളും. കഷ്ടപ്പെട്ട് മനസ്സിലാക്കിയെടുത്തതിന്റെ ഒരു ഇഴുകിച്ചേരായ്മയാണ് ക്രിക്കറ്റിനോടെങ്കിൽ, സ്വാഭാവികമായി സ്വാംശീകരിച്ചതിന്റെ ഒരു തന്മയീഭാവമാണ് മലയാളിക്ക് ഫുഡ്ബോളിനോട്.

ഫുട്ബോൾ ഒരു കളിയും ക്രിക്കറ്റ് ഒരു കാര്യവുമാണ്. അല്പനേരം മാത്രം നീണ്ടു നിൽക്കുന്നത് കളിയും ഒരുപാടുനേരം നീണ്ടുനിൽക്കുന്നത് കാര്യവുമാണ് എന്നതാണിതിന്റെ സാമാന്യയുക്തി. കളിയിൽ അല്പം കാര്യമുണ്ടാകുമ്പോൾ അത് വിനോദവും കളിയിൽ ഒരുപാട് കാര്യങ്ങളുണ്ടാകുമ്പോൾ അത് കച്ചവടവുമായി മാറുന്നു. ക്രിക്കറ്റിൽ കച്ചവടം കളിയെ നിയന്ത്രിക്കുമ്പോൾ ഫുട്ബോളിൽ കളി കച്ചവടത്തെനിയന്ത്രിക്കുന്നു എന്നതാണ് വ്യത്യാസം. രണ്ട് ഓവറുകൾക്കിടയിലുള്ള സമയം കയ്യടക്കുന്നതോടെ ഒരു കളിയെ ആകെത്തന്നെ കയ്യടക്കാൻ പരസ്യക്കമ്പനികൾക്ക് കഴിയുന്നിടത്താണ് ക്രിക്കറ്റ് കളിയിൽനിന്നും കാര്യത്തിലേക്ക് വഴിമാറുന്നത്. ഒരു ബൗളർ പന്ത് മറ്റൊരാളെ ഏല്പിക്കുന്നതുവരെയോ അതുമല്ലെങ്കിൽ, അടുത്ത പന്ത് എറിയാനുള്ള ശ്വാസവേഗം നിയന്ത്രിക്കുന്നതുവരെയോ ഉള്ള സെക്കന്റുകൾ വെറും സെക്കന്റുകൾ മാത്രമല്ലെന്നും അത് കാണികളുടെ ആകാംക്ഷയുടെ അസാധാരണ നിമിഷം കൂടിയാണെന്നും പരസ്യക്കമ്പനികൾ തിരിച്ചറിഞ്ഞതോടെയാണ് ക്രിക്കറ്റിനെ കച്ചവടം നിയന്ത്രിക്കാൻ തുടങ്ങുന്നത്. ആദിമധ്യാന്തം ചടുലതയുടെതയുടെ ഒറ്റച്ചരടിൽക്കൊരുത്ത ഒരു വൈകാരികമുഖമല്ല ക്രിക്കറ്റിനെനിയന്ത്രിക്കുന്നത്. പരസ്യങ്ങളിൽ നിന്ന് ഭിന്നമായി നിലനില്പില്ലാത്തവിധം അടിമുടി കച്ചവടവൽക്കരിക്കപ്പെട്ട ഒരു കായിക വ്യവഹാരമാണത്. പരസ്യവാക്യങ്ങൾ എഴുതിയ ബാറ്റുമായി ബാറ്റ് ചെയ്യാൻ വരാത്ത ബാറ്റ്സ്മാന്മാർ ഒരിക്കലും മികച്ച ബാറ്റ്സ്മാന്മാരാകില്ലെന്ന മുൻ വിധി കാണികൾക്കുണ്ടാകുന്നതതുകൊണ്ടാണ്. സെഞ്ച്വറി അടിച്ചാൽ ഇളകിമറിയുന്ന സ്റ്റേഡിയത്തിനു നേരെ ബാറ്റുയർത്തിക്കാട്ടി ആഹ്ളാദം പങ്കിടുന്നത് ബാറ്റ്സ്മാന്മാരുടെ പതിവാണ്. ഉയർത്തിക്കാട്ടുന്നത് ബാറ്റ് മാത്രമല്ലെന്നും അതിൽ വലിയ അക്ഷരത്തിലെഴുതിയ പരസ്യമാണെന്നും നമ്മളറിയാതിരിക്കുന്നു എന്നതിലാണ് കച്ചവടത്തിലെ കാര്യം ഉള്ളിലൊളിപ്പിച്ച കളിയുടെ മിടുക്ക്. ഇഷ്ടതാരം നേടിയ റൺ ഒരു ആസ്വാദകനു എത്രമേൽ പ്രിയപ്പെട്ടതാണോ അത്രമേൽ പ്രിയപ്പെട്ടതായി അയാളുടെ ബാറ്റിലെഴുതിയ പരസ്യവാക്യവും മനസ്സിൽ പതിയുന്നു എന്നത് അബോധമായി സംഭവിക്കുന്ന ഒന്നാണ്. ‘MRF‘എന്നു വലിയ അക്ഷരത്തിലെഴുതാത്ത ഒരു ബാറ്റ് സച്ചിന്റെ കയ്യിൽ ആരാധകർ പ്രതീക്ഷിക്കുന്നേയില്ല. മണ്ണിലും വിണ്ണിലും തൂണിലും തുരുമ്പിലും ദൈവമുണ്ടെന്ന് പറയുന്നത് പോലെ, ഉടുപ്പിലും നടപ്പിലും സ്റ്റമ്പിലും ബാറ്റിലും ബോളിലും കുടിക്കുന്ന വെള്ളക്കുപ്പിയിലും എന്നുവേണ്ട അരയിൽ തിരുകുന്ന തൂവാലയിൽ വരെ പരസ്യങ്ങളുടെ രഹസ്യം നിറച്ച് കളിക്കമ്പത്തോടൊപ്പം നമ്മളെ ഉല്പന്നങ്ങളുടെ ഉന്മാദലോകത്തെത്തിക്കുന്ന ക്രിക്കറ്റ് കളിയല്ല, കാര്യമാണെന്ന് പറഞ്ഞത് അതുകൊണ്ടാണ്.

നേരിൽക്കാണുന്ന കളിയേക്കാൾ ആവേശം ടി വിയിൽ കാണുന്ന കളിക്കാണെന്ന് കളി നേരിൽക്കണ്ടവർ പറഞ്ഞുകേട്ടിട്ടുണ്ട്. ഇതിനു കാരണം ക്ളോസപ്പുകളും സ്ലോമോഷനും ലോങ്ങ്ഷോട്ടുകളും കൊണ്ടുള്ള ക്യാമറയുടെ കളിയാണ്. ആവേശം എന്നത് നമ്മളിലുണ്ടാകുന്ന ഒന്നല്ലെന്നും അത് ബോധപൂർവ്വം ഉണ്ടാക്കുന്നതാണെന്നും നാം ഇവിടെ തിരിച്ചറിയുന്നുണ്ട്. ജനക്കൂട്ടത്തിന്റെ ആവേശം എന്നാൽ, ആ ജനക്കൂട്ടം എത്തിച്ചേർന്ന സവിശേഷവ്യവഹാരത്തിന്റെ നിർമ്മിതിയാണ്. അടുത്ത ഓവറിനെക്കുറിച്ചുള്ള ആകാംക്ഷയുടെ ലഹരിയിൽ സ്വന്തം ഉല്പന്നങ്ങളുടെ കപടമൂല്യങ്ങളെ സമർത്ഥമായി വിനിമയം ചെയ്യുന്ന ഒരു ‘കൊമേഴ്സ്യൽ ഡിസൈനിംഗ്‘ ക്രിക്കറ്റിനുണ്ട്. പലപ്പോഴും അയഞ്ഞ ഘടനകളെയാണ് വിപണി ആദ്യം കീഴടക്കുന്നത്. നമുക്കൊരു സുചിന്തിതമായ നിലപാടുണ്ടാകുമ്പോൾ നിലപാടിനു പുറത്തുള്ളവയ്ക്കൊന്നും നമ്മളെ കീഴ്പ്പെടുത്താൻ കഴിയാതിരിക്കുന്നത് നിലപാടുകളുടെ കർക്കശമായ ഘടനയ്ക്കകത്ത് നാം ജീവിക്കുന്നത്കൊണ്ടാണ്. നിലപാടുകൾ അയവാർന്നതാകുകയും നിലപാടില്ലായ്മതന്നെ ഒരു നിലപാടായിമാറുകയും ചെയ്യുന്നകാലത്ത് വിപണിയുടെ ‘കളി‘കൾ നമുക്ക് തിരിച്ചറിഞ്ഞേ പറ്റൂ. പറഞ്ഞുവരുന്നത് കളിയിലെ കാര്യത്തെക്കുറിച്ച് തന്നെയാണ്. പരസ്യവിപണിക്ക് ക്രിക്കറ്റിനോളം പഥ്യം ഫുട്ബോളിനോടില്ലാതിരിക്കുന്നത് ഫുട്ബോളിന്റെ ഘടനാപരമായ സവിശേഷതകൊണ്ട് കൂടിയാണ്. ബുദ്ധികൊണ്ടും ശാരീരികക്ഷമതകൊണ്ടും അസാധാരണമായ യുക്തിഭദ്രതകൊണ്ടും ഒന്നരമണിക്കൂർ നടക്കുന്ന ബലാബലങ്ങൾക്കിടയിൽ വിപണിയുടെ പരസ്യമായികലോകങ്ങളിലേക്ക് കാണികളെ കൊണ്ടുപോകാനുള്ള സാധ്യത പരിമിതമായതുകൊണ്ടാണ് ക്രിക്കറ്റിനെ അപേക്ഷിച്ച് രാജ്യാന്തരമൽസരങ്ങൾ ഫുട്ബോളിൽ കുറവാകുന്നത്.

നാലുവർഷം കൂടുമ്പൊഴുള്ള ലോകക്കപ്പും ചില ക്ളബ്ബ് മൽസരങ്ങളുമൊഴിച്ചാൽ വിവിധ രാജ്യങ്ങൾ തമ്മിൽ ഇടതടവില്ലാതെ നടക്കുന്ന സീരീസ് പരമ്പരകൾ ഫുട്ബോളിൽ പതിവില്ലാതിരിക്കുന്നത് പരസ്യ വിപണികളെ അത് അത്രമേൽ മോഹിപ്പിക്കാത്തതുകൊണ്ട് തന്നെയാണ്. പകുതി സമയത്ത്, കളിക്കാർ വിശ്രമിക്കാനെടുക്കുന്ന നേരമൊഴിച്ചാൽ, ലോകമെങ്ങുമുള്ള കോടാനുകോടി കാണികളെ വശത്താക്കാൻ കുത്തകകമ്പനികൾക്ക് മറ്റ് മാർഗ്ഗങ്ങളില്ലാത്തവിധം സുബദ്ധവും സുഘടിതവുമായ ഘടനയാണ് ഫുട്ബോളിന്റെ സവിശേഷത. എന്നു കരുതി അത് പരസ്യങ്ങളിൽ നിന്ന് ഒഴിഞ്ഞു നിൽക്കുന്നുവെന്നർത്ഥമില്ല. ക്ളബ്ബ് ഫുട്ബോളുകളെ നിയന്ത്രിക്കുന്നത് കുത്തകകളുടെ പണംതന്നെയാണ്. എന്നാൽ ആസ്വാദനത്തിന്റെ ഒന്നരമണിക്കൂർ ദൈർഘ്യത്തിനിടയിൽ കാണികളുടെ കായികാഭിരുചിയെ ഉല്പന്നാഭിരുചിയിലേക്ക് സമർത്ഥമായി വിനിമയം ചെയ്യാനുള്ള വിപണിയുടെ പരിശ്രമങ്ങളെ ഫുട്ബോൾ വലിയ അളവിൽ ഘടനാപരമായി പ്രതിരോധിക്കുന്നുണ്ട്. സ്റ്റേഡിയത്തിനു ചുറ്റും സ്ഥാപിച്ച പരസ്യബോഡുകളിലേക്ക് ഒരു സെക്കന്റ് പോലും ക്യാമറ തിരിച്ചുവെയ്ക്കാൻ പറ്റാത്തവിധം ചടുലവും തീക്ഷ്ണവുമാണ് ഫുട്ബോളിലെ നീക്കങ്ങൾ. ഒരു റണ്ണെടുത്താൽ പിച്ചിനു നടുവിൽ വന്ന് കൈകൾ പരസ്പരം കൂട്ടിമുട്ടിച്ച് സ്വകാര്യം പറഞ്ഞ് പരസ്യവാചകം കാണുന്നമട്ടിൽ ബാറ്റ് പലമട്ടിൽ തിരിച്ചുപിടിച്ച് നിൽക്കുന്ന ബാറ്റ്സ്മാൻമാരെപ്പോലെ ഒരു പന്ത് എതിരാളികൾക്ക് നേരെയടിച്ചാൽ സഹകളിക്കാരുമായി ഒന്നു സന്തോഷം പങ്കിടാൻ പോയിട്ട് കാണികൾക്ക് നേരെ ഒന്നു കൈവീശാൻ പോലും കളിക്കാരെ അനുവദിക്കാത്തവിധമുള്ള വേഗതയുടെ രസതന്ത്രമാണ് ഫുട്ബോളിന്റെ മർമ്മം. ഗോളടിക്കുന്നതിന്റെ ഇടവേളകൾ പോലും സെക്കന്റുകൾ മാത്രം നീണ്ടുനിൽക്കുന്ന ആഹ്ളാദപ്രകടനങ്ങളിലൊതുങ്ങുന്നു.

അശ്രദ്ധയുടെ നിസ്സാര പഴുതുകൾ പോലും മഹാദുരന്തങ്ങളിലേക്കുള്ള വാതിലാണെന്ന ബോധ്യമാണ് ഇവിടെ ഓരോ കളിക്കാരനെയും നയിക്കുന്നത്. യാദൃശ്ചികതയുടെ നിമിഷങ്ങളിൽ നിന്നാണ് അത് വൈവിധ്യങ്ങൾ കണ്ടെടുക്കുന്നത്. രണ്ട് തൂണുകൾക്കിടയിലെ ദൂരം അളന്നുതീർക്കാനാകാത്ത ധർമ്മസങ്കടങ്ങളുടെ പേരാണ് ഗോളി. വെടിയുണ്ടകൾ പോലെ തനിക്കുനേരെവരുന്ന ബോളുകൾ തനിക്കുനേരെയല്ലെന്നും തന്റെ രാജ്യത്തിനു നേരെയാണെന്നും തിരിച്ചറിയുന്നിടത്താണ് ഒരു ഗോളി ഒരേസമയം രക്ഷകനും നിസ്സഹായനുമായി മാറുന്നത്. പത്തുപേരുടെ നിസ്സഹായത മുഴുവൻ ചാട്ടുളിയായി തന്റെനേർക്കു വരുന്നതിനെ നെഞ്ചുവിരിച്ച് നേരിടാനുള്ള കരുത്താണ് ഒരു ഗോളിയുടെ മൂലധനം. ഒരു ജാലവിദ്യക്കാരന്റെ വൈദഗ്ധ്യത്തോടെ റഫറി പോക്കറ്റിൽനിന്ന് പുറത്തെടുക്കുന്ന മഞ്ഞയും ചുവപ്പും നിറങ്ങൾ കളിക്കാരന്റെമാത്രമല്ല കായികഭൂപടത്തിൽ ഒരു രാജ്യത്തിന്റെ തന്നെ വിധി നിർണ്ണയിക്കുന്നു. ഓരോതെറ്റുകൾക്കും വിചാരണകൂടാതെ നിറങ്ങൾകൊണ്ട് ശിക്ഷ വിധിക്കുന്ന അതിവേഗകോടതിയാണത്. മഹാമേരുക്കളുടെ പതനവും നിസ്സാരന്മാരുടെ അഭ്യുദയവും ഇഴപിരിഞ്ഞ യാദ്ശ്ചികതയുടെ മറുപേര്.

കളി കാര്യമായി മാറുന്നത് നമ്മുടെ ദൈനംദിന ജീവിതാനുഭവമാണെങ്കിലും അത് അത്ര നിസ്സാരമായ കാര്യമല്ല. പാക്കിസ്ഥാൻ ജയിക്കുമ്പോൾ മലപ്പുറത്തെ ചിലർ ആഹ്ളാദിക്കുന്നുവെന്നാരോപിച്ച് ക്രിക്കറ്റിനെ വർഗ്ഗീയ വിദ്വേഷത്തിന്റെ വ്യവഹാരമാക്കാൻ ചിലർ ബോധപൂർവ്വം ശ്രമിക്കാറുണ്ട്. എന്നാൽ, ഈ വാദം എന്തുകൊണ്ട് ഫുട്ബോളിൽ പ്രവർത്തിക്കുന്നില്ലെന്നത് നമ്മളാരും എന്തുകൊണ്ടോ ചോദിക്കാറില്ല. മറുചേരിയിൽ ഏത് മതരാഷ്ട്രം വന്നു നിന്നാലും അർജ്ജന്റീനയ്ക്കും ബ്രസീലിനും ജർമ്മിനിക്കും പോർച്ചുഗലിനും വേണ്ടി അലറിവിളിക്കുന്ന കായികാവേശം ഒരു ജനവിഭാഗത്തിനു മേൽ പതിഞ്ഞ എല്ലാ ആരോപണങ്ങളെയും മായ്ച്ചുകളയുന്നുണ്ട്. വംശീയതയുടെയും മതബോധത്തിന്റെയും ഭാഷാഭേദത്തിന്റെയും അതിർത്തികൾ ചടുലവേഗങ്ങൾകൊണ്ട് മറികടക്കുന്ന അസാധാരണമായ സാധാരണത്വം ഫുട്ബോളിന്റെ സവിശേഷതയായി നാം തിരിച്ചറിയുന്നു. എല്ലാ മലയാളിയും ഏതെങ്കിലുമൊരു പക്ഷത്ത് നിലയുറപ്പിക്കുന്ന കാലമാണിത്. കാലിൽ ചിറകു മുളച്ച മനുഷ്യർക്ക് വേണ്ടി, അവരെ അതിനു പ്രാപ്തരാക്കുന്ന രാജ്യങ്ങൾക്ക് വേണ്ടി പക്ഷം പിടിക്കുന്ന മലയാളി നിഷ്പക്ഷതയുടെ നാട്യങ്ങളെ താൽക്കാലികമായെങ്കിലും അഴിച്ചുവെയ്ക്കുന്നു എന്നതാണ് ഈ കാൽപ്പന്തുകളിയുടെ രാഷ്ട്രീയമായ ഉള്ളടക്കം.