അഭിമുഖം

വീടിനോട് ചേർന്ന ചെറു കൃഷിയിടങ്ങളിലും, മുറ്റത്തും മട്ടുപ്പാവിലും പച്ചക്കറിയും പൂച്ചെടികളും കൃഷി ചെയ്തു പുത്തൻ അനുഭവങ്ങൾ വിളയിക്കുന്ന ഒരു സമൂഹം വികസിച്ചു വരുന്നുണ്ട്. ഇവർക്ക് മാർഗ നിർദേശങ്ങളും സാങ്കേതിക സഹായവും നൽകുന്ന ഗ്രൂപ്പുകൾ സാമൂഹ്യ മാധ്യമത്തിൽ സജീവമാണ്. അത്തരം ഏതാനും കാർഷിക സംരംഭകരെ മലയാളനാട് പരിചയപ്പെടുത്തുന്നു.

കൃഷിയിലേക്കുള്ള വരവ്, മുൻപരിചയം, അവലംബിച്ചിരിക്കുന്ന കാർഷിക രീതി, ഫലങ്ങൾ, വെല്ലുവിളികൾ, അനുഭവങ്ങൾ എന്നിവയാണ് യുവകാർഷിക സംരംഭകർ പങ്കുവെക്കുന്നത്.

റൈഹാനത്ത്( 45).

സ്വദേശം കുടുംബം :

സ്വദേശം മലപ്പുറം. ഭർത്താവും രണ്ടു മക്കളും അടങ്ങുന്ന കുടുംബം.

കൃഷിയിലേക്കുള്ള വരവ് :

ഞാൻ ടെറസിൽ ഗ്രോ ബാഗുകളിൽ ആണ് കൃഷി തുടങ്ങിയത്. FB യിലെ “മുറ്റത്തെ കൃഷി” ഗ്രൂപ്പിൽ എത്തിയതിനു ശേഷം ശാസ്ത്രീയമായ രീതിയിൽ മണ്ണൊരുക്കാനും, വളം കൊടുക്കാനും കീട നിയന്ത്രണം നടത്തുവാനും ശീലിച്ചു തുടങ്ങി. ചെറിയതോതിൽ ആണെങ്കിലും ഗ്രൂപ്പിൽ ആദ്യമായ് കമ്പോസ്റ്റ് ഉണ്ടാക്കി വിജയിപ്പിച്ച അനുഭവം ആണ് എന്റേത്.

ഇപ്പോൾ സ്വന്തമായ വീട്ടിലേക്കു മാറി. ഇവിടെ കുറേക്കൂടി സ്ഥലവും മുറ്റവും ഉള്ളതിനാൽ മുറ്റത്ത് ഫാം ബെഡുകൾ ഉണ്ടാക്കി കൃഷി ചെയ്യണം എന്നു പദ്ധതിയിട്ടു. കൃത്യമായ അളവിലും ആകൃതിയിലും ഒരടി ആഴത്തിൽ കുഴിയെടുത്തു ഓടുകൾ കൊണ്ട് അതിരിട്ടാണ് ആ ബെഡ് ഒരുക്കുക. അതിൽ ലേയറുകളായി ഉണക്കില, പച്ചില, പുല്ല്, ചാണകം, ആട്ടിൻ കാട്ടം, ചുണ്ണാമ്പ്, എല്ലുപൊടി, പിണ്ണാക്ക് തുടങ്ങിയവ പരത്തി ഇട്ടുകൊടുത്ത്, ഇടക്കിടെ കുഴിച്ചു മാറ്റിയ മണ്ണ് തൂവി, അതിൽ നനച്ചു കൊടുത്ത് ആണ് ബെഡ് തയ്യാറാക്കിയത്. ബെഡുകൾ തയ്യാറാക്കിയാൽ കാലതാമസം കൂടാതെ ചെടികൾ നടാം. പലതരം ചെടികൾ ഇടകലർത്തി നടുന്നതാണ് നല്ലത്. ഇത് പലതരം സൂക്ഷ്മ ജീവികൾ ബെഡിലെ മീഡിയത്തിൽ വളരാൻ സഹായിക്കും. ഇത്തരം ബെഡുകൾ ഉയർന്ന ഫലപുഷ്ടി ഉള്ളവ ആയതുകൊണ്ട് ആരോഗ്യമുള്ള വളർച്ച ഉണ്ടാവുന്നു. ബാഗുകൾ, ചട്ടികൾ എന്നിവയെപ്പോലെ ഇടയ്ക്കിടെ നിറയ്ക്കുകയോ മാറ്റുകയോ വേണ്ട എന്ന മെച്ചമുണ്ട്.

അടുത്തതായി വേണുഗോപാൽ മാഷുടെ മാർഗനിർദേശത്തിൽ മറ്റൊരു രീതി പരീക്ഷിക്കുവാൻ പോവുകയാണ്. വ്യാസമുള്ള, തുളയിട്ട പി വി സി പൈപ്പുകൾ കുഴിയിൽ കുത്തിനിർത്തുകയും അടിയിൽ ബന്ധിപ്പിക്കകയും ചെയ്തു കമ്പോസ്റ്റിന് വേണ്ട വസ്തുക്കൾ നിക്ഷേപിക്കുക, OWDC പോലുള്ള ദ്രവണത്വരകങ്ങൾ ചേർക്കുക എന്നതാണ് ഈ രീതി. കമ്പോസ്റ്റു കുഴികളിലെപ്പോലെ മിശ്രിതം ഇടക്കിടെ കുത്തിയിളക്കികൊടുക്കേണ്ട. അതു നല്ല അധ്വാനമുള്ള പണിയാണ്.

സഹായത്തിനു ആളെ കിട്ടാനില്ല എന്നതാണ് ബുദ്ധിമുട്ട്. പൊതുവെ സഹായം തേടിയാൽ മെയ്യനങ്ങി പണിയെടുക്കാൻ അധികം പേരും തയ്യാറില്ല എന്നാണ് തടസ്സം. അങ്ങനെയുള്ള സാഹചര്യത്തിൽ എന്തെങ്കിലും വയ്യായ്ക ഉള്ളവർക്കും ശാരീരിക അധ്വാനം ബുദ്ധിമുട്ടായവർക്കും പിവിസി പൈപ്പുകൾ ഉപയോഗിച്ചുള്ള മേൽ സംവിധാനം വളരെ ഉപകാരപ്പെടും. ആദ്യം കുറച്ചു പണച്ചിലവുള്ള രീതിയാണ്. പക്ഷെ മേല്പറഞ്ഞ ഗുണ ഫലങ്ങൾ സ്ഥിരമായി ലഭിക്കും എന്നത് കൊണ്ടു അതിനെ അനുകൂലിക്കുന്നു.

കുറേ പദ്ധതികൾ മനസ്സിലുണ്ട്. മുറ്റം ലാൻഡ്സ്‌കേപ്പ് ചെയ്യുകയും ചെറുതെങ്കിലും ഒരു പുൽത്തകിടി ഉണ്ടാക്കുകയും അതിൽ പെടുന്നു. ചില ശാരീരിക വിഷമതകൾ ഉണ്ട്. പക്ഷെ തോട്ടത്തെയും ചെടികളെയും കുറിച്ച് ആലോചിക്കുകയും അവിടെ പണിയെടുക്കുകയും ചെയ്യുമ്പോൾ വല്ലാത്ത ഒരുന്മേഷമാണ്.

മുറ്റത്തെ കൃഷി ഗ്രൂപ്പിനെ പറ്റിയും വേണുഗോപാൽ മാഷെപ്പറ്റിയും പറയുമ്പോൾ ഉള്ളു നിറയെ നന്ദിയും സന്തോഷവും ആണ്. എപ്പോൾ, എത്ര പ്രാവശ്യം ചോദിച്ചാലും ആവശ്യമുള്ള നിർദേശങ്ങൾ കിട്ടും. മിക്ക സംശയ നിവാരണങ്ങളും ഗ്രൂപ്പിൽ വോയിസ്‌ മെസ്സേജ് ആയും വീഡിയോ കളായും തരുന്നത് കൊണ്ട് എല്ലാവർക്കും ഉപയോഗപ്പെടും.

സ്കൂൾ വിദ്യാർത്ഥിയായ മകൻ കൃഷിക്കാര്യങ്ങളിൽ താല്പര്യം കാണിക്കുന്നുണ്ട്. അവന്റെ സഹായവും കിട്ടിത്തുടങ്ങിയിരിക്കുന്നു.

മുൻപ് ചെയ്ത ഗ്രോ ബാഗ് കൃഷിയുടെയും ഇപ്പോൾ തുടക്കം കുറിച്ചിരിക്കുന്ന മൺതടമൊരുക്കൽ, പി വി സി കമ്പോസ്റ്റ് നിർമാണ രീതിയുടെയും ഫോട്ടോകൾ ഒപ്പം കൊടുക്കുന്നു.

വീടിനോട് ചേർന്ന ചെറു കൃഷിയിടങ്ങളിലും, മുറ്റത്തും മട്ടുപ്പാവിലും പച്ചക്കറിയും പൂച്ചെടികളും കൃഷി ചെയ്തു പുത്തൻ അനുഭവങ്ങൾ വിളയിക്കുന്ന ഒരു സമൂഹം വികസിച്ചു വരുന്നുണ്ട്. ഇവർക്ക് മാർഗ നിർദേശങ്ങളും സാങ്കേതിക സഹായവും നൽകുന്ന ഗ്രൂപ്പുകൾ സാമൂഹ്യ മാധ്യമത്തിൽ സജീവമാണ്. അത്തരം ഏതാനും കാർഷിക സംരംഭകരെ മലയാളനാട് പരിചയപ്പെടുത്തുന്നു.

കൃഷിയിലേക്കുള്ള വരവ്, മുൻപരിചയം, അവലംബിച്ചിരിക്കുന്ന കാർഷിക രീതി, ഫലങ്ങൾ, വെല്ലുവിളികൾ, അനുഭവങ്ങൾ എന്നിവയാണ് യുവകാർഷിക സംരംഭകർ പങ്കുവെക്കുന്നത്.

ഷെരീഫ (36)

സ്വദേശം, കുടുംബം :

സ്വദേശം തൃശൂർ ജില്ലയിലെ പഴയന്നൂർ. ഭർത്താവും നാലുമക്കളും അടങ്ങുന്നതാണ് കുടുംബം. റൈസ് മിൽ ആണ് കുടുബ ബിസിനസ്.

കൃഷിയിലെ മുൻപരിചയം :

മുറ്റത്തു ചില ചെടികൾ നടുക എന്നത് മാത്രമായിരുന്നു രണ്ടു മൂന്നു വർഷം മുൻപ് വരെ. FB യിലെ ചില പച്ചക്കറി ഗ്രൂപ്പുകളിൽ കയറി ഇറങ്ങാറുണ്ടായിരുന്നു. അവിടെ പറയുന്നതൊന്നും എനിക്ക് ചെയ്യാൻ പറ്റുമെന്നു തോന്നിയിട്ടില്ല. 2021 ജനുവരിയിൽ ആണ് “മുറ്റത്തെ കൃഷി” ഗ്രൂപ്പിൽ എത്തുന്നത്. അത് ഒരു പുതിയ തുടക്കമായിരുന്നു. ഗ്രൂപ്പിലെ സന്ദേശങ്ങളും ക്ലിപ്പുകളും കണ്ടു, ഞാൻ അഡ്മിൻ വേണുഗോപാൽ മാഷെ നേരിട്ട് വിളിച്ചു സംശയനിവൃത്തി വരുത്തുകയായിരുന്നു. കൃഷി കീറാമുട്ടിയല്ല എന്നാണ് എനിക്ക് കിട്ടിയ ആദ്യ പ്രോത്സാഹനം.

ഇപ്പോൾ അവലംബിച്ചിരിക്കുന്ന കൃഷിരീതി :

ഒറ്റനില വീടായത് കൊണ്ട് ടെറസ് കൃഷിയാണ് ഏറ്റവും യോജിച്ചത് എന്ന് മനസ്സിലായി. അധ്വാനവും പണച്ചിലവും മൂലം അതുവരെ കമ്പോസ്റ്റ് ഉണ്ടാക്കാം എന്ന ധൈര്യം ഉണ്ടായിരുന്നില്ല. എന്നാൽ മുറ്റത്തെ കൃഷി ഗ്രൂപ്പിൽനിന്ന് കിട്ടിയ വീഡിയോയും വേണുഗോപാൽ സാറിൽ നിന്ന് ലഭിച്ച നിർദേശങ്ങളും അനുസരിച്ചു ഞാൻ കമ്പോസ്റ്റ് ഉണ്ടാക്കി. ഇപ്പോൾ മുറ്റത്തും തൊടിയിലും വീടിനു ചുറ്റും കിട്ടുന്ന ഇലയും പുല്ലും പാഴ് ജൈവാവശിഷ്ടങ്ങളും ശേഖരിച്ചു ആവശ്യത്തിന് ചാണകം ആട്ടിൻ കാട്ടം തുടങ്ങിയവ ചേർത്ത് പോഷകസമൃദ്ധമായ കമ്പോസ്റ്റ് ഉണ്ടാക്കി അതിലാണ് ചെടികൾ വളർത്തുന്നത്. മണ്ണ് ഉപയോഗിക്കാറില്ല. കമ്പോസ്റ്റ് നിർമ്മാണം ഒരു തുടർ പ്രക്രിയയാണ് എനിക്ക്. അതിന്റെ ഗുണങ്ങൾ പലതാണ്. വീട്ടിൽ ഉണ്ടാകുന്ന ഭക്ഷണാവശിഷ്ടങ്ങളും മുറ്റത്തും വഴിയിലും ഉണ്ടാവുന്ന പുല്ലും ചെടികളും കൊഴിയുന്ന ഉണക്കിലകളും എല്ലാം കമ്പോസ്റ്റിലേക്ക് പോകുന്നതുകൊണ്ട് വീടും പരിസരവും ശുചീകരിക്കപ്പെടുന്നു. പലതരം സസ്യങ്ങളിൽ അടങ്ങിയ വ്യത്യസ്ത ധാതു ക്കൾ ചേരുന്നതുകൊണ്ട് പോഷകഗുണം വർദ്ധിക്കുന്നു.

മണ്ണ് ഉപയോഗിക്കാത്തത് കൊണ്ട് ഓരോ തവണയും നടുന്നതിനു മുൻപായി മണ്ണ് പുറത്തിട്ടു treat ചെയ്യേണ്ടി വരുന്നില്ല. അതിന്റെ അധ്വാനവും വെയിലത്ത് ഉണക്കാൻ വേണ്ട കാലതാമസവും ഒഴിവാവുന്നു. തുടക്കത്തിൽ ഉപയോഗിച്ച ഗ്രോ ബാഗുകൾ ഉപേക്ഷിച്ചു പിന്നീട് പ്ലാസ്റ്റിക് പാത്രങ്ങളും ചട്ടികളും ഉപയോഗിക്കാൻ തുടങ്ങി. രണ്ടോ മൂന്നോ തവണകളോടെ കേടുവന്നു പോകുന്നതുകൊണ്ട് ഗ്രോബാഗുകൾ വലിയ അളവിൽ മാലിന്യത്തിനു കാരണമാവുന്നുണ്ട്. കൂടുതൽ പാത്രങ്ങൾ പ്ലാസ്റ്റിക് പാത്രക്കടയിൽ നിന്ന് മൊത്തനിരക്കിൽ ഒരുമിച്ചു വാങ്ങിക്കുമ്പോൾ ചിലവ് കുറയും. വാഹനമോടിക്കാൻ പഠിച്ചതുകൊണ്ട് ഞാൻ നേരിട്ട് പോയി തിരഞ്ഞു വാങ്ങിക്കുകയാണ് പതിവ് ഇപ്പോൾ മുന്നൂറോളം പാത്രങ്ങളിൽ ടെറസ് കൃഷി ഉണ്ട്.

കമ്പോസ്റ്റിലെ സൂക്ഷ്മ ജീവികൾ എങ്ങനെ ചെടികളുടെ വളർച്ചയെ സ്വാധീനിക്കുന്നു എന്നു പഠിച്ചത് പുതിയ അറിവായി. അവയെ സംരക്ഷിക്കുന്നതിലൂടെയാണ് കൃഷി പോഷിപ്പിക്കേണ്ടതെന്ന് മനസ്സിലായപ്പോൾ അവയെ നശിപ്പിക്കുന്ന ഒന്നും ഉപയോഗിക്കാതായി. ഇതിനെക്കുറിച്ചു വിശദമായ സാങ്കേതിക പാഠം ലഭിച്ചത് യുട്യൂബിലെ വീഡിയോ വഴിയും ഗ്രൂപ്പിൽ നിന്നും വേണുഗോപാൽ സാറിൽ നിന്നുമാണ്.

കീടനശികരണം :

പിന്നീട് വേണ്ട പോഷകത്തിനും കീടനശികരണത്തിനും “ഗ്രീൻ പ്ലാനറ്റ്” ഉത്പന്നങ്ങൾ ഉപയോഗിക്കുന്നു. താരതമ്യേന ഉയർന്ന വിലയാണ്. പക്ഷെ ചെറിയ അളവിൽ ഉപയോഗിച്ചാൽ മതി എന്നത് കൊണ്ട് ഇവയ്ക്കുള്ള പണച്ചിലവ് കുറവാണ്. ആരോഗ്യമുള്ള മിശ്രിതത്തിൽ വളരുന്നത് കൊണ്ട് കീടങ്ങളുടെ ആക്രമണം തീരെ കുറവാണ്.

കാർഷികവൃത്തിയിൽ നിന്നുള്ള അനുഭവം :

വിത്തിട്ടു വളർത്തി വിളവ് കിട്ടുന്നതിന് അപ്പുറം ഈ കാർഷിക വൃത്തി എന്റെ ജീവിതത്തെ ആകെ മാറ്റി മറിച്ചു എന്നതാണ് വാസ്തവം.കൂടുതൽ പഠിച്ചില്ല, ജോലി ചെയ്തില്ല, വീട്ടുപണികളിൽ കുടുങ്ങിക്കിടന്നു തുടങ്ങിയ പരാതികൾ, കുടുംബത്തിൽ നിന്നും ചുറ്റുപാടിൽ നിന്നും ഉണ്ടാകുന്ന പ്രശ്നങ്ങൾക്ക് ചുറ്റും ആലോചിച്ചു കൂട്ടുന്ന സങ്കടങ്ങൾ എന്നിവയാണ് ഇതോടെ പുറത്ത് കടന്നത്. ഇപ്പോൾ മറ്റു പണികളൊരുക്കി നേരെ കൃഷിയിടത്തിലേക്കെത്തുക എന്നതായി എന്റെ ദിനചര്യ. നേരിട്ടുള്ള അധ്വാനമോ ഇടപെടലോ ഇല്ലെങ്കിലും പൂർണമായ പിന്തുണയാണ് ഭർത്താവിൽ നിന്നും കിട്ടുന്നത്.

വേണുഗോപാൽ സാറിനോട് നേരിട്ടോ “മുറ്റത്തെകൃഷി” ഗ്രൂപ്പിലോ സംശയമോ പ്രശ്നപരിഹാരമോ ചോദിച്ചപ്പോഴൊക്കെ ഉടൻ മറുപടി ലഭിച്ചിട്ടുണ്ട്. ഇന്ന് ചെയ്യേണ്ടത് ഇന്ന് ചെയ്യണം, നീട്ടിവെക്കരുത് എന്നാണ് ഇവിടെനിന്നു ഞാൻ പഠിക്കുകയും പകർത്തുകയും ചെയ്തത്. കൃഷിയിലും ജീവിതത്തിലും.

തോട്ടത്തിൽ നിന്ന് ശേഖരിച്ച വിഭവങ്ങളുടെ ചില ഫോട്ടോകൾ കൂടുതൽ പറയുമെന്ന് ഞാൻ കരുതുന്നു.

കാർഷിക സംരംഭകനും കൺസൾട്ടന്റും ആയ വേണുഗോപാൽ മാധവ് സൂക്ഷ്മജൈവ പുനരുജ്ജീവന കൃഷി പരിചയപ്പെടുത്തുന്നു. കഴിഞ്ഞ ഏതാനും വർഷങ്ങളായി Regenerative ultra organic farming രംഗത്തു പ്രവർത്തിക്കുന്ന ആളാണ് വേണുഗോപാൽ. ഫാമുകൾ ഉണ്ടാക്കുക, പരിപാലിക്കുക, സംരക്ഷിക്കുക, പഴയ ഫാമുകളെ പുനരുജ്ജീവന കാർഷിക രീതിയിലേക്ക് പരിവർത്തനം ചെയ്യുക എന്നിവയാണ് അദ്ദേഹം മുന്നോട്ടു വെക്കുന്ന സേവനങ്ങൾ. മേത്തരം ജൈവ വളങ്ങൾ, ജൈവകീട നാശിനികൾ എന്നിവയുടെ വിതരണവും ഉണ്ട്.

വേണുഗോപാലുമായുള്ള സംഭാഷണങ്ങളിൽ നിന്നും യൂ ട്യൂബിലെ അദ്ദേഹം പുറത്തിറക്കിയ വീഡിയോകളെ ആശ്രയിച്ചും ഫീച്ചർ തയ്യാറാക്കിയത് പി എൽ ലതിക.

ചോ : എന്താണ് ഓർഗാനിക് ​അഥവാ ജൈവകൃഷി?

ഉ: ആദ്യകാലത്തു കൃ​ഷി പ്രകൃതിയിൽ ലഭ്യമായ ഘടകങ്ങളെ മാത്രം ആശ്രയിച്ചുകൊണ്ടുള്ള ഒരു ​സമ്പ്രദായമായിരുന്നു . ലോകയുദ്ധാനന്തരകാലത്തിലാണ്, രാഷ്ട്രങ്ങളുടെ ശ്രദ്ധ വർധിച്ച കാർഷികോൽപാദനത്തിലേക്കു തിരിയുന്നത്. തൽഫലമായി അത്യുല്പാദന ശേഷിയുള്ള വിത്തുകൾ, രാസ ചേരുവകൾ അടങ്ങിയ കൃത്രിമ വളങ്ങൾ എന്നിവ കണ്ടു പിടിക്കപ്പെട്ടു.​ ഭക്ഷ്യോൽപ്പാദന രംഗത്ത് വൻ കുതിച്ചു ചാട്ടമാണ് രാസകൃഷിയിലൂടെ ലോകം കൈവരിച്ചത്. പക്ഷെ കാലക്രമേണ മണ്ണിന്റെ സഹജ സ്വഭാവം നഷ്ടപ്പെടുകയും, കീടദോഷങ്ങൾ പെരുകുകയും, ഉത്പന്നങ്ങൾ പുതിയ ആരോഗ്യപ്രശ്നങ്ങൾ ഉണ്ടാക്കുകയും ചെയ്തപ്പോഴാണ് 70- 80 കാലഘട്ടത്തോടെ ഓർഗാനിക് അഥവാ ജൈവ കൃഷി രീതികൾ വീണ്ടും പരിഗണനയിൽ വന്നത്. ഒരു തിരിച്ചു പോക്ക് പ്രയോഗികമോ ലാഭകരമോ അല്ലായിരുന്നു. ​സ്വീകാര്യമായ ഒരു ബ​ദലിനു വേണ്ടി ലോകകാർഷികരംഗം ഗവേഷണങ്ങൾ തുടർന്നു. അതിന്റെ ഫലമായാണ് സൂക്ഷ്മ ജൈവ കൃഷി രീതികൾ പരീക്ഷിക്കപ്പെടുന്നത്.

ചോ : അൾട്രാ ഓർഗാനിക് റീജനറേറ്റീവ് അഥവാ സൂക്ഷ്മ പുണരുജ്ജീവന ജൈവ കൃഷി എന്ന ആധുനിക രീതി വിവരിക്കാമോ?

സസ്യങ്ങൾ മണ്ണിൽ നിന്ന് പോഷകം വലിച്ചെടുത്തു പുഷ്ടിപ്പെടുകയും കായ്ഫലം നൽകുകയും ചെയ്യുന്നു എന്നും വളപ്രയോഗത്തിലൂടെ അതു മെച്ചപ്പെടുത്താം എന്നും ഉള്ള സ്ഥൂലസങ്കല്പം തിരുത്തപ്പെടുന്ന​തോ​ടെയാണ് ഒരു സമൂലമാറ്റം സംഭവിക്കുക.

ഈ കേവലക്രിയക്കപ്പുറം മണ്ണിലെ സൂക്ഷ്മജീവികളുടെ ( microbes ) പ്രവർത്തനങ്ങളും ജീവിത ചക്രവും മണ്ണിന്റെ പുഷ്ടിയിലും സസ്യങ്ങളുടെ വളർച്ചയിലും വരുത്തുന്ന മാറ്റങ്ങളും അവയും സസ്യങ്ങളും തമ്മിലുള്ള പരസ്പര സന്ധാരണവും സംബന്ധിച്ചുള്ള പുതിയ അറിവുകളാണ് പുതിയ രീതിക്ക് അടിസ്ഥാനം. സൂക്ഷ്മജീവികൾ മണ്ണിൽ നിന്ന് മൂലകങ്ങൾ സ്വീകരിച്ചു ആഹാരം ഉൽപ്പാദിപ്പിക്കുകയും കോശഭിത്തികളിൽ സൂക്ഷിക്കുകയും അവ വേരുകൾക്കുള്ളിലേക്ക് ആകർഷിക്കപ്പെടുകയും അവിടെ വെച്ച്‌ സസ്യങ്ങൾ കോശഭിത്തിയെ ആഗിരണം ചെയ്ത് സൂക്ഷ്മജീവികളെ മണ്ണിലേക്ക് തന്നെ പുറംതള്ളുകയും ചെയ്യുന്നു എന്ന് കണ്ടുപിടിക്കപ്പെട്ടു. ഇത് ഒരു തുടർപ്രക്രിയയാണ്. ഇതിനിടെ സസ്യമൂലങ്ങളിൽ നിന്നുള്ള സ്രവങ്ങൾ മണ്ണിനെ പുഷ്ടിപ്പെടുത്തുന്നുമുണ്ട്. അങ്ങനെ നോക്കുമ്പോൾ സസ്യങ്ങൾ മാംസഭുക്കുകൾ ആണ് എന്ന് പറയാം​. വേരുകൾ മൈക്രോബുകളെ വേരുകളിലേക്കു ആകർഷിച്ചു വളർച്ചക്കാവശ്യമായ മൂലകങ്ങൾ വലിച്ചെടുക്കുന്ന പ്രക്രിയയെ “റൈസോഫജി” എന്ന് പറയുന്നു. പുറമെ മൈക്രോബുകളുടെ സ്രവങ്ങൾ, അവയുടെ മൃതപിണ്ഡം എന്നിവ മണ്ണിലേക്ക് ചേർന്ന് ഓർഗാനിക് ഉള്ളടക്കം വർദ്ധിക്കുകയും കാർബൺ ഫിക്സിങ് ഉയർന്നതോതിൽ നടക്കുകയും ചെയ്യുന്നു. അങ്ങനെയാണ് സൂക്ഷമജൈവ കൃഷി സ്വയം നിലനിൽക്കുന്ന മാതൃകയാവുന്നുന്നത്.

ചോ : ഇതിനാവശ്യമായ വളപ്രയോഗം?

കൃത്രിമ രാസവളങ്ങൾ കൃഷിയേക്കാളേറെ വ്യവസായമാണ്. വിപണിയും ലാഭവും ആണ് അവയുടെ അളവും സമയക്രമവും നിശ്ചയിക്കുന്നത്. സൂക്ഷ്മ ജൈവ കൃഷിയിൽ മണ്ണിനു ആവശ്യമുള്ള മൂലകങ്ങൾ ആവശ്യമുള്ള അളവിൽ നൽകുന്നതാണ് വള പ്രയോഗം. വ്യത്യസ്തമായ തോതിൽ അവശ്യ ഘടകങ്ങൾ ചേർത്ത് കമ്പോസ്റ്റ് ചെയ്യുകയും ആവശ്യത്തിനനുസരിച്ചു പ്രയോഗിക്കുകയും ചെയ്യുന്നു. വളത്തിന്റെ അളവ് താരതമ്യേന കുറവാണ്.

ചോ : കീട നശികരണമോ?

മേൽ രീതിയിൽ inputs സ്വീകരിച്ചു വളരുന്ന സസ്യങ്ങൾക്കും മണ്ണിനും ഭേദപ്പെട്ട പ്രതിരോധ ശക്തി സിദ്ധിക്കുന്നു. പല നിരുപദ്രവമായ ജൈവ കീടനാശിനികൾ കൃത്യമായ ഏറ്റവും കുറഞ്ഞ അളവിൽ പ്രയോഗിക്കുന്ന രീതിയാണ് അവലംബിക്കുന്നത്.

ചോ : എന്തായിരുന്നു ഈ രംഗത്ത് ഇതുവരെയുള്ള അനുഭവം?

ഒരു നൂതന കാർഷികവിദ്യയുടെ സംരംഭകനും പരിശീലകനും ആയി പ്രവർത്തിക്കാൻ തുടങ്ങിയിട്ട് കുറച്ചു വർഷങ്ങളേ ആയിട്ടുള്ളു. ഇപ്പോൾ നൂറു കണക്കിന് അംഗങ്ങൾ ഉള്ള കർഷക WhatsApp ഗ്രൂപ്പുകൾ ഉണ്ടാക്കി സദാ സമ്പർക്കം പുലർത്തുന്നു. സൂക്ഷ്മ ജൈവ കൃഷി എന്ന ആശയം ( concept ) പരിചയപ്പെടുത്തുന്നതുമുതൽ പടി പടിയായുള്ള നിർദേശങ്ങളും സംശയ നിവാരണങ്ങളും പ്രശ്ന പരിഹാരങ്ങളുമായി ഗ്രൂപ്പ് സജീവമായി നിലനിർത്തുന്നു. ചില വലിയ കാർഷികസംരംഭങ്ങൾക്ക് തുടക്കം കുറിക്കുകയും ചിലതു പുതിയ രീതിയിൽ പരിവർത്തിക്കുകയും മേൽനോട്ടം നടത്തുകയും ചെയ്യുന്നുണ്ട്. കൃഷി രീതിയെപ്പറ്റിയും ഓരോഘട്ടങ്ങളുടെ പ്രയോഗരീതികളെപ്പറ്റിയും ഈ മേഖലയിൽ നടന്ന ഗവേഷണങ്ങളെപ്പറ്റിയും വീഡിയോകൾ നിർമ്മിച്ചു യു ട്യൂബിൽ ലഭ്യമാക്കിയിട്ടുണ്ട്.

ചോ : പ്രവാസി തൊഴിലിൽ നിന്ന് എന്നാണ് നാട്ടിൽ കൃഷിയിലേക്കുള്ള പറിച്ചുനടൽ?

കൃഷിയുമായുള്ള ബന്ധം ചെറുപ്പം മുതലുണ്ട്. സൂക്ഷ്മ പുനരുജ്ജീവന കൃഷിയിൽ 5 കൊല്ലമായി മുഴുവൻ സമയ പ്രവർത്തകൻ ആണ്. ഫേസ് ബുക്കിലെ “മുറ്റത്തെ കൃഷി ” ഗ്രൂപ്പിലൂടെയും വ്യക്തിപരമായ ബന്ധങ്ങൾ വെച്ചും നിരവധിപേരെ ഈ രീതിയിലേക്ക് കൊണ്ടുവരാൻ കഴിഞ്ഞിട്ടുണ്ട്.

ചോ : കാർഷിക സമൂഹത്തിൽ നിന്നുള്ള പ്രതികരണം എങ്ങനെ?

നിലവിലുള്ള അസ്സൽ കാർഷിക സമൂഹത്തിലേക്ക് ഈ രീതികൾ കടന്നു ചെല്ലുന്നതേയുള്ളൂ. അത്തരം ഇടങ്ങളിൽ ഉണ്ടാക്കിയ ഗുണഫലങ്ങൾ ഇതിന്റെ പ്രചാരണം ത്വരിതപ്പെടുത്തും എന്നാണ് പ്രതീക്ഷിക്കുന്നത്. എന്നാൽ കാർഷിക വൃത്തിയുമായി കാര്യമായ ബന്ധമില്ലാതിരുന്ന ഒരു വിഭാഗം ഈ രംഗത്തേക്ക് കടന്ന് വന്നു ഫലം കൊയ്യുന്നത് വലിയ ആവേശമാണ് പകരുന്നത്. ഇതിൽ വീട്ടമ്മമാർ, അധ്യാപകർ, വിരമിച്ചവർ, നവതൊഴിലുകളിൽ ഏർപ്പെട്ട യുവാക്കൾ, എന്നിവരുണ്ട്. ​ ടെറസിലും മുറ്റത്തും ഗ്രോബാഗിലും ആരോഗ്യവും അഴകും ഗുണമമേന്മയും ഉള്ള കാർഷിക വിഭവങ്ങൾ ഉണ്ടാക്കുക വഴി കൃഷി ഒരാസ്വാദനമായി മാറുകയാണ് ഈ വിഭാഗ​ങ്ങൾക്കിടയിൽ. ഉൽപ്പാദനം വർധിക്കുന്നു, സ്വന്തം ആവശ്യം കഴിഞ്ഞു ഉൽപ്പന്നങ്ങൾ വിറ്റഴിക്കുവാനുള്ള പ്രാപ്തിയിലേക്കു വളരുന്നു. സ്വന്തം മണ്ണിലേക്ക് അവശ്യ ഘടകങ്ങൾ മാത്രം ചുരുങ്ങിയ തോതിൽ നിക്ഷേപിച്ചു മണ്ണിനെ സമ്പുഷ്‌ടീകരിക്കുന്നത് വഴി കൃഷിക്കാവശ്യമായ പോഷകങ്ങൾ ഉൽപ്പാദിപ്പിക്കുന്ന ഒരു പുനർചംക്രമണ രീതിയിലൂടെ ബാഹ്യ ഏജൻസികളിന്മേലുള്ള ആശ്രിതത്വം കുറയുന്നു. കൃഷി സമൂഹത്തിന്റെ നിത്യവൃത്തിയും വിനോദോപാധിയും സാമൂഹ്യ വിനിമയവും ആവുന്ന ഒരു വ്യവസ്ഥിതി സമീപഭാവിയിൽ നിർണായക മാറ്റം വരുത്തും എന്നാണ് ശുഭപ്രതീക്ഷ.

(വിശദീകരണ യുട്യൂബ് ലിങ്കുകൾ ഉൾക്കൊള്ളുന്ന ഒറ്റ ലിങ്ക് ഈ അഭിമുഖത്തോടൊപ്പം ചേർക്കുന്നു.)

(മികച്ച രീതിയിൽ കൃഷി ചെയ്യുന്ന ഏതാനും കർഷകരെ തുടർ ലക്കങ്ങളിൽ പരിചയപ്പെടാം)

കവർ : ജ്യോതിസ് പരവൂർ

ലോക സിനിമയെ കുറിച്ചും, മറുഭാഷാ ഇന്ത്യൻ സിനിമകളെ കുറിച്ചും, മലയാള സിനിമകളെ കുറിച്ചും ആഴത്തിലുള്ള ഒട്ടേറെ നിരൂപണങ്ങൾ, പഠനങ്ങൾ, നിരീക്ഷണങ്ങൾ എന്നിവ നമുക്ക് നൽകിയ, ദേശീയ പുരസ്‌കാരം അടക്കം ഒട്ടേറെ പുരസ്‌കാരങ്ങൾ ലഭിച്ച പ്രശസ്ത എഴുത്തുകാരനും സീനിയർ സിനിമാ പ്രവർത്തകനുമായ ഐ ഷണ്മുഖദാസ് മാഷുമായി കൂടെ നടന്ന് സംസാരിച്ച കാര്യങ്ങളാണ് ഇതിലുള്ളത്. 2022-ലെ ഫിപ്രസി.-ഇന്ത്യ (FIPRESCI-India) (ഇന്റർനാഷണൽ ഫെഡറേഷൻ ഓഫ് ഫിലിം ക്രിട്ടിക്‌സ്) ഏർപ്പെടുത്തിയ സത്യജിത് റേ മെമ്മോറിയൽ അവാർഡ് ലഭിച്ചതിലുള്ള ആദരവ് രേഖപ്പെടുത്തൽ കൂടിയാണ് ഈ അഭിമുഖം

ഐ.ഷണ്മുഖദാസ് ഒറ്റപ്പാലത്ത് ജനിച്ചു. ഇപ്പോള്‍ തൃശൂരിൽ സ്ഥിരതാമസം.ഇംഗ്ളീഷ് സാഹിത്യത്തിൽ ബിരുദാനന്തര ബിരുദം നേടിയ ശേഷം ബോംബെയിൽ അധ്യാപകനായി ഔദ്യോഗിക ജീവിതം ആരംഭിച്ചു. പിന്നീട് കേരള സർക്കാർ സർവ്വീസിൽ വിവിധ കോളേജുകളിൽ ഇംഗ്ളീഷ് അധ്യാപകനായി ജോലി ചെയ്തു. തൃശൂർ സി. അച്യുതമേനോന്‍ ഗവണ്‍മെന്റ് കോളേജിൽ നിന്നാണ് വിരമിച്ചത്. വിദ്യാർത്ഥിജീവിതകാലം മുതൽ ഫിലിം സൊസൈറ്റി അംഗമാകുകയും പിന്നീട് ഫിലിം സൊസൈറ്റി പ്രവർത്തനങ്ങളുടെ ഭാഗമാവുകയും ചെയ്തു. എഴുപതുകളുടെ അവസാനം മുതല്‍ ചലച്ചിത്ര സംബന്ധിയായ ലേഖനങ്ങൾ എഴുതുവാൻ തുടങ്ങി. ദൃശ്യകലാപഠനത്തിന് മുൻതൂക്കം നൽകിയ ദൃശ്യകല, ദർശി എന്നീ പ്രസിദ്ധീകരണങ്ങളുമായി ബന്ധപ്പെട്ട് പ്രവർത്തിച്ചിരുന്നു.

മികച്ച ചലച്ചിത്ര നിരൂപകനുള്ള ദേശീയ അവാർഡിന് 1999-ല്‍ അര്‍ഹനായി. സത്യജിത്‌ റായുടെ ചലച്ചിത്രങ്ങളെ കുറിച്ചുള്ള പുസ്തകം ‘സഞ്ചാരിയുടെ വീടി’ന് 1996-ല്‍ മികച്ച ചലച്ചിത്ര ഗ്രന്ഥത്തിനുള്ള സംസ്ഥാന പുരസ്കാരം ലഭിച്ചു. മികച്ച ചലച്ചിത്ര സംബന്ധിയായ ലേഖനത്തിനുള്ള 2013-ലെ സംസ്ഥാന പുരസ്കാരം എം.ടി വാസുദേവന്‍ നായരുടെ ‘നിര്‍മ്മാല്യ’ത്തിനെ കുറിച്ചെഴുതിയ ‘ദൈവനർത്തകന്റെ ക്രോധ’ത്തിന് ലഭിച്ചു. സാഹിത്യ നിരൂപണ ഗ്രന്ഥത്തിനുള്ള കേരള സാഹിത്യ അക്കാദമിയുടെ വിലാസിനി പുരസ്കാരം, മികച്ച വൈജ്ഞാനിക ഗ്രന്ഥത്തിനുള്ള ജി.എൻ പിള്ള എൻഡോവ്മെന്റ് (2008), ചലച്ചിത്ര ഗ്രന്ഥത്തിനുള്ള കോഴിക്കോടന്‍ പുരസ്കാരം (2012), രണ്ട് വട്ടം ഫിലിം ക്രിട്ടിക്സ് അസോസിയേഷന്റെ മികച്ച ചലച്ചിത്ര ഗ്രന്ഥത്തിലുള്ള അവാർഡ് (1997, 2006), 2022-ലെ ഫിപ്രസി.-ഇന്ത്യ (FIPRESCI-India) (ഇന്റർനാഷണൽ ഫെഡറേഷൻ ഓഫ് ഫിലിം ക്രിട്ടിക്‌സ്) ഏർപ്പെടുത്തിയ സത്യജിത് റേ മെമ്മോറിയൽ അവാർഡ്. എന്നിവയും ലഭിച്ചിട്ടുണ്ട്.

മലകളില്‍ മഞ്ഞ് പെയ്യുന്നു’ സിനിമയുടെ വഴിയില്‍’, സഞ്ചാരിയുടെ വീട്’, ആരാണ് ബുദ്ധനല്ലാത്തത്’, ഗൊദാര്‍ദ്: കോളയ്ക്കും മാര്‍ക്സിനും നടുവില്‍, പി. രാമദാസ്‌: വിദ്യാര്‍ത്ഥിയുടെ വഴി’, സിനിമയും ചില സംവിധായകരും, ശരീരം, നദി, നക്ഷത്രം എന്നിവയാണ് പ്രസിദ്ധീകരിച്ച കൃതികള്‍.

ഫൈസൽ ബാവ : അടൂരിൽ നിന്ന് തന്നെ തുടങ്ങാം എന്ന് തോന്നുന്നു. അടൂർ സിനിമകൾ അരാഷ്ട്രീയ സിനിമകളാണ് എന്ന വിമർശനത്തെ എതിർത്തുകൊണ്ട്, മാഷ് ഈയിടെ നടത്തിയ പ്രസ്താവന ഏറെ പ്രസക്തമാണല്ലോ. അത് ശരിയല്ല എന്നും അടൂർ സിനിമകൾ രാഷ്ട്രീയ സിനിമകൾ തന്നെയാണെന്നും താങ്കൾ ഉറപ്പിച്ചു പറഞ്ഞിരുന്നു .അടൂർ സിനിമകൾ രാഷ്ട്രീയമാണോ? അടൂരിന്റെ “എലിപ്പത്തായം”തിരക്കഥയ്ക്ക് താങ്കളുടെ അവതാരികയായിരുന്നല്ലോ?

ഐ.ഷൺമുഖദാസ് : പ്രകടമായി രാഷ്ട്രീയമില്ല എന്ന് തോന്നുമെങ്കിലും അടൂർ സിനിമകളിൽ ആന്തരികമായി രാഷ്ട്രീയം ഉണ്ട്. കാഴ്ചയുടെ ആഴമേറിയ അനുഭവതലം തരാൻ അതിനാകുന്നു. സത്യത്തിൽ അടൂരിൽ ഉള്ള രാഷ്ട്രീയം ഇടതുപക്ഷ മാർക്സിസ്റ്റ് രാഷ്ട്രീയമല്ല അദ്ദേഹത്തെ ഏറെയും സ്വാധീനിച്ചത് ഗാന്ധിയൻ രാഷ്ട്രീയമാകാം. അദ്ദേഹത്തിന്റെ സിനിമകളെ കുറിച്ച്‌ ഈ വീക്ഷണകോണിൽ നിന്നുകൊണ്ടുള്ള സൂക്ഷ്‌മമായ പഠനങ്ങൾ നടക്കേണ്ടിയിരിക്കുന്നു.

അത് ആമുഖമോ അവതാരികയോ ആയി എഴുതിയതല്ല, നേരത്തെ സ്വതന്ത്രമായി എഴുതിയതാണ്. ‘യാഥാര്‍ത്ഥ്യത്തിന്‍റെ ഭ്രമാത്മകമായ മുഖം’ എന്നപേരിൽ അത് ഫിലിം സൊസൈറ്റി സുവനീറില്‍ അച്ചടിച്ചു വന്നിരുന്നതുമാണ്. പിന്നീട് എന്റെ സമ്മതത്തോടെ തന്നെ പുസ്തകത്തിൽ ചേർത്തതാണ്.
അത് അക്കാലത്തെ എന്റെ രാഷ്ട്രീയ വീക്ഷണങ്ങളുടെ സാധ്യതകളോടുകൂടി ചേർത്ത് വായിക്കാം. ഹംഗേറിയൻ മാർക്സിസ്റ്റ് സൈദ്ധാന്തികനായ ലൂകാഷിന്റെ (György Lukács) ചില സ്വാധീനങ്ങൾ അതിലുണ്ട് . പ്രകടമായ രാഷ്ട്രീയം ഇല്ല എങ്കിൽ പോലും അക്കാലത്തെ എന്റെ മാർക്സിസ്റ്റ് സൈദ്ധാന്തിക വായനയുടെ ഭാവതലം അന്നത്തെ എഴുത്തിലുണ്ട്. ലേഖനത്തിൽ എന്റെ സഹതാപം എലിപ്പത്തായത്തിലെ കേന്ദ്ര കഥാപാത്രത്തോടാണ്. അവസാന രംഗം അക്കാലത്ത് ഏറെ വിമർശിക്കപ്പെട്ടതാണ്. കരമന ജനാർദ്ദനൻ നായർ അവതരിപ്പിക്കുന്ന കഥാപാത്രം ഉണ്ണിക്കുഞ്ഞ് കാണികളുടെ മുമ്പിൽ ഇരിക്കുമ്പോൾ, സിനിമയിലത് സംഭവിക്കുന്നത് നാട്ടുകാരുടെ മുമ്പിലാണ്. അദ്ദേഹത്തിന്റെ സഹോദരി ജലജ ചെയ്ത കഥാപാത്രം ഒന്നിലേറെ തവണ എലിക്കെണിയിൽ പെട്ട എലിയെ കുളത്തിൽ മുക്കികൊല്ലുന്ന രംഗമുണ്ട് . ഈ സന്ദർഭത്തിൽ വരുന്ന പശ്ചാത്തല സംഗീതം അടൂർ വിരുദ്ധരായ ചിലരും അരവിന്ദൻ പക്ഷക്കാരായ ചിലരും ജാറിങ് സംഗീതം എന്നു വിമർശിച്ചു . അങ്ങനെ അവർ പറയുന്നു എങ്കിൽ അത് അദ്ദേഹത്തെ കുറിച്ചുള്ള ഗംഭീരമായ പുകഴ്ത്തലാണ് എന്നേ എനിക്ക് പറയാൻ കഴിയൂ. സത്യത്തിൽ അടൂർ ജാറിങ് മ്യൂസിക് എന്നു തോന്നാൻ വേണ്ടിത്തന്നെയാണ് ചെയ്തത്. നാടുവാഴിത്ത വ്യവസ്ഥിതിയുടെ തുടർച്ചയായ ഒരു ജീവിതം ജീവിക്കുന്ന കഥാപാത്രമാണ് ഉണ്ണിക്കുഞ്ഞ്. ഏതാണ്ട് അതേ വ്യവസ്ഥിതിയുടെ തുടർച്ചയാണ് സംവിധായകന്റെ ജീവിതവും എന്ന് പറയാം. അദ്ദേഹത്തിന് പ്രകടമായ കമ്യുണിസ്റ്റ് ചായ്‌വൊന്നുമില്ല. ഞാൻ നേരത്തെ പറഞ്ഞപോലെ അദ്ദേഹത്തെ സ്വാധീനിച്ചത് ഗാന്ധിസമാണ്. ഗാന്ധി ഗ്രാമിലെ അധ്യാപകനായിരുന്ന ജി ശങ്കരപിള്ളയുടെ ശിഷ്യനെ പോലെ ഒരാളായിരുന്നു അടൂർ.
അപ്പോൾ ആ ചിത്രം സങ്കീർണമായ തലത്തിൽ ഒരു മാർക്സിയൻ സൗന്ദര്യശാസ്ത്ര ധാരയുമായും അതിലെ ചിന്തയുമായും ചേർന്ന് നില്ക്കുന്നു. അതേ സമയം അതിനെ പിന്തുണച്ചുകൊണ്ടല്ല. വിമർശനാത്മകമായ ഒരു താളം അതിലുണ്ട്. എന്നാൽ അത്തരത്തിൽ നേരിട്ടുള്ള ഒന്ന് “അനന്തര”ത്തിൽ കാണാനാവില്ല. അത് അടൂർ സിനിമ അരാഷ്ട്രീയമാണ് എന്ന വാദത്തിന് കാരണമായിട്ടുണ്ടാവാം. എലിപ്പത്തായം എന്ന സിനിമയിൽ ഗംഭീരവും തീക്ഷ് ണവുമായവ എന്ന് പറയാവുന്ന രണ്ടു രംഗങ്ങൾ ഇവയാണ് .
ഒന്ന്: ഷിമ്മിസ് ധരിച്ച പെൺകുട്ടി പാലുമായി വന്ന് അതവിടെ വെയ്ക്കുന്ന രംഗം.രണ്ട്: പ്രേതഭവനം പോലെ അടച്ചിട്ട വീടിന്റെ പടിക്ക് മുന്നിലൂടെ അമ്മയും കൊച്ചുമോളും പോകുമ്പോൾ കുട്ടിയുടെ സഹജമായ നിഷ്കളങ്കതകണ്ട്, പടിയിലേക്ക് പോകുന്ന കുട്ടിയെ അമ്മ ഭീതിയോടെ പിടിച്ചു വെക്കുന്ന രംഗം. ചലച്ചിത്രഭാഷയിലെ യഥാർത്ഥ രീതിയെയും എക്സ്പ്രക്ഷണിസ്റ്റ് രീതിയെയും ഏകോപിപ്പിച്ചു കാണിക്കുന്നതിൽ കൃത്യമായ രാഷ്ട്രീയം ഉണ്ടെന്നാണ് ദൃശ്യ ഭാഷ പറയുന്നത്. സത്യത്തിൽ ഉപരിതലത്തിലൂടെ മാത്രം സഞ്ചരിക്കുമ്പോൾ തോന്നുന്ന ഒരു അഭിപ്രായമായിട്ടേ അടൂർ സിനിമകൾ അരാഷ്ട്രീയമാണ് എന്ന വാദത്തെ സ്വീകരിക്കാൻ പറ്റൂ. അതുകൊണ്ടാണ് ഒരു വെല്ലുവിളിയെന്നോണം അടൂർ സിനിമകളിലെ രാഷ്ട്രീയം ശക്തമാണ് എന്ന് ഞാൻ പറയാൻ കാരണം.

ഫൈസൽ ബാവ : ‘നിലവിളിക്ക് ശേഷം’ എന്നപേരിൽ ‘അനന്തര’ത്തെ കുറിച്ചെഴുതിയ ലേഖനത്തിൽ ദൃശ്യ സാധ്യതകളെ മറ്റൊരു തലത്തിൽ ആണല്ലോ പ്രതിപാദിക്കുന്നത്?

ഐ.ഷൺമുഖദാസ് : അടിസ്ഥാനപരമായി എനിക്ക് തോന്നുന്നത് അല്ലെങ്കിൽ ഞാനതിനെ വായിക്കുന്നത് മറ്റൊരു തലത്തിൽ ആണ്. സിനിമയുടെ സൗന്ദര്യ ശാസ്ത്രം വെച്ചു പറയുമ്പോൾ ആദ്യ പകുതിയിലെ ലോങ്ങ് ഷോട്ടുകളിലൂടെയുള്ള പരിചരണരീതി റിയലിസമാണ്. വസ്തുനിഷ്ഠ കാഴ്ചപ്പാടാണ്. The point of view is objective. എന്നാൽ രണ്ടാം പകുതിയിൽ എക്പ്രഷനിസ്റ്റ് രീതിയാണ്. അത് ആത്മനിഷ്ഠമാണ്. ഒരു തരം ഭ്രാന്തിന്റെ ഭ്രമാത്മകതയിൽ നിൽക്കുന്നു അതിന്റെ ദൃശ്യപരത. ഏങ്കോണിക്കപ്പെട്ട കോണുകൾ നമുക്കതിൽ കാണാം. അടൂരിന്റെ സിനിമകളിലെ വേറിട്ട ഒരാഖ്യാനം ‘അനന്തരം’ ആണ്.

ഫൈസൽ ബാവ : അടൂരിന്റെ ‘മുഖാമുഖം’ ആണല്ലോ ഒരു പക്ഷെ ഏറ്റവും കൂടുതൽ വിമർശിക്കപ്പെട്ട സിനിമ. പ്രത്യേകിച്ച് ഇടതുപക്ഷ ബൗദ്ധിക ഇടങ്ങളിൽ നിന്നും ഏറെ വിമർശനങ്ങൾ ഏറ്റുവാങ്ങി. എന്തായിക്കാം അതിനു കാരണം?

ഐ.ഷൺമുഖദാസ് : ‘മുഖാമുഖം’ കമ്യുണിസ്റ്റ് രാഷ്ട്രീയവുമായി ഏറെ ബന്ധമുള്ള സിനിമയാണ്. അതിനാൽ അതിറങ്ങിയ കാലത്ത് തന്നെ ധാരാളം വിമർശനങ്ങൾ ഏറ്റുവാങ്ങി. അതിനു കാരണമായി എനിക്ക് തോന്നുന്നത് സിനിമാ നിരൂപണരംഗത്തും സജീവമായിരുന്ന, ഇടത് സൈദ്ധാന്തികരിൽ വളരെ പ്രധാനിയായിരുന്ന രവീന്ദ്രന്റെ ലേഖനത്തിൽ വന്ന വലിയൊരു അബദ്ധം ആണെന്നാണ്. അത്‌ പുനർവായന നടത്താതെ എല്ലാവരും, പ്രത്യേകിച്ച് ഇടതുപക്ഷധാരയിൽ ഉള്ള പലരും അതേറ്റു പാടി. ഒരു പ്രത്യേക ദൃശ്യരംഗം കമ്മ്യൂണിസ്റ്റ് വിരുദ്ധമാണ് എന്ന് അദ്ദേഹം ചൂണ്ടിക്കാണിക്കുകയുണ്ടായി. ഒരു ഫാക്ടറിയിൽ ഉണ്ടായ സമരത്തിനിടെ പെട്ടെന്ന് ചെങ്കൊടി ഉയർത്തുന്ന രംഗം കമ്യുണിസ്റ്റുകാർ വ്യവസായങ്ങൾക്ക് എതിരു നിൽക്കുന്നവരാണ് എന്ന ധ്വനിയുണ്ടാക്കുന്നു എന്ന്വി രവീന്ദ്രൻ വിമർശിച്ചു. എന്നാൽ ഈ സിനിമയിൽ അദ്ദേഹം ചൂണ്ടി കാണിച്ച സംഭവങ്ങളുടെ ക്രമം അങ്ങനെയാണോ എന്ന് സംശയമുണ്ട്. അദ്ദേഹത്തിന്റെ നിലപാടിൽ നിന്നും നോക്കുമ്പോൾ അത്‌ ശരിയായിരിക്കാം. പക്ഷെ അതിലൊരു മറുവായന നടത്താതെ കമ്യുണിസ്റ്റ് വിരുദ്ധത എന്ന പ്രചാരണത്തിലെത്തിച്ചു എന്നാണ് എന്റെ അഭിപ്രായം.

ഫൈസൽ ബാവ: മലയാള സിനിമയിൽ പ്രധാന സാനിധ്യമായിരുന്ന കെജി ജോർജ്ജ് എന്തു കൊണ്ടാണ് സിനിമക്കാരുടെ ബൗദ്ധിക ചർച്ചകളിൽ അധികം ഇടം നേടാതെ പോയത്? ജോർജ്ജിന്റെ ‘മറ്റൊരാൾ’ എന്ന സിനിമയെ കുറിച്ച് എൺപതുകളിൽ തന്നെ ‘ദാമ്പത്യം ഒരു മുറിവ് ‘ എന്ന ലേഖനം താങ്കൾ എഴുതിയിരുന്നല്ലോ. പക്ഷെ അത്തരത്തിൽ ഒരു നിരീക്ഷണം ഏറെ ചർച്ച ചെയ്യപ്പെട്ടവോ? കെജി ജോർജ്ജ് മലയാള സിനിമയിലെ അവിഭാജ്യഘടകമല്ലേ?

ഐ.ഷൺമുഖദാസ് : അതെ, അക്കാര്യത്തിൽ സംശയമില്ല. എൺപതുകളിലാണ് ജോർജ്ജിന്റെ മറ്റൊരാൾ എന്ന സിനിമയെ കുറിച്ച് ‘ദാമ്പത്യം ഒരു മുറിവ് ‘ എന്ന ലേഖനം ഞാൻ എഴുതുന്നത്. എല്ലാ ജോണറിലും ഉള്ള സിനിമകൾ ചെയ്ത മലയാളത്തിലെ പ്രധാന സംവിധായകനാണ് ജോർജ്ജ്. പക്ഷെ മലയാളത്തിലെ ധൈഷണികധാര എന്നറിയപ്പെടുന്ന ആർട്ട് സിനിമക്കാർക്കൊപ്പമായിരുന്നില്ല അദ്ദേഹം . അതിനാൽ അവരുടെ സിനിമാ ചർച്ചകളിൽ ജോർജ്ജിന് ഇടം കിട്ടിയില്ല. സമാന്തര സിനിമകൾക്കൊപ്പവും അദ്ദേഹം നടന്നില്ല. ജോർജ് സ്വന്തമായി ഒരു വഴിയിലൂടെ നടക്കാൻ ശ്രമിച്ച ആളാണ്. എന്നാൽ ജോർജിന്റെ സിനിമകളെ,അതിന്റെ പ്രാധാന്യത്തെ ഇന്ന് പുതിയ തലമുറ തിരിച്ചറിഞ്ഞു തുടങ്ങി.

ഫൈസൽ ബാവ: ‘ഇരകൾ’ പോലുള്ള സിനിമ അക്കാലത്ത് ചെയ്തത് എങ്ങനെ കാണുന്നു?

ഐ.ഷൺമുഖദാസ് : ആ സിനിമ എന്റെ പ്രത്യേക ശ്രദ്ധയാകർഷിച്ച നല്ലൊരു work ആണ്. അതിനെക്കുറിച്ചെഴുതാൻ എന്നെ പ്രേരിപ്പിച്ച പ്രധാന കാരണം പടം തുടങ്ങുമ്പോൾ ചുമരിൽ തൂക്കിയിട്ട ഒരു ചിത്രമാണ്. സിനിമയിൽ ഗണേഷ് കുമാർ അവതരിപ്പിച്ച കഥാപാത്രം ഹോസ്റ്റൽ മുറിയിൽ ഉലാത്തുകയാണ്. കൂടെതാമസിക്കുന്ന ആൾ കിടന്നുറങ്ങുന്നു. ഗണേഷ്‌കുമാറിന്റെ കഥാപാത്രത്തിന്റെ അപ്പോഴത്തെ ചിന്ത കയ്യിൽ ഒരു വയർ എടുത്തു അയാളെ കഴുത്തിൽ കുരുക്കി, മുറുക്കി കൊല്ലണം എന്നാണ്. ഇവർ തമ്മിൽ ഒരു വൈരാഗ്യവും ഉണ്ടാവണം എന്നില്ല. സുഹൃത്തുക്കൾ ആണ് താനും. കഥാപാത്രത്തിന്റെ മനസ്സിനെയാണ് ഈ രംഗത്തിലൂടെ ദൃശ്യാവിഷ്കാരം ചെയ്തിരിക്കുന്നത്.ഇവിടെയാണ് ചിത്രത്തിന്റെ മുൻപറഞ്ഞ പ്രാധാന്യം. ചുമരിൽ മൂന്ന് ചിത്രങ്ങൾ ഉണ്ട് അതിൽ മധ്യത്തിൽ ഉള്ളത് കഥാപാത്രമോ അവിടെ ഉറങ്ങി കിടക്കുന്ന ആളോ അല്ല. അത്‌ സംവിധായകൻ തന്നെ. ചിത്രത്തിലൂടെ സംവിധായകന് എന്തോ പറയാനുണ്ട് എന്നതാണ് ചുമർചിത്രം സൂചിപ്പിക്കുന്നത്. ഈ സിനിമയുടെ പ്രമേയം ഹിംസയാണ്. ഫ്രോയിഡ് പറയുന്നുണ്ടല്ലോ മനുഷ്യന്റെ ആദിമ വികാരങ്ങളാണ് സെക്സും അക്രമവും എന്ന് . ഈ സിനിമ മനുഷ്യന്റെ ഹിംസയെ കുറിച്ചുളള വളരെ ആഴത്തിലുള്ള ഒരന്വേഷണമാണ്. അതിന്റെ സൂചന ചുമരിൽ ആ ചിത്രത്തിലും കാണാൻ സാധിക്കും. സൂക്ഷ്‌മമായ നിരീക്ഷണം വേണമെന്ന് മാത്രം. ഈ സിനിമ എടുക്കാനുണ്ടായ സാഹചര്യത്തെ കുറിച്ച് ജോർജ്ജ് പറഞ്ഞത് ഓർക്കുന്നു. സഞ്ജയ് ഗാന്ധിയുടെ ചെരുപ്പ് അന്നത്തെ പ്രസിഡന്റ്എടുത്തുകൊടുക്കുന്ന ചിത്രം കണ്ടത് മുതലാണ് ഈ സിനിമയെക്കുറിച്ച് ആലോചിച്ചതത്രെ. ഒരാളിൽ സിനിമ ജനിക്കുന്നത് തന്നെ ഇത്തരത്തിൽ പല രാഷ്ട്രീയ കാരണങ്ങളാലാണ്. അതേപടി ആവണമെന്നില്ല. പക്ഷെ പലപ്പോഴും ആദ്യത്തെ ത്രെഡ് പൊളിറ്റിക്കൽ ആകാനാണ് സാധ്യത.

ഫൈസൽ ബാവ : ഇരകൾ പോലുള്ള സിനിമയുടെ പ്രമേയം എന്തുകൊണ്ടാണ് ഇക്കാലത്ത് കൂടുതൽ പരീക്ഷിക്കപ്പെടാത്തത്?

ഐ.ഷൺമുഖദാസ് : പരീക്ഷിക്കപ്പെടുന്നില്ല എന്ന് പറയാൻ പറ്റില്ല. ശ്രദ്ധിക്കപ്പെടുന്നോ എന്നതാണ് പ്രധാനം ജോർജിന്റെ ഇരകൾ എന്ന സിനിമയും ഈയിടെ ഇറങ്ങിയ ദിലീഷ് പോത്തന്റെ ‘ജോജി’ എന്ന സിനിമയും തമ്മിലുള്ള ചാർച്ച ഉദാഹരണമാണ്. ജോജി എന്ന സിനിമയെ പലരും വിമർശിച്ചിട്ടുണ്ട്. ജോജി എന്ന സിനിമ വലിയതോതിൽ എന്നെ ആകർഷിച്ചു എന്നു പറയാനാകില്ല. പക്ഷെ എന്നെ ഉണർത്തിയ ഒരു സിനിമയാണ്. ഒരു സിനിമ പ്രേക്ഷകനിൽ എന്തു പ്രതികരണമാണ് ഉണ്ടാക്കേണ്ടത് എന്നെന്നോട് ചോദിച്ചാൽ ഞാൻ പറയുക, ഉറങ്ങിക്കിടക്കുന്ന പ്രേക്ഷകരെ ഉണർത്തുക, ചിന്തയെ ഉണർത്തുക എന്നുള്ളതാണ് നല്ല സിനിമയുടെ പല ലക്ഷ്യങ്ങളിലൊന്ന് എന്നായിരിക്കും.ഒരു നല്ല സിനിമ പ്രേക്ഷകരെ സ്പർശിക്കണം. എന്നാൽ അതിനൊരു അളവുകോൽ നിശ്ചയിക്കാൻ എനിക്കറിയില്ല. പലരിലും പലമാതിരിയായിരിക്കും. അതിലവരുടെ കാഴ്ചയുടെ സംസ്കാരവും അടങ്ങിയിട്ടുണ്ടാകും.

ഇരകൾ എന്ന സിനിമ ഏതു രീതിയിൽ എന്നിലെ സത്തയെ, ചിന്തയെ ഉണർത്തി എന്നപോലെ അതെ രീതിയിൽ ജോജി എന്നെ സ്പർശിച്ചോ എന്ന് ചോദിച്ചാൽ ഇല്ല എന്ന് പറയും. എന്നാൽ അതിലെ എന്തൊക്കെയോ മൂലകങ്ങൾ എന്നെ സ്പർശിച്ചിട്ടുണ്ട്. മാക് ബത്തിനെ ആധാരമാക്കിയുള്ള സിനിമയാണ് എന്നാണ് തുടക്കത്തിൽ അദ്ദേഹം പറയുന്നത്. അങ്ങനെ പറയേണ്ടിയിരുന്നില്ല എന്നെനിക്ക് തോന്നിയിട്ടുണ്ട്.

ഫൈസൽ ബാവ: ഇരകൾ എടുക്കുന്ന കാലത്തെ സാങ്കേതികതയല്ല ഇന്ന് സിനിമയിൽ ഉള്ളത്. സാങ്കേതിക വളർച്ചയെ കലാപരമായി പ്രയോജനപ്പെടുത്താൻ ഇന്നാവുന്നുണ്ടോ?

ഐ.ഷൺമുഖദാസ് : തീർച്ചയായും. ഈ സിനിമയിലെ തുടക്കം എനിക്കേറെ ഇഷ്ടപ്പെട്ടതാണ്. മലയാള സിനിമയിൽ മുമ്പ് അധികം കാണാത്ത ഷോട്ട്. മുകളിൽ നിന്നുള്ള ക്യാമറയാണ് അങ്ങനെയൊരു ഷോട്ട് സാധ്യക്കിയത്. ഇന്നത്തെ സാങ്കേതിക വളർച്ചയാണത്. ഇന്ന് അതുപോലുള്ള ഒരു ariel view ഏറെ വ്യക്തതയോടെ കുറഞ്ഞ ചെലവിൽ എടുക്കാനാകും. ഇത് പറയുമ്പോൾ എനിക്ക് ഓർമ്മ വരുന്നത് ഞാൻ എൺപതിയഞ്ചിലോ മറ്റോ നടത്തിയ ഒരു അഭിമുഖമാണ്. പ്രശസ്ത സംവിധായകൻ സയ്യിദ് മിർസ പറഞ്ഞത് ഓർക്കാം.അദ്ദേഹത്തിന്റെ 1978ൽ ഇറങ്ങിയ Arvind Desai Ki Ajeeb Dastaan എന്ന സിനിമയിൽ ബോംബെ നഗരമാണ് മുഖ്യ കഥാപാത്രം . മികച്ച ഒരു സിനിമയായിരുന്നു അത്‌. ആ സിനിമയുടെ അവസാന ഭാഗത്ത് ഹെലികോപ്റ്റർ ഷോട്ടാണ് വേണ്ടിയിരുന്നത്. എന്നാൽ അക്കാലത്ത് അങ്ങനെ ഷോട്ടെടുക്കാൻ ഹെലികോപ്റ്ററിന് തന്നേ ദിവസം ഒരുലക്ഷം വാടക വേണ്ടിവരും. അത്‌ വലിയ ബാധ്യത വരുത്തും എന്നതിനാൽ ആ ആഗ്രഹം ഉള്ളിലൊതുക്കിയത്രേ. സാങ്കേതിക വളർച്ച നേടിയ ഇക്കാലത്ത് വളരെ എളുപ്പത്തിൽ അതെടുക്കാൻ ആകും. പക്ഷെ അതെത്ര കലാപരമായി എടുക്കുന്നു എന്നിടത്താണ് കാര്യം. ജോജി, റോഷൻ ആൻഡ്രൂസിന്റെ ‘സ്കൂൾ ബസ്സ്‌’, കണ്ണൂരിന്റെ രാഷ്ട്രീയം പറയുന്ന ബി.അജിത്കുമാറിന്റെ ‘ഈട’ തുടങ്ങി പല സിനിമകളിലും ഇത്തരം ഷോട്ടുകൾ ഇപ്പോൾ പരീക്ഷിക്കപ്പെട്ടിട്ടുണ്ട് . ഇവിടെ ശ്രദ്ധിക്കേണ്ട ഒരു കാര്യമുണ്ട്. സാങ്കേതികവളർച്ച കലാ പ്രവർത്തനങ്ങളെ കൂടുതൽ എളുപ്പത്തിലാക്കും. പക്ഷെ അതിലെ ക്രിയേറ്റിവിറ്റി ചോർന്നു പോകാതെ ശ്രദ്ധിക്കണം എന്നു മാത്രം.

ഫൈസൽ ബാവ: സിനിമയുൾപ്പെടെ വിവിധ മേഖലകളിലെ ഒട്ടേറെ പ്രശസ്തരടക്കം ഇരുനൂറോളം പേരെ ഇന്റർവ്യൂ ചെയ്തിട്ടുണ്ടല്ലോ? ഇപ്പോൾ രാഹുൽ ഗാന്ധിയെ ഇന്റർവ്യൂ ചെയ്യാൻ ശ്രമം നടത്തിയിരുന്നു. ഇനിയും പല പ്രമുഖരും ആ ലിസ്റ്റിൽ ഉണ്ടെന്ന് അറിയാം. അഭിമുഖം എന്നതിനോട് ഇത്ര താല്പര്യത്തിനു കാരണം?

ഐ.ഷൺമുഖദാസ് : ജീവിതത്തിൽ ഏറ്റവും ആനന്ദകരമായ കാര്യം ഏതാണ് എന്നൊന്നോട് ചോദിച്ചാൽ ഞാൻ പറയുക സിനിമയെ കുറിച്ചുളള ലേഖനം എഴുതുക എന്നാണ്. അതുപോലെ ഇപ്പോൾ അഭിമുഖം എനിക്കൊരു ഭ്രമം ആണ്. അതിന്റെ കാരണങ്ങൾ പലതാണ്. ഭാഷ അറിയാത്തവരോടു പോലും ഇത്തരത്തിൽ അഭിമുഖം നടത്തിയിട്ടു ണ്ട്. പല പ്രമുഖരെയും ഇതിനകം ഇൻറർവ്യൂ ചെയ്തു. ഇനിയും മനസിലുള്ള പട്ടിക വളരെ വലുതാണ്. അതിൽ സിനിമാക്കാർ മാത്രമല്ല പല മേഖലകളിൽ പെട്ടവർ ഉണ്ട്. ഒരു അമച്വർ സാഹിത്യ പത്രപ്രവർത്തകൻ എന്ന നിലയിൽ ഞാൻ റസൂൽ പൂക്കുട്ടിയും ജീൻ ക്ലോഡും ഉൾപ്പെടെ ഒമ്പത് സൗണ്ട് ഡിസൈനർമാരെ അഭിമുഖം ചെയ്തിട്ടുണ്ട്. അതിൽ ഒരാൾ “Blue’ , White’ ,And ‘Red” എന്നീ ചിത്രങ്ങളുടെ ത്രീ കളർ ട്രൈലോജിക്ക് വേണ്ടി പ്രവർത്തിച്ച ഫ്രഞ്ച് സൗണ്ട് ഡിസൈനർ ലോറക്സ് ആണ് . ‘ദ ഡബിൾ ലൈഫ് ഓഫ് വെറോണിക്ക’,യുടെ സൃഷ്ടാവ് പോളിഷ് മാസ്റ്ററായ ക്രിസ്റ്റോഫ് കീസ്ലോവ്സ്കിയെ ഇന്റർവ്യൂ ചെയ്തിട്ടുണ്ട്. കൂടാതെ വെർനർ ഹെർസോഗ്, ക്രിസ്സ്റ്റോഫ് സാനുസ്സി, കാർലോസ് സൗറ, മൊഹ്‌സെൻ മഖ്മൽബാഫ്, സമീറ മഖ്മൽബാഫ്, മർസി മെഷ്കിനി, അലക്സാണ്ടർ സൗഖോറോവ്, കിം കി ഡുക്ക്, സെമിൻ കപ്ലോനോഗ്ലു, എന്നിവരെയും,അടൂർ ഗോപാലകൃഷ്ണൻ, സഈദ് മിർസ, ആനന്ദ് പട്വർധൻ, ഷാജി എൻ.കരുൺ,ഗിരീഷ് കാസറവള്ളി, തുടങ്ങിയ ലോകപ്രശസ്ത ചലച്ചിത്ര സംവിധായകരെയും അഭിമുഖം ചെയ്തിട്ടുണ്ട്. ബുദ്ധ ദാസ് ഗുപ്ത, എം.എസ്.സത്യു, നാടകകൃത്തും, ശ്യാം ബെനഗലിന്റെ “ഭൂമിക”യുടെ ദേശീയ അവാർഡ് നേടിയ തിരക്കഥാകൃത്തും ആയ വിജയ് ടെണ്ടുൽക്കർ തുടങ്ങിയവരെയും.സിനിമയിലെ പ്രമുഖരെക്കൂടാതെ മഹാശ്വേതാ ദേവി, ഉൽപ്പൽ ദത്ത്,
മേധാ പട്കർ, ഹിമാലയൻ മേഖലയിലെ ചിപ്കോ പ്രസ്ഥാനത്തിന്റെ ചന്ദിപ്രസാദ് ഭട്ട്,
എഡ്വേർഡ് ഒ.വിൽസൺ, മാധവ് ഗാഡ്ഗിൽ,
ഹൈദരാബാദിൽ നിന്നുള്ള പത്മവിഭൂഷൺ പുരസ്‌കാര ജേതാവും മോളിക്യുലാർ ബയോളജിസ്റ്റുമായ പുഷ്പ മിത്ര ഭാർഗവ എന്നിവരെയും അഭിമുഖം ചെയ്യാൻ സാധിച്ചു.
ഏറ്റവും അവസാനം അഭിമുഖം ചെയ്യാൻ ആഗ്രഹിച്ചത് രാഹുൽ ഗാന്ധിയെയാണ്. അത് നടന്നില്ല.

ഫൈസൽ ബാവ: ‘ക്ളോസ്ലി ഒബ്സേർവ്ഡ് ട്രെയിൻ’ എന്ന സിനിമ ചെയ്ത ചെക്ക് സംവിധായകൻ ജെറി മെൻസിലുമായി നടത്തിയ അഭിമുഖം വഴങ്ങാൻ മടിക്കുന്ന ഇംഗ്ലീഷ്ഭാഷയിലായിരുന്നു എന്ന് താങ്കൾ പറഞ്ഞിരുന്നു. എങ്ങനെയാണു അത്തരത്തിൽ ഒരു അഭിമുഖം സാധ്യമാകുന്നത്?

ഐ.ഷൺമുഖദാസ് : അത്തരം അനുഭവങ്ങൾ ഏറെ ഉണ്ടായിട്ടുണ്ട് പലപ്പോഴും വിദേശത്ത് നിന്നും എത്തുന്ന പല സംവിധായകർക്കും ഇംഗ്ലീഷ് അത്ര വശമില്ല എന്നത് ഒരു പ്രശ്നമാണ്. പക്ഷെ അതിനെ മറികടക്കാൻ പലപ്പോഴും കഴിഞ്ഞിട്ടുണ്ട്. മേൽ അഭിമുഖത്തിൽ ഈ പരിമിതി അദ്ദേഹം തന്നെ തിരിച്ചറിഞ്ഞിരുന്നു എന്നതിനാൽ ഏറെ എളുപ്പമായി. അത്കൊണ്ട് തന്നെ വേണ്ടത്ര ആംഗിക ചലനങ്ങളും ഭാവപ്രകടനങ്ങളും ഉപയോഗിക്കുന്നതിൽ നടനും കൂടിയായ ഈ സംവിധായകൻ പിശുക്കുകാണിക്കുകയുണ്ടായില്ല. കലയിൽ മാത്രമല്ല ജീവിതവും നർമ്മപ്രധാനമായിരിക്കണം എന്ന ഒരുബോധം ഈ സംവിധായകന്റെ വാക്കുകളിൽ മാത്രമല്ല ഭാവ പ്രകടനങ്ങളിലും തെളിഞ്ഞു നിന്നിരുന്നു. അത്‌ ഞങ്ങളുടെ സംവേദനത്തിന് ഏറെ ഗുണം ചെയ്തു.

ഫൈസൽ ബാവ: അരുന്ധതി റോയിയുടെ ഗോഡ് ഓഫ് സ്മാൾ തിങ്ങ്സ് എന്ന നോവലിനെ കുറിച്ച് ‘ശരീരം, നദി, നക്ഷത്രം’ എന്ന പുസ്തകം തന്നെ എഴുതിയിട്ടുണ്ടല്ലോ, അതിനുള്ള പ്രചോദനം എന്തായിരുന്നു?

ഐ.ഷൺമുഖദാസ് : അരുന്ധതീ റോയിയുടെ The God of Small things എന്ന നോവലിനെ ഞാൻ കാണുന്നത് പഞ്ചേന്ദ്രിയങ്ങളും സമര്‍പ്പിച്ച ഒരെഴുത്തായിട്ടാണ്. വായിക്കുമ്പോൾ തന്നേ ഗഹനമായ അനുഭവമാണ് ഈ പുസ്തകം നൽകിയത്. നോവലിന്റെ ഘടനയും ഉള്ളടക്കവും ഈ പഠന ഗ്രന്ഥത്തിന്റെ രൂപത്തെ നിര്‍ണ്ണയിച്ചിരിക്കുന്നു . സിനിമയും കവിതയും പ്രകൃതിയും ഗ്രന്ഥകാരന്റെ ആന്തരികാനുഭവങ്ങളുമെല്ലാം ഈ പുസ്തകത്തിൽ നിന്നും ലഭിക്കുന്നുണ്ട്. സൗന്ദര്യശാസ്ത്രം, മനഃശാസ്ത്രം, മനുഷ്യ മസ്തിഷ്കത്തിന്റെ നിഗൂഢതകൾ എന്നിവയിൽ താൽപ്പര്യമുള്ള ഒരാളാണ് ഞാൻ. പുസ്തകങ്ങൾ വായിക്കുന്നവന്റെയും സിനിമകൾ കാണുന്നവന്റെയും വീക്ഷണകോണിൽ നിന്ന് മനുഷ്യ മനസ്സ് എനിക്ക് കേൾക്കാൻ താൽപ്പര്യമുണ്ട്. സിനിമകളിൽ നിന്നും പുസ്തകങ്ങളിൽ നിന്നുമുള്ള ശബ്ദങ്ങൾ. ‘ദി ഗോഡ് ഓഫ് സ്മോൾ തിംഗ്സ്’ സിനിമാറ്റിക് ഉള്ളടക്കം ഉള്ള ഒരു നോവലായിട്ടാണ്
ഞാൻ കണക്കാക്കുന്നത്. നോവല്‍ വായനകൊണ്ട് എങ്ങനെ ചിന്തയുടെയും അനുഭൂതിയുടെയും
ലോകത്തേക്ക് എത്താം എന്നതാണ് ‘ശരീരം, നദി, നക്ഷത്രം’ എന്ന പുസ്തകം എഴുതാൻ
കാരണം.

രണ്ടായിരത്തി പതിനൊന്നിലെ മേയ് മാസത്തില്‍ ക്രിക്കറ്റും ശ്രീലങ്കയും നിറഞ്ഞു നില്‍ക്കുന്ന ‘ചൈന മാന്‍ ‘ എന്ന പുസ്‌തകം വായിച്ചിട്ട് ഞാന്‍ ഷെഹന്‍ കരുണ തിലക എന്ന എഴുത്തുകാരന് ഒരു ഫേസ് ബുക്ക്‌ മെസ്സേജ് അയച്ചു, ‘ചൈനമാന്‍ വായിച്ചു വളരെ ഇഷ്ടപ്പെട്ടു’ എന്ന്. ശ്രീലങ്കയുടെ കഥ പറയാന്‍ ഷെഹന്‍ ക്രിക്കറ്റ് എന്ന മാധ്യമം ഉപയോഗിക്കുകയായിരുന്നു ഈ പുസ്തകത്തില്‍. പ്രത്യക്ഷത്തില്‍ അല്ലാതെ കാലിക ശ്രീലങ്കന്‍ സമൂഹത്തിലെ പല കാര്യങ്ങളിലേക്കും ഈ നോവല്‍ വിരല്‍ ചൂണ്ടുന്നുണ്ട്.
ഏതാനും മാസങ്ങള്‍ കഴിഞ്ഞ് ഇദ്ദേഹം കനകക്കുന്നു കൊട്ടാരത്തിന്‍റെ കോവളം സാഹിത്യോത്സവ വേദിയില്‍ സുരേഷ് മേനോനൊടൊപ്പം സൌമ്യനായി ഇരിക്കുന്നതു കണ്ടപ്പോള്‍, ‘മിതഭാഷിയായ ഒരു ശ്രിലങ്കന്‍ താടിക്കാരന്‍’ എന്ന് ഞങ്ങള്‍ സുഹൃത്തുകള്‍ തമ്മില്‍ പറഞ്ഞു. ചര്‍ച്ച തുടങ്ങി, തന്‍റെ പുസ്തകത്തെ പറ്റി അദ്ദേഹം സംസാരിക്കാന്‍ ആരംഭിച്ചതോടെ വേദി സജീവമായി. അന്ന് ഷെഹന്‍ ഇത്ര പ്രശസ്തനല്ല, ഡി എസ് സി സമ്മാനമോ, കോമണ്‍ വെല്‍ത്ത് സമ്മാനമോ നേടിയിട്ടില്ല, പുസ്‌തകം പ്രചാരത്തില്‍ ആകുന്നതേ ഉള്ളൂ. എന്നാലും ശ്രിലങ്കന്‍ ക്രിക്കറ്റ് രംഗത്ത് ഒരു മിന്നായം പോലെ വന്നു പോയ ഇടം കയ്യന്‍ സ്പിന്നര്‍ ആയ സാങ്കല്‍പ്പിക ക്രിക്കറ്റ് കളിക്കാരന്‍റെ ദുരൂഹമായ തിരോധാനം അന്വേഷിച്ചിറങ്ങുന്ന വിജെ കരുണസേന എന്ന കുടിയനും വയസ്സനുമായ സ്പോര്‍ട്സ് ലേഖകനെ അവതരിപ്പിക്കാന്‍ ഈ ചെറുപ്പക്കാരന്‍ തന്‍റെ ജീവിതത്തിന്‍റെ ഏതാനും വര്‍ഷങ്ങള്‍ തന്നെ മാറ്റി വച്ച് ഗവേഷണം നടത്തി എന്ന് കേട്ടപ്പോള്‍ തോന്നി, വെറുതെയല്ല ഈ പുസ്‌തകം ഇത്രയും ശക്തമായത്‌.
ഷെഹന്‍ പരസ്യ രംഗത്ത് പ്രവര്‍ത്തിക്കുന്ന വ്യക്തിയാണ്, വാക്കുകളുടെ ആ ബലം, കുറിക്കു കൊള്ളുന്ന പ്രയോഗങ്ങള്‍ ഒക്കെ വരുന്നത് അവിടെ നിന്നാകണം.ഈ കൊളംബോകാരന്‍ ഉദ്യോഗവശാല്‍ ഇപ്പോള്‍ ജീവിക്കുന്നത് സിങ്കപൂരിലും. എങ്കിലും പുസ്‌തകം ലോകം ശ്രദ്ധിക്കുന്ന വിജയം ആവുകയും, കൂടുതല്‍ രാജ്യങ്ങളില്‍ പ്രസിദ്ധീകരിക്കുകയും ചെയ്തതോടെ ഷെഹന്‍ ഇപ്പോള്‍ ലോകം ചുറ്റുന്ന എഴുത്തുകാരന്‍ ആയിരിക്കുന്നു. ഏറ്റം ഒടുവിലായി, ഇംഗ്ലീഷില്‍ എഴുതുന്ന ഏതു ഏഷ്യന്‍ എഴുത്തുകാരനും ആഗ്രഹിക്കുന്ന അമേരിക്കന്‍ എഡിഷന്‍ ആണ് പുറത്തു വന്നിട്ടുള്ളത്. ഷെഹന്‍ മലയാളനാടിനോട് സംസാരിച്ചത് ഇങ്ങനെയാണ്.

മലയാളനാട്: പരസ്യ രംഗത്തെ പ്രവര്‍ത്തനം താങ്കളുടെ എഴുത്തിനെ സ്വാധീനിച്ചിട്ടുള്ളത് എങ്ങനെയാണ്?

ഷെഹന്‍ കരുണതിലക : കുറച്ചു സമയത്തിനുള്ളില്‍ ഒരുപാട് ആശയങ്ങള്‍ കണ്ടുപിടിക്കാന്‍ പരസ്യത്തിനുള്ള എഴുത്ത് നമ്മളെ ശീലിപ്പിക്കുന്നുണ്ട്. കഥകള്‍ തേടിപ്പോകുമ്പോള്‍ ഇതൊരു നല്ല ശീലമാണ്. ചെറിയ, കുറിക്കു കൊള്ളുന്ന വാചകങ്ങള്‍ എഴുതാന്‍ ഇത് നമ്മളെ പഠിപ്പിക്കുന്നു. എന്നാല്‍ ഒരു നോവല്‍ എഴുതുമ്പോള്‍ ഈ ശീലം മാറ്റണം എന്ന് തോന്നുന്നു. ഫിക്ഷന്‍ എന്നാല്‍ നുണയുടെ കുപ്പായം അണിഞ്ഞ വാസ്തവം ആണെങ്കില്‍ പരസ്യങ്ങള്‍ ആ നാണയത്തിന്‍റെ മറുവശമാണ്, നുണ ഇവിടെ സത്യത്തിന്‍റെ കുപ്പായം അണിഞ്ഞു നില്‍ക്കുകയാണ്. എനിക്കൊരു ജീവിതമാര്‍ഗം തന്നതിന് ഈ നുണകളോട് എനിക്ക് നന്ദിയുണ്ടെങ്കിലും, ഞാന്‍ അവയില്‍ നിന്ന് വര്‍ഷങ്ങളായി രക്ഷപെടാന്‍ ശ്രമിക്കുകയാണ് എന്നതാണ് സത്യം.

മലയാളനാട്: താങ്കള്‍ കഥയും കവിതയും യാത്ര വിവരണവും നോവലും ഒക്കെ എഴുതുന്നുണ്ട്, ഇതില്‍ എന്ത് എഴുതുന്നതിനോടാണ് വാസ്തവത്തില്‍ കമ്പം?

ഷെഹന്‍ കരുണതിലക :നോവല്‍ എഴുതുന്നത്‌ നീണ്ടതും ശ്രമകരവുമായ ഒരു പ്രക്രിയ തന്നെയാണ്. എന്നാലും ഏറ്റം സംതൃപ്തി തരുന്നതും അത് തന്നെ, പ്രത്യേകിച്ച് കഥയുടെ താളം കണ്ടു തുടങ്ങുമ്പോള്‍. പാട്ടുകള്‍ എഴുതുന്നത്‌ എനിക്കിഷ്ടമാണ്, സംഗീതം എന്നാല്‍ ഏറ്റവും ഉള്ളില്‍ നിന്ന് വരുന്ന ഒരു കലയായാണ് എനിക്ക് തോന്നീട്ടുള്ളത്, അതില്‍ ഞാന്‍ അല്പം കൂടി മിടുക്കന്‍ ആയിരുന്നെങ്കില്‍ എന്ന് ആശിക്കാറുണ്ട്.

മലയാളനാട്: നോവല്‍ എഴുതിക്കഴിഞ്ഞാല്‍ എഴുത്തുകാരന്‍ വളരെ ചുരുക്കമായേ ചെറുകഥ എഴുതാറുള്ളൂ..എന്താണ് ഇതിനെ പറ്റി പറയാനുള്ളത്?

ഷെഹന്‍ കരുണതിലക :ചെറുകഥ എന്ന സാഹിത്യ രൂപം വളരെ ശ്രമകരമായ ഒന്നാണ് എന്ന് എനിക്ക് തോന്നിയിട്ടുണ്ട്. വളരെ ചുരുക്കം പേര്‍ക്കേ ഇവ രണ്ടും ഒരേ പ്രതിഭയോടെ കൈകാര്യം ചെയ്യാന്‍ കഴിയാറുള്ളൂ. ഇവിടെ ടെസ്റ്റ്‌ മാച്ച് ട്വന്‍റി-ട്വന്‍റി എന്ന ഒരു താരതമ്യം ഞാന്‍ മന::പൂര്‍വം ഒഴിവാക്കുകയാണ്, നോവലിനെ ടെസ്റ്റ്‌ മാച്ചിനോടു ഉപമിച്ചാലും ട്വന്‍റി ട്വന്‍റി യെക്കാളും വളരെ വളരെ ഉന്നതങ്ങളില്‍ നില്‍ക്കുന്ന ഒരു സാഹിത്യ രൂപമാണ് ചെറുകഥ. ഒരുപക്ഷെ കൂടുതല്‍ നോവലിസ്റ്റുകള്‍ ചെറുകഥ എഴുതാത്തതിന്‍റെ പിന്നിലെ കാരണം കലയെക്കാളും ഇക്കണോമിക്സ്‌ തന്നെയാകാം. നല്ല ചെറുകഥകള്‍ വായിക്കാന്‍ എനിക്ക് ഇഷ്ടമാണ്, ഒരിക്കല്‍ ഞാനും അത് ധാരാളമായി എഴുതണം എന്ന് കരുതുന്നു.

മലയാളനാട്: ചൈനമാന്‍ പ്രസിദ്ധീകരിക്കാന്‍ ഉണ്ടായ ശ്രമങ്ങളെ പറ്റി അല്പം പറയാമോ? ആ പുസ്തകത്തിന്‌ അഭിച്ച പ്രതികരണങ്ങളും?

ഷെഹന്‍ കരുണതിലക : നല്ല ചെറുകഥ ആയേയ്ക്കാവുന്ന ഒരാശയം എനിക്ക് തോന്നിയതാണ് പിന്നീട് ചൈനമാന്‍ ആയത് . ലോക റിക്കാര്‍ഡുകള്‍ ഭേദിച്ച മഹാനായ ഒരു ശ്രിലങ്കന്‍ ക്രിക്കറ്റ് കളിക്കാരന്‍ പെട്ടെന്ന് തിരശീലയ്ക്കു പിന്നിലേക്ക്‌ മറയുകയാണ്. ഇദ്ദേഹത്തിന്‍റെ കരിയര്‍ വിഷയമാക്കി ഒരു കഥ എന്നും രാവിലെ ജോലിക്ക് പോകും മുമ്പ് ആറു മാസത്തോളം എഴുതി വന്നപ്പോള്‍ ആ ചെറുകഥ വളര്‍ന്നു എണ്‍പത് പേജില്‍ എത്തി നിന്നു.
അങ്ങനെ ഞാന്‍ പരസ്യ രംഗത്തെ എന്‍റെ ജോലി രാജി വച്ച് രണ്ടു കൊല്ലം മുഴുവനായും ക്രിക്കറ്റ് മാച്ചുകള്‍ കാണുകയും, മദ്യപാനികളെ ഇന്‍റര്‍വ്യു ചെയ്യുകയും കൂടെ എഴുതുകയും ചെയ്തുകൊണ്ടിരുന്നു. ഒടുവില്‍ അത് ഒരു മുഴുവന്‍ കഥ ആയപ്പോള്‍ എനിക്ക് അത് കൊള്ളാം എന്നു തോന്നി. പക്ഷെ അത് മറ്റാര്‍ക്കെങ്കിലും ഇഷ്ടപ്പെടുമോ എന്നു എനിക്ക് ഒരു രൂപവും ഇല്ലായിരുന്നു. അങ്ങനെയാണ് ഞാന്‍ ശ്രീലങ്കയിലെ അനേകം എഴുത്തുകാര്‍ ചെയ്യുന്നത് പോലെ നോവല്‍ സ്വയം പ്രസിദ്ധീകരിച്ചത്. അവിടെ പുസ്തക പ്രസിദ്ധീകരണം അത്ര ചെലവുള്ള സംഗതിയല്ല. ഇത് നടന്നത് രണ്ടായിരത്തി എട്ടിലാണ്. അതിനു തൊട്ടു മുന്നേ ഞാന്‍ സിങ്കപ്പൂരിലേക്ക് ഉദ്യോഗത്തിനായി ചേക്കേറി.
ശ്രീലങ്കക്ക് പുറത്ത് ഈ പുസ്‌തകം പ്രസിദ്ധീകരിക്കപ്പെടുക എന്ന ബോണസ് ഞാന്‍ ഒട്ടും പ്രതീക്ഷിച്ചതല്ല. എന്നാലും വര്‍ഷം നാലോ അഞ്ചോ പ്രസാധകര്‍ക്ക് ഞാന്‍ ഇത് അയച്ചു കൊടുത്തുകൊണ്ടിരുന്നു. ഒടുവില്‍ ഒരു വര്‍ഷത്തിനു ശേഷം Galle Fest ല്‍ വച്ച് ഞാന്‍ അമിത് വര്‍മയെ പരിചയപ്പെട്ടു, അദ്ദേഹം എനിക്ക് കുറെ ഇന്ത്യന്‍ പ്രസാധകരുടെ മേല്‍വിലാസം തന്നു. അവരില്‍ ഒരാള്‍, ചിക്കി സര്‍കാര്‍ എന്ന പ്രസാധക, എന്‍റെ പുസ്‌തകം ഏറ്റെടുക്കുകയായിരുന്നു. ഞാന്‍ എഴുതി വച്ചിരുന്നതില്‍ നിന്നും ഏതാണ്ട് നൂറു പേജ് അവര്‍ എടുത്തു മാറ്റി, ബാക്കി ഉള്ള ഭാഗത്തെ ബോറടിക്കുന്ന ശകലങ്ങള്‍ വെട്ടിക്കളഞ്ഞു എന്നിട്ട് അവര്‍ ഈ പുസ്‌തകം പുറം ലോകത്ത് എത്തിച്ചു. അവര്‍ കാരണമാണ് ഈ സംഭാഷണം നമ്മള്‍ നടത്തുന്നത് തന്നെ. നമ്മള്‍ ശ്രമിച്ചു കൊണ്ടിരുന്നാലെ പറ്റൂ. അല്ലാതെ മിക്ക പുസ്തകങ്ങളും വെളിച്ചം കാണുകയില്ല.
പ്രതികരണങ്ങളെ പറ്റി ആലോചിച്ചാല്‍, ഞാന്‍ പുസ്‌തകം ശ്രീലങ്കയില്‍ പുറത്തു വരുന്നതിനു തൊട്ടു മുന്‍പായി സിങ്കപ്പൂരിലേക്ക് കൂട് മാറി. ശ്രീലങ്കയിലെ ആളുകള്‍ വിശേഷിച്ചും ക്രിക്കറ്റ് ആരാധകര്‍ പത്രപ്രവര്‍ത്തകന്‍ വിജെയുടെ ലങ്കന്‍ കാഴ്ചപ്പാടിനെ കുറിച്ച് അമര്‍ഷം കൊള്ളുമോ എന്നു ഞാന്‍ ഭയന്നിരുന്നു. എന്നാല്‍ വിമര്‍ശനങ്ങളും പ്രതികരണങ്ങളും ഒക്കെ വളരെ ഗംഭീരമായിരിക്കുന്നു. Michael Ondaatje, Mohammed Hanif തുടങ്ങിയവര്‍ പുസ്തകത്തെ പറ്റി നല്ല പ്രതികരണം പറഞ്ഞു. നോവല്‍ ക്രിക്കറ്റിനെ പറ്റി അല്ല എന്നും, അതില്‍ ഒരു അടിയൊഴുക്കുണ്ട് എന്നും വായനക്കാരന്‍ മനസ്സിലാക്കിയിരിക്കുന്നു. എനിക്കേറ്റം ഇഷ്ടമായത്, ക്രിക്കറ്റിനെ പറ്റിയോ ശ്രീലങ്കയെ പറ്റിയോ ഒന്നും അറിയാത്ത ആളുകള്‍ പുസ്‌തകം ആസ്വദിച്ചതായി പറയുമ്പോഴാണ് .

മലയാളനാട്: ഇന്നത്തെ ശ്രിലങ്കന്‍ സാഹചര്യവുമായി എത്രത്തോളം താദാത്മ്യം പ്രാപിക്കാന്‍ ആവുന്നുണ്ട്‌?

ഷെഹന്‍ കരുണതിലക : ഒരു എഴുത്തുകാരന് താമസിക്കാന്‍ ഏറ്റം പറ്റിയ ഇടമാണ് ശ്രീലങ്ക, അവിടെ ഇതുവരെ പറയാത്ത കഥകളുടെ ഒരു സ്വര്‍ണ ഖനി തന്നെയുണ്ട്‌. രണ്ടായിരം വര്‍ഷങ്ങള്‍ക്കു മേല്‍ പ്രായമുള്ള മിത്തുകള്‍, ഞങ്ങളുടെ കൊളോണിയല്‍ ഭൂതകാലം, മുപ്പതു വര്‍ഷമായി നടക്കുന്ന ആഭ്യന്തര യുദ്ധം, ഞങ്ങളുടെ മാര്‍ക്സിസ്റ്റ്‌ വിപ്ലവങ്ങള്‍ , ഞങ്ങളുടെ രാഷ്ട്രീയം, സുനാമി, അല്ലെങ്കില്‍ ക്രിക്കറ്റ്…ചെറിയ ഒരു രാജ്യമാണ് ഞങ്ങളുടേത്.. എന്നാലും വിസ്മയകരമായ വൈചിത്ര്യങ്ങള്‍ നിറഞ്ഞത്‌.

മലയാളനാട്: നിങ്ങളുടെ ശൈലി വളരെ വ്യത്യസ്തമായ ഒന്നാണ് എന്ന് പറയുന്നുണ്ട്. ഇത് ഈ നോവലിന് വേണ്ടി സ്വീകരിച്ച ഒന്നാണ്, എന്നു പറയാമോ?

ഷെഹന്‍ കരുണതിലക : ഒരു മദ്യപാനിയെ കൊണ്ട് കഥ പറയിക്കുക എന്ന തീരുമാനം ആണെന്ന് തോന്നുന്നു ഈ പുസ്തകത്തിന്‌ വാസ്തവത്തില്‍ ജീവന്‍ കൊടുത്തത്. ആ വോയ്സ് ഞാന്‍ സ്വീകരിച്ചതോടെ കഥ സ്വയം ഒഴുകാന്‍ തുടങ്ങുകയായിരുന്നു. എന്‍റെ പുതിയ നോവലില്‍ ഞാന്‍ ഇങ്ങനെ മറ്റൊരു വോയ്സ് പരീക്ഷിക്കുകയാണ്. കഥ പറയുന്നതില്‍ ഏറ്റവും രസമുള്ള കാര്യം ഇങ്ങനെ പല തരം വോയ്സ് പരീക്ഷിക്കുന്നത് തന്നെയാണ്.

മലയാളനാട്: അവാര്‍ഡുകള്‍ക്ക് ശേഷം എന്ത് തോന്നുന്നു?

ഷെഹന്‍ കരുണതിലക : ഞാന്‍ ചൈനമാന്‍ എഴുതുമ്പോള്‍ അത് ശ്രീലങ്കക്ക് പുറത്തു വെളിച്ചം കാണും എന്ന് കൂടി കരുതിയതല്ല. ഗല്ലെയിലും കാണ്ടിയിലും പിന്നെ പരിഭാഷ ചെയ്യപ്പെടുകയാണെങ്കില്‍ ശ്രീലങ്കയുടെ മറ്റു ഭാഗങ്ങളിലും ആളുകള്‍ വായിക്കും എന്ന് മാത്രമാണ് കരുതിയിരുന്നത്. ഇന്ത്യയില്‍ ഇത് പ്രസിദ്ധീകരിക്കപ്പെടുന്നത് തന്നെ ഒരു സ്വപ്ന സാക്ഷാത്കാരം ആണ്, ലോകത്തിലേക്ക്‌ ഈ പുസ്‌തകം എത്തുകയെന്നാല്‍, സ്വപ്നത്തിനും അപ്പുറത്ത് തന്നെയാണ്.
അവാര്‍ഡുകള്‍ എന്നെ വിനയാന്വിതന്‍ ആക്കുന്നു. അവിശ്വസനീയം. ഇതൊന്നും ഞാന്‍ പ്രതീക്ഷിച്ച കാര്യങ്ങളേ അല്ല. ഒരു അപരിചിതന്‍റെ സമ്മാനം പോലെയൊക്കെ തോന്നുന്നു. കുറെ ഭാഗ്യം, പിന്നെ അതില്‍ കൂടുതലൊക്കെ അവാര്‍ഡ്‌ പോലത്തെ കാര്യങ്ങളില്‍ വായിച്ചെടുക്കുന്നത് അപകടമാണ് എന്നു തോന്നുന്നു. പുസ്‌തകം കൂടുതല്‍ പേര്‍ വായിക്കും, പുസ്തകത്തെ പറ്റി കൂടുതല്‍ എഴുത്തുകള്‍ ഉണ്ടാകും, ബയോഡാറ്റയില്‍ ഒരു വരി കൂടി കയറും, പിന്നെ അവാര്‍ഡിന്‍റെ കൂടെ ഉള്ള തുക എപ്പോഴും പ്രയോജനപ്പെടും, എന്നാല്‍ അവാര്‍ഡിന് വേണ്ടി എഴുതുന്നത്‌ ഒരു വല്ലാത്ത ഏര്‍പ്പാട് തന്നെയാണ്. അത് ചെയ്യുന്നവന്‍റെ തൂലിക എടുത്തു മാറ്റണം.

മലയാളനാട്: ക്രിക്കറ്റില്‍ താത്പര്യം ഉണ്ടോ?

ഷെഹന്‍ കരുണതിലക :അത്രക്കൊന്നുമില്ല. തൊണ്ണൂറ്റി ആറിലെ ശ്രിലങ്കന്‍ വിജയത്തിന് ശേഷം ഇവിടെ എല്ലാരും താല്പര്യം ഉള്ളവരാണ്. ഞാന്‍ അത്ര ക്രിക്കറ്റ് ഭ്രാന്തനൊന്നും അല്ല. എന്നാല്‍ നോവല്‍ എഴുത്ത് നടന്ന രണ്ടു കൊല്ലം ഞാന്‍ ക്രിക്കറ്റ് വളരെ ശ്രദ്ധിച്ചിരുന്നു.

മലയാളനാട്: ചൈനമാന്‍ എത്രത്തോളം സത്യമാണ്?

ഷെഹന്‍ കരുണതിലക :പ്രദീപ്‌ മാത്യുവിന്‍റെ പേര് ഒഴികെ എല്ലാം സത്യം തന്നെ.

മലയാളനാട്: അടുത്ത സംരംഭം?

ഷെഹന്‍ കരുണതിലക : അതേ…… മറ്റൊരു നോവല്‍, ശ്രീലങ്കയില്‍ തന്നെ സംഭവിക്കുന്ന എന്നാല്‍ ചൈനമാനില്‍ നിന്നും വളരെ വിഭിന്നമായ ഒരു നോവല്‍. ഇതിനായി ഇപ്പോള്‍ ഗവേഷണം നടത്തുകയാണ്. ഒന്ന് രണ്ടു കൊല്ലം കൊണ്ട് തീരണം.

മലയാളനാട്: ചൈനമാനിനു മുമ്പും, പിമ്പും ജീവിതം എങ്ങനെ വ്യത്യസ്തമായി?

ഷെഹന്‍ കരുണതിലക : ചൈന മാനിനു ശേഷം ഞാന്‍ തിരിച്ച് ജോലിക്ക് പോയി. തല പെരുത്ത അവസ്ഥയായിരുന്നു എനിക്ക്, ബാങ്ക് അക്കൌണ്ടില്‍ ഒരു ചില്ലി കാശില്ല. സിങ്കപ്പൂര്‍ പോലെ ഒരിടത്തെ ജീവിതച്ചെലവു താങ്ങാന്‍ ഒരു മുഴുവന്‍ സമയ എഴുത്തുകാരന് സാധിക്കാത്തതു കാരണം ഇടയ്ക്കു പരസ്യ എജന്‍സികള്‍ക്കും മാസികള്‍ക്കും വേണ്ടി ഞാന്‍ എഴുതാറുണ്ട്. വില്പന കണക്കുകള്‍ അവാര്‍ഡുകള്‍ ഇവയൊക്കെ എഴുത്തിനെ ബാധിക്കാവുന്ന ഒന്നാവരുത്.

കവർ : വിത്സൺ ശാരദാ ആനന്ദ്