പതിപ്പുകൾ

ആഴ്ചവായനക്കുശേഷ –
മട്ടിയട്ടിയായെടുത്ത
ളന്നുതൂക്കി വാക്കിനാൽ,
ഉൾനിറഞ്ഞ ഭാവ-രാഗ
സ്മൃതികളക്ഷരങ്ങളായ്
റാക്കിലേക്കടുക്കിവെച്ചൊ –
രാനുകാലികസ്ഥിതി:

ക്രമികകാലചര്യയിൽ
സംക്രമിച്ചൊരർത്ഥവും
ചരിത്ര- ലോക ഗതികളും
ഭാവുകത്വമാപിനിക്ക്
ധ്വനിവിജൃംഭബിംബവും
വീണ്ടെടുപ്പി,നോർമ്മകൾ –
ക്കെന്നുൾനിറഞ്ഞ പിൻബലം
കരുതികാത്തുവെച്ചതി –
ന്നടുക്കുതൂക്കി വിൽപന ,
കുരുക്കുപാക മൂകത.

തൊട്ടതില്ലൊരിക്കലും
പൊടിപിടിച്ച നേർമയിൽ
തുറന്നതില്ലൊരിക്കലും
വെറുതെ മിന്നുമോർമയിൽ

താളിൽ നിന്ന് വെൺചിതൽ ,
ഉറുമ്പ്, പാറ്റ വരികളായ്
സംഘമായാരചിച്ചു
തുടരെഴുത്ത്, കൂട്ടുകാവ്യം.

കോറൽവീണ ക്ലിഷ്ടലേഖ്യം
പുറംചട്ട വിട്ട ലക്കം
മടുക്കാത്ത സൂക്ഷിപ്പിൻ
ബാധയേറ്റ പതിപ്പായ് ഞാൻ

_{കവർ: ജ്യോതിസ് പരവൂർ}