2024 ലെ മലയാള സിനിമയിലേക്കൊരു ലോങ്ങ് ഷോട്ട്

ആനന്ദ് ഏകർഷി തിരക്കഥയെഴുതി സംവിധാനം ചെയ്ത ‘ ആട്ടം ‘ 2024 ലാണ് പുറത്തിറങ്ങിയത്. മികച്ച സിനിമയ്ക്കുള്ള ദേശീയഅവാർഡു കിട്ടിയതോടെ സിനിമ ഏറെ ചർച്ചചെയ്യപ്പെട്ടു. വിനയ് ഫോർട്ട്, ഷാജോൺ, സറിൻ ഷിനാസ് എന്നിവരായിരുന്നു മുഖ്യ കഥാപാത്രങ്ങളെ അവതരിപ്പിച്ചത്. നാടകസംഘത്തിലെ മറ്റ് കഥാപാത്രങ്ങളെ അവതരിപ്പിച്ച നടന്മാരും മികച്ച പ്രകടനമാണ് കാഴ്ചവെച്ചത്. സറിന്റെ പ്രകടനം തന്നെയാണ് മുൻപന്തിയിൽ നിൽക്കുന്നത്. പുരുഷകേന്ദ്രീകൃത സമൂഹത്തിൽ തന്റേടത്തോടെ നിൽക്കുന്ന നാടകകട്രൂപ്പിലെ നായികയ്ക്ക് ഒരു പ്രതിസന്ധിയുണ്ടായപ്പോൾ അടുപ്പമുണ്ടെന്ന് കരുതുന്നവരുടെ പ്രതികരണത്തിന്റെ വ്യതിയാനം വിദഗ്ധമായി സിനിമ അവതരിപ്പിച്ചിട്ടുണ്ട്. കാമുകൻ പോലും കയ്യൊഴിഞ്ഞ ഘട്ടത്തിലും നായിക തളരാതെ മുന്നോട്ട് പോകുന്ന സാഹചര്യം ഒട്ടും നാടകീയതയില്ലാതെ സിനിമ ചർച്ചചെയ്തു. സാങ്കേതികഘടകങ്ങളും മികച്ചതായിരുന്നു.

ബ്ലെസ്സിയും കൂട്ടരും ഏറെക്കാലം കൊണ്ട് പണിപ്പെട്ട് ഒരുക്കിയ മരുഭൂമിയിലെ കാഴ്ചകൾ ഗംഭീരം. Lawrence of Arabia ഓർമ്മ വരും. മസറയിലെത്തിയ നജീബിന്റെ നരക ജീവിതത്തേക്കാൾ അവിടെ നിന്ന് രക്ഷപ്പെടാനുള്ള മാർഗ്ഗങ്ങളെയാണ് സിനിമ ഫോക്കസ് ചെയ്തിരിക്കുന്നത്. പൃഥ്വിരാജിന്റെ മേക്ക് ഓവറിന് അഭിനന്ദനങ്ങൾ. രണ്ടാം പകുതിയിലാണ് പ്രകടനം ഒന്ന് കൂടി മികച്ചു നിന്നത്. നാട്ടിലെ ഓർമ്മകൾ വരുന്ന സീനുകൾ വളരെ സാധാരണമായിപ്പോയി. സിനിമയുടെ ടോട്ടാലിറ്റിയിൽ നിന്ന് വേറിട്ട് നിൽക്കുന്നതായി അനുഭവപ്പെട്ടു. രണ്ടാം പകുതിയിൽ നിറഞ്ഞുനിൽക്കുന്നത് ഇബ്രാഹിം കാദിരിയായി വരുന്ന ജിമ്മി ജീൻ ലുയിസും ഹക്കീമായി വരുന്ന ഗോകുലുമാണ്. അവരുടെ കോമ്പിനേഷൻ രംഗങ്ങൾ മികച്ചതായി. സിനിമയുടെ തുടക്കത്തിൽ സൗദി വിമാനത്താവളത്തിൽ വന്നിറങ്ങുന്ന ഹക്കീമിന്റെ അമ്പരപ്പും ആശങ്കയും ഗോകുൽ എന്ന നടനെ കാണിച്ചു തരുന്നു. അന്ത്യരംഗങ്ങളിലെ ദൈന്യത നമ്മളെ സ്പർശിക്കും. ഒരു വേദനയായി കൊളുത്തി വലിക്കും. മസറയിലെത്തി ഏറെ നാളുകൾക്ക് ശേഷം ഹക്കീമിനെ കാണുന്ന രംഗം ഹൃദയസ്പർശിയായി. കെ എസ് സുനിലിന്റെ മികച്ച ക്യാമറക്കാഴ്ചകൾ മരുഭൂമിയുടെ വന്യത കാണിച്ചു തരുന്നുണ്ട്. റസൂൽ പൂക്കുറ്റിയുടെ ശബ്ദലേഖനം കൊള്ളാം. എ. ആർ. റഹ്മാന്റെ സംഗീതം ചിത്രത്തോട് ചേർന്ന് നിന്നു. മേക്കപ്പ് ആർട്ടിസ്റ്റ് രഞ്ജിത്ത് അമ്പാടിയുടെ കൈയ്യൊപ്പ് പതിഞ്ഞ ചിത്രമാണ്.

ഡാർക്ക് കോമഡി ത്രില്ലർ വിഭാഗത്തിൽപെട്ട ചിത്രമാണ് എം സി എന്ന പേരിൽ അറിയപ്പെടുന്ന എം സി ജിതിൻ സംവിധാനമ ചെയ്ത ‘സൂക്ഷ്മ ദർശിനി ‘ എന്ന ചിത്രം. ഒരിടവേളയ്ക്ക് ശേഷമുള്ള നസ്രിയയുടെ ശക്തമായ തിരിച്ചുവരവ്, ബേസിലിന്റെ രസിപ്പിക്കുന്ന അഭിനയം എന്നിവ കൊണ്ട് ശ്രദ്ധേയമാണ് ഈ ചിത്രം. ഒരു ത്രില്ലർ സ്വഭാവം സിനിമയിലുടനീളം നിലനിർത്തിയിട്ടുണ്ട്. ക്ലൈമാക്സ് എല്ലാവര്ക്കും വർക്ക് ആകണമെന്നില്ല. നസ്രിയ, ദീപക് പറമ്പിൽ ദമ്പതികളുടെ വീട്ടിനടുത്ത് ബേസിലും അമ്മയും താമസം മാറി വരുന്നത് തൊട്ടാണ് സിനിമയുടെ തുടക്കം. ‘അമ്മയ്ക്ക് ഓർമ്മക്കുറവുള്ള അസുഖമായത് കൊണ്ട് പലപ്പോഴായി വീട് വിട്ടു പോകുന്നു .ഇക്കാര്യത്തിൽ സൂക്ഷ്മ ദർശിനിയായ നസ്രിയയുടെ സംശയങ്ങളാണ് സിനിമയെ മുന്നോട്ട് കൊണ്ട് പോകുന്നത്. നസ്രിയയുടെ അയൽക്കാരികളായ സുഹൃത്തുക്കളുടെ പിന്തുണ കൂടി ആകുമ്പോൾ അനേഷണം പുരോഗമിക്കുന്നു. സിദ്ധാർഥ് ഭരതൻ ചെയ്ത കഥാപാത്രവും രസകരമായിട്ടുണ്ട്.