ഇക്കരെ നിന്ന്

ഇക്കരെ നിന്നു പരുക്കൻവഴിയൂ-

ടക്കര പറ്റാനൊരു പുഴു….

കമ്പിളിനൂലിൻ കുപ്പായവുമി-

ല്ലമ്പിളി മിന്നും കനവും…

വേച്ചു വിറച്ചു വിയർത്തുമുഴച്ചും

മൂച്ചു പിടിച്ചും അഴന്നു വലഞ്ഞും

ആഞ്ഞു ഞെരിക്കാനേതൊരു കൈ?

തേച്ചു തുലയ്ക്കാനേതൊരു കാൽ?!

കാണാപ്പേടികൾ ചൂഴേ നെയ്തൊരു

വലയിൽ കുതറി വലഞ്ഞും

അലകടലിൽ തിര, ചൊരിമണലിന്നല –

യിഞ്ചിനു താണ്ടി ഞരമ്പുമിടിപ്പുകൾ

പാകിയ വഴിയിൽ പുഴുവിഴയുന്നു.

അക്കരയുണ്ടൊരു പച്ചപ്പിൻ തല

ചക്കര കാട്ടി വിളിക്കുന്നു

അക്കര ചക്കര പിന്നെയുമക്കര-

യകന്നുമായും ചക്കരകൾ….

ഇക്കരെ നിന്നു പരുക്കൻ വഴിയൂ-

ടക്കര പറ്റാനൊരു പുഴു…