ഐക്യരാഷ്ട്രസഭയിൽ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു നടത്തിയ പ്രസംഗം, ചരിത്രപരമായ ധാർഷ്ട്യത്തിൻ്റെയും നഗ്നമായ നുണപ്രചാരണത്തിൻ്റെയും ഏറ്റവും പുതിയ അദ്ധ്യായമാണ്. ഗാസയിലെ മണ്ണിനടിയിൽ കുഴിച്ചിട്ട ആയിരക്കണക്കിന് നിരപരാധികളുടെ മൃതദേഹങ്ങൾ ലോകത്തോട് വിളിച്ചുപറയുന്ന യാഥാർത്ഥ്യത്തെ, ‘ഭീകരതയ്‌ക്കെതിരായ പോരാട്ടം’ എന്ന ഒറ്റവാക്കിൽ ഒതുക്കി ലോക മനഃസാക്ഷിയെ കബളിപ്പിക്കാനുള്ള അദ്ദേഹത്തിൻ്റെ ശ്രമം, പരാജയപ്പെട്ട ഒരു ദുരന്ത നാടകമാണ്.
നെതന്യാഹു, തൻ്റെ രാജ്യത്തെ ജനാധിപത്യത്തിൻ്റെ പ്രകാശഗോപുരമായി വാഴ്ത്തുമ്പോൾ, ആധുനിക ലോകം കണ്ടിട്ടുള്ളതിൽ വെച്ച് ഏറ്റവും നിഷ് ടുരമായ വംശീയ ഉന്മൂലനത്തിന് ഇസ്രായേൽ സൈന്യം നേതൃത്വം നൽകുകയാണ്. ഈ ചെയ്തികൾ വെറും സൈനിക നടപടികൾ അല്ല; മറിച്ച്, പലസ്തീൻ ജനതയുടെ വേരറുക്കാനുള്ള വ്യക്തമായ രാഷ്ട്രീയ അജണ്ടയുടെ നടപ്പാക്കലാണ്. മനുഷ്യത്വമാണ്‌ അവിടെ കൊന്നു കുഴിച്ചു മൂടപ്പെടുന്നത്. ഏതൊരു മനുഷ്യനെയും നടുക്കുന്ന ഇസ്രായേലിന്റെ സൈനിക അക്രമങ്ങൾ പോരാട്ടം അല്ല, മറിച്ച് തിരിച്ചടിക്കാൻ ശേഷിയില്ലാത്ത ഒരു ജനതയുടെമേലുള്ള നരവേട്ടയാണ്.
ആശുപത്രികൾ, സ്കൂളുകൾ, അഭയാർത്ഥിക്യാമ്പുകൾ എന്നിവയെല്ലാം തകർത്ത്, യുദ്ധനിയമങ്ങളെ പരസ്യമായി ലംഘിച്ചിരിക്കുകയാണ്. ഒരു ജനതയ്ക്ക് വെള്ളം, ഭക്ഷണം, മരുന്ന് എന്നിവ നിഷേധിക്കുന്നത് കൂട്ടശിക്ഷയാണ്. ഈ നടപടി എങ്ങനെ ഭീകരതയ്‌ക്കെതിരായ പോരാട്ടമാവും? മറിച്ച് അത് സംഘടിത ഭീകരതയാണ്.
ആയിരക്കണക്കിന് കുഞ്ഞുങ്ങളുടെ ജീവനെടുക്കുകയും ഗാസയെ വാസയോഗ്യമല്ലാതാക്കുകയും ചെയ്യുന്നതിലൂടെ ഇസ്രായേൽ ഭരണകൂടം പലസ്തീൻ ജനതയെ ഉന്മൂലനത്തിന് ഇരയാക്കുന്നത് യുദ്ധക്കുറ്റമാണ്‌. ലക്ഷക്കണക്കിന് ആളുകളെ അവരുടെ വീടുകളിൽ നിന്ന് പലായനം ചെയ്യാൻ നിർബന്ധിച്ച്, അവരുടെ അസ്തിത്വം തന്നെ ഇല്ലാതാക്കുകയും ചെയ്യുന്നു. ഈ ജനസംഖ്യാപരമായ മാറ്റം വംശീയ ഉന്മൂലനം എന്നതിൻ്റെ കൃത്യമായ പ്രയോഗവൽക്കരണമാണ്.
യുഎൻ വേദിയിലെ കപടമുഖം
യുഎൻ പൊതുസഭയിൽ നിന്നുകൊണ്ട് നെതന്യാഹു ലോകത്തോട് സംസാരിച്ചത്, ഒരു ഭീകരതയുടെ ആസൂത്രകൻ്റെ മനോഭാവത്തോടെയാണ്. നന്മയും തിന്മയും തമ്മിലുള്ള പോരാട്ടം എന്ന് പറഞ്ഞ് അദ്ദേഹം ലോകത്തെ കബളിപ്പിക്കാൻ ശ്രമിക്കുന്നു. എന്നാൽ, ലോകത്തിന് മുന്നിലുള്ള സത്യം, അതിക്രമി അതിജീവിതനെ വേട്ടയാടുന്നതിൻ്റെ ഞെട്ടിക്കുന്ന കാഴ്ചയാണ്. ഒരു ഭരണകൂടം അതിൻ്റെ അധികാരം ഉപയോഗിച്ച് നടത്തുന്ന ഈ ഹീനമായ അതിക്രമങ്ങൾക്ക് നെതന്യാഹു കണക്ക് പറയേണ്ടിവരും.
അന്താരാഷ്ട്ര നീതിന്യായ കോടതികളോ, യുഎൻ പ്രമേയങ്ങളോ ഇസ്രായേലിന് ബാധകമല്ല എന്നുള്ള നിലപാട്, ഇസ്രായേൽ ഭരണകൂടത്തിന് അന്താരാഷ്ട്ര നിയമവ്യവസ്ഥയോടുള്ള പുച്ഛം വ്യക്തമാക്കുന്നു. ഇസ്രായേലിന് ലോകരാജ്യങ്ങൾ നൽകുന്ന പിന്തുണ, മനുഷ്യത്വമില്ലാത്ത ഒരു ഭരണകൂടത്തിനുള്ള ലൈസൻസ് ആക്കി മാറ്റുകയാണ് നെതന്യാഹു.
ലോകമേ, ഉണരുക!
നെതന്യാഹുവിൻ്റെ വാക്കുകളിലെ കപടത തിരിച്ചറിയാത്ത, ഗാസയിലെ ചോരക്കളം കണ്ടില്ലെന്ന് നടിക്കുന്ന ലോകശക്തികളുടെ ഇരട്ടത്താപ്പ് ചോദ്യം ചെയ്യപ്പെടേണ്ടതുണ്ട്. ഗാസയിൽ ഇല്ലാതാകുന്നത് ഒരു ജനതയുടെ പ്രതീക്ഷകളും ഭാവിയുമാണ്. ചരിത്രപരമായ നീതി പുലരുന്നതുവരെ, ഈ യുദ്ധക്കുറ്റങ്ങൾ ലോകത്തിൻ്റെ മനഃസാക്ഷിയെ വേട്ടയാടിക്കൊണ്ടിരിക്കും. നെതന്യാഹുവിന് കയ്യടിച്ച രാജ്യങ്ങൾ, രക്തം പുരണ്ട അവരുടെ കൈകളെക്കുറിച്ച് സ്വയം ലജ്ജിക്കേണ്ടി വരും.
