ജെയിംസ് വർഗീസ്

17 ആം ലോക് സഭയിലേക്കുള്ള തെരഞ്ഞെടുപ്പിന്റെ മൂന്നാം ഘട്ടം പൂർത്തിയായിരിക്കുകയാണ്. 13 സംസ്ഥാനങ്ങളിലും 2 കേന്ദ്ര ഭരണ പ്രദേശങ്ങളിലുമായി 116 ലോക് സഭാ മണ്ഡലങ്ങളിൽ തെരഞ്ഞെടുപ്പ് നടക്കുകയുണ്ടായി. ഗുജറാത്ത് (26), കേരളം (20 ), ഗോവ (2 ) എന്നിവിടങ്ങളിലെ എല്ലാ മണ്ഡലങ്ങളിലും തെരഞ്ഞെടുപ്പ് നടക്കുന്നത് മൂന്നാം ഘട്ടത്തിലാണ്. കർണാടകയിലെ (14 ), മഹാരാഷ്ട്രയിലെ (14) , യു പി യിലെ (10 ) , ആസാം (4 ) , ബീഹാർ ( 5 ) ഒഡിഷ (6 ) ഛത്തിസ്ഗഢ് (7 ) , പശ്ചിമ ബംഗാൾ (5 ) , കാശ്മീരിലെ അനന്തനാഗ് (1 ) ദാമം ഡിയു, ഭദ്ര നാഗർ ഹാവേലി എന്നീ കേന്ദ്ര ഭരണ പ്രദേശങ്ങളിലെ ഓരോ മണ്ഡലങ്ങളിൽ — ഇത്രയും ഇടങ്ങളിലാണ് തെരഞ്ഞെടുപ്പ് നടന്നത്. ത്രിപുരയിൽ കഴിഞ്ഞ തവണ നീട്ടി വച്ച തെരഞ്ഞെടുപ്പും ഈ ഘട്ടത്തിൽ നടക്കുകയുണ്ടായി. ഇതോടു കൂടി, തെക്കേ ഇന്ത്യൻ സംസ്ഥാനങ്ങളിലെയും ഗുജറാത്ത്, ഛത്തിസ്ഗഢ് , പശ്ചിമ ബംഗാൾ ഒഴികെ വടക്കു കിഴക്കൻ സംസ്ഥാനങ്ങളിലെയും തെരഞ്ഞെടുപ്പുകൾ പൂർത്തിയായി. മൂന്നാം ഘട്ടം അവസാനിച്ചതോടു കൂടി 300 ലോക്സഭാ മണ്ഡലങ്ങളിലെ വോട്ടുകൾ പോളിംഗ് ചെയ്യപ്പെട്ടു എന്നതും ശ്രദ്ധേയമാണ്. ഹിന്ദി ബെൽറ്റിലെയും പശ്ചിമ ബംഗാളിലെയും 245 സീറ്റുകളിലെ തെരഞ്ഞെടുപ്പ് മാത്രമാണ് അടുത്ത 4 ഘട്ടങ്ങളിൽ ആയി നടക്കുന്നത്.

മൂന്നാം ഘട്ടത്തോടെ പൊതു തെരഞ്ഞെടുപ്പിലെ ആവേശം പൂർണ്ണസ്ഥായിയിലെത്തി. എവിടെയും തെരഞ്ഞെടുപ്പിന്റെ ആരവങ്ങൾ മാത്രം.

16 – ആം ലോക്സഭയിൽ, മൂന്നാം ഘട്ടത്തിൽ തെരഞ്ഞെടുപ്പ് നടക്കുന്ന 116 മണ്ഡലങ്ങളിൽ, 62 സിറ്റിംഗ് സീറ്റുകൾ ബി ജെ പി യുടേതാണ്. കോൺഗ്രസ്സിന് 16ഉം , സി പി എം ന് 7ഉം , ബി ജെ ഡിക്ക് 6ഉം , എൻ സി പി ക്ക് 4ഉം , എസ് പിക്ക് 3 ഉം , ശിവസേന, ആർ ജെ ഡി, ഐ യൂ എം എൽ , എ ഐ യൂ ഡി എഫ് എന്നീ കക്ഷികൾക്ക് 2 വീതവും സീറ്റുകൾ, കേരള കോൺഗ്രസ്, തൃണമൂൽ കോൺഗ്രസ്, ആർ എസ് പി , എൽ ജെ പി, സി പി ഐ, പി ഡി പി, സ്വാഭിമാന പക്ഷ എന്നിവർക്കാണ് ഓരോന്ന് വീതവും സീറ്റുകൾ ഉണ്ട് .

മൂന്നാം ഘട്ടത്തിൽ തെരഞ്ഞെടുപ്പ് നടന്ന പ്രധാന സംസ്ഥാനം ഗുജറാത്ത് ആണ്. 26 സീറ്റുകൾ ആണ് ഗുജറാത്തിൽ ഉള്ളത്, കഴിഞ്ഞ തവണ മോദിക്ക് അനുകൂലമായാണ് ഗുജറാത്ത് വിധിയെഴുതിയത്. 26 സീറ്റും ബി ജെ പി നേടി. കഴിഞ്ഞ നിയമസഭാ തെരഞ്ഞെടുപ്പിൽ ശക്തമായ മത്സരം നടന്ന ഗുജറാത്തിൽ തുടർന്ന് നടന്ന കാലുമാറ്റത്തിലൂടെ ബി ജെ പി വീണ്ടും ശക്തി തിരിച്ചു പിടിക്കുന്ന കാഴ്ച ആണ് കണ്ടത്. ഇക്കുറി 20 മുതൽ 24 സീറ്റുകൾ വരെ ബി ജെ പി നേടിയേക്കും. കോൺഗ്രസിന് പരമാവധി 2 മുതൽ 6 വരെ സീറ്റുകൾ കിട്ടിയേക്കും. ഗുജറാത്തിയായ മോദി ഫാക്ടർ ഒരു പക്ഷെ 26 സീറ്റും വൈകാരികമായി ബി ജെ പി ക്കു നേടിക്കൊടുത്തേക്കാം.

കേരളം ആണ് മൂന്നാം ഘട്ടത്തിൽ കൂടുതൽ സീറ്റുകളിൽ തെരഞ്ഞെടുപ്പ് നടന്ന മറ്റൊരു സംസ്ഥാനം. ഇവിടെ 20 സീറ്റുകളിൽ ആണ് മത്സരം നടന്നത്. കോൺഗ്രസ് നേതൃത്വം കൊടുക്കുന്ന യു ഡി എഫും സി പി എം നേതൃത്വം കൊടുത്ത എൽ ഡി എഫും തമ്മിലാണ് പ്രധാന മത്സരം. തിരുവനന്തപുരം, പത്തനംതിട്ട, തൃശൂർ ഉൾപ്പെടെ ബി ജെ പി യുടെ നേതൃത്വത്തിലുള്ള എൻ ഡി എ യും അര ഡസൻ സീറ്റുകളിൽ എങ്കിലും കടുത്ത മത്സരം നടത്തിയിട്ടുണ്ട്. കോൺഗ്രസ് അഖിലേന്ത്യാ പ്രസിഡണ്ട് രാഹുൽ ഗാന്ധി മത്സരിക്കുന്ന വയനാടും ശശി തരൂർ മത്സരിക്കുന്ന തിരുവനന്തപുരവും ദേശീയ പ്രാധാന്യമുള്ള മണ്ഡലങ്ങൾ ആണ്. വലിയ അടിയൊഴുക്കുകൾ ഇത്തവണ ഇവിടെ നടന്നു എന്നത് ഫല പ്രവചനം തീർത്തും അസാധ്യമാക്കുന്നു. വോട്ടിങ് ശതമാനം ഉയർന്ന പശ്ചാത്തലത്തിൽ 12 മുതൽ 16 വരെ സീറ്റുകളിൽ യു ഡി എഫും 4 മുതൽ 8 വരെ സീറ്റുകളിൽ എൽ ഡി എഫും വിജയിച്ചേക്കാം. എൻ ഡി എ ഇത്തവണയും അവരുടെ അക്കൗണ്ട് തുറക്കില്ല.

ഗുജറാത്തും കേരളവും കഴിഞ്ഞാൽ ഏറ്റവും അധികം സീറ്റുകളിൽ മത്സരം നടന്നത് കർണാടകയിൽ ആണ്. 14 സീറ്റിൽ ആണ് മൂന്നാം ഘട്ടത്തിൽ കർണാടകയിൽ മത്സരം നടന്നത്. ഇതോടു കൂടി 2 ഘട്ടത്തിലായി കർണാടകയിലെ എല്ലാ സീറ്റിലും മത്സരം പൂർത്തിയായി. ഇവിടെ ബി ജെ പി ഒറ്റക്കും, കോൺഗ്രസ്സ്, ജനതാദൾ എസ് കക്ഷികൾ ഒന്നിച്ചുമാണ് മത്സരിച്ചത്. തീ പാറുന്ന പോരാട്ടമായിരുന്നു ഇക്കുറി. നിലവിൽ ഉത്തര കർണാടകയിൽ 11 സീറ്റുകളിൽ ബി ജെ പിയും മൂന്നു സീറ്റുകളിൽ കോൺഗ്രസ്സും ആണ് ഉള്ളത്. കുമാര സ്വാമിയും, ഡി കെ ശിവകുമാറും, സിദ്ധാരാമയ്യയും കൈമെയ് മറന്നാണ് ഇവിടെ ബി ജെ പി യോട് മല്ലിടുന്നത് . രണ്ടു മുൻ മുഖ്യമന്ത്രിമാരുടെ മക്കൾ മത്സരിക്കുന്ന ഷിമോഗയിൽ യെഡിയൂരപ്പയുടെ മകൻ രാഘവേന്ദ്ര ആയിരിക്കും വിജയി. കോൺഗ്രസിലെ മല്ലികാർജുന ഖാർഗ്ഗെ മത്സരിക്കുന്ന ഗുൽബർഗയിൽ അദ്ദേഹം തന്നെ ജയിക്കാൻ ആണ് സാധ്യത. ജനതാദൾ എസ് മത്സരിക്കുന്ന കോൺഗ്രസിന്റെ സിറ്റിംഗ് മണ്ഡലത്തിൽ ജനതാദൾ എസ് ജയിച്ചേയ്ക്കും . കോൺഗ്രസ്സ് 7 സീറ്റുകളിലും ബി ജെ പി 6 സീറ്റുകളിലും ജയിച്ചേക്കാം.

മഹാരാഷ്ട്രയിലെ 14 സീറ്റുകളിലേക്കാണ് രണ്ടാം ഘട്ടത്തിൽ തെരഞ്ഞെടുപ്പ് നടന്നത്. 14 ൽ 6 സീറ്റുകൾ ബി ജെ പി യും 3 എണ്ണം ശിവസേനയും ഒന്ന് ബി ജെ പി ശിവസേന സഖ്യത്തിലെ സ്വാഭിമാനപക്ഷയും നാലെണ്ണം എൻ സി പി യും ജയിച്ചിരുന്നു. കോൺഗ്രസിന് കഴിഞ്ഞ തവണ ഒരു സീറ്റും കിട്ടിയിരുന്നില്ല. അഹമ്മദ് നഗറിൽ കോൺഗ്രസ് നിയമസഭാ കക്ഷിയുടെ നേതാവ് രാധാകൃഷ്ണ വിഖെ പാട്ടീലിന്റെ മകൻ സുജയ് ബി ജെ പി സ്ഥാനാർഥി ആയി മത്സരിക്കുന്നു. ശരദ് പവാറിന്റെ മകൾ സുപ്രിയ സുലെ മത്സരിക്കുന്ന ബാരമതിയും ശ്രദ്ധ പിടിച്ചുപറ്റിയ മണ്ഡലങ്ങൾ ആണ്. ഇക്കുറി കോൺഗ്രസ് – എൻ സി പി സഖ്യം നില മെച്ചപ്പെടുത്തും എന്നാണ് നിരീക്ഷകർ അഭിപ്രായപ്പെടുന്നത്. ബി ജെ പി 4, എൻ സി പി 4, ശിവസേന 3 കോൺഗ്രസ് 2 , കോൺഗ്രസ് മുന്നണിയിൽ മത്സരിക്കുന്ന സ്വാഭിമാൻ പക്ഷ 1 എന്നിങ്ങനെയാകും മത്സര ഫലം.

ഉത്തർ പ്രദേശിലെ യാദവ മേഖലയിലെയും വടക്കേ ഉത്തർ പ്രാദേശിയിലെയും 10 സീറ്റുകളിൽ വാശിയേറിയ തെരഞ്ഞെടുപ്പാണ് നടന്നത്. കഴിഞ്ഞ തവണ പത്തിൽ 7 സീറ്റുകൾ ബി ജെ പി യും 3 സീറ്റുകൾ എസ് പിയും ആണ് ഇവിടെ നേടിയത്. മുലായംസിംഗ് യാദവ് മത്സരിക്കുന്ന മെയിൻപുരി, വരുൺ ഗാന്ധി മത്സരിക്കുന്ന പിലിബത്ത്, തുടങ്ങിയ മണ്ഡലങ്ങൾ പോരാട്ടത്തിനിറങ്ങുന്നതു മൂന്നാം ഘട്ടത്തിലാണ്. കേന്ദ്ര സംസ്ഥാന സർക്കാറിന് എതിരായ വികാരം ആണ് ഇത്തവണ ഈ മേഖലയിൽ നിഴലിക്കുന്നത്. കരിമ്പ് കർഷകരുടെ പ്രശ്‍നങ്ങൾ വൈകാരികവുമാണ്. അതിനാൽ തന്നെ ഇത്തവണ മഹാ ഗഡ്‌ബന്ധനിലെ സമാജ്‌വാദി പാർട്ടി ഈ മേഖലയിൽ 8 സീറ്റുകൾ നേടും, ബി ജെ പി ക്കു ലഭിക്കുക കേവലം 2 സീറ്റുകൾ മാത്രമാവും. കോൺഗ്രസ് മെയിൻപുരി ഒഴികെ എല്ലാ മണ്ഡലങ്ങളിലും സ്ഥാനാർത്ഥികളെ നിറുത്തിയിട്ടുണ്ട് എങ്കിലും വിജയ സാധ്യത തീർത്തും കുറവാണ്. എസ് പി സ്ഥാനാർത്ഥികൾക്ക് എതിരെ മത്സരിക്കുന്ന കോൺഗ്രസ് സ്ഥാനാർത്ഥികൾ ബി ജെ പി യുടെ വോട്ടുകൾ ഭിന്നിപ്പിക്കുന്നതു മൂലം എസ് പി യുടെ സാധ്യതകൾ വർദ്ധിക്കുകയാണ്.

മൂന്നാം ഘട്ടത്തിൽ ഒഡിഷയിലെ 6 സീറ്റുകളിൽ ആണ് ലോക്സഭയിലേക്കു മത്സരം നടന്നത്. ഭുവനേശ്വർ, പൂരി, കട്ടക്ക്, കിയോഞ്ചർ, സമ്പൽപൂർ, ധെങ്കനാൽ എന്നിവയാണ് മണ്ഡലങ്ങൾ. 6 സീറ്റുകളും ഇപ്പോൾ കൈവശം വച്ചിരിക്കുന്നത് ബി ജെ ഡി ആണ്. എന്നാൽ കട്ടക്ക്, പൂരി, ധെങ്കനാൽ സീറ്റുകളിൽ ഇത്തവണ ബി ജെ പി ക്കായിരിക്കും മുൻ തൂക്കം. ഭുവനേശ്വർ, സമ്പൽപ്പൂർ, കിയോഞ്ചർ സീറ്റുകളിൽ ഇത്തവണയും ബി ജെ ഡി ആയിരിക്കും ജയിക്കുക. കോൺഗ്രസ് ചിത്രത്തിലേ ഇല്ല എന്ന് പറയേണ്ടിയിരിക്കുന്നു. മുൻ ഐ എ എസ് ഓഫിസർ ആയ അപരാജിത സിങ് ബി ജെ പി ക്കു വേണ്ടിയും , മുൻ മുംബൈ പോലീസ് കമ്മീഷണർ ആയ അരൂപ് പട് നായിക്ക് ബി ജെ ഡി ക്കു വേണ്ടിയും മത്സരിക്കുന്ന ഭുവനേശ്വർ ആണ് ഏറ്റവും ശ്രദ്ധേയമായ മത്സരം കാഴ്ചവയ്‌ക്കുന്ന മണ്ഡലം. മൂന്നാം ഘട്ടത്തിൽ ബി ജെ പി യും ബി ജെ ഡി യും മൂന്നു വീതം സീറ്റുകൾ നേടിയേക്കും.

ബീഹാറിൽ മൂന്നാം ഘട്ടത്തിൽ മത്സരം നടന്ന ജഞ്ജർപൂർ ബി ജെ പിയും സുപൗൾ ആർ ജെ ഡി യും ഖഗാരിയ എൽ ജെ പി യും മധേപുര, അറാറിയ മണ്ഡലങ്ങൾ ആർ ജെ ഡിയും കൈവശം വച്ചിരിക്കുന്നു. പപ്പു യാദവും ശരദ് യാദവും മത്സരിക്കുന്ന മധേപുരയിലാണ് ശ്രദ്ധേയമായ മത്സരം. ആർ ജെ ഡി രണ്ടു സീറ്റിലും കോൺഗ്രസ്, ബി ജെ പി, എൽ ജെ പി എന്നിവർ ഓരോ സീറ്റിലും ജയിച്ച് നിലവിലെ സ്ഥിതി തുടരാൻ ആണ് സാധ്യത.

ആസാമിൽ മൂന്നാം ഘട്ടത്തിൽ പോളിംഗ് നടന്ന 4 മണ്ഡലങ്ങൾ, ബാർപേട്ട, ധുബ്രി, കൊക്രജാർ, ഗുവാഹത്തി എന്നിവയാണ്. നിലവിൽ എ ഐ യു ഡി എഫ് എന്ന പാർട്ടിക്കു രണ്ടു സീറ്റും ബി ജെ പി സ്വതന്ത്രൻ എന്നിവർക്ക് ഓരോ സീറ്റും ആണുള്ളത് . ഇക്കുറി കോൺഗ്രസ് 2 മുതൽ 3 വരെ സീറ്റുകൾ നേടിയേക്കും. ഒരു സീറ്റു ബോഡോ ലാൻഡ് പാർട്ടിയും.

കോൺഗ്രസിനെ സംബന്ധിച്ചിടത്തോളം ഏറ്റവും പ്രാധാന്യമുള്ള മൂന്നു മണ്ഡലങ്ങളിൽ ആണ് പശ്ചിമ ബംഗാളിൽ തെരഞ്ഞെടുപ്പ് നടന്നത്. ബംഗാളിലെ കോൺഗ്രസിന്റെ അതികായനായിരുന്ന മാൽഡയുടെ ഘനിഖാൻ ചൗധരിയുടെ സ്വാധീനമുള്ള രണ്ടു മണ്ഡലങ്ങൾ. മാൽഡ ഉത്തർ, മാൽഡ ദക്ഷിൺ. രണ്ടിലും കഴിഞ്ഞ തവണ വിജയിച്ചത് കോൺഗ്രസ് ആണ്. ഇന്ത്യൻ പ്രസിഡണ്ട് ആയിരുന്ന പ്രണാബ് കുമാർ മുക്കർജിയുടെ മകനും നിലവിലെ കോൺഗ്രസ് സിറ്റിംഗ് എം പി യുമായ അഭിജിത് മുഖർജി മത്സരിക്കുന്ന ജംഗിപൂർ, സി പി എമ്മിന്റെ നിലവിലെ സീറ്റും, കോൺഗ്രസിന് സ്വാധീനവുമുള്ളതുമായ മുഷിദാബാദ്, തൃണമൂൽ കോൺഗ്രസിന്റെ നിലവിലെ സീറ്റായ ബലൂർഘട്ട എന്നിവയാണ് മറ്റു രണ്ടു മണ്ഡലങ്ങൾ. ഈ മണ്ഡലങ്ങളിൽ കോൺഗ്രസിനും സി പി എമ്മിനും ആർ എസ് പി ക്കും വലിയ സ്വാധീനമുണ്ട് . മാൽഡ ഉത്തർ മണ്ഡലത്തിൽ നിലവിലെ കോൺഗ്രസ് എം പി മൗസും നൂർ തൃണമൂൽ കോൺഗ്രസിൽ ചേർന്ന് ജനവിധി തേടുമ്പോൾ കോൺഗ്രസിനായി നിലവിലെ എം എൽ എ യും മൗസും നൂറിന്റെ കസിനുമായ ഇഷ ഖാൻ ചൗധരിയാണ് മത്സരിക്കുന്നത്. സി പി എം എം എൽ എ, ഖാഗം മുർമു ആണ് ബി ജെ പി ക്കുവേണ്ടി ഇവിടെ മത്സരിക്കുന്നത്. പ്രവചനാതീതമാണ് ഇവിടത്തെ മത്സരഫലം .ജംഗിപ്പൂരിലും മുർഷിദാബാദിലും കോൺഗ്രസ് ശക്തമായ മത്സരമാണ് കാഴ്ച വയ്ക്കുന്നത്. ഇത്തവണ കോൺഗ്രസിന് ഇവിടെ നിന്നും 3 സീറ്റുകൾ വരെ ലഭിച്ചേക്കും, ടി എം സി, ബി ജെ പി എന്നിവർ ഓരോ സീറ്റിലും വിജയിക്കും.

ഛത്തിസ്ഗഡിൽ 7 സീറ്റിൽ ആണ് മൂന്നാം ഘട്ടത്തിൽ മത്സരം നടക്കുന്നത്. ഇതോടെ ഛത്തിസ്ഗറിലെ 11 മണ്ഡലത്തിലെയും തെരഞ്ഞെടുപ്പ് കഴിയും. കഴിഞ്ഞ തവണ ദുർഗ് മണ്ഡലത്തിൽ മാത്രമാണ് കോൺഗ്രസ്സ് ജയിച്ചത്. ഇത്തവണ 7 സീറ്റിലും വിജയ പ്രതീക്ഷയിലാണ് കോൺഗ്രസ്സ്.

ഗോവയിലെ രണ്ടു മണ്ഡലങ്ങളിൽ ഓരോ സീറ്റുകൾ വീതം കോൺഗ്രസ്സും ബി ജെ പി യും പങ്കു വയ്‌ക്കും. ത്രിപുരയിലും ഭദ്ര നാഗർവേലിയിലും ദാമം ഡിയു മണ്ഡലങ്ങളിലും വിജയ സാധ്യത ബി ജെ പി ക്കാണ്. കാഷ്മീരിലെ അനന്ത് നാഗ് മണ്ഡലത്തിൽ കോൺഗ്രസിലെ ഗുലാം നബി ആസാദും, പി ഡി പി യിലെ മെഹ്ബൂബ മുഫ്‌തിയും മാറ്റുരക്കുന്നു . 15 ശതമാനത്തിൽ മാത്രം വോട്ടിംഗ് നടന്ന ഇവിടെ പ്രവചനം അസാധ്യമാണ്.

മൂന്നാം ഘട്ടത്തിലെ 116 സീറ്റുകളിലേക്ക് നടന്ന തെരഞ്ഞെടുപ്പിൽ കോൺഗ്രസും ബി ജെ പിയും 41 വരെ സീറ്റുകളിൽ വീതം വിജയിച്ചേക്കാം, എസ് പി 8, സി പി എം 6 , എൻ സി പി 4 , ശിവസേന 3 ബി ജെ ഡി 3 , ആർ ജെ ഡി 2 , മുസ്‌ലിം ലീഗ് 2 , ടി എം സി, സ്വാഭിമാൻ പക്ഷ, കേരള കോൺഗ്രസ്, ആർ എസ് പി , ബോഡോ നാഷണൽ പാർട്ടി, എൽ ജെ പി , ജനത ദൾ എസ് എന്നിവർ ഓരോ സീറ്റ് എന്നിങ്ങനെ നേടിയേക്കും. ബി ജെ പി ക്കു 21 സീറ്റുകൾ വരെ ഈ ഘട്ടത്തിൽ നഷ്ടപ്പെട്ടേയ്ക്കും കോൺഗ്രസിന് 25 അധിക സീറ്റുകൾ ലഭിക്കുവാനാണ് സാധ്യത. സമാജ്‌വാദി പാർട്ടിയും ശിവസേനയും നില മെച്ചപ്പെടുത്തും.ബി ജെ ഡി ക്ക് കോട്ടം തട്ടിയേക്കും.

17 ആം ലോക്സഭയിലേക്കുള്ള തെരഞ്ഞെടുപ്പിന്റെ രണ്ടാം ഘട്ടം പൂർത്തിയായിരിക്കുകയാണ്. 11 സംസ്ഥാനങ്ങളിലും കേന്ദ്രഭരണപ്രദേശമായ പോണ്ടിച്ചേരിയിലുമായി 95 ലോക്സഭാ മണ്ഡല ങ്ങളിലും ഒഡീസയിലെ 28 നിയമസഭ മണ്ഡലങ്ങളിലും, രണ്ടാം ഘട്ടത്തിൽ തെരഞ്ഞെടുപ്പ് നടന്നു . ആദായനികുതി വകുപ്പ് നടത്തിയ റെയ്‌ഡിൽ ഡി എം കെ സ്ഥാനാർത്ഥി കതിർ ആനന്ദിന്റെ വസതിയിൽ നിന്നും അനധികൃതമായി സൂക്ഷിച്ച പണം കണ്ടു പിടിച്ചതിനാൽ തെരഞ്ഞെടുപ്പ് റദ്ദാക്കിയ, തമിഴ് നാട്ടിലെ വെല്ലൂർ ഒഴികെയുള്ള, മുഴുവൻ സീറ്റുകളിലേക്കും കർണാടകയിലെ 14 ഉം, മഹാരാഷ്ട്രയിലെ 10 ഉം , യു പി യിലെ 8 ഉം  , ആസാം , ബീഹാർ, ഒഡിഷ എന്നിവിടങ്ങളിലെ 5 വീതവും  സീറ്റുകളിലേക്കും, ഛത്തിസ്ഗഡിലെ 3 ഉം, പശ്ചിമ ബംഗാളിലെ  3 ഉം , ജമ്മുവിലെ  2 ഉം, മണിപ്പൂരിലെ  1 ഉം , പോണ്ടിച്ചേരിയിലെ 1 ഉം  ആണ് തെരെഞ്ഞെടുപ്പ് നടക്കുന്നത്. ഈ തെരഞ്ഞെടുപ്പോടു കൂടി, തമിഴ് നാട്, പോണ്ടിച്ചേരി, മണിപ്പൂർ തുടങ്ങിയ സംസ്ഥാനങ്ങളിലെ തെരഞ്ഞെടുപ്പുകൾ പൂർത്തിയാവും. സുരക്ഷയുടെ ഭാഗമായി ത്രിപുരയിലെ ഒരു മണ്ഡലത്തിലെ തെരഞ്ഞെടുപ്പ് മൂന്നാം ഘട്ടത്തിലേക്ക് മാറ്റിയിരിക്കുകയാണ്.

ആദ്യത്തേതിൽ  നിന്ന് വ്യത്യസ്തമായി രണ്ടാം ഘട്ടത്തിലെ തെരഞ്ഞെടുപ്പിൽ ബി ജെ പിയുടെ പ്രകടന പത്രികയും ചർച്ചക്ക് വിഷയമാകുന്നതായി കാണുന്നു. എങ്കിലും ദേശീയതയും ന്യൂനപക്ഷ വിരുദ്ധതയും ആണ് ബി ജെ പി രണ്ടാം ഘട്ടത്തിലും പ്രചാരണ വിഷയമാക്കുന്നത്. കോൺഗ്രസ്സ് ആകട്ടെ, മോദി സർക്കാറിന്റെ കീഴിൽ നടന്ന അഴിമതിയും വാഗ്‌ദാന ലംഘനങ്ങളും ആണ് ചർച്ച ചെയ്യുന്നത്.

രണ്ടാം ഘട്ടത്തിൽ തെരഞ്ഞെടുപ്പ് നടക്കുന്ന മണ്ഡലങ്ങളിലേറെയും എൻ ഡി എ യുടെ കൈവശമിരുന്ന സീറ്റുകൾ ആണെന്നതിനാൽ ഈ തെരഞ്ഞെടുപ്പ് സവിശേഷ ശ്രദ്ധ ആകർഷിക്കുന്നു. എ ഐ എ ഡി എം കെ (35) , ബി ജെ പി (26), ശിവ സേന (4), ബി ജെ ഡി (3), ജെ ഡി (യു) (1), പി എം കെ (1) . 97 സീറ്റിൽ 70 ലും  എൻ ഡി എ എം പി മാർ ആണ് നിലവിൽ. യു പി എ ആകട്ടെ, കോൺഗ്രസ് (11), ആർ ജെ ഡി, ജെ ഡി ( എസ്) (2 വീതം), എൻ സി പി, നാഷണൽ കോൺഫറൻസ് (1  വീതം), അങ്ങനെ 15 എം പി മാർ. .

പ്രധാനമായും രണ്ടാം ഘട്ടത്തിൽ തെരഞ്ഞെടുപ്പ് നടന്ന സംസ്ഥാനങ്ങൾ തമിഴ് നാടും പോണ്ടിച്ചേരിയും ആണ്. എം ജി ആറിന് ശേഷം, തമിഴകത്ത് നിറഞ്ഞുനിന്ന കുമാരി ജയലളിതയും ഡോക്ടർ മുത്തുവേൽ കരുണാനിധിയും മൺമറഞ്ഞു പോയതിന് ശേഷമുള്ള ആദ്യ തെരഞ്ഞെടുപ്പാണ് ഇത് . യു പി എ യുടെയും എൻ ഡി എ യുടെയും നേതൃത്വത്തിലുള്ള രണ്ടു പ്രധാന മുന്നണികളിലും 8 വീതം പാർട്ടികൾ ആണ് ഉള്ളത്. എം കെ സ്റ്റാലിന്റെ നേതൃത്വത്തിലുള്ള ഡി എം കെ, കോൺഗ്രസ്സ്, സി പി എം, സി പി ഐ, മുസ്‌ലിം ലീഗ്, വിടുതലൈ തിരുമകൾ കട്ചി , എം ഡി എം കെ, കെ എം ഡി കെ, ഇന്ത്യ ജനനായക കട്ചി എന്നിവ ഉൾപ്പെട്ട മുന്നണിയും മുഖ്യമന്ത്രി പഴനി സ്വാമിയുടെ നേതൃത്വത്തിലുള്ള എ ഐ എ ഡി എം കെ, ബി ജെ പി, പി എം കെ, ഡി എം ഡി കെ, പുതിയ തമിഴകം, തമിഴ് മനില കോൺഗ്രസ്സ്, മക്കൾ നീതി കട്ചി എന്നിവ ചേർന്ന  മുന്നണിയും  തമ്മിലാണ് പ്രധാന മത്സരം. ടി ടി വി ദിനകരന്റെ ‘അമ്മ മക്കൾ മുന്നേറ്റ കഴകവും കമൽ ഹാസൻറെ മക്കൾ നീതി മയ്യവും ഇക്കുറി തെരഞ്ഞെടുപ്പിൽ മത്സരിക്കുന്നു എന്നത് എടുത്തു പറയേണ്ടത് ആണ്. ഒരു കാലത്തു ഡി എം കെ യും, എ ഐ ഡി എം കെ യും കോൺഗ്രസ്സും ഇടതു കക്ഷികളും മാത്രമായിരുന്ന തമിഴ് നാട്ടിൽ ഇന്ന് അനേകം സമ്മർദ്ദ ഗ്രൂപ്പുകൾ രാഷ്ട്രീയ കക്ഷികളായി മാറിയിരിക്കുന്നു  .

മത്സരം കടുത്തതാണെങ്കിലും  വോട്ടർമാരിൽ പൊതുവെ ഒരു വിരക്തി നിലനിൽക്കുന്നതായി കാണാം. ജയലളിത, കരുണാനിധി തുടങ്ങിയ പ്രഗത്ഭരുടെ അഭാവം ഈ തെരഞ്ഞെടുപ്പിൽ എങ്ങനെ പ്രതിഫലിക്കും എന്ന് കാണേണ്ടതാണ്. ഏകദേശം 25 മുതൽ 30 വരെ സീറ്റുകൾ ഇക്കുറി യു പി എ ക്കു ഇവിടെ നിന്നും ലഭിച്ചേക്കാം. പൊതുവിൽ ലോക്സഭാ തെരഞ്ഞെടുപ്പുകളിൽ  തമിഴ് നാട്ടിൽ ജയിക്കുന്നതു ഏതെങ്കിലും ഒരു മുന്നണിയിൽ പെട്ടവരാണ്. അങ്ങനെയെങ്കിൽ യു പി എ ക്കു 35 സീറ്റിനു മുകളിൽ ലഭിക്കാനും സാധ്യത കാണുന്നു. കോൺഗ്രസ് മത്സരിക്കുന്ന 9 സീറ്റുകളും , ഡി എം കെ മത്സരിക്കുന്ന 20 സീറ്റുകളും  സി പി എം, സി പി ഐ മത്സരിക്കുന്ന സീറ്റുകളും വിജയ സാധ്യതാ പട്ടികയിലുണ്ട്.

തമിഴ് നാട് കഴിഞ്ഞാൽ ഏറ്റവും അധികം സീറ്റുകളിൽ മത്സരം നടക്കുന്നത് കർണാടകയിൽ ആണ്. 14 സീറ്റിൽ ആണ് രണ്ടാം ഘട്ടത്തിൽ കർണാടകയിൽ മത്സരം നടക്കുന്നത്. ഇവിടെ ബി ജെ പി ഒറ്റക്കും, കോൺഗ്രസ്സ്, ജനതാദൾ എസ് കക്ഷികൾ ഒന്നിച്ചുമാണ് മത്സരിക്കുന്നത്. തീ പാറുന്ന പോരാട്ടമാണ് ഇക്കുറി. ദേവ ഗൗഡ മത്സരിക്കുന്ന തുംകൂർ, ദേവ ഗൗഡയുടെ പേരക്കുട്ടികൾ മത്സരിക്കുന്ന ഹസ്സൻ, മാണ്ട്യ തുടങ്ങിയ മണ്ഡലങ്ങൾ ദേശീയ ശ്രദ്ധ ആകർഷിക്കുന്നു. ഇവയിൽ കോൺഗ്രസ്സ് നേതാവായിരുന്ന അംബരീഷിന്റെ ഭാര്യയും നടിയുമായ സുമലത ബി ജെ പി പിന്തുണയോടെ മത്സരിക്കുന്ന മാണ്ട്യയിലെ മത്സരം ആണ് ഏവരും ഉറ്റു നോക്കുന്നത്. സഖ്യ കക്ഷിയായ കോൺഗ്രസ് ഈ മണ്ഡലങ്ങളിൽ പ്രാദേശികമായി എന്ത് നിലപാടെടുക്കും എന്നത് തെരഞ്ഞെടുപ്പ് ഫലത്തെ നിർണയിക്കും. കഴിഞ്ഞ തവണ ബി ജെ പി 6 സീറ്റുകൾ ഈ മേഖലയിൽ നിന്ന്  നേടിയിരുന്നു. കോൺഗ്രസ് നേതാക്കളായ മുനിയപ്പ മത്സരിക്കുന്ന കോലാറിലും, വീരപ്പ മൊയ്‌ലി മത്സരിക്കുന്ന ചിക്കബല്ലാപ്പുരയിലും കേന്ദ്ര മന്ത്രി സദാനന്ദ ഗൗഡ മത്സരിക്കുന്ന ബാംഗ്ലൂർ നോർത്തിലും ശക്തമായ മത്സരം ആണ് നടക്കുന്നത്. ബി ജെ പി യുടെ ശോഭ കരാന്തില മത്സരിക്കുന്ന ഉഡുപ്പി ചിക്മഗല്ലൂർ, യെദിയൂരപ്പയുടെ മകൻ രാഘവേന്ദ്രയും മധു ബംഗാരപ്പയും മത്സരിക്കുന്ന ഷിമോഗയും ഇക്കുറി കടുത്ത മത്സരമാണ് നേരിടുന്നത്. തീരദേശ മേഖലയിൽ ബി ജെ പി ഇക്കുറിയും നല്ല പ്രകടനം കാഴ്ച വയ്‌ക്കുവാൻ സാധ്യതയുണ്ട് . ഇത്തവണ കോൺഗ്രസ് – ജെ ഡി എസ് കാലുവാരൽ ഉണ്ടായില്ലെങ്കിൽ എട്ടു സീറ്റുകൾ വരെ സഖ്യത്തിന് ഇവിടെ നേടാൻ സാധിക്കും.

വിദർഭ, മാറാത്തവാഡാ മേഖലയിലെ 10 സീറ്റുകളിലേക്കാണ് രണ്ടാം ഘട്ടത്തിൽ തെരഞ്ഞെടുപ്പ് നടക്കുന്നത്. ദേശീയതയെക്കാളും വർഗീയതയെക്കാളും കർഷകരുടെ ജീവൽസംബന്ധിയായ വിഷയങ്ങളും തൊഴിലില്ലായ്മയും ആണിവിടെ ചർച്ചാ വിഷയം. കഴിഞ്ഞ തവണ 10 ൽ 8 സീറ്റും  നേടിയത് ബി ജെ പി – ശിവസേന കൂട്ടുകെട്ട് ആണ്. രണ്ടെണ്ണം കോൺഗ്രസ്സും. ഇവിടെ പ്രധാന മത്സരം നടക്കുന്ന മണ്ഡലങ്ങളിൽ ഒന്ന് മുൻ കേന്ദ്രമന്ത്രിയും കോൺഗ്രസ്സ് നേതാവുമായ സുശീൽ കുമാർ ഷിൻഡെയും ബാബാസാഹേബ് അംബേദ്ക്കറുടെ കൊച്ചു മകനും വഞ്ചിത് ബഹുജൻ അംഗാഡിയുടെ സ്ഥാനാർത്ഥിയുമായ പ്രകാശ് അംബേദ്‌കറും  മത്സരിക്കുന്ന സോളാപ്പൂർ ആണ്. ഇവിടെ ദളിത് മുസ്‌ലിം വോട്ടുകൾ ജനസംഖ്യയുടെ 35% വരും.അതിനാൽ തന്നെ, പ്രവചനാതീതമായ ത്രികോണ മത്സരമാണ് ഇവിടെ നടക്കുന്നത്. കോൺഗ്രസ് ഒരു പക്ഷെ ഇവിടെ മൂന്നാം സ്ഥാനത്തേക്ക് പിന്തള്ളപ്പെട്ടേക്കാം. കോൺഗ്രസിന്റെ കുത്തക സീറ്റായ നാന്ദഡിൽ സിറ്റിംഗ് എം പി അശോക് ചവാൻ ആണ് ഇക്കുറിയും മത്സരിക്കുന്നത്. കോൺഗ്രസ് ഈ മേഖലയിൽ ജയിച്ച ഹിൻഗോളി സീറ്റിലെ വിജയത്തിന് പിന്നിലും അശോക് ചവാന്റെ സ്വാധീനമുണ്ട്. ഇവിടെ സിറ്റിംഗ് എം പി രമേശ് സാറ്റ്‌വെ ഇക്കുറി മത്സരിക്കുന്നില്ല, പകരം സുഭാഷ് വാൻഖാടെ ആണ് ശിവ സേനയുടെ ഹേമന്ത് പാട്ടീലിനെ നേരിടുന്നത്.
വഞ്ചിത് ബഹുജൻ അംഗാഡിയുടെ പ്രകാശ അംബേദ്‌കർ മത്സരിക്കുന്ന രണ്ടാമത്തെ മണ്ഡലമാണ് അകോല . അകോലയിൽ നിന്ന്  ഇതിനു മുൻപ് രണ്ടു തവണ പ്രകാശ് അംബേദ്‌കർ വിജയിച്ചിട്ടുണ്ട്. നിലവിലെ സിറ്റിംഗ് എം പി, ബി ജെ പി യുടെ സഞ്ജയ് ധോത്രയും കോൺഗ്രസ്സിന്റെ ഹിദായത്ത് പട്ടേലുമാണ്. ഇവിടെയും പ്രവചനം തീർത്തും അസാധ്യമാണ്. വിപുലമായ സ്വാധീനമുള്ള ശിവസേനക്ക് വിജയ പ്രതീക്ഷ നൽകുന്ന മണ്ഡലമാണ് ബുൽദാന. ബി ജെ പി നേതാവ് ഗോപിനാഥ് മുണ്ടെയുടെ മകൾ പ്രീതം മുണ്ടെയാണ് ഇത്തവണയും ബീഡിനെ പ്രതിനിധീകരിക്കുക. വഞ്ചിത് ബഹുജൻ അംഗാഡിക്ക് ഇത്തവണ കിട്ടുന്ന വോട്ടുകൾ കോൺഗ്രസ് – എൻ സി പി സഖ്യത്തിന്റെ സാധ്യതകളെ പ്രതികൂലമായി ബാധിക്കും. എങ്കിലും ഇവിടെ കോൺഗ്രസ് 2 സീറ്റുകളിലും എൻ സി പി ഒരു സീറ്റിലും വിജയിച്ചേക്കും. വഞ്ചിത് ബഹുജൻ അംഗാഡി 1 സീറ്റും , ശിവസേന 3 സീറ്റും ബി ജെ പി 3 സീറ്റും ഈ മേഖലയിൽ നേടിയേക്കും.

ഉത്തർ പ്രദേശിലെ പശ്ചിമ മധ്യ മേഖലയിലെ 8 സീറ്റുകളിൽ അത്യന്തം വാശിയേറിയ തെരഞ്ഞെടുപ്പാണ് നടന്നത്. ബി ജെ പിയും ബി എസ് പി, എസ് പി , ആർ എൽ ഡി ഉൾപ്പെടുന്ന മഹാഗഡ്‌ബന്ധനും കോൺഗ്രസ്സും ആണ് ഈ 8 മണ്ഡലങ്ങളിലെയും തെരഞ്ഞെടുപ്പിലെ പ്രധാന എതിരാളികൾ. നാഗിന, അംറോഹ, ആഗ്ര, മഥുര, ഫത്തേപ്പൂർ സിക്രി, അലിഗർ, ഹത്രാസ്, ബുലന്ദേശ്വർ തുടങ്ങിയ മണ്ഡലങ്ങളിലെല്ലാം വാശിയേറിയ മത്സരങ്ങൾ ആണ് നടക്കുന്നത്. ഇവയിൽ, കോൺഗ്രസിന്റെ രാജ് ബബ്ബറും, ബി ജെ പിയുടെ രാജ്‌കുമാർ ചാഹറും ബി എസ്  പി യുടെ ശ്രീഭഗവാൻ ശർമയും തമ്മിലുള്ള മത്സരം പ്രവചനാതീതമാണ്. മൂന്നിൽ ആർക്കു വേണമെങ്കിലും ഇവിടെ വിജയിക്കാം എന്നതാണ് സ്ഥിതി. രണ്ടാം ഘട്ടത്തിൽ കോൺഗ്രസ് പ്രതീക്ഷ അർപ്പിക്കുന്ന മണ്ഡലങ്ങളിൽ ഏറ്റവും പ്രധാനം ഫത്തേപ്പൂർ സിക്രി ആണ്. നടി ഹേമ മാലിനി മത്സരിക്കുന്ന മഥുരയിൽ ഇക്കുറി വിജയം ആർ എൽ ഡി സ്ഥാനാർഥി കുൻവർ നരേന്ദ്ര സിംഗിനാകും . ആഗ്രയിൽ ബി എസ്  പി യുടെ മനോ കുമാർ സോണിയും യു പി മന്ത്രിയായ എസ് പി സിങ് ബാഗേലും തമ്മിലാണ് പ്രധാന മത്സരം. അലിഗറിലും ഇത്തവണ മത്സരം കടുക്കുമെങ്കിലും ബി എസ്  പി യുടെ അജിത് ബല്യാൻ വിജയിക്കാനാണ് സാധ്യത. ജനതദൾ എസ്സിൽ നിന്നും ബി എസ്  പി യിലേക്ക് മാറി അംറോഹയിൽ മത്സരിക്കുന്ന ഡാനിഷ് അലി ശക്തമായ മത്സരമാണ് ബി ജെ പിയിൽ നിന്നും നേരിടുന്നത്. ഹത്രാസിലും ബുലന്ദേശ്വരിലും നാഗിനയിലും ശക്തമായ മത്സരമാണ് നടക്കുന്നത്. ഇക്കുറി രണ്ടാം ഘട്ടത്തിൽ യു പി യിൽ ഒരു സീറ്റിൽ ആർ എൽ ഡി, രണ്ടു സീറ്റുകളിൽ ബി ജെ പി, നാല് സീറ്റിൽ ബി എസ്  പി, ഒരു സീറ്റിൽ എസ് പി ഇങ്ങനെയായേക്കും കക്ഷി നില.

രണ്ടാം ഘട്ടത്തിൽ ഒഡിഷയിലെ 5 സീറ്റുകളിൽ ആണ് ലോക് സഭയിലേക്കു മത്സരം നടക്കുന്നത്. ബർഗർ, സുന്ദരഗാർ, അസ്ക, കാണ്ഡമാൽ, ബോലങ്കാർ എന്നിവയാണവ . ബി ജെ പി യുടെ സിറ്റിംഗ് സീറ്റ് ആയ സുന്ദർഗറിൽ കേന്ദ മന്ത്രി ജുവൽ ഓരോണ് വീണ്ടും ജനവിധി നേടുന്നു. കോൺഗ്രസിന്റെ ജോർജ് തീർക്കിയും ബി ജെ ഡി യുടെ സുനിത ബിസ്വാലും ചേർന്ന്  ശക്തിയേറിയ ത്രികോണ മത്സരത്തിന് വേദിയൊരുക്കുന്നു . അസ്കയിൽ ആകട്ടെ, കോൺഗ്രസ് ഇക്കുറി സ്ഥാനാർത്ഥിയെ നിർത്തിയിട്ടില്ല. രണ്ടാം പാദത്തിൽ ബി ജെ പി മൂന്നു സീറ്റുകളും ബി ജെ ഡി ഒരു സീറ്റും നേടുവാൻ ആണ് സാധ്യത.

ആസാമിൽ രണ്ടാംഘട്ട പോളിംഗ് നടക്കുന്ന 5 മണ്ഡലങ്ങൾ മംഗൾഡോയ്‌, സിൽച്ചാർ, ആട്ടോണോമസ് ഡിസ്‌ട്രിക്‌, നൗഗോങ്, കരിംഗഞ്ജ് എന്നിവയാണ്. ഇവയിൽ രണ്ടു വീതം എം പി മാർ നിലവിൽ കോൺഗ്രസിനും ബി ജെ പി ക്കും ഉണ്ട്. എ ഐ യു ഡി എഫ് എന്ന പാർട്ടിക്കാണ് കരിംഗഞ്ജ് ലോകസഭാ മണ്ഡലം. സിൽച്ചറിൽ മഹിളാ കോൺഗ്രസ്സ് പ്രസിഡന്റ് സുഷ്മിത് ദേവ് ആണ് കോൺഗ്രസിന് വീണ്ടും സാധ്യത നൽകുന്നത്. ഇക്കുറിയും രണ്ടു സീറ്റുകൾ കോൺഗ്രസ്സും, രണ്ടു സീറ്റുകൾ ബി ജെ പി യും ഒരു സീറ്റ് എ ഐ യു ഡി എഫും സ്വന്തമാക്കും.

രണ്ടാം ഘട്ടത്തിൽ അഞ്ചു മണ്ഡലങ്ങളിൽ തെരഞ്ഞെടുപ്പ് നടക്കുന്ന ബിഹാർ കോൺഗ്രസിനെ സംബന്ധിച്ചിടത്തോളം അതിപ്രധാനമാണ്. കോൺഗ്രസ് മത്സരിക്കുന്ന 9 സീറ്റുകളിൽ മൂന്നെണ്ണവും ഈ ഘട്ടത്തിൽ ആണ് നടക്കുന്നത്. ബീഹാറിൽ ഏറ്റവും കൂടുതൽ മുസ്‌ലിം വോട്ടുകൾ ഉള്ള കിഷൻഗഞ്ചിൽ കോൺഗ്രസിന്റെ മുഹമ്മദ് ജാവേദ്, സുൽത്താൻ ഒവൈസിയുടെ  എ ഐ എം ഐ എം  പാർട്ടിയുടെ മൗലാനാ അഷ്‌റഫ് ഹഖ് ഇമാൻ , ജനതാദൾ യു വിന്റെ സയദ് അഹമ്മദ് അഷ്‌റഫ് എന്നിവരോടാണ് ഏറ്റുമുട്ടുന്നത്. ഒവൈസിയുടെ സ്ഥാനാർഥിയുടെ രംഗ പ്രവേശം ഇവിടുത്തെ കോൺഗ്രസിന്റെ നില പരുങ്ങലിൽ ആക്കുന്നു. പുർണിയയിൽ കോൺഗ്രസിന് വേണ്ടി പപ്പു സിങ് ആണ് ജനതാദൾ യു വിന്റെ സന്തോഷ് കുമാർ കുശ്‌വാഹയെ നേരിടുന്നത്. നിലവിലെ എം പി ആയ താരിഖ് അൻവർ ആണ് കത്തിഹാറിൽ കോൺഗ്രസിന് വേണ്ടി മത്സരിക്കുന്നത്. ഭഗൽപൂരിൽ ആർ ജെ ഡിയും ജനതാദൾ യു വും തമ്മിൽ ആണ് മത്സരം. ബങ്കയിൽ ബി ജെ പി യുടെ മുൻ എം പി ദിഗ്‌വിജയ് സിംഗിന്റെ ഭാര്യ റിബൽ ആയി മത്സരിക്കുന്നതിനാൽ ആർ ജെ ഡി യുടെ സാധ്യതകൾ കൂടുന്നു. ബീഹാറിൽ രണ്ടാം പാദത്തിൽ, ആർ ജെ ഡി യും കോൺഗ്രസും രണ്ടു സീറ്റുകൾ വീതം നേടിയേക്കാം, ഒരു സീറ്റ് ജനതാദൾ യു വിനും കിട്ടിയേക്കാം .

പശ്ചിമ ബംഗാളിലെ ഡാർജിലിങ് , റായ്‌ഗഞ്ച് , ജൈപൈഗുരി എന്നീ മണ്ഡലങ്ങളിൽ ആണ് രണ്ടാം ഘട്ടത്തിൽ വോട്ടെടുപ്പ് നടക്കുന്നത് . മൂന്നു മണ്ഡലങ്ങളിലും ബി ജെ പി അതി ശക്തമായ മത്സരമാണ് കാഴ്ചവെയ്ക്കുന്നത് . കഴിഞ്ഞ തവണ 1600 വോട്ടിനു കോൺഗ്രസിലെ ദീപാ ദാസ് മുൻഷിയെ തോൽപ്പിച്ച്  വിജയിയായ മുഹമ്മദ് സലിം ആണ് റായ്‌ഗഞ്ചിലെ സി പി എം സ്ഥാനാർഥി. ദീപാ ദാസ് മുൻഷി കോൺഗ്രസിന് വേണ്ടി ഇവിടെ വീണ്ടും പോരാടുമ്പോൾ  ടി എം സി, ബി ജെ പി സ്ഥാനാർത്ഥികളും അരയും തലയും മുറുക്കി രംഗത്തുണ്ട്. ബി ജെ പി യും കോൺഗ്രസ്സും ആയിരിക്കും ഇവിടെ അവസാന ഘട്ടത്തിൽ ഒന്നും രണ്ടും സ്ഥാനങ്ങൾ നേടുന്ന പാർട്ടികൾ എന്നാണ് രാഷ്ട്രീയ നിരീക്ഷകർ കരുതുന്നത്. ഇടതു കോട്ട എന്നറിയപ്പെടുന്ന ജൈപൈഗുരിയിൽ ഇക്കുറി ബി ജെ പി യും തൃണമൂൽ കോൺഗ്രസും മുന്നണിയിൽ തന്നെയുണ്ട്. ഡാർജിലിംഗിൽ ഇത്തവണയും ബി ജെ പി വെന്നിക്കൊടി നാട്ടാൻ ആണ് സാധ്യത. രണ്ടാം പാദത്തിലെ തെരഞ്ഞെടുപ്പിൽ രണ്ടു സീറ്റിൽ ബി ജെ പി യും ഒരു സീറ്റിൽ കോൺഗ്രസും ജയിച്ചേക്കാം.

ഛത്തിസ്ഗഡിൽ തെരഞ്ഞെടുപ്പ് നടന്ന മൂന്നു സീറ്റിൽ രണ്ടെണ്ണം കോൺഗ്രസിനും ഒന്ന്  ബി ജെ പിക്കും കിട്ടിയേക്കും. ജമ്മുകാശ്മീരിൽ തെരഞ്ഞെടുപ്പ് നടന്ന രണ്ടു സീറ്റിൽ നാഷണൽ കോൺഫറൻസിനാണ്  ജയസാധ്യത. പോണ്ടിച്ചേരിയിൽ കോൺഗ്രസിനും  മണിപ്പൂരിൽ മണിപ്പൂർ പീപ്പിൾസ് പാർട്ടിക്കുമാണ്  മുൻ തൂക്കം.

രണ്ടാം ഘട്ടത്തിലെ 95 സീറ്റുകളിലേക്ക് നടന്ന തെരഞ്ഞെടുപ്പിൽ കോൺഗ്രസ്സ് 25 വരെ സീറ്റുകളിൽ വിജയിച്ചേക്കാം, സഖ്യ കക്ഷികൾ ആയ ഡി എം കെ 20 വരെ സീറ്റിലും സി പി എം, സി പി ഐ, ജനതാദൾ, നാഷണൽ കോൺഫറൻസ്, ആർ ജെ ഡി എന്നിവ രണ്ടു വീതം സീറ്റിലും വിജയിക്കുവാൻ സാധ്യതയുണ്ട്.  ബി ജെ പി 20 സീറ്റുകൾ നേടും, സഖ്യ കക്ഷിയായ ജനതാദൾ യു ഒരു സീറ്റിലും വിജയിക്കും. ബി എസ് പി 4 സീറ്റിലും, എസ് പി രണ്ടു സീറ്റിലും മണിപ്പൂർ പീപ്പിൾസ് പാർട്ടി, എ ഐ യു ഡി എഫ് എന്നിവർ ഓരോ സീറ്റിലും വിജയിച്ചേക്കാം.

ലോക് സഭാ തെരഞ്ഞെടുപ്പ് – ആദ്യ ഘട്ട സാധ്യതകൾ: മുന്നിൽ പ്രാദേശിക കക്ഷികൾ
———————————————————————————————————–
17 ആം ലോക് സഭയിലേയ്ക്കുള്ള തെരഞ്ഞെടുപ്പിന്റെ ആദ്യ ഘട്ടം പൂർത്തിയായിരിക്കുകയാണ്.
20 സംസ്ഥാനങ്ങളിലെ, 91 ലോക് സഭാ മണ്ഡലങ്ങളിലും ആന്ധ്ര പ്രദേശ്, അരുണാചൽ പ്രദേശ് നിയമസഭകളിലെ മുഴുവൻ മണ്ഡലങ്ങളിലും ഒഡീസയിലെ 28 നിയമ സഭ മണ്ഡലങ്ങളിലും, ഈ ഘട്ടത്തിൽ, തെരഞ്ഞെടുപ്പ് നടന്നു. മെയ് 19 നു നടക്കുന്ന അവസാന ഘട്ട തെരഞ്ഞെടുപ്പ് വരെ എക്‌സിറ്റ് പോളുകൾക് നിരോധനമേർപ്പെടുത്തിയിരിക്കുകയാണ്. ഈ ഘട്ടത്തിൽ തെരഞ്ഞെടുപ്പിന്റെ ട്രെൻഡ് നിരീക്ഷിക്കുവാനുള്ള ഒരു ചെറിയ ശ്രമം ആണ് നടത്തുന്നത്.
രാജ്യത്തെങ്ങും തെരഞ്ഞെടുപ്പ് ചൂട് അതിന്റെ പാരമ്യത്തിൽ എത്തിയിട്ടില്ല, നിയമസഭാ തെരഞ്ഞെടുപ്പുകൾ നടക്കുന്ന സംസ്ഥാനങ്ങളിൽ ഒഴികെ. തെരഞ്ഞെടുപ്പിനു മൂന്നു ദിവസങ്ങൾക്കു മുൻപ് മാത്രമാണ് ഭരിക്കുന്ന പാർട്ടിയുടെ പ്രകടന പത്രിക പുറത്തിറങ്ങിയത്. അതിനാൽ ഈ ഘട്ടത്തിൽ അത് വലിയൊരു ചർച്ചാ വിഷയം ആയിരിക്കാനുള്ള സാധ്യത കുറവാണ്. യു പി ഐ ക്കു നേതൃത്വം നൽകുന്ന കോൺഗ്രസ്സിന്റെ പ്രകടന പത്രികയെക്കുറിച്ചും വാഗ്ദാനങ്ങളെ കുറിച്ചും, ഏകദേശം രണ്ടാഴ്ചകൾക്കു മുന്നേ തന്നെ ചർച്ചകൾ തുടങ്ങിക്കഴിഞ്ഞിരുന്നു. എൻ ഡി എ ആകട്ടെ ആദ്യ ഘട്ടത്തിൽ പുൽവാമയും ബാലക്കോട്ടും കാഷ്മീരും ഉൾപ്പെടുത്തി ദേശീയതയും, വർഗീയ ജാതി കാർഡുകളും ആണ് ചർച്ചക്ക് വിഷയമാക്കിയിരുന്നത്
പക്ഷെ വർഷത്തിൽ 72000 രൂപ പാവപ്പെട്ടവർക്ക്‌ നല്കുന്നതുൾപ്പെടെയുള്ള, ജനങ്ങളെ നേരിട്ട് ബാധിക്കുന്ന, വിഷയങ്ങൾ ആണ് യു പി എ ക്ക് നേതൃത്വം നൽകുന്ന കോൺഗ്രസ് ചർച്ചയാക്കിയത്. സംസ്ഥാനങ്ങളിലെ മുൻ തെരഞ്ഞെടുപ്പുകളുടെ ട്രെൻഡുകളും ജാതി മത സമവാക്യങ്ങളും ദേശീയതയും മുന്നണികളും എല്ലാം ആദ്യ ഘട്ടത്തിൽ എങ്ങനെ ജനങ്ങൾ ഏറ്റെടുത്തു എന്ന് കണ്ടെത്തുന്നത് വിഷമകരമായ ദൗത്യമാണ്.

ആദ്യപാദത്തിൽ തെരഞ്ഞെടുപ്പ് നടന്ന സംസ്ഥാനങ്ങളിലും പ്രധാന മണ്ഡലങ്ങളിലും ഒരു ഓട്ട പ്രദക്ഷിണം നടത്തിനോക്കാം.

ഉത്തർ പ്രദേശിന്റെ പശ്ചിമ മേഖലയിലെ 8 സീറ്റുകളിൽ വാശിയേറിയ തെരഞ്ഞെടുപ്പാണ് നടന്നത്. ബി ജെ പിയും ബി എസ് പി, എസ് പി , ആർ എൽ ഡി ഉൾപ്പെടുന്ന മഹാഗഡ്‌ബന്ധനും കോൺഗ്രസ്സും ആണ് ഈ 8 മണ്ഡലങ്ങളിലും പ്രധാന എതിരാളികൾ. സഹാറൻപൂർ, കൈറാന, മുസാഫർ നഗർ, ബിജ്‌നോർ, മീററ്റ്, ബാഗ്പെട്ട്, ഗാസിയാബാദ്, ഗൗതം ബുദ്ധ് നഗർ തുടങ്ങിയ മണ്ഡലങ്ങളെല്ലാം വാശിയേറിയ മത്സരങ്ങൾ ആണ് നടക്കുന്നത്. ഇതിൽ തന്നെ കേന്ദ്ര മന്ത്രി വി കെ സിങ് മത്സരിക്കുന്ന ഗാസിയബാദിൽ പൊരിഞ്ഞ പോരാട്ടമാണ്. 56 % ആണ് ഈ മണ്ഡലത്തിലെ പോളിംഗ്. എസ് പി യുടെ സഞ്ജീവ് ബൻസാലും കോൺഗ്രസ്സിന്റെ ഡോളി ശർമയും കൂടി ശക്തമായ മത്സരമാണ് ഇവിടെ കാഴ്ച വച്ചിട്ടുള്ളത്. വർഗീയ കലാപം നടന്ന മുസാഫർ നഗറിൽ ആർ എൽ ഡി യുടെ അജിത് സിങ്ങും മുൻ മന്ത്രി കൂടിയായ ബി ജെ പി യുടെ സഞ്ജീവ് ബല്യാനും നേരിട്ടുള്ള മത്സരമാണ് നടക്കുന്നത്. ഇവിടെ പോളിംഗ് 67 % ആണ്.  26 ശതമാനം മുസ്‌ലിം ഭൂരിപക്ഷ മേഖലയായ ഇവിടെ പ്രവചനം അസാധ്യമാണ്. കേന്ദ്ര മന്ത്രി മഹേഷ് ശർമ്മ മത്സരിക്കുന്ന ഗൗതം ബുദ്ധ് നഗറിൽ ഗഡ്‌ബന്ധൻ സ്ഥാനാർഥി ബി എസ പി യുടെ സത് വീർ ആണ്. കോൺഗ്രസ്സിന്റെ അരവിന്ദ് കുമാർ സിംഗിന്റെ സാന്നിധ്യം ഒരു ത്രികോണ മത്സര പ്രതീതി ജനിപ്പിക്കുന്നു. മറ്റൊരു കേന്ദ്ര മന്ത്രി സത്യപാൽ മത്സരിക്കുന്നത് ജാട്ട് കോട്ടയായ ബാഗ് പെട്ടിൽ ആർ എൽ ഡി യുടെ അജിത് സിംഗിന്റെ മകൻ ജയന്ത് ചൗധരിയുമായാണ്. 71 % വോട്ടു രേഖപ്പെടുത്തിയ സഹാറൻ പൂരിൽ ബി ജെ പിയുടെ നിലവിലെ എം പി രാഘവ് ലഖൻ പാലും കോൺഗ്രസ്സിന്റെ പ്രതീക്ഷയായ ഇമ്രാൻ മസൂദും തമ്മിൽ ശക്തമായ മത്സരത്തിലാണ്. മറ്റു മണ്ഡലങ്ങളിൽ ബി ജെ പിയും മഹാ ഗഡ്‌ ബന്ധനും തമ്മിൽ നേരിട്ടുള്ള മത്സരം നടക്കുന്നു. കൈറാനയിൽ എസ് പിയുടെ തബസോം ബീഗവും ബി ജെ പിയുടെ പ്രദീപ് കുമാറും തമ്മിൽ ഏറ്റുമുട്ടുന്നു. മീററ്റിൽ ബി എസ് പി യും ബി ജെ പിയും ആണ് പ്രധാന എതിരാളികൾ. കോൺഗ്രസ്സിന്റെ നസിമുദീൻ സിദ്ധിഖി കൂടി മത്സരിക്കുന്ന ബിജ്‌നോറിൽ അടിയൊഴുക്കുകൾ പ്രധാനമാണ്. ആദ്യ ഘട്ടത്തിൽ മത്സരം നടക്കുന്ന ഉത്തർ പ്രദേശിൽ ആർ എൽ ഡി യുടെ അജിത് സിങ്ങിനും മകൻ ജയന്ത് ചൗധരിക്കും എതിരെ കോൺഗ്രസ്സ് സ്ഥാനാർത്ഥികൾ ഇല്ല. കടുത്ത മത്സരം ആണ് നടക്കുന്നത് എങ്കിലും ഇവിടെ ആർ എൽ ഡി വിജയിക്കാൻ ആണ് സാധ്യത. സഹറൻപൂരിൽ കോൺഗ്രസ്സ് പ്രതീക്ഷ വയ്ക്കുന്നു, ഗാസിയ ബാദും, ഗൗതം ബുദ്ധ് നഗറും ബിജെപി യോടൊപ്പം നിൽക്കാൻ ആണ് സാദ്ധ്യത . മീററ്റിൽ, ബി എസ് പിയും, കൈറാനയിൽ എസ് പി യും ജയിച്ചേയ്ക്കും.

മഹാരാഷ്ട്രയിലെ വിദർഭ റീജിയണിലെ 7 മണ്ഡലങ്ങളിൽ ആണ് ഇന്നലെ തെരഞ്ഞെടുപ്പ് നടന്നത്. അതിൽ ബി ജെ പി യിലെ പ്രധാനിയായ നിതിൻ ഗഡ്‌കരിയും ജയന്റ് കില്ലർ എന്ന ഖ്യാതി നേടിയ നാനാ പട്ടോലയും തമ്മിൽ ഏറ്റുമുട്ടുന്ന നാഗ്‌പൂരാണ്‌ ഏറ്റവും പ്രധാനം. ഇവിടെ ആര് ജയിക്കും എന്ന് പ്രവചിക്കാൻ വയ്യ . മറ്റൊരു ശ്രദ്ധേയമായ പോരാട്ടം നടക്കുന്നത് കേന്ദ്രമന്ത്രി, ബി ജെ പിയുടെ, ഹാൻസ്‌രാജ് ആഹിറും കോൺഗ്രസ്സിന്റെ സുരേഷ് ദാനോക്കാറും മത്സരിക്കുന്ന ചന്ദ്രപ്പൂർ ആണ്. ഒരു കാലത്തു കോൺഗ്രസ്സിന്റെ ശക്തി കേന്ദ്രമായിരുന്ന വിദർഭയിലെ പോരാട്ടം പ്രവചനാതീതമാണ്. കോൺഗ്രസ്സ് ബി ജെ പി മത്സരം നടക്കുന്ന വർദ്ദ, ഗഡ്‌ ചിറോളി ചിമൂർ മണ്ഡലങ്ങളിലും ശിവസേന നേരിട്ട് ഏറ്റു മുട്ടുന്ന യവട്മാൽ, രാംടേക് എന്നിവിടങ്ങളിലും സാധ്യത കോൺഗ്രസിനാണ്. ബന്ദാര ഗോണ്ടിയായിൽ ബി ജെ പി , എൻ സി പിയുമായാണ് മത്സരിക്കുന്നത്. കഴിഞ്ഞ തവണ ഈ ഏഴു സീറ്റുകളിൽ അഞ്ചെണ്ണം ബി ജെ പിയും രണ്ടെണ്ണം ശിവസേനയും ആണ് ജയിച്ചത്. ഇത്തവണ കോൺഗ്രസ്സ് നാല് സീറ്റുകൾ വരെ നേടിയേക്കും, ബി ജെ പി മൂന്നും.

കഴിഞ്ഞ തെരഞ്ഞെടുപ്പിൽ നാലിൽ നാല് സീറ്റും ബി ജെ ഡി നേടിയ ബെഹ്‌റിൻ പൂർ, കാലഗന്ധി, കൊരാപുട്, നബരംഗ് പൂർ മണ്ഡലങ്ങളിൽ കൊരാപുട്, നബരംഗ് പൂർ മണ്ഡലങ്ങളിൽ ബി ജെപി മികച്ച മുന്നേറ്റം നടത്തിയതായി തോന്നുന്നു . ഈ രണ്ടു സീറ്റിലും ജയിക്കാൻ അവർക്ക് സാധ്യത ഏറെയാണ്-കോൺഗ്രസ്സും ശക്തമായ മത്സരമാണ് ഇവിടെ കാഴ്ച വക്കുന്നതെങ്കിലും .

മാവോയിസ്റ്റ് സാന്നിദ്ധ്യമുള്ള 4 മണ്ഡലങ്ങളിൽ ആണ് ബീഹാറിൽ ആദ്യ ഘട്ട പോളിംഗ് നടന്നത്. കഴിഞ്ഞ തവണത്തേക്കാൾ 3 ശതമാനത്തോളം പോളിംഗ് കൂടുതൽ രേഖപ്പെടുത്തിയതായിട്ടാണ് വിവരം. നവാഡ , ഗയ, ഔരംഗാബാദ് , ജമുയി മണ്ഡലങ്ങളിൽ ആണ് വോട്ടെടുപ്പ് നടന്നത് . ഗയയിൽ ആർ ജെ ഡി കോൺഗ്രസ് മുന്നണിയുടെ ജിതിൻ രാം മഞ്ചിക്കാണ് സാദ്ധ്യത, ഔരംഗാബാദ് മണ്ഡലത്തിൽ ബി ജെ പി യുടെ സുശീൽ കുമാർ സിങ് ആയിരിക്കും വിജയിക്കുക. ജാമുയിൽ ലോക് ജനശക്തിക്ക് വേണ്ടി മത്സരിക്കുന്ന ചിരാഗ് പാസ്വാന് ജയസാധ്യത കൂടുതൽ ആണ്. നവാഡയിൽ നിതീഷ് കുമാറിന്റെ ജനതാ ദൽ വിജയിച്ചേക്കും.

തെലങ്കാനയിൽ ഭരണ കക്ഷിയായ ടി ആർ എസ് 14 – 15 സീറ്റുകൾ നേടിയേക്കും, ഹൈദരാബാദിൽ സലാവുദീൻ ഒവൈസിയും. കോൺഗ്രസിന് ഒന്നോ രണ്ടോ സീറ്റുകൾ മാത്രമായിരിക്കും ലഭിക്കുക.

ആന്ധ്ര പ്രദേശിൽ ജഗൻമോഹൻ റെഡ്ഢിയുടെ വൈ എസ് ആർ കോൺഗ്രസും ടി ഡി പി യും തമ്മിൽ ആണ് മത്സരം. ആകെയുള്ള 25 മണ്ഡലങ്ങളിൽ 17 സീറ്റുകൾ വരെ ജഗൻ നേടുമ്പോൾ 5 സീറ്റുകൾ ടി ഡി പി ക്ക് കിട്ടിയേക്കും. പവൻ കല്യാൺ , ബി എസ് പി മുന്നണിയും രണ്ടോ മൂന്നോ സീറ്റുകൾ നേടിയാൽ അത്ഭുതപ്പെടേണ്ട.
ആസാമിൽ ആദ്യ ഘട്ട പോളിംഗ് നടക്കുന്ന 5 മണ്ഡലങ്ങളിൽ കോൺഗ്രസ്സ് ശക്തമായ മുന്നേറ്റം നടത്തിയേക്കും, കാലിയബാറിൽ കോൺഗ്രസിന്റെ ഗൗതം ഗോഗോയ് , എ ജി പി യുടെ മോനി മഹന്തയെ തോൽപ്പിക്കുവാനുള്ള സാധ്യത ഏറെയാണ്. തേസ് പൂർ , ജോർഹാറ്റ് , ദീബ്രുഹർ മണ്ഡലങ്ങൾ കോൺഗ്രസ്സ് ഇക്കുറി തിരിച്ചു പിടിച്ചേക്കും, ലഖ്‍മിപ്പൂർ സീറ്റ് ബി ജെ പി നേടിയേക്കും.

ഉത്തരാഖണ്ഡിൽ കടുത്ത പോരാട്ടമാകും നടക്കുക, നൈനിറ്റാളിൽ കോൺഗ്രസിന്റെ മുൻ മുഖ്യമന്ത്രി ഹരീഷ് റാവത്, ബി ജെ പിയുടെ സാംസ്ഥാന അധ്യക്ഷൻ അജയ് ഭട്ടിനെ നേരിടുന്നു. അൽമോറയിൽ കേന്ദ്രമന്ത്രി അജയ് തംത (ബി ജെ പി)യും രാജ്യ സഭാംഗം ആയ പ്രദീപ് തംത (കോൺഗ്രസ്)ഉം തമ്മിൽ നേരിട്ടുള്ള മത്സരം നടക്കുന്നു. ഹരിദ്വാറിൽ ബി ജെ പി യുടെ രമേശ് പോഖാരിയാൽ കോൺഗ്രസിന്റെ അംബരീഷ് കുമാറിനെ നേരിടുന്നു. തേരി ഗാർവാളിൽ ബി ജെ പി യുടെ സിറ്റിംഗ് എം പി മാൾ രാജലക്ഷ്മി ഷാ നേരിടുന്നത് കോൺഗ്രസിന്റെ കരുത്തനായ പ്രീതം സിങ്ങിനെയാണ്. ഇവിടെ സ്വതന്ത്രൻ ബി ജെ പി യുടെ പ്രതീക്ഷകൾ തല്ലിക്കെടുത്തും. ഗാർവാളിൽ ബി ജെ പി യുടെ മുൻ മുഖ്യമന്ത്രി ബി സി ഖണ്ഡൂരിയുടെ മകൻ മനീഷ് ഖണ്ഡൂരി കോൺഗ്രസ്സ് ടിക്കറ്റിൽ മത്സരിക്കുന്നു. ഉത്തരാഖണ്ഡിൽ ഇത്തവണ അത്ഭുതങ്ങൾ സംഭവിക്കിച്ചേക്കാം, കോൺഗ്രസ് മൂന്നു സീറ്റുകൾ ഇവിടെ നിന്നും നേടുവാനുള്ള സാധ്യത കാണുന്നു.

പശ്ചിമ ബംഗാളിൽ തെരഞ്ഞെടുപ്പ് നടന്ന കൂച്ചു ബിഹാർ, ആലിപ്പൂർ മണ്ഡലങ്ങളിൽ, തൃണമൂൽ കോൺഗ്രസ് സീറ്റുകൾ നില നിർത്തിയേക്കും.
അരുണാചൽ പ്രദേശ്, മേഘാലയ സംസ്ഥാനങ്ങളിലെ രണ്ടു വീതം സീറ്റുകളും, ലക്ഷദ്വീപ്, മിസോറാം, മണിപ്പൂർ സീറ്റുകളും കോൺഗ്രസ്സ് നേടുവാനുള്ള സാധ്യത കാണുന്നു.
ചുരുക്കത്തിൽ, ആദ്യ ഘട്ടം തെരഞ്ഞെടുപ്പ് നടന്ന 91 സീറ്റുകളിൽ ബി ജെ പി യുടെ സാധ്യത 15 സീറ്റുകൾ മാത്രമാണ്. കോൺഗ്രസ്സ് ഏകദേശം 22 സീറ്റുകളിൽ ജയിച്ചേക്കാം, ടി ആർ എസ്-15 , വൈ എസ് ആർ- 17 , ടി ഡി പി – 5 , ആർ എൽ ഡി – 2 , എസ് പി – 1 , ബി എസ് പി – 1 , തൃണമൂൽ – 2 , എ ഐ എം എം – 1 , ബി ജെ ഡി – 3, ലോക് ജൻ ശക്തി -2 , രാഷ്ട്രീയ ജനതാദൾ – 1 , ലോക് ജനതാദൾ – 1 , സിക്കിം സംഗ്രാം പരിഷത് – 1 , നാഗ പീപിൾസ് പാർട്ടി – 1 . ഏകദേശം ഇതാവും, ആദ്യ ഘട്ടത്തിലെ ജയസാധ്യതകൾ .

ലിയോ തദ്ദേവൂസ് ശാന്തമായി വന്നു കൃത്യമായ ഇടവേളകൾ എടുത്തു സിനിമകൾ ചെയ്യുന്ന ആളാണ്. ഒരു ദശാബ്ദത്തിൽ ഏറെയായി അദ്ദേഹത്തിൻറെ ആദ്യ ചിത്രം പുറത്തു വന്നിട്ടത്. അവിടെ നിന്ന് ലോനപ്പന്റെ മാമ്മോദിസയിലേക്ക് എത്തുമ്പോൾ ഇടക്കുണ്ടായത് രണ്ടു സിനിമകൾ മാത്രം. കുടുംബവും പ്രണയവും നിലനിൽപ്പിനായുള്ള ഓട്ടവും സ്വപ്നങ്ങൾക്ക് പുറകെ പോക്കും ഒക്കെയാണ് സാധാരണയായി അദ്ദേഹം തന്റെ സിനിമകളുടെ പ്രധാന ഇതിവൃത്തങ്ങളായി ചേർക്കാറുള്ളത്. ഒരു വിൻറ്റെജ് ജയറാം സാന്നിധ്യം അനുഭവപ്പെടുന്ന സിനിമയുടെ പരസ്യങ്ങൾ പ്രേക്ഷകർക്ക് പ്രതീക്ഷ നൽകി. ഇടക്കെപ്പോഴോ വന്ന പഞ്ചവർണതത്ത മാറ്റി നിർത്തിയാൽ ജയറാം ഇപ്പോൾ ചെയ്യുന്ന സിനിമകൾ ഒന്നും ശ്രദ്ധിക്കപ്പെടുന്നുണ്ടായിരുന്നില്ല. പലപ്പോഴും അദ്ദേഹത്തെ കൊണ്ട് പഴയ കാല ജയറാമിനെ അനുകരിപ്പിക്കാനുള്ള സംവിധായകരുടെയും തിരക്കഥാകൃത്തുക്കളുടെയും വികല ശ്രമങ്ങൾ ആയി അവയൊക്കെ മാറി. അത് കൊണ്ട് തന്നെ ലോനപ്പന്റെ മാമ്മോദിസയും കൗതുകമുണ്ടാക്കുന്ന ജയറാം ലിയോ തദ്ദേവൂസ് കൂട്ടുകെട്ടും അതിനൊരു മാറ്റമുണ്ടാക്കുമോ എന്ന കാത്തിരിപ്പിൽ ആയിരുന്നു സിനിമ ശ്രദ്ധിക്കുന്നവർ. ജയറാമിനെ കൂടാതെ ശാന്തികൃഷ്ണ, ഹരീഷ് കണാരൻ, നിഷ സാരംഗ്, ഈവ പവിത്രൻ, സ്നേഹ, രേഷ്മ രാജൻ,ജോജോ, ഇർഷാദ്, വിശാഖ്, ദിലീഷ് പോത്തൻ, കനിഹ എന്നിങ്ങനെ നിരവധി അഭിനേതാക്കൾ സിനിമയിൽ ഉണ്ട്. ഒരു കാലത്ത് മലയാള സിനിമ സ്ഥിരം പിന്തുടർന്ന തൃശൂർ ഭാഷാ ശൈലി ചെറിയൊരു ഇടവേളയ്ക്കു ശേഷം വീണ്ടും ഉപയോഗിക്കുന്ന സിനിമ കൂടിയാണ് ലോനപ്പന്റെ മാമോദിസ. സംവിധായകന്റെ തന്നെയാണ് തിരക്കഥ.

ലോനപ്പൻ എന്ന വാച്ച് മെക്കാനി ജീവിതത്തിന്റെ ഒഴുക്കുകളിലൂടെ ആണ് സിനിമ തുടങ്ങുന്നത്. കഥകൾ കേൾക്കാനും പറയാനും ഇഷ്ടപ്പെട്ടിരുന്ന ഭാവന കൊണ്ട് അനുഗ്രഹീതനായ നിരീക്ഷണ പാടവം കൊണ്ട് ചെറുപ്പത്തിൽ എല്ലാവരുടെയും പ്രിയപ്പെട്ടവൻ ആയിരുന്നു ലോനപ്പൻ. അച്ഛന്റെയും അമ്മയുടെയും മരണവും ദാരിദ്ര്യവും അയാളെ പഠനം പാതി വഴിയിൽ ഉപേക്ഷിക്കാൻ നിര്ബന്ധിതൻ ആക്കി. രണ്ടു ചേച്ചിമാരുടെയും ഒരു അനുജത്തിയുടെയും ( ശാന്തി കൃഷ്ണ, നിഷ സാരംഗ്, ഈവ പവിത്രൻ ) തുടർജീവിതം അയാളുടെ ഉത്തരവാദിത്വമായി. കുടുംബ സ്വത്തായി കിട്ടിയ വാച്ച് കട നടത്തി കൊണ്ട് പോകൽ ആയിരുന്നു അയാളുടെ മുന്നിൽ ഉള്ള വഴി. ഒരു മെക്കാനിക്കും ( ഹരീഷ് കണാരൻ ) കൂട്ടിനുണ്ട്. ലോനപ്പൻ ഒട്ടും താത്പര്യമില്ലാതെ ഏറ്റെടുത്ത ജോലി ആണ് ഇത്. ഒരു ശീലം പോലെ കടയിൽ പോയിരിക്കുന്നു എന്നതിനപ്പുറം വലിയ ലാഭം ഉണ്ടാക്കാൻ സ്വാഭാവികമായും അയാളെ കൊണ്ട് കഴിയുന്നില്ല. ജീവിതത്തിൽ നിരാശകളും ഉത്തരവാദിത്വ കുറവും അലസതയും മടുപ്പും ഒക്കെയാണ് അയാളുടെ കൈമുതൽ. സഹോദരിമാരെ ആരെയും വിവാഹം കഴിച്ചു അയക്കാനോ മറ്റൊരു മെച്ചപ്പെട്ട ജോലി ഏറ്റെടുക്കാമോ അയാൾക്ക് കഴിഞ്ഞില്ല. ലോനപ്പനും വിവാഹിതനല്ല യാദൃശ്ചികമായി പരിചയപ്പെട്ട ലീന( രേഷ്മ രാജൻ ) എന്ന പെൺകുട്ടിക്ക് അയാളോട് പ്രണയമുണ്ട്. ഇത് തിരിച്ചറിയുന്നുണ്ടെങ്കിലും സഹോദരിമാരുടെ വിവാഹം നടക്കാത്ത കുറ്റബോധം അയാളെ അതിൽ നിന്ന് പിന്തിരിപ്പിക്കുന്നു. അങ്ങനെയിരിക്കെ ഒരു സവിശേഷ സാഹചര്യത്തിൽ ലോനപ്പൻ തന്റെ ഭൂതകാലം ഓർക്കുന്നു. ഇത് അയാളെ അസ്വസ്ഥനാക്കുന്നു. തനിക്കൊരിക്കലും ചേരാത്ത ഈ വേഷം അഴിച്ചു പ്രിയപ്പെട്ട ഇടങ്ങളിലേക്ക് യാത്ര ചെയ്യാൻ അയാൾ ആഗ്രഹിക്കുന്നു. അപ്പോൾ അയാൾക്ക്‌ മുന്നിൽ നിറഞ്ഞ വെല്ലുവിളികളിലൂടെയും പ്രതിബന്ധങ്ങളിലൂടെയും ആണ് ലോനപ്പന്റെ മാമോദിസ സഞ്ചരിക്കുന്നത്.

ഒരുപാട് കാലത്തിനു ശേഷം തൃശൂർ നഗരപ്രാന്തങ്ങളെയും ഭാഷയെയും ഭംഗിയായി അവതരിപ്പിച്ച സിനിമകളിൽ ഒന്നാണ് ലോനപ്പന്റെ മാമോദിസ. സാധാരണ ഏതൊക്കെയോ സിനിമകൾ ഹിറ്റ് ആയതും ഊട്ടിയുറപ്പിച്ചതും ആയ ഒരു ട്രെന്റിന് പുറകെ പോകാനാണ് മലയാള സിനിമ തൃശൂർ ഭാഷയെ ആശ്രയിക്കാറ്. കഥാ പരിസരവും ഗതിയും ആവശ്യപ്പെടുന്ന ഒരു ലാൻഡ്‌സ്‌കേപ്പ് ആക്കി ലോനപ്പന്റെ വാച്ച് കടയേയും അയാൾ ഇടപെടുന്ന ഇടങ്ങളേയും മാറ്റി. സാധാരണ തൃശൂർ ഭാഷ അങ്ങേയറ്റം അതിശയോക്തി കലർന്ന് സംസാരിക്കുന്ന നടീനടന്മാരും ഈ സിനിമയിൽ ഇല്ല. തികച്ചും സ്വാഭാവികമായ ഒന്നായി കഥയോട് ചേർന്ന് ഭാഷയും സിനിമയിൽ നിൽക്കുന്നു. ഒരു തരത്തിലുള്ള ഏച്ചുകൂട്ടലുകളും കാണികൾക്ക് അനുഭവപ്പെടില്ല ലോനപ്പന്റെ മാമ്മോദിസയിലെ തൃശൂർ ഭാഷ കേട്ടാൽ. കുറെയൊക്കെ സ്ഥിരം ജയറാം പടങ്ങളുടെ തിരക്കഥകളിൽ കാണാറുള്ള അംശങ്ങൾ ലോനപ്പന്റെ മാമ്മോദിസയിലും ഉണ്ട്. പക്ഷെ ഒരുപാട് കാലത്തിനു ശേഷം ജയറാം എന്ന നടനെ മികച്ച രീതിയിൽ അവതരിപ്പിച്ച സിനിമ ആണ് ഇത്. അതിശയോക്തി കലർന്ന അതിവൈകാരികത ഈ ജയറാം സിനിമയിൽ വളരെ കുറവാണു. വളരെ ബാലൻസ്ഡ് ആയാണ് ജയറാം ഈ കഥാപാത്രത്തെ ഉൾക്കൊണ്ടു സ്‌ക്രീനിൽ എത്തിച്ചത്. വല്ലാതെ മടുപ്പിക്കുന്ന ഹാസ്യമോ അതിഭീകര ദുരന്തമോ ഒന്നുമില്ലാത്ത ജയറാം സിനിമയുടെ ഒഴുക്ക് കാണികൾ ഇഷ്ടപ്പെട്ട ഒന്നാണ്. അത്തരം ഒരു അന്തരീക്ഷത്തെ ഒരു പരിധി വരെ എങ്കിലും ലോനപ്പന്റെ മാമോദിസ വീണ്ടെടുക്കാൻ ശ്രമിക്കുന്നുണ്ട്. സഹതാരങ്ങൾക്കും വ്യക്തിത്വവും റോളും നൽകിയാണ് സംവിധായകൻ ഈ ശ്രമത്തിൽ വിജയിച്ചിട്ടുള്ളത്. ഹരീഷ് കണാരനും ശാന്തി കൃഷ്ണയും നിഷ സാരംഗും ഒക്കെ ചേർന്നുള്ള കോമ്പിനേഷൻ സീനുകൾ ആണ് സിനിമയെ കുറച്ചൊക്കെ രസകരമായ കാഴ്ച്ചാനുഭവമാക്കി മാറ്റുന്നത്.

അതിമാനുഷിക നായകന്മാരെ പോലെ തന്നെ മലയാള സിനിമ എല്ലാ കാലവും പല നിലക്ക് ആശ്രയിച്ചിട്ടുള്ള ഒരു വിഭാഗമാണ് അസ്തിത്വ ദുഃഖം ഉള്ള അലസ നായകന്മാർ. ഒരു കാലത്തു സമാന്തര സിനിമ ഏറ്റെടുത്ത ഇവരെ പിന്നീട് മുഖ്യധാരാ സിനിമയും ഏറ്റെടുത്തു. ഹാസ്യത്തിന്റെ ഏറ്റവും സുന്ദരമായ ഉപയോഗത്തിലൂടെ ഏറ്റവും മികച്ച രീതിയിൽ ഹാസ്യം കൈകാര്യ൦ ചെയ്യുന്ന നടീ നടന്മാരുടെ ഇത്തരം നായക കഥാപാത്രങ്ങൾ മലയാള സിനിമക്ക് എന്നും പ്രിയപ്പെട്ടവർ ആയി. ഓരോ കാലത്തെയും തൊഴില്ലായ്മ ,മുതൽ ഉള്ള നിരവധി സാമൂഹ്യ പ്രശ്നങ്ങളെ പറ്റി പറയാനുള്ള ടൂളുകൾ കൂടിയായിരുന്നു ഇത്തരം നായകന്മാർ. മോഹൻലാലും ജയറാമും ദിലീപും ടോവിനോയും ദുൽകർ സൽമാനും വരെ അത്തരം നിരവധി കഥാപാത്രങ്ങളെ അവതരിപ്പിച്ചിട്ടുണ്ട്. സത്യൻ അന്തിക്കാട് ബോക്സ് ഓഫീസിൽ പരിക്കുകൾ ഇല്ലാതെ സ്ഥിരം പിന്തുടരുന്നത് ഇത്തരം നായകന്മാരുടെ വിജയ ഫോർമുല ആണ്. തന്റെ കരിയറിന്റെ പല കാലത്തും ജയറാം ഇത്തരം കഥാപാത്രങ്ങളെ വിജയകരമായി അവതരിപ്പിച്ചിട്ടുണ്ട്. ജയറാമിനെ കുടുംബ പ്രേക്ഷകർക്ക് പ്രിയപ്പെട്ടവൻ ആകുന്നതും ഇത്തരം കഥാപാത്രങ്ങൾ ആണ്. ആ ഫോർമുലയുടെ ഏതൊക്കെയോ നിലക്കുള്ള അനുകരണമാണ് ലോനപ്പന്റെ മാമ്മോദിസയും. ഇത്തരം സിനിമകളിലെ നായികരമയുടെ സ്ഥിരം മോട്ടിവേഷണൽ റോളുകളുടെ തുടർച്ചയാണ് രേഷ്മ രാജന്റെ ലീന. കൂട്ടുകാരുടെയും പണക്കാരനായ വിജയിയായ ബന്ധുവിന്റെയും സുഹൃത്തിന്റെയും ഒക്കെ റോളുകൾ സ്ഥിരം മലയാള സിനിമ പിന്തുടരുന്നവയാണ്. നായകന് തിരിച്ചറിവ് വരുന്ന വഴിയിലും സിനിമ വ്യത്യസ്തമായ പാത ഒന്നും സ്വീകരിച്ചിട്ടില്ല. ലോനപ്പന്റെ മാമോദിസ എന്ന പേരിൽ നിന്ന് തന്നെ ആ നിലക്ക് സിനിമയുടെ കഥാഗതി ഊഹിക്കാൻ ആകും. മേക്കിങ്ങിൽ ഉള്ള പുതുമയും വളരെ സ്വാഭാവികമായ തിരക്കഥയുടെ പ്രോഗ്രെഷനും പാത്ര സൃഷ്ടിയിൽ കാണിച്ച ലാളിത്യവും ഒക്കെയാണ് ഈ സിനിമയെ മുഷിപ്പിക്കാതെ കണ്ടു ഇറങ്ങാവുന്ന കാഴ്ച്ചാനുഭവമാക്കുന്നത്.

കഥകൾ പറയാൻ ഇഷ്ടമുള്ള ഒരാൾ യാന്ത്രികമായ ഒരു ലോകത്ത് എത്തുമ്പോൾ ഉണ്ടാവുന്ന മടുപ്പും അസ്വസ്ഥതയും നിരാശയും അമർഷവും എല്ലാം ജയറാമിൽ ഭദ്രമായിരുന്നു. അയാൾക്ക് ചുറ്റുമുള്ളവരെ എങ്ങനെ ഈ അവസ്ഥകൾ ബാധിക്കുന്നു എന്ന് കൂടി സംവിധായകൻ പറയുന്നുണ്ട്. അവരുടെ കൂടി ജീവിതത്തിലെ നൈരാശ്യങ്ങൾക്ക് ലോനപ്പന്റെ തെറ്റായ തീരുമാനങ്ങൾ കാരണമാകുന്നു എന്നും സിനിമ പറഞ്ഞു വെക്കുന്നു. ഇവിടെയൊന്നും ആശയ കുഴപ്പങ്ങൾക്ക് ഇടം നൽകിയിട്ടില്ല. കഥ പറച്ചിൽ അഥവാ സ്റ്റോറി ടെല്ലിങ് സാധാരണ മലയാളി ജീവിതത്തിനു എത്രാസ് കണ്ടു പരിചയമുണ്ട് എന്ന് അറിയില്ല. തമാശ പോലെ ചില ഇന്ത്യൻ സിനിമകൾ അത് ഉപയോഗിച്ചിട്ടുണ്ടെങ്കിലും സാധാരണക്കാർക്ക് അത്ര കണ്ട പരിചിതമല്ലാത്ത ഒരു തൊഴിലിടം ആണിത്. ഭാവന നിറഞ്ഞ കഥ പറച്ചിൽ രംഗങ്ങൾ കാണാൻ രസമുണ്ട്, കേൾക്കാനും. പക്ഷെ ഈ അപരിചിതത്വം പ്രേക്ഷകർക്ക് സിനിമയിൽ നിന്ന് ദൂരമുണ്ടാക്കാം. സാമ്പത്തിക പ്രതിസന്ധി പോലെ ചില പ്രായോഗിക ബുദ്ധിമുട്ടുകൾ വരുമ്പോൾ സിനിമ ആശ്രയിക്കുന്ന ചില സംഭാഷണങ്ങളും മറ്റും പല ജയറാം സിനിമകളെയും ഓർമിപ്പിക്കും. സ്ക്രിപ്റ്റിൽ നിന്ന് വഴുതി മാറി ജയറാമിന്റെ സ്ഥിരം കംഫർട്ട് സോണുകളെ ആശ്രയിക്കാൻ ശ്രമിക്കുമ്പോഴാണ് സിനിമ ചെറുതായി പരാജയപ്പെടുന്നതും

കുടുംബ സിനിമകളുടെ വിന്റേജ് ജയറാമിന്റെ മോട്ടിവേഷണൽ ഫീൽ ഗുഡ് പതിവ് രീതികളെ ആശ്രയിക്കുന്നവർക്കുള്ള സിനിമ ആണ് ലോനപ്പന്റെ മാമോദിസ

കഴിഞ്ഞ ജൂലൈ മാസം, റബ്ബർ മരങ്ങൾ തിങ്ങി വളരുന്ന രാമപുരം ഗ്രാമത്തിലെ മേഴ്‌സി നാച്വറൽ ക്യൂർ സെൻററിൽ പ്രകൃതി ചികിത്സക്കായി പോയിരുന്നു. അവിടെ വച്ച് പൊൻകുന്നത്തുള്ള വലിയ റബ്ബർ പ്ലാന്റർമാരായ ഷിബു, ജോപ്പൻ എന്നിവരെ പരിചയപ്പെട്ടു. അവർ റബ്ബർ പ്ലാന്റർമാർ മാത്രമല്ല, ലാറ്റക്സിന്റെ അനുബന്ധ ബിസിനസ്സുകാരുമാണ്. റബറിന്റെ ഭാവി സാധ്യതകളെ കുറിച്ച് സംസാരിച്ചപ്പോൾ, ഇനിയൊരിക്കലും കേരളത്തിൽ റബർ കൃഷി നടത്തരുതെന്നും, വരുംകാലത്ത് അതൊരിക്കലും ലാഭകരമാവില്ലെന്നും നമ്മുടെ കാലാവസ്ഥ വ്യതിയാനങ്ങൾക്ക് അനുയോജ്യമല്ലാത്ത കൃഷിയാണതെന്നും ഞാൻ അവരോടു പറഞ്ഞു. 25 ഏക്കർ സ്ഥലം ഈ വർഷം റീപ്ലാന്റ് ചെയ്യാൻ പദ്ധതിയിട്ടിരുന്ന ജോപ്പൻ അതിനു പകരമായി മറ്റെന്തു കൃഷി ചെയ്യുവാൻ സാധിക്കുമെന്നാരാഞ്ഞു.

പ്രവാസ വിപ്ലവം നടക്കുന്നതിനു മുമ്പ്, ഏതാണ്ട് 40 വർഷങ്ങൾക്കു മുൻപ് വരെ, കേരളം ശീലിച്ചു പോന്നത് കൃഷി അടിസ്ഥാനമാക്കിയുള്ള സമ്പദ് ഘടനയായിരുന്നു.. റബറും തെങ്ങും, കുരുമുളകും, ഏലവും തേയിലയും കാപ്പിയും കപ്പയും കമുകും നെല്ലും ആയിരുന്നു പ്രധാന കൃഷി ഇനങ്ങൾ . ഇവയിൽ നെല്ലും കപ്പയും തെങ്ങും ഒഴികെയുള്ളവ പ്രധാനമായും കയറ്റുമതിക്കായി കൃഷിചെയ്യപ്പെടുന്നവയായിരുന്നു ആ പറഞ്ഞ മൂന്നെണ്ണത്തിലാവട്ടെ, ആവശ്യത്തിനുള്ള നെല്ല് ഉത്പ്പാദിപ്പിക്കാൻ നമുക്ക് സാധിച്ചിരുന്നില്ല. അരിക്കായി അന്ന് ആന്ധ്ര പ്രദേശിനേയും തമിഴ്നാടിനേയും ആശ്രയിച്ചിരുന്ന നമ്മൾ ഇന്ന് ഛത്തിസ്ഗഡിനെ കൂടി ആശ്രയിക്കേണ്ട അവസ്ഥയിൽ എത്തിയിരിക്കുന്നു. നമുക്കാവശ്യമായ ഭക്ഷണ പദാർത്ഥങ്ങളിൽ സിംഹ ഭാഗവും അന്യ സംസ്ഥാനങ്ങളിൽ നിന്നും ഇറക്കുമതി ചെയ്യുകയാണ്. വിഷലിപ്തമായ പച്ചക്കറികൾ ഇവയിൽ ഉൾപ്പെടുന്നു. ചുരുക്കത്തിൽ നമ്മുടെ ദൈനംദിന ജീവിതത്തിൽ അത്യന്താപേക്ഷിതമായ ഭക്ഷണപദാർത്ഥങ്ങൾ, അവയുടെ കൃഷിക്ക് അനുയോജ്യമായ മണ്ണും കാലാവസ്ഥയും ഉള്ളപ്പോഴും ശരിയായി ഉപയോഗപ്പെടുത്താതെയിരിക്കുകയും അനാരോഗ്യകരവും വിഷം കലർന്നതുമായ വിഭവങ്ങൾ മറ്റിടങ്ങളിൽ നിന്നും കൊണ്ട് വന്നു കഴിക്കുകയും ആണ് നമ്മൾ ചെയ്യുന്നത്. പഴകിയതും കേടായതും വിഷലിപ്തവുമായ പച്ചക്കറികൾക്ക് ‘ഉണർവ്’ തോന്നിക്കുവാൻ വീണ്ടും വിഷം ചേർത്ത് വിൽക്കുകയും അത് വാങ്ങി കഴിക്കുകയും ചെയ്ത രോഗികളായി മാറുന്ന ജനസമൂഹമാണ് മലയാളികൾ.
ബ്രിട്ടീഷുകാരും ഇന്ത്യയിൽ വന്ന കച്ചവടക്കാരും അവരുടെ ആവശ്യങ്ങൾക്കനുസരിച്ചു നമ്മുടെ കൃഷി രീതികൾ മാറ്റി മറിക്കുകയായിരുന്നു. അനുയോജ്യമായ കാലാവസ്ഥയും മണ്ണിന്റെ ഗുണങ്ങളും തിരിച്ചറിഞ്ഞ് അവർ, അവർക്കു വേണ്ടി പ്രയോജനപ്പെടുത്തി. നമ്മുടെ ദൈനംദിന ജീവിതത്തിന് ആവശ്യമായ ഭക്ഷണ പദാർത്ഥങ്ങൾ മറ്റുള്ളവരിൽ നിന്ന് വാങ്ങി, നമ്മുടെ കൃഷിയിടങ്ങളിൽ നമ്മൾ മറ്റുള്ളവർക്കായി കൃഷി ചെയ്തു. നമ്മുടെ കൃഷി രീതികൾ, ആദ്യമായി നമുക്ക് വേണ്ടിയാകണം. നമുക്ക് വേണ്ടുന്ന നെല്ലും പഴങ്ങളും പച്ചക്കറികളും നമുക്ക് തന്നെ ഉത്പ്പാദിപ്പിക്കുവാൻ കഴിയണം. ഭക്ഷണകാര്യത്തിൽ സ്വയം പര്യാപ്തത ഉണ്ടാക്കുവാനുള്ള ശ്രമങ്ങൾക്കാകണം നമ്മുടെ കൃഷി വകുപ്പും സർക്കാറും ഊന്നൽ നൽകേണ്ടത്.
ഇതിനായി നാം ആദ്യം ചെയ്യേണ്ടത്, നമുക്ക് വേണ്ടാത്ത, ലാഭം തരാത്ത, നമ്മുടെ ജൈവികതക്ക് ആഘാതമായ, കൃഷി രീതികളിൽ നിന്ന് പിൻവാങ്ങുകയാണ് .
റബ്ബർ പൂർണ്ണമായി നമ്മുടെ സംസ്ഥാനത്തു നിന്നും മാറ്റി നിർത്തപ്പെടണം അത് നമുക്ക് കാര്യമായ ലാഭം തരുന്നില്ല. നമ്മുടെ ജൈവിക പരിസ്ഥിതിക്ക് വലിയ ആഘാതമേൽപ്പിക്കുന്നുമുണ്ട്. യൂക്കാലിപ്റ്റസ് മരങ്ങൾ പോലെ നമ്മുടെ മണ്ണിലെ വെള്ളത്തെ ആവിയാക്കി പുറംതള്ളുകയും അങ്ങനെ മണ്ണിലെ ജലാംശം നഷ്ടപ്പെടുത്തുകയും ചെയ്യുന്നു റബ്ബർ കൃഷി. ഇതിനായി ഉപയോഗിക്കപ്പെടുന്ന സ്ഥലത്തിന്റെ പകുതിയെങ്കിലും പഴവർഗ്ഗങ്ങൾ പച്ചക്കറികൾ തുടങ്ങിയവയുടെ കൃഷിക്കായി മാറ്റി വയ്‌ക്കപ്പെടുകയാണെങ്കിൽ നമ്മുടെ ഭക്ഷണ ക്രമത്തിൽ ആരോഗ്യകരമായ അത്ഭുതങ്ങൾക്ക് അത് വഴി വെയ്ക്കും . തേയിലത്തോട്ടങ്ങളുടെയും കാപ്പിത്തോട്ടങ്ങളുടെയും ചെറിയൊരു പങ്കു കൂടി പഴവർഗ്ഗങ്ങൾ കൃഷി ചെയ്യുവാനായി മാറ്റി വയ്ക്കണം.
നമ്മുടെ ജീവിത ശൈലിയിൽ വരുന്ന മാറ്റങ്ങൾ, നമ്മുടെ പുതു തലമുറയുടെ ഭക്ഷണക്രമത്തിലെ താൽപ്പര്യങ്ങൾ ഇവയെല്ലാം ഉൾക്കൊണ്ടു കൊണ്ടുള്ള പുതിയൊരു കൃഷി സംസ്കാരം പടുത്തുയർത്തണം. നൂതന സാങ്കേതിക വിദ്യ കൃഷിയിടങ്ങളിൽ നടപ്പാക്കണം. സർക്കാർ ആദ്യം ചെയ്യേണ്ടത്, കേരളത്തിലെ മുഴുവൻ ഭൂമിയുടെയും സോയിൽ മാപ്പിംഗ് നടത്തുകയും ഓരോ പ്രദേശത്തെയും കാലാവസ്ഥക്കും മണ്ണിനും അനുസരിച്ച് , അനുയോജ്യമായ വിളകളെ കുറിച്ച് കർഷകർക്ക് അറിവ് നൽകുകയുമാണ് .
സൂപ്പർ ഫുഡ്സ് എന്ന ശ്രേണിയിൽ അറിയപ്പെടുന്ന അവകാഡോ, ബ്ലൂ ബെറി, സ്‌ട്രാബെറി, റാസ്പ്ബെറി, ബ്ലാക്ക് ബെറി,ബ്ലാക്ക് കറൻറ്, റെഡ് കറന്റ് തുടങ്ങിയ ഇനം ബെറികൾ, സിട്രസ് വിഭാഗങ്ങൾ, സ്റ്റോൺ ഫ്രൂട്ട്സ് എന്ന വിഭാഗത്തിൽ പെടുന്ന പീച്ചസ്, നെക്റ്ററിൻ, പ്ലംസ്, ആപ്പ്രികോട്ട്, തുടങ്ങി
യവയും കാക്ക ഫ്രൂട്ട് എന്ന പേരിലുള്ള പേഴ്‌സിമോണിസ്, പിയേഴ്സ്, ലോകത്തിൽ വളരെയധികം പ്രകാരമുള്ള എം ഡി 3 പൈൻആപ്പിൾ, റംബുട്ടാൻ, മാങ്കോസ്റ്റീൻ,ലിച്ചി, മാതള നാരങ്ങ തുടങ്ങിയവയും അടങ്ങുന്ന അനേകയിനം പഴവർഗ്ഗങ്ങൾ കൃഷി ചെയ്യുവാനുള്ള സാധ്യത ഇന്ന് കേരളത്തിൽ ഉണ്ട് .
പച്ചക്കറി കൃഷിയിലെ കീടങ്ങളെ പ്രതിരോധിക്കുവാനും വർഷത്തിൽ എല്ലാ ദിവസവും കൃഷി നടത്തുവാനും വെള്ളത്തിന്റെ ഉപയോഗം കുറയ്ക്കുവാനും കാലാവസ്ഥ നിയന്ത്രണത്തിനും പോളി ഹൌസ്, ഗ്രീൻ ഹൌസ്, ഗ്ളാസ് ഹൌസ് , ഹൈഡോ ഫോണിക്, അക്വാ ഫോണിക്, എയറോ ഫോണിക് കൃഷി രീതികൾ നടപ്പിലാക്കുവാനും സാധിച്ചാൽ സംസ്ഥാനത്തിന് മൊത്തം അത് ഏറെ പ്രയോജനകരമാകും . ആരോഗ്യരംഗത്തും നമുക്കത് ഗുണം ചെയ്യും