മുൻ നക്സൽ നേതാവ് വെള്ളത്തൂവൽ സ്റ്റീഫൻ അന്തരിച്ചു.
1968 ൽ നടന്ന തലശ്ശേരി പോലീസ് സ്റ്റേഷൻ ആക്രമണത്തിൽ കുന്നിക്കൽ നാരായണനും അജിതക്കുമൊപ്പം സ്റ്റീഫൻ നേതൃത്വം നൽകി. നീണ്ട ഒളിവു ജീവിതത്തിനു ശേഷം ഒടുവിൽ 1971 ൽ പോലീസ് പിടിയിലാവുകയും തുടർന്ന് 15 വർഷങ്ങളോളം ജയിലിൽ കഴിയുകയും ചെയ്തു. പിൽക്കാലത്തു സ്റ്റീഫൻ വിപ്ലവ പാത ഉപേക്ഷിക്കുകയും ഇവാഞ്ചലിസ്റ് ആയി മാറുകയും ചെയ്തു
കേരളത്തിന്റെ രാഷ്ട്രീയചരിത്രത്തിൽ നക്സൽ പ്രസ്ഥാനം ഒരു തീപ്പൊരി പോലെ കടന്നുവന്ന കാലമുണ്ടായിരുന്നു.
ഭൂമി എന്നത് രേഖകളിലൊതുങ്ങിയ സ്വത്തല്ല, ജീവനും നിലനില്പുമാണെന്ന് വിശ്വസിച്ച ഒരു തലമുറയുടെ കലഹമായിരുന്നു അത്. 1960കളുടെ അവസാനവും 1970കളുടെ തുടക്കവും ഇടതുപക്ഷ ആശയങ്ങൾ ഭരണകൂടത്തിലേക്കും പാർലമെന്റിലേക്കും ചുരുങ്ങുന്നു എന്ന ചിന്ത മുഖ്യധാരാ ഇടതു പക്ഷത്തിലെ ചില യുവമനസ്സുകളിൽ തീപടരുന്ന ചോദ്യങ്ങളായി മാറിയ കാലം.
അങ്ങനെയൊരു കാലഘട്ടത്തിലാണ് വെള്ളത്തൂവൽ സ്റ്റീഫൻ എന്ന പേര് കേരളത്തിന്റെ മലയോര ചരിത്രത്തിലൂടെ നിഴലുപോലെ സഞ്ചരിച്ചത്. ഇടുക്കിയുടെ മഞ്ഞുമൂടിയ മലനിരകളുടെ ഇടയിൽ, ഭൂമിയോട് ചേർന്ന് ജീവിച്ച ആദിവാസി സമൂഹങ്ങളുടെയും കുടിയേറ്റ കർഷകരുടെയും ദുരിതങ്ങളാണ് സ്റ്റീഫനെ രാഷ്ട്രീയത്തിലേയ്ക്ക് നയിച്ചത്.
പാർട്ടി ഓഫിസുകളിലോ വേദികളിലോ അല്ല, കാട്ടുവഴികളിലും കുടിലുകളിലുമാണ് അദ്ദേഹത്തിന്റെ രാഷ്ട്രീയം രൂപപ്പെട്ടത്. അവിടെ ഭൂമിയില്ലായ്മ ഒരു ആശയമല്ലായിരുന്നു. അത് വിശപ്പായിരുന്നു, അവഗണനയായിരുന്നു, നൂറ്റാണ്ടുകളായുള്ള നിശ്ശബ്ദ പീഡനമായിരുന്നു.
കേരളത്തിലെ നക്സൽ പ്രസ്ഥാനം ബംഗാളിലെ നക്സൽബാരിയെപ്പോലെ ഒരു വൻ പൊട്ടിത്തെറിയായിരുന്നില്ല. അത് ചെറുതും ശക്തവുമായ പല തീക്കനലുകളുടെ സമാഹാരമായിരുന്നു. സർക്കാർ സംവിധാനങ്ങളോടും മുഖ്യധാരാ ഇടതുപക്ഷത്തോടും ഒരുപോലെ വിമർശനാത്മകമായിരുന്ന ഈ പ്രസ്ഥാനം, വിപ്ലവം ഒരു ഭാവികാല സ്വപ്നമല്ല, ഇന്നത്തെ അനിവാര്യതയാണ് എന്ന നിലപാടിലായിരുന്നു. ആ നിലപാടിന്റെ പ്രതീകങ്ങളിലൊന്നായിരുന്നു സ്റ്റീഫൻ.
“വെള്ളത്തൂവൽ” എന്ന വിളിപ്പേര് അദ്ദേഹത്തെ വ്യക്തിയേക്കാൾ വലുതാക്കി ഒരു സ്ഥലത്തിന്റെ, ഒരു കാലത്തിന്റെ, ഒരു പ്രതിരോധ മനസ്സിന്റെ അടയാളമായി. എന്നാൽ, ചരിത്രം അദ്ദേഹത്തെ അധികം സൂക്ഷിച്ചില്ല. ഏറ്റുമുട്ടലുകളും അടിച്ചമർത്തലുകളും, പിരിഞ്ഞുപോകലുകളും നിരാശകളും നക്സൽ പ്രസ്ഥാനത്തെ പോലെ തന്നെ സ്റ്റീഫന്റെ വിപ്ലവ ജീവിതത്തെയും രേഖകളിൽ നിന്ന് മായ്ച്ചു. പിന്നീട് ഒരു നക്സലൈറ്റ് ഒരിക്കലും സഞ്ചരിക്കാൻ പാടില്ലാത്ത വഴികളിലൂടെയും അയാൾ സഞ്ചരിച്ചു.
ഇന്ന്, കേരളത്തിന്റെ രാഷ്ട്രീയചരിത്രത്തിലേയ്ക്ക് തിരിഞ്ഞുനോക്കുമ്പോൾ, വെള്ളത്തൂവൽ സ്റ്റീഫൻ ഒരു വലിയ അധ്യായമല്ല. പക്ഷേ, “ഒരു തെരുവിൽ ഒരു അനീതി കണ്ടാൽ അവിടെ ഒരു കലാപമുണ്ടാകണം, അല്ലെങ്കിൽ പുലരും മുന്നേ ആ തെരുവ് കത്തിയമരണം” എന്ന വാചകം ഉള്ളിൽ കൊളുത്തിവലിച്ചിട്ടുള്ള ഒരാൾക്കും മിന്നലാക്രമണങ്ങളിലെ വീരനായകരെ പൂർണ്ണമായും തള്ളിപ്പറയാനാവില്ല.
“എല്ലാ വിപ്ലവങ്ങളും വിജയിക്കുന്നില്ല; പക്ഷേ അവ ചോദിച്ച ചോദ്യങ്ങൾ ചരിത്രത്തെ പിന്തുടരുന്നു.” അതാണ് വെള്ളത്തൂവൽ സ്റ്റീഫൻ അടക്കമുളള കലാപകാരികളുടെയും ഒരു നാൾ അവർ ഉയർത്തിവിട്ട കലഹങ്ങളുടെയും കലാപങ്ങളുടെയും പ്രസക്തി.
കവർ: ജ്യോതിസ് പരവൂർ