പി. എൽ. ലതിക

“ജന്തർ മന്തറിലെ സംഘർഷത്തിൽ 60 പോലീസ് ഉദ്യോഗസ്ഥർക്ക് പരിക്കുപറ്റി അവർ വിദഗ്ധ പരിശോധനയിലാണ്. ഏതാനും പ്രക്ഷോഭകാരികൾക്ക് പരിക്കേറ്റു. കുറച്ചു പേരെ കരുതൽ തടങ്കലിൽ ആക്കുകയും കലാപം ഉണ്ടാക്കിയതിന്റെ പേരിൽ എഫ്ഐആർ രജിസ്റ്റർ ചെയ്യുകയും ചെയ്തു. പലതവണ ആവശ്യപ്പെട്ടിട്ടും പിരിഞ്ഞു പോകാതെ പ്രക്ഷോഭകാരികൾ കൂട്ടം കൂടി പ്രതിഷേധം തുടർന്നത് കൊണ്ടാണ് നടപടി വേണ്ടിവന്നത്.” രാവിലത്തെ ആകാശവാണി വാർത്തയിൽ നിന്നാണ്. തലസ്ഥാനത്തെ പിടിച്ചു കുലുക്കിയ യുവജന പ്രക്ഷോഭത്തെ ഔദ്യോഗിക ദേശീയ മാധ്യമം റിപ്പോർട്ട് ചെയ്ത രീതി അതിന്റെ പിന്നിലെ സാഹചര്യങ്ങളെ വിശകലനം ചെയ്യാൻ പ്രേരിപ്പിക്കുന്നു

19 ദിവസങ്ങൾ നീണ്ട നിരാഹാരം ഉൾപ്പെടെയുള്ള ജനാധിപത്യ സമരം അധികൃതർ കണ്ടില്ലെന്ന് നടിച്ചപ്പോഴാണ് പാർലമെന്റ് സമ്മേളനം തുടങ്ങുന്ന ദിവസം തലസ്ഥാനത്തു പ്രതിഷേധ ജാഥ സംഘടിപ്പിക്കപ്പെട്ടത്. അധികാരികളെ മുൻകൂട്ടി അറിയിച്ചിരുന്നു. സമരക്കാരുടെ ഒന്നാമത്തെ ആവശ്യം തുടർച്ചയായ പരീക്ഷാക്രമക്കേടുകളുടെ കാലത്ത് വകുപ്പ് ഭരിച്ച മന്ത്രി രാജിവെയ്ക്കണം എന്നതാണ്. അതിൽ കഴമ്പുണ്ടോ എന്ന് പരിശോധിക്കാം.

നീറ്റ് പരീക്ഷ ക്രമക്കേടുകൾ രാജ്യത്തിന്റെ പല ഭാഗത്തുനിന്നും പുറത്തുവരാൻ തുടങ്ങിയിട്ട് വർഷങ്ങളായി. പക്ഷേ ഒറ്റപ്പെട്ട ശബ്ദങ്ങൾ ആയതുകൊണ്ട് അവ നിശബ്ദമായി അടിച്ചമർത്തപ്പെടുകയായിരുന്നു. ഇത്തവണ അതിന് സാധിക്കാത്ത വിധത്തിൽ തെളിവ് സഹിതം വ്യാപകമായ ക്രമക്കേടുകൾ പുറത്തുവന്നു. ലക്ഷക്കണക്കിന് രൂപ വിലയ്ക്ക് ചോദ്യപേപ്പറുകൾ പരിശീലന സ്ഥാപനങ്ങൾ വഴി ലഭ്യമായിരുന്നു എന്ന് സംശയാതീതമായി തെളിയിക്കപ്പെട്ടു. അതിൽ കേന്ദ്രം ഭരിക്കുന്ന ബിജെപിയിലെ പ്രവർത്തകർ ആരോപിതരായി. ഗത്യന്തരമില്ലാതെ മുൻവർഷങ്ങളിൽ നിന്ന് വ്യത്യസ്തമായി പരീക്ഷ ക്യാൻസൽ ചെയ്യുകയും അത് വിദ്യാർത്ഥികളിൽ കടുത്ത വൈകാരികാഘാതത്തിന് വഴി തെളിയിക്കുകയും ചെയ്തു. മുപ്പതോളം പേർ ജീവനൊടുക്കി. എത്രയോ പേർ രണ്ടാമത്തെ പരീക്ഷ എഴുതാൻ കഴിയില്ലെന്ന് നിരാശയുടെ പടുകുഴിയിൽ വീണു.

പ്ലസ് ടു പരീക്ഷയുടെ ഫലപ്രഖ്യാപനവും അതിനെ തുടർന്നുവന്ന രാജ്യവ്യാപകമായ ക്രമക്കേടുകളും വെളിപ്പെടുത്തുന്നത് മൂല്യനിർണയം ശരിയായ രീതിയിൽ നടന്നിട്ടില്ല എന്നതാണ്. അധ്യാപകരുടെയും വിദഗ്ധരുടെയും അഭിപ്രായങ്ങൾ തൃണവൽഗണിച്ച്, ആവശ്യമായ പരിശീലനമോ പരീക്ഷണമോ നടത്താതെ, യന്ത്രവൽകൃത മൂല്യ നിർണയം നടപ്പിലാക്കുകയും അതിന്റെ സാങ്കേതികപ്രവർത്തനങ്ങൾ കളങ്കിത റെക്കോർഡുള്ള ഒരു സ്ഥാപനത്തിന് ഏൽപ്പിച്ചു കൊടുക്കുകയും ചെയ്തതിൽ നിന്ന്, വിദ്യാഭ്യാസ വകുപ്പും മന്ത്രിയും സർക്കാർ പൊതുവേയും എത്ര അശ്രദ്ധയോടെയാണ് വിഷയം കൈകാര്യം ചെയ്തത് എന്ന് ഏത് സാധാരണക്കാരനും മനസ്സിലാകും.

വിദേശകാര്യ വകുപ്പിന് വേണ്ടി പാസ്പോർട്ട് സേവാ പ്രൊജക്റ്റ്, കമ്പനി കാര്യ മന്ത്രാലയത്തിനു വേണ്ടി രാജ്യത്തെ പ്രഥമ ഇ ഗവർണൻസ് പ്രോജക്ട്, ലോകത്തിലെ ഏറ്റവും വലിയ പോസ്റ്റൽ നെറ്റ്‌വർക്ക് ആയ ഇന്ത്യ പോസ്റ്റ് ന്റെ 150000 ശാഖകളെ ഒരു കേന്ദ്രീകൃത ഐടി നെറ്റ്‌വർക്കിൽ കൊണ്ടുവന്ന മെഗാ പ്രോജക്ട്, നികുതി വകുപ്പിന് ഡിജിറ്റലൈസ് ചെയ്തു കേന്ദ്രീകരിച്ച Saksham പ്രോജക്ട് തുടങ്ങിയ വമ്പൻ പദ്ധതികൾ സ്തുത്യർഹമായ രീതിയിൽ നിർവഹിച്ച Tata Cunsultancy Service നെ ഉയർന്ന tender തുക യുടെ പേരിൽ തള്ളിയാണ് Co emt edu tek എന്ന സ്ഥാപനത്തിന് മൂല്യ നിർണയത്തിന്റെ digitalisation project ഏല്പിച്ചത്.സ്ഥാപനം മുൻപ് മറ്റൊരു പേരിലാണ് പ്രവർത്തിച്ചിരുന്നത്-Globerena Technologies. അവരുടെ track record നോക്കാം:

“Before rebranding, the company served as the tech partner for the Telangana State Board of Intermediate Education in 2019. The board faced severe backlash when hundreds of thousands of students received inaccurate scores. A government committee found “systemic failures, procedural collapse, and glaring negligence” on the part of the board and Globarena, though the company was not officially blacklisted. “
Ref : google

പ്രതീക്ഷിച്ച മാർക്ക് ലഭിക്കാത്തതിൽ പരാതി ഉയർത്തിയ വിദ്യാർത്ഥികൾക്ക് ലഭിച്ച ഉത്തരക്കടലാസുകളിൽ ഉത്തരങ്ങൾ വ്യക്തമായിരുന്നില്ല. പലതും ശൂന്യമായിരുന്നു എന്നും ആരോപണമുയർന്നു.അതായത് uploading, proper ആയിരുന്നില്ല. അങ്ങനെയുള്ള ഉത്തരക്കടലാസുകൾ എങ്ങനെയാണ് അധ്യാപകർ വായിച്ചു മാർക്കിട്ടത് എന്നത് ദുരൂഹമാണ്‌. പഴയപടി അധ്യാപകർ മാനുവലായി മൂല്യനിർണയം നടത്തി ഈ പ്രതിസന്ധി പരിഹരിക്കുകയാണ് ഏക പോംവഴി. അത് സങ്കീർണ്ണവും കടുത്ത പ്രായോഗിക ബുദ്ധിമുട്ടുകൾ ഉള്ളതും ആണ്. എങ്കിലും ഒരു രാജ്യത്തെ യുവാക്കളുടെ വിദ്യാഭ്യാസ -തൊഴിൽ പരിപാടികൾ മൊത്തത്തിൽ അടിസ്ഥാനപ്പെടുത്തിയിരിക്കുന്ന ഒരു ദേശീയപരീക്ഷയിൽ ആ ബുദ്ധിമുട്ടുകൾ തരണം ചെയ്തേ പറ്റൂ. സത്യസന്ധമായി, നിയമാനുസൃതമായി പിഴവറ്റ രീതിയിൽ. അതാണ് ലാഘവത്തോടെ തള്ളിക്കളയപ്പെട്ടത്.

പിന്നെ എങ്ങനെ മാർക്കുകൾ നൽകിയിട്ടുണ്ടാവും എന്നത് വിദ്യാർത്ഥികളെയും രക്ഷിതാക്കളെയും ആശങ്കാകുലരാക്കി. ഏതായാലും അത് പരീക്ഷ എഴുതിയവർ പ്രതീക്ഷിച്ച മാർക്കുകൾ ആയിരുന്നില്ല . അത് ഈ നാട്ടിലെ പ്ലസ് ടു അധ്യാപക സമൂഹത്തിന് അറിയാതിരിക്കില്ല. കാരണം അവർ വാല്യൂഷന്റെ ഭാഗമാണല്ലോ. പക്ഷേ അവർ മൗനം പാലിച്ചു. ഒരു ഫാസിസ്റ്റു ഭ രണത്തിന് കീഴിലെ ഭീതിദമായ മൗനം. എങ്കിലും വിദ്യാർത്ഥികൾ അത് കണ്ടുപിടിച്ചു. അഞ്ചാം ക്ലാസ് മുതൽ ട്യൂഷനും കോച്ചിംഗ് ക്ലാസുകളും ആയി വലിയ പ്രതീക്ഷകളോടെ അന്താരാഷ്ട്ര വിദ്യാഭ്യാസം വരെ ലക്ഷ്യം വയ്ക്കുന്ന കഠിനാധ്വാനികളായ കൗമാരക്കാർ ഒരു പരസഹായവും കൂടാതെ സ്വന്തം സാങ്കേതിക പ്രാപ്തി ഉപയോഗിച്ച് പരീക്ഷ നടത്തിപ്പിൽ അധികൃതരുടെ അറിവോടുകൂടി നടത്തിയ ക്രമക്കേടുകൾ പുറത്തുകൊണ്ടുവന്നു. ഇത് നാടിന്റെ നാനാഭാഗത്തും അറിയാതിരിക്കാൻ നമ്മുടെ മുഖ്യധാരാ മാധ്യമങ്ങൾ പരമാവധി സഹകരിച്ചു. ഏതാണ്ട് ഇതേ കാലഘട്ടത്തിൽ ഒരു ശാഖയിലെ ലൈംഗിക മതപരിവർത്തനം- ചൂഷണ ആരോപണങ്ങളാൽ ടി സി എസ് വാർത്തകളിൽ അപവാദം നേരിട്ടു.

തങ്ങൾക്ക് ലഭിച്ച random മാർക്കിംഗ് വിദ്യാർത്ഥികൾ തിരസ്കരിക്കുമെന്നും ഇതുപോലൊരു തിരിച്ചടി ഉണ്ടാകുമെന്നും കേന്ദ്രം പ്രതീക്ഷിച്ചിട്ടുണ്ടാവില്ല.കാരണം ഇതുവരെ ഉണ്ടായ എല്ലാ ആരോപണങ്ങളെയും വിവാദങ്ങളെയും ഭരണകൂട സ്ഥാപനങ്ങളെ ഉപയോഗിച്ച് നേരിട്ട് വായടപ്പിക്കുന്നതിൽ സർക്കാർ വിജയിച്ചിട്ടുണ്ട്.

ബ്രിട്ടീഷ് പട്ടാളം സ്വാതന്ത്ര്യത്തിനു വേണ്ടിയുള്ള സത്യാഗ്രഹ സമരക്കാർക്കെതിരെ അഴിച്ചുവിട്ട മർദ്ദന ങ്ങളുടെ രംഗം നമുക്ക് ഒരു വിദേശി ചലച്ചിത്രത്തിലാക്കി കാണിച്ചുതന്നിട്ടുണ്ട് . ഇന്നലെ” എല്ലും മുള്ളും മൂക്കാത്ത” ഇളം തലമുറയ്ക്കു നേരെ രാജ്യത്തെ നിയമപാലകർ സമാനമായ മർദ്ദന നടപടികളാണ്‌ കൈക്കൊണ്ടത്. ഇതുവരെ കുറ്റകരമായ മൗനം കൊണ്ട് ഉപേക്ഷ കാണിച്ച പ്രാദേശിക മാധ്യമങ്ങൾ പോലും ശബ്ദിച്ചു.

വൈകിയെങ്കിലും കോൺഗ്രസ് സമര ത്തിലേക്ക് എത്തിയത് സ്വാഗതം ചെയ്യാം. അത് യുവജന പ്രക്ഷോഭത്തെ റാഞ്ചാൻ ആവരുത്, ശക്തിപ്പെടുത്താൻ ആവണമെന്ന് ആഗ്രഹിക്കുന്നു. ചർച്ച എന്ന പ്രഹസനവും വാസ്തവ വിരുദ്ധ പ്രസ്താവനകളും അറസ്റ്റും ആയി സർക്കാർ. അയഞ്ഞു എന്നോ വഴങ്ങി എന്നോ കരുതുന്നില്ല. അത് രണ്ടും അധികാരത്തിന്റെയും അടിമത്ത ത്തിന്റെയും പദപ്രയോഗങ്ങൾ ആണ്. ഈ രാജ്യം നാളെ ആർക്ക് വേണ്ടി നിലനിൽക്കണമോ, അവർക്ക് വേണ്ടി സർക്കാർ, സംഭവിച്ച തെറ്റുകൾക്ക് ഉത്തരവാദി ആയവരെ പുറത്താക്കുകയും മാതൃകാപരമായി ശിക്ഷിക്കുകയും വേണം. ഭാവിസജ്ജീ കരണങ്ങൾ സുതാര്യവും കുറ്റമറ്റതും ആക്കണം.ബ്രുഹത്തും ബഹുസ്വരവും ആയ ഈ രാജ്യത്തിന്റെ സർവ ഇടപാടുകളും സംവിധാനങ്ങളും കേന്ദ്രീകരിക്കുക എന്ന ആശയം പുനപരിശോധിക്കണം.നാം ഒരു ഫെഡറൽ റിപ്പബ്ലിക് ആണ്. ഭാവിയിലും അങ്ങനെ തുടരണം. അത് മാത്രമാണ് വിജയിക്കുക.

നിയുക്ത മുഖ്യമന്ത്രി വി ഡി സതീശന് അഭിവാദ്യങ്ങൾ.

എം എൽ എമാർക്കിടയിലെ വോട്ടെടുപ്പും മുതിർന്ന നേതാക്കളുമായുള്ള കൂടിയാലോചനകളും മാധ്യമചർച്ചകളും കൊടുമ്പിരിക്കൊണ്ട പത്ത് ദിവസങ്ങൾക്കൊടുവിൽ വോട്ടർമാരുടെ തെരഞ്ഞെടുപ്പ് മുഖ്യമന്ത്രിസ്ഥാനത്തേയും നിർണയിക്കുന്ന അപൂർവമായ ഒരു രാഷ്ട്രീയ പ്രതിഭാസത്തിനാണ് നാം സാക്ഷ്യം വഹിച്ചത്. ജനാധിപത്യത്തിന്റെ ഓരോ വാതിലും അടയുന്ന ഇന്ത്യൻ വർത്തമാന സാഹചര്യത്തിൽ ഇത് ഒരു ചരിത്ര മുഹൂർത്തമാണ്. വർഷങ്ങൾക്കു മുൻപ് മലമ്പുഴ മണ്ഡലത്തിൽ വി എസിനു സ്ഥാനാർത്ഥിത്വം നിഷേധിച്ചപ്പോൾ ജനം തെരുവിലിറങ്ങി പന്തം കൊളുത്തി പ്രകടനം നടത്തി അത് പുനസ്ഥാപിക്കുകയും നല്ല ഭൂരിപക്ഷത്തോടെ അദ്ദേഹത്തെ വിജയിപ്പിക്കുകയും ചെയ്തതാണ് ഇതിനു മുൻപ് ജനങ്ങളുടെ ഇച്ഛ സമ്മതിദാനത്തിന് പുറത്ത് തിരഞ്ഞെടുപ്പിൽ ഇടപെട്ട ഒരു സന്ദർഭം.

ഇത് വി ഡി സതീശന്,മന്ത്രിയായിട്ടുള്ള തന്റെ ആദ്യത്തെ ഊഴത്തിൽ സാരമായ ആത്മധൈര്യം നൽകുമെന്നുറപ്പ്. അതോടൊപ്പം അത് അദ്ദേഹത്തിൽ ഏൽപ്പിക്കുന്ന ഉത്തരവാദിത്തം കൂടുതൽ ഗൗരവമുള്ളതാക്കുകയും ചെയ്യുന്നു.

കോൺഗ്രസിനകത്ത് തന്റെ മുഖ്യമന്ത്രി പദത്തിനെതിരെ അണിനിരന്ന ബഹുഭൂരിപക്ഷം സാമാജികരെയാണ് അദ്ദേഹത്തിന് ഭരണത്തിൽ ആശ്രയിക്കാനുള്ളത്. അവസാനം വരെ തനിക്ക് അനുകൂലമായി തീരുമാനമെടുക്കുന്നതിൽ അറച്ചു നിന്ന ഹൈക്കമാന്റാണ് പാർട്ടി തലത്തിൽ അദ്ദേഹത്തിന് പിന്തുണ നൽകേണ്ടതും അദ്ദേഹത്തിന്റെ പ്രവർത്തനങ്ങളെ വിലയിരുത്തേണ്ടതും.

പിന്തുണ നൽകിയവർ ജനസാമാന്യം അഥവാ പൗരസമൂഹം എന്ന ഒരു പൊതു സഞ്ചയമല്ല. സഖ്യകക്ഷികളും സമുദായ സംഘടനകളും ചേർന്ന,വ്യത്യസ്ത താല്പര്യങ്ങളും രാഷ്ട്രീയവും പിന്തുടരുന്ന കൂട്ടങ്ങളാണ്. പ്രചാരണ വേളയിൽ സ്ഥാനാർത്ഥിക്ക് ലഭിക്കുന്ന സ്വാതന്ത്ര്യം ഭരണത്തിൽ ഇരിക്കുമ്പോൾ അത്രതന്നെ നിരുപാധികമാവില്ല. കഴിഞ്ഞ ഇടത് സർക്കാരിന് നേരെ ഉയർന്ന കടുത്ത വിമർശനങ്ങളിൽ ഒന്ന് എസ്എൻഡിപി യോടും എൻഎസ്എസ് നോടും അവസാനകാലത്ത് വഴങ്ങിയ ജനാധിപത്യവിരുദ്ധമായ ഒത്തുതീർപ്പുകൾ ആയിരുന്നു. ആ സംഘടനകൾക്കും ക്രിസ്തീയ സഭാധ്യക്ഷർക്കും തന്റെ പാർട്ടിയുടെ നേതൃത്വത്തിലുള്ള മുന്നണി ഭരണത്തിൽ യാതൊരു കൈകടത്തലും അനുവദിക്കില്ല എന്നതാണ് സതീശന്റെ പ്രഖ്യാപിത നിലപാട്.അത് പാലിക്കുവാനും ആർ എസ് എസ്,ജമാ അത്തെ ഇസ്ലാമി തുടങ്ങിയ സംഘടനകളോടും അതേ സമീപനം പുലർത്താനും ഭരണനേതൃ സ്ഥാനത്ത് എത്തുന്നതോടെ അദ്ദേഹം ബാധ്യസ്ഥനാവുന്നു.

നിയമസഭയിൽ പുതിയതായി വന്ന മൂന്ന് ബിജെപി അംഗങ്ങൾ സർക്കാറിനും കേന്ദ്രത്തിനും ഇടയിൽ ഒരു പാലമായി പ്രവർത്തിക്കും എന്ന് പ്രതീക്ഷിക്കാൻ വയ്യ എന്നതാണ് ഇതുവരെയുള്ള അവരുടെ പ്രതികരണങ്ങൾ നൽകുന്ന സൂചന. കേന്ദ്രം സംസ്ഥാനത്തിന്റെ ഫെഡറൽ അവകാശങ്ങളിൽ കൈ കടത്തുകയും വഴങ്ങാത്തപ്പോൾ അർഹമായ ഫണ്ട് വിഹിതം പിടിച്ചു വെയ്ക്കുകയും ചെയ്തതു മൂലം ഉണ്ടായ കടുത്ത സമ്മർദ്ദങ്ങളാണ് കഴിഞ്ഞ ഇടത് സർക്കാർ നേരിട്ട ഒരു പ്രധാനവെല്ലുവിളി. ആശാവർക്കർമാരുടെ ഓണറേറിയം മുതൽ സ്കൂൾ ഉച്ചഭക്ഷണത്തിന്റെ ഫണ്ട് വരെ തടഞ്ഞു വയ്ക്കുകയും നീണ്ട കുടിശ്ശികയോടെ മാത്രം വിതരണം ചെയ്യുകയും ചെയ്യുന്നത് തിരുത്തി, ഫണ്ട് ഫ്ലോ സുഗമമാക്കുക തുടർന്നും വെല്ലുവിളി ആയിരിക്കും. എൻ. ഇ.പി.യിൽ ഒപ്പിടാനുള്ള നിർദ്ദേശം കഴിഞ്ഞദിവസം കേന്ദ്രം വീണ്ടും മുന്നോട്ടുവെച്ചിരുന്നു. പ്രതിപക്ഷനേതാവായിരിക്കെ സ്വാഭാവികമായും ഇരകളുടെ നാവാവുക യിരുന്നു സതീശൻ. കേന്ദ്രത്തിനെതിരെ പ്രതിഷേധം ഉയർത്തുകയോ സർക്കാരിന്റെ പ്രതിരോധങ്ങൾക്ക് പിന്തുണ നൽകി ശക്തിപകരുകയോ ചെയ്തിട്ടില്ല. വിമർശനത്തിൽ ഒതുങ്ങുകയായിരുന്നു പ്രതിപക്ഷം. ഇപ്പോൾ റോൾ മറി ച്ചായിരിക്കുന്നു. ഈ റോളും ആർജ്ജവത്തോടെ കൈകാര്യം ചെയ്തു സംസ്ഥാനതാല്പര്യങ്ങൾ ഉയർത്തിപ്പിടിക്കാൻ സതീശന് കഴിയട്ടെ.

സർക്കാരിന്റെ ഭരണവിജയങ്ങളിലും പരാജയങ്ങളിലും പ്രധാന പങ്കു വഹിക്കുന്നവരാണ് ഉദ്യോഗസ്ഥർ. വരുമാന പരിമിതിയുള്ള നമ്മുടെ സംസ്ഥാനം നിന്ന നിലയിൽ നിൽക്കാതെ കാലോചിതമായ വികസനവുമായി മുന്നോട്ടുപോകാൻ ഉറച്ചപ്പോൾ ആവിഷ്കരിച്ചു നടപ്പിലാക്കിയ കിഫ്‌ബി തുടർന്നും കാര്യക്ഷമമായി മുന്നോട്ടു കൊണ്ടുപോകുന്നത് ഉചിതമായിരിക്കും. ഉറപ്പും തുടർച്ചയുമുള്ള സ്രോതസ്സുകൾ,ഭാവിയിലേക്കും വർദ്ധനവോടെ തുടരാൻ സാധ്യതയുള്ള തിരിച്ചടവ് മാർഗ്ഗം എന്നിവ കിഫ്‌ബിയെ പുതിയ സർക്കാരിനും സ്വീകാര്യമാക്കുമെന്ന് പ്രതീക്ഷിക്കുന്നു.

ഒരു സർക്കാരിന്റെ എല്ലാ നേട്ടങ്ങൾക്കും പിന്നിൽ ഉദ്യോഗസ്ഥരുണ്ട്. അതേപോലെ കോട്ടങ്ങൾക്ക് പിന്നിലും. ഭൂമി തരം മാറ്റൽ, പാർപ്പിടങ്ങൾക്ക് വരുത്തിയ ഭേദഗതികൾക്ക് മേൽ മുൻകാല പ്രാബല്യത്തോടെ അധികനികുതി ചുമത്തൽ തുടങ്ങി മുൻ സർക്കാർ ആവിഷ്കരിച്ചു നടപ്പിലാക്കാൻ ശ്രമിച്ച വിഭവസമാഹരണമാർഗങ്ങൾ ഉദ്യോഗസ്ഥരുടെ മെല്ലെപ്പോക്കും അനാസ്ഥയും മൂലം ഫലം കാണാതെ ഫയലുകളിൽ ഉറങ്ങുന്നത് ഉദാഹരണം.
നാനാതുറകളിൽ പെട്ട ജനത്തിന്റെയും വിരോധവും എതിർപ്പും ക്ഷണിച്ചു വരുത്തുന്ന പോലീസ് അതിക്രമങ്ങളും ഏതൊരു സർക്കാരിനും തലവേദനയാണ്. അലകും പിടിയും മാറിയ ഗ്രാമീണ തൊഴിലുറപ്പ് പദ്ധതി സാമൂഹ്യവും സാമ്പത്തികവുമായ പ്രശ്നങ്ങൾക്ക് വഴിവെക്കാനിടയുണ്ട്.

തെരഞ്ഞെടുപ്പ് കാലത്ത് പരക്കെയുള്ള ചർച്ചകളിലേക്ക് വന്ന ചില പ്രശ്നങ്ങൾ നിയുക്ത മുഖ്യമന്ത്രിയുടെ ശ്രദ്ധയിൽ പെടുത്തുക എന്നതായിരുന്നു ഉദ്ദേശം. അവ അവധാനതയോടെ കൈകാര്യം ചെയ്യുകയും ഒപ്പം നീതി ആയോഗിന്റെ സൂചികകളിൽ പലതിലും മുന്നിൽ സംസ്ഥാനത്തെ എത്തിച്ച പുരോഗമനോന്മുഖമായ പദ്ധതികൾക്ക് തുടർച്ച ഉറപ്പുവരുത്തുകയും ചെയ്യാൻ നിയുക്ത മുഖ്യമന്ത്രിക്കും സർക്കാരിനും കഴിയട്ടെ. ഉന്നത വിദ്യാഭ്യാസരംഗത്തും ആതുര ശുഷ്‌റൂഷാരംഗത്തും ചൂണ്ടിക്കാണിക്കപ്പെട്ട പോരായ്മകൾ പരിഹരിച്ച് തെരഞ്ഞെടുപ്പ് ഫലത്തോട് നീതി പുലർത്താൻ കഴിയട്ടെ. ജനഹിതം സാക്ഷാൽക്കരിക്കുവാനുള്ള ഭരണ യജ്ഞത്തിൽ ജനങ്ങളോടൊപ്പം ആശംസകൾ നേരുന്നു.

കവർ : സി പി ജോൺസൺ

സംസ്ഥാനത്തു നിയമസഭാ തിരഞ്ഞെടുപ്പിൽ യു ഡി എഫ് അസന്നിഗ്ദ്ധമായി വിജയിച്ചു. Ldf ൽ സീറ്റുകൾ കിട്ടാതെ പുറത്തു പോയി നിന്നവരും ജയം കണ്ടു. LDF ന്റെ മന്ത്രിമാരുൾപ്പെടെ തോൽ‌വിയിൽ. ഒരു ക്ഷീണവും തട്ടാതെ മുസ്ലിം ലീഗ്. NDA ക്ക് 3 സീറ്റുകൾ. വൻ സാമ്പത്തിക ക്രമക്കേടുകൾ നടത്തിയെന്ന് തിരഞ്ഞെടുപ്പിന് അല്പം മുൻപ് വെളിപ്പെട്ടയാളും അടിമുടി കേരള വിരോധിയും ആയ രാജീവ്‌ ചന്ദ്രശേഖറി ലൂടെ NDA തലസ്ഥാനത്തു വിജയം നേടി.

ബംഗാളിലെ വിധി ജനവിധിയാണെന്നു വിശ്വസിക്കുന്നതിനു ബുദ്ധിമുട്ടുണ്ട്.മാസങ്ങളായി അവിടെ നടന്ന സംഭവപരമ്പര ആണ് കാരണം. മാധ്യമങ്ങൾ അത് ഭരണവിരുദ്ധവികാരം എന്നു പൊതുവായി അടയാളപ്പെടുത്തുന്നതിനോട് വിയോജിക്കുന്നു. ബംഗാളിന്റെ പതനം ഇന്ത്യയുടെ നിവൃത്തികേടാണ്. ഗുരുതരവും ദൂരവ്യാപകവും ആയിരിക്കും അതിന്റെ തുടർ പ്രകമ്പനങ്ങൾ.

തമിഴ്നാടിലെ പുതിയ പാർട്ടിയെ കുറിച്ച് എന്തെങ്കിലും പറയാൻ ഇപ്പോൾ നിവൃത്തിയില്ലല്ലോ..

ഇതോടെ കേന്ദ്ര സർക്കാരിനോടും മോദി – ഷാ അധികാര കേന്ദ്രത്തിനോടും നേർക്കുനേർ എന്തെങ്കിലും പറയാൻ മുതിർന്ന മുഖ്യമന്ത്രിമാർ പുറത്താക്കപ്പെട്ടിരിക്കുന്നു. ഇന്ത്യൻ ജനാധിപത്യം കൂടുതൽ ദുർബലമാവാനുള്ള അനുകൂല സാഹചര്യം ആണ് അതുമൂലം വന്നു ചേർന്നിട്ടുള്ളത്.

ഇടതു കക്ഷികൾ രാജ്യത്തു ഭരണപക്ഷത്തു നിന്നു പൂർണമായും ഒഴിവായിരിക്കുന്നു. തൊഴിലും തൊഴിലാളിയും ബാഹ്യവും ആന്തരികവും ആയ നിരവധി പ്രാതികൂല്യങ്ങൾ നേരിടുന്ന സാഹചര്യത്തിൽ അത് വലിയ പ്രത്യാഘാതങ്ങൾ ഉണ്ടാക്കും

കഴിഞ്ഞതവണ തുടർഭരണം ലഭിച്ചില്ലായിരുന്നെങ്കിൽ ഒരുപക്ഷേ ഈ തിരഞ്ഞെടുപ്പ് ഫലം കേരളത്തിന്റെ സാമ്പ്രദായിക വിധിയെഴുത്തായി സ്വീകരിക്കപ്പെടുമായിരുന്നു. വിമർശകർ എത്ര നിസ്സാരവൽക്കരിക്കാൻ ശ്രമിച്ചാലും എടുത്ത് കാണിക്കാവുന്ന പല ഭരണനേട്ടങ്ങളും പിണറായി സർക്കാറിന് അവകാശപ്പെട്ടതായി ഉണ്ട്. എങ്കിലും ഒരു സർക്കാർവിരുദ്ധ വികാരം നിലവിൽ ഉണ്ടായിരുന്നു എന്ന് തിരഞ്ഞെടുപ്പ് ഫലം തെളിയിക്കുന്നു. ആദ്യ റൗണ്ടുകളിൽ പിണറായി പിന്നോക്കം പോയത് അദ്ദേഹത്തിന് എതിരെ ജനവികാരം ഉണ്ടെന്ന് മാധ്യമങ്ങളും വിമർശകർരും ആവർത്തിച്ച് പറഞ്ഞുകൊണ്ടിരുന്നതിൽ വാസ്തവം ഉണ്ടെന്ന് തെളിയിച്ചിരിക്കുന്നു.

മുതിർന്ന പല നേതാക്കളെയും മാറ്റിനിർത്തുകയും തന്റെ സ്ഥാനാർത്ഥിത്വത്തിന് പാർട്ടി ചട്ടങ്ങൾക്ക് വിരുദ്ധമായി തുടർച്ച കല്പിക്കുകയും ചെയ്തത് പിണറായിയുടെ രാഷ്ട്രീയ വ്യക്തിത്വത്തിന് മങ്ങൽ ഏൽപ്പിച്ചു. നല്ല പ്രവർത്തന റെക്കോർഡും അഴിമതി വിരുദ്ധരെന്ന ജനസമ്മതിയും ഉള്ള നേതാക്കൾ തഴയപ്പെടുമ്പോൾ പ്രകടിപ്പിക്കുന്ന നൈരാശ്യം ലാഘ വത്തോടെ അവഗണിച്ചതും വിനയായി.

5 ലക്ഷം ലൈഫ് ഭവനങ്ങൾ നിർമ്മിച്ചു നൽകുകയും ആയിരക്കണക്കിന് പട്ടയങ്ങൾ വിതരണം ചെയ്യുകയും വയനാട്ടിലെ ദുരന്തബാധിതരെ മാതൃകാപരമായി പുനരധിവസി പ്പിക്കുന്നതിന് തുടക്കമിടുകയും ചെയ്ത മുഖ്യമന്ത്രി, പാർട്ടിയോടൊപ്പം നിന്നവരും അല്ലാത്തവരുമായ സാധാരണക്കാർ വ്യക്തികളിൽ നിന്നും സ്ഥാപനങ്ങളിൽ നിന്നും ക്രൂരമായ ജീവിതാനുഭവങ്ങൾ നേരിട്ടപ്പോൾ അടിസ്ഥാന വർഗ്ഗത്തിന്റെ മുഖ്യമന്ത്രിയായി അവരുടെ അടുത്തെത്തിയില്ല. താഹ,ശുഹൈബ്, മധു, ജിഷ്ണു, നിധിൻ രാജ്എന്നിവ ചില പേരുകൾ മാത്രം.അത്തരം സന്ദർഭങ്ങളിൽ പാർട്ടി അതിർത്തികൾ അവഗണിച്ചു വി എസ് സ്വീകരിച്ച മാനുഷികസമീപനം കൈവിട്ടു. കരിങ്കൊടി പ്രകടനം ഉൾപ്പെടെയുള്ള ജനാധിപത്യ പതിഷേധങ്ങളോട് പോലും അസഹിഷ്ണുവായി. RSS സ്വാധീനം ആരോപിക്കപ്പെട്ട പോലീസ് സേനയെ തിരുത്തുന്നത് പോയിട്ട് വിമർശിക്കാൻ പോലും തയ്യാറായില്ല. സ്വന്തം വകുപ്പ് ഏറ്റവും വിമർശിക്കപ്പെട്ട വകുപ്പായി മാറുന്നതു വക വെയ്ക്കാതെ പോലീസ് അക്രമങ്ങളെ ന്യായീകരിച്ചു.

തിരഞ്ഞെടുപ്പിന് മുൻപും പിൻപും നടന്ന സർവേകളിൽ, രണ്ടാം ഊഴത്തിൽ അടിസ്ഥാന തലത്തിൽ സിപിഎം പ്രവർത്തകർ അവരുടെ പരമ്പരാഗത ശക്തികേന്ദ്രങ്ങളിൽ പോലും ജനകീയ പ്രശ്നങ്ങളിൽ ഇടപെടാതെയും ജനങ്ങളിൽ നിന്നകന്നും നിലകൊണ്ടു എന്ന് പൊതുവെ നിരീക്ഷിക്കപ്പെട്ടു. കേരളത്തിന്റെ രാഷ്ട്രീയ മനസ്സ് അത്തരം അവഗണനകൾ പൊറുക്കുകയില്ല എന്ന് ഈ ഫലത്തിൽ നിന്ന് ഇടതുപാർട്ടികൾ പഠിച്ചെടുക്കണം.

നാനാവിഭാഗങ്ങളും മതാലസ്യത്തിൽ മുഴുകാൻ വെമ്പുന്ന ഒരു സമൂഹത്തിൽ മതനിരപേക്ഷ നിലപാട് മുറുകെപ്പിടിക്കുക വോട്ട് രാഷ്ട്രീയത്തിന് വലിയ വെല്ലുവിളിയാണ്. പക്ഷേ ഇടത് രാഷ്ട്രീയ കക്ഷികൾ അതിൽ ഒരിക്കലും വിട്ടുവീഴ്ചയോ അവസരവാദിത്തമോ കൈക്കൊള്ളരുത് . രണ്ടാം പിണറായി സർക്കാറിന് പലതവണ ഈ വിഷയത്തിൽ കാൽ വഴുതി. മുന്നോക്ക സംവരണം വെള്ളാപ്പിള്ളിയുമായുള്ള ചാർച്ച , അയ്യപ്പ സംഗമം എന്നിവ ഇടത് അനുഭാവികൾക്ക് പോലും പിന്താങ്ങുവാൻ കഴിയാത്ത വ്യതിചലനങ്ങളായിരുന്നു. ഹ്രസ്വകാല നേട്ടങ്ങൾക്കു വേണ്ടി ഒരു ജനതയുടെ സ്ഥായിയായ അനുഭാവങ്ങളെയും , രാഷ്ട്രീയ അവബോധത്തെയും അവഗണിക്കുന്നത് ആത്മഹത്യാപരമാണ്‌.

മാധ്യമങ്ങൾ പൊതുവെ രണ്ടാം ഇടതു സർക്കാരിന്റെ ശത്രുപക്ഷത്തായിരുന്നു എന്ന് വിമർശകർ പോലും സമ്മതിക്കും. ഒരാഴ്ചക്കുള്ളിൽ ഒരു ഡസനിലധികം മാധ്യമങ്ങളെ സമചിത്തതയോടെ അഭിമുഖീകരിച്ചു, ജനാധിപത്യ ഉത്തരവാദിത്തം പ്രകടിപ്പിച്ച മുഖ്യമന്ത്രി ഒരു പൊതു സമ്മേളനത്തിൽ സദസ്സിലെ ഒരംഗത്തിനോട് നടത്തിയ പ്രതികരണത്തിന്റെ പേരിൽ ആഴ്ചകളോളം വേട്ടയാടപ്പെട്ടത് ഉദാഹരണം. കടുത്ത പരിമിതികളിലും എടുത്തു പറയാവുന്ന കണക്കുകളോടെ മികവിലേയ്ക്ക് എത്താൻ അത്യധ്വാനം ചെയ്യുന്ന ആരോഗ്യ വകുപ്പ് വിരലിൽ എണ്ണാവുന്ന പിഴവുകളുടെ പേരിൽ നിശിതമായി ആക്രമിക്കപ്പെടുകയുണ്ടായി. കേന്ദ്രത്തിന്റെ fund വിഹിത നിഷേധങ്ങൾക്കെതിരെ ഒരു വാക്ക് എഴുതുകയോ ചർച്ചചെയ്യുകയോ ചെയ്യാത്തവർ സംസ്ഥാന സർക്കാരിന്റെ വിതരണത്തിലെയും വിനിയോഗത്തിലെയും കുടിശ്ശികക്കണക്കുകൾ നിരത്തുന്നതിൽ നിർലോഭരായി.

അതതു ദേശങ്ങളിലെ പരിത സ്ഥിതിക്കനുസൃതമായി ബാഹ്യ ഇടപാടുകൾ ക്രമപ്പെടുത്തുകയും സ്ഥാപിത ലക്ഷ്യം ഒളിപ്പിച്ചു വെയ്ക്കുകയും ചെയ്യുന്ന ജമാ അത്ത് ഇസ്ലാമിക്കെതിരെയുള്ള നിലപാട് മുസ്ലിം വിരുദ്ധതയായി ദുർവ്യാഖ്യനിക്കാൻ കോൺഗ്രസ് , മുസ്ലിം ലീഗ് എന്നിവർക്കൊപ്പം മുൻ കമ്മ്യൂണിസ്റ്റുകളും ഉണ്ടായി.

കേരളത്തെ നാണം കെടുത്തിയ ചലച്ചിത്ര രംഗത്തെ സ്ത്രീപീഡനങ്ങൾ നിയമാ നുസൃതം നേരിടുമെന്ന് ആദ്യഘട്ടത്തിൽ തോന്നിപ്പിച്ചുവെങ്കിലും അവിടത്തെ നായക മേധാവിത്വത്തിന് കീഴടങ്ങി. ഹേമ കമ്മിറ്റി റിപ്പോർട്ട്‌ ചവറ്റു കുട്ടയിലെറിഞ്ഞത് പൊറുക്കാനാവാത്ത സ്ത്രീവിരുദ്ധതയായി.

സർക്കാരിന്റെ നേട്ടങ്ങൾക്ക് പിന്നിൽ കഠിനാധ്വാനം ചെയ്ത ശിവശങ്കർ, നവീൻ ബാബു തുടങ്ങിയ ഉദ്യോഗസ്ഥർ നേരിട്ട നീതി നിഷേധവും സർക്കാരിന്റെ നിലപാടുകളെ സംശയത്തിന്റെ നിഴലിലാക്കി

കേന്ദ്രത്തിൽ നിന്നും അഭൂതപൂർവമായ നിസ്സഹകരണവും നിഷേധാത്മകതയും നേരിട്ട ഭരണകാലം കൂടി ആയിരുന്നു കഴിഞ്ഞ അഞ്ച് വർഷങ്ങൾ. ഇത് ഉയർത്തിക്കാട്ടുവാൻ ഭരണകക്ഷി വേണ്ടത്ര ഊർജ്ജം വിനിയോഗിച്ചില്ല എന്നത് തിരിച്ചടിയായി. കേന്ദ്രത്തിനെതിരെ ശക്തവും പ്രകടവുമായ അവകാശസമരങ്ങൾ സംഘടിപ്പിക്കുന്നതിൽ ഇടതു സർക്കാർ പരാജയപ്പെട്ടുകൂടാ. അത് സ്വാഭാവികമായും സർക്കാറിന്റെ ദൗർബല്യമായി വിലയിരുത്തപ്പെടും.

വികസനം പ്രധാനമാണ്.അതോടൊപ്പം സർവതലസ്പർശിയായ സുസ്ഥിതിയും നൈതികതയും പുലരുന്നുണ്ട് എന്ന് ഉറപ്പ് വരുത്തുകയും വേണം എന്ന് ജനം ആഗ്രഹിക്കുന്നു.

ആശങ്കപ്പെട്ടത് പോലെ വോട്ട് കൃത്രിമങ്ങൾ സംസ്ഥാനത്ത് സംഭവിച്ചില്ല എന്നത് ആശ്വാസകരമാണ്. ഇപ്പോഴും പൗരന്മാർ തങ്ങളുടെ വോട്ടവകാശം തിരിച്ചറിവോടെയും ബോധപൂർവ്വമായും ഉപയോഗിക്കാൻ ബദ്ധശ്രദ്ധരാണെന്നതും സംസ്ഥാനത്തെ സംബന്ധിച്ച് ജനാധിപത്യത്തിൽ ഉള്ള വിശ്വാസം ഊട്ടിയുറപ്പിക്കുന്നതാണ്.

പശ്ചിമേഷ്യയിൽ യുദ്ധം തുടരുകയാണ്. ഇറാനിലെ ഭരണാധികാരിയും പരമോന്നത ആത്മീയനേതാവുമായ ആയത്തുള്ള അലി ഖമേനി വധിക്കപ്പെട്ടതോടെ യുദ്ധം അവസാനിക്കുമെന്ന് ഒരു പ്രതീതി ലോകവ്യാപകമായി ഉണ്ടായി. അമേരിക്കയുടെ കണക്കുകൂട്ടലും വിജ്ഞാപനങ്ങളും അങ്ങനെ ഒരു ധാരണ ഉളവാക്കി എന്നതാണ് വസ്തുത. പക്ഷേ ഇന്ന് യുദ്ധം പതിനൊന്നാം ദിവസത്തിലേക്ക് കടക്കുമ്പോൾ ആക്രമണങ്ങൾ കൂടുതൽ രൂക്ഷമാകുകയാണ്. കഴിഞ്ഞ ഒരാഴ്ചക്കാലത്ത് കുവൈറ്റ്, ബഹറിൻ, ഇറാഖ്, ഒമാൻ , യു എ ഇ,ജോർദാൻ ഇസ്രായേൽ, സൗദി അറേബ്യ, ഖത്തർ, അസൈർബൈജാൻ, സൈപ്രസ് തുടങ്ങിയ രാഷ്ട്രങ്ങളെല്ലാം മിസൈൽ ആക്രമണങ്ങൾക്ക് വിധേയമായിരിക്കുന്നു.അതോടെ ഇത് ഇറാനും ഇസ്രായേൽ /യു എസ് ചേരിയും തമ്മിലുള്ള യുദ്ധം എന്നതിലുപരി മധ്യേഷ്യ മുഴുവൻ ഉൾപ്പെടുന്ന യുദ്ധമായി. ലെബനോണിൽ മാത്രം മരണം 400 കടക്കുമ്പോൾ എങ്ങനെ അതിനെ ഇസ്രായേൽ-ഇറാൻ സംഘർഷം എന്ന് പരിമിതപ്പെടുത്തും? മേല്പറഞ്ഞ രാജ്യങ്ങളെ ആക്രമിക്കുന്നതിലൂടെ ഇറാൻ ശ്രമിക്കുന്നത് അവിടെയെല്ലാം അസ്ഥിരത വരുത്തുവാനും അതിലൂടെ സംഘർഷത്തിന്റെ ആഘാതം ആഗോളതലത്തിലേക്ക് എത്തിക്കുവാനുമാണ്. ഈ രാജ്യങ്ങളിൽ വർഷങ്ങളിലൂടെ കോടികൾ ചിലവഴിച്ചു അമേരിക്ക പടുത്തുയർത്തിയ പ്രതിരോധ സംവിധാനങ്ങൾക്ക് വലിയതോതിൽ ഉള്ള നാശം സംഭവിച്ചിരിക്കുന്നു. നഷ്ടങ്ങൾ അതിഭീകരമാണ് എന്നാണ് വിവരം. ഇസ്രായേൽ പ്രതിരോധത്തിന്റെ അപ്രമാദിത്തവും വെല്ലുവിളികൾ നേരിടുന്നു, ഔദ്യോഗികമായി പുറത്തു വന്നിട്ടില്ലെങ്കിലും. മിക്കവാറും നമുക്ക് ലഭിക്കുന്നത് പശ്ചാത്യസ്രോതസ്സുകളിൽ നിന്നുള്ള വാർത്തകളും റിപ്പോർട്ടുകളും ആണല്ലോ.

ഇറാനെ സംബന്ധിച്ച്, കൊല്ലപ്പെട്ടത് ഏറ്റവും സമുന്നതനായ ആത്മീയനേതാവാണ്.അങ്ങനെയൊരാളെ സമാധാനചർച്ചയെന്ന വ്യാജപരിസരം സൃഷ്ടിച്ചു അതിക്രൂരമായ അക്രമണത്തിലൂടെ ഇല്ലാതാക്കിയത് ഇറാനികളിൽ കനത്ത വൈകാരികാഘാതമേൽപ്പിച്ചിരിക്കുന്നു. അത് ഫലത്തിൽ അവർക്കിടയിൽ ഉണ്ടായിരുന്ന ഭിന്നതകളെ അലിയിച്ച് ഐക്യപ്പെടുത്തിയിരിക്കുന്നു എന്നാണ് സർവസന്നാഹങ്ങളുമായി ആ രാജ്യം യുദ്ധത്തിന് ഇറങ്ങിയിരിക്കുന്നതിൽ നിന്ന് മനസ്സിലാക്കേണ്ടത്. ദീർഘയുദ്ധങ്ങൾ ഇറാൻ ജനതയ്ക്ക് പുത്തരിയല്ല. ഇവിടെ അമേരിക്കയുടെ തന്ത്രം പാളിപ്പോയി.

യുദ്ധം തുടരുമെന്നും ഇസ്രായേലിന് വലിയ ആയുധശേഖരം അയക്കുന്നു എന്നും ട്രംപിന്റെ പ്രഖ്യാപനം കഴിഞ്ഞ ദിവസം ഉണ്ടായി. ഇറാൻ നിരുപാധികമായി കീഴടങ്ങി ഭരണമാറ്റം സംഭവിക്കുന്നത് വരെ യുദ്ധം തുടരുമെന്നാണ് ട്രമ്പിന്റെ പക്ഷം. അത് പക്ഷേ വിചാരിച്ചതുപോലെ എളുപ്പമല്ല എന്നാണ് ഇതുവരെയുള്ള സംഭവങ്ങളിൽ നിന്ന് വിലയിരുത്താൻ കഴിയുന്നത്. യുദ്ധം ദിവസങ്ങളോ ആഴ്ചകളോ നീളാം എന്നാണ് ഇപ്പോഴത്തെ വിദഗ്ധപക്ഷം.

ആയത്തുള്ള അലി ഖമേനിയുടെ മരണശേഷം പുത്രൻ മൊജ്താബ ഖമേനി നേതൃസ്ഥാനം ഏറ്റെടുത്തു. കടുത്ത നിലപാടുകളും സൈനികകേന്ദ്രങ്ങൾക്കുമേൽ സ്വാധീനവും ഉള്ള ആൾ. ഇതുവരെ നടന്ന ആക്രമണങ്ങളിലെ പാറ്റേണിൽ നിന്ന് ഇറാൻ തികച്ചും ആസൂത്രിതമായും വ്യക്തമായ ലക്ഷ്യങ്ങളോടെയും ആണ് ആക്രമണങ്ങൾ നടത്തുന്നത് എന്നുവേണം കണക്കാക്കുവാൻ. അമേരിക്കൻ സൈനികകേന്ദ്രങ്ങൾക്ക് അപ്പുറം ഗൾഫ് രാഷ്ട്രങ്ങളിലെ എണ്ണ ഉൽപാദന കേന്ദ്രങ്ങളെയും പ്രമുഖർ താവളമാക്കാവുന്ന ഹോട്ടലുകളെയും വിമാനത്താവളങ്ങളെയും കൃത്യമായി ടാർഗറ്റ് ചെയ്യുന്നു.ഹോർമുസ് കടലിടുക്ക് അടച്ചതോടെ നൂറുകണക്കിന് കപ്പലുകളുടെ യാത്രയ്ക്ക് ഭംഗം വരുന്നു. അവ എന്നത്തേയ്ക്ക് എവിടെ കരയടുപ്പിക്കാനാവുമെന്നത് ഊഹാതീതമാണ്.ചരക്കിന്റെ കാലാവധി, ജീർണസാധ്യത ( perishability ) എന്നിവ ഉയർത്തുന്ന നഷ്ടസാദ്ധ്യതകൾ ഏറെ.പല സ്ഥാപനങ്ങളുടെയും നിരവധി കപ്പലുകൾ എന്ന് തീരമടുക്കുവാനോ ചരക്കിറക്കുവാനോ സാധ്യമാകുമെന്ന് അറിയാതെ ചിന്നിച്ചിതറിയ അവസ്ഥയിലാണ്. യുദ്ധം ഇന്ന് അവസാനിക്കുകയാണെങ്കിൽ പോലും ഈ മേഖല പൂർവസ്ഥിതിയിലേക്ക് എത്തുവാൻ മാസങ്ങളോ വർഷങ്ങളോ വേണ്ടിവരും. പുതിയതായി ഏർപ്പെടുത്തിയ യുദ്ധ അധികചുങ്കം കനത്ത സാമ്പത്തിക ബാധ്യതയാണ് ഉണ്ടാക്കുക. ഇനിയുള്ള ചരക്കുനീക്കങ്ങൾക്ക് കരയിലൂടെയുള്ള മറ്റുമാർഗങ്ങൾ ആലോചിക്കേണ്ടിവരും.

ഇതിന്റെ മറുവശം വിവിധരാജ്യങ്ങളിൽ അവശ്യസാധനങ്ങളുടെ ലഭ്യത തടസ്സപ്പെടുകയും തന്മൂലം വിലക്കയറ്റം ഉണ്ടാവുകയും ചെയ്യും എന്നതാണ്.

എയർലൈൻ ഇൻഡസ്ട്രിയും നിശ്ചലാവസ്ഥയിലാണ്. ഭീമമായ നഷ്ടങ്ങൾ.ടൂറിസം, റീറ്റൈൽ ബിസിനസ്, എന്നിവയും ബാധിക്കപ്പെട്ടു . റമദാൻ കാലമാണ് ഗൾഫ് മേഖലയിൽ എല്ലാവിധ ബിസിനസ്സുകളുടെയും പുഷ്കലകാലം. ആ മാസങ്ങളിൽ തന്നെ യുദ്ധം ഉണ്ടായി എന്നത് പ്രതിസന്ധിയുടെ ഗൗരവം വർധിപ്പിക്കുന്നു. ആളുകൾ പുറത്തിറങ്ങുന്നത് കുറഞ്ഞു. Shopping അവശ്യവസ്തുക്കളിലേയ്ക്ക് ചുരുങ്ങുന്നു. ആഡംബര വിപണി മന്ദീഭ വിക്കുകയാണ്. ഇഫ്താർ വിരുന്നുകൾ കുടുംബവൃത്തങ്ങളിലേയ്ക്ക് പരിമിതപ്പെടുന്നതിനാൽ റെസ്റ്റാറന്റുകൾ ഒഴിഞ്ഞു കിടക്കുന്നു. മേഖലയിലേക്കുള്ള ചരക്കുനീക്കം അനിശ്ചിതമായി തടസ്സപ്പെട്ടത് ഏഷ്യൻ, ആഫ്രിക്കൻ,ലാറ്റിനമേരിക്കൻ രാജ്യങ്ങളിലെ ഉൽപാദകരെയും പ്രതികൂലമായി ബാധിക്കുന്നുണ്ട്.

ഏറ്റവും സുരക്ഷിതമായ ഒരു നിക്ഷേപകേന്ദ്രമാണ് ദുബായ്. ലോകമെമ്പാടുമുള്ളവർ ബിസിനസ്, പാർപ്പിട ആവശ്യങ്ങൾക്ക് റിയൽ എസ്റ്റേറ്റ് മേഖലയിൽ നടത്തുന്ന നിക്ഷേപങ്ങളിൽ അടിസ്ഥാനപ്പെടുത്തിയാണ് ദുബായ് മോഡൽ പടുത്തുയർത്തിയിരിക്കുന്നതും വികസിക്കുന്നതും. ആ ബിസിനസ് ആശയത്തെയും പ്രയോഗത്തെയുമാണ് കൃത്യമായും ഇറാൻ ലക്ഷ്യം വെച്ചിട്ടുള്ളത്. റിയൽ എസ്റ്റേറ്റ് മേഖലയിൽ ഡിമാന്റിലും വിലയിലും വൻ വീഴ്ചകൾക്ക് സാധ്യതയുണ്ട്. വീണ്ടെടുപ്പുകൾക്ക് വർഷങ്ങൾ വേണ്ടിവരും. ഇതിന്റെ ഫലം ദൂരവ്യാപകവും ബഹുതലസ്പർശിയും ആയിരിക്കും. അത് യാദൃച്ചികമല്ല. ഒരു യുദ്ധലക്‌ഷ്യം തന്നെയാണ്. തങ്ങളുടെ ബിസിനസ്‌ മോഡൽ കൈവരിച്ചിട്ടുള്ള image തകർന്നിട്ടില്ല എന്ന് ഉയർത്തിക്കാട്ടുവാൻ ലക്ഷ്യമിട്ടുകൊണ്ടാണ് ദുബായ് ആക്രമണങ്ങൾക്കിടയിലും വ്യോമഗതാഗതം പുനസ്ഥാപിക്കുന്നതും ജനങ്ങളുടെ സുരക്ഷയെ കുറിച്ച് ആവർത്തിച്ചു ഉറപ്പ് നൽകുന്നതും.

ഈ യുദ്ധം മേഖലയിലെ ജനങ്ങളെ എങ്ങനെയാണ് ബാധിക്കുക എന്നതും പ്രധാനമാണ്. ഓരോ ജനതയും ഇത്തരം അവസ്ഥകളെ വ്യത്യസ്ത രീതിയിലാണ് നേരിടുക.പൊതുവേ അറബ് വംശജരായ പൗരന്മാർ പ്രത്യേകിച്ചും ജി സി സി ഇതര രാജ്യങ്ങളിലെ അറബ് വംശജർ അസാധാരണമായ മന:സാന്നിധ്യത്തോടെയാണ് യുദ്ധത്തിനെ നേരിടുന്നത്. തങ്ങൾ കുട്ടികളായിരുന്നപ്പോഴും വിദ്യാർഥികൾ ആയിരുന്നപ്പോഴും യുവാക്കളായപ്പോഴും യുദ്ധത്തോടൊപ്പം ജീവിച്ചു എന്നതാണ് അവരുടെ അനുഭവപാഠം.എന്നാൽ പെട്ടെന്ന് ഭയത്തിന് കീഴടങ്ങുന്നവരാണ് പല ഏഷ്യൻ രാജ്യക്കാരും. എവിടെയെങ്കിലും ഒരു കലാപം ഉണ്ടാകുമ്പോൾ ആദ്യം സ്ഥലം വിടുന്നത് വെള്ളക്കാരാണ്. യൂറോപ്പിലെയും അമേരിക്കയിലെയും സർക്കാരുകളും ആവശ്യക്കാർക്ക് ഒഴിഞ്ഞു പോകാനുള്ള അവസരം ഒരുക്കുന്നുണ്ട്. ഏഷ്യൻ രാജ്യങ്ങളിലെ ധനവാന്മാരെ സംബന്ധിച്ചും ഏറെക്കുറെ ഇത് ശരിയാണ്. എന്നാൽ ബഹുഭൂരിപക്ഷം വരുന്ന ഇന്ത്യക്കാർ അടങ്ങുന്ന ഗൾഫ് കുടിയേറ്റക്കാർ അത്ര പെട്ടെന്നൊന്നും മേഖല വിട്ടു പോവുകയില്ല. സാഹചര്യങ്ങളുമായി പരമാവധി പൊരുത്തപ്പെട്ട് പിടിച്ചുനിൽക്കുവാൻ ജീവിതസാഹചര്യങ്ങൾ അവർക്ക് പ്രാപ്തി നൽകിയിരിക്കുന്നു. സമാധാനകാലത്തും വിദേശത്ത് പ്രതിസന്ധികൾ ഉണ്ടായാൽ അത് കഴിയുന്നത്ര നാട്ടിൽ അറിയിക്കാതെ കഴിച്ചുകൂട്ടുന്നവരാണ് ഇവർ. ഇപ്പോഴും അതുതന്നെയാണ് അവർ ചെയ്യുന്നത്. രാത്രിയും പകലുമെന്നില്ലാതെ മിസൈ ലുകളും ഡ്രോണുകളും അലർട്ടുകളും മുഴങ്ങുമ്പോൾ അവരുടെ സ്ഥൈര്യവും താങ്ങൽശേഷിയും പരീക്ഷിക്കപ്പെടുകയാണ്. വലിയ സ്ഥാപനങ്ങൾ ജീവനക്കാർക്ക് വേണ്ടി കൗൺസലിങ്ങും സാന്ത്വനസംവാദങ്ങളും നടത്തുമ്പോൾ ഈ സൗകര്യങ്ങളൊന്നും ലഭിക്കാത്തവരാണ് കുറച്ചുകൂടി താഴെക്കിടയിലുള്ള ഭൂരിപക്ഷം. തുടർച്ചയായി സ്ഫോടനങ്ങളും അലട്ടുകളും കേട്ട് ഉറക്കം നഷ്ടപ്പെട്ടവർ, ഉണർന്ന് കരയുന്ന കുട്ടികളുമായി പെടാപ്പാട് പെടുന്നവർ…അർധരാത്രിയിൽ പട്ടാളക്കാരുടെ മുട്ടുകേട്ട് വാതിൽ തുറക്കുകയും വാസസ്ഥലം വെടിഞ്ഞു അഭയകേന്ദ്രങ്ങളിലേക്ക് മാറ്റപ്പെടുകയും ചെയ്യുന്നവർ … ഒന്നും എളുപ്പമല്ല കാര്യങ്ങൾ അത്ര ലഘുതരവുമല്ല.

മറ്റു ഗൾഫ് രാജ്യങ്ങളെ അപേക്ഷിച്ച് ബഹറിനിൽ വ്യാപകമായ ആക്രമണങ്ങളും നാശനഷ്ടങ്ങളും ഉണ്ടായതായി റിപ്പോർട്ടുകളുണ്ട്. സുന്നികളുടെ ഭരണം നടക്കുന്ന രാജ്യത്ത് ആ വംശത്തിൽ പെട്ടവർ പ്രത്യേക ആനുകൂല്യങ്ങൾ അനുഭവിക്കുന്നവരും സമ്പന്നരുമാണ്. ഭൂരിപക്ഷം വരുന്ന ഷിയാക്കൾ പിന്നോക്കാവസ്ഥയിലുമാ ണ്. ബഹറിനിൽ ആക്രമണങ്ങളെ തുടർന്ന് വിവിധ ജനവിഭാഗങ്ങൾ പ്രകടനങ്ങൾ നടത്തി. ഇതും കാണിക്കുന്നത് സുനിശ്ചിതമായ ലക്ഷ്യങ്ങളോടെയാണ് ഇറാൻ നീങ്ങുന്നത് എന്നാണ്.

റഷ്യ ഇറാന് പിന്തുണ പ്രഖ്യാപിച്ചിട്ടുണ്ട്. ചൈന അമേരിക്കയുടെ ആക്രമണത്തിനെതിരെ നിലപാടെടുത്തിട്ടുണ്ട്. ഈ രണ്ടു വൻ ശക്തികളുടെ ഇറാൻ പിന്തുണ എത്രത്തോളം ഉണ്ടാകുമെന്ന് അറിയാനി രിക്കുന്നതേയുള്ളൂ.

മൂന്നുകൊല്ലങ്ങളായി തുടരുന്ന ഉക്രൈൻ- റഷ്യ യുദ്ധം യൂറോപ്പിന് പുറത്തു മറ്റ് രാജ്യങ്ങളെ കാര്യമായി നേരിട്ട് ബാധിച്ചിട്ടില്ല. പക്ഷേ ഗൾഫ് യുദ്ധത്തിന്റെ ആഘാതം വ്യത്യസ്തമായിരിക്കും. ഗൾഫിലെ എണ്ണസ്രോതസ്സുകളിൽ ആക്രമണം ഉണ്ടാവാനുള്ള സാധ്യത കണക്കിലെടുത്ത് ഉത്പാദനം നിർത്തിവയ്ക്കാൻ ഉള്ള തീരുമാനം പരിഗണനയിലാണ്. ലോകത്തിലെ ഏറ്റവും വലിയ പ്രകൃതി വാതക ഉൽപാദകരായ ഖത്തർ അതിന്റെ ഉൽപാദനം നിർത്തിവച്ചിരിക്കുന്നു. ഫലം ആഗോളമായി ഇന്ധനങ്ങളുടെ ദൗ ർലഭ്യവും വിലക്കയറ്റവും ആയിരിക്കും ഇപ്പോൾ തന്നെ 110 ഡോളറിൽ എത്തിയ എണ്ണ വില 150 വരെ ഉയരാം എന്ന് അധികൃതർ പ്രഖ്യാപിച്ചുകഴിഞ്ഞു. യൂറോപ്പിൽ ഇന്ധനവിലക്കയറ്റം പ്രാബല്യത്തിലായി.ഇന്ത്യയിലും പാചകവാതകത്തിന്റെ വില വർദ്ധിപ്പിച്ചു. പെട്രോളിയം ഉൽപ്പന്നങ്ങളുടെ വിലവർദ്ധനവ് എല്ലാ മേഖലയേയും ബാധിക്കും. ഇതിന്റെ പ്രത്യാഘാതങ്ങൾ ഗുരുതരം ആയിരിക്കും എന്ന് പറയേണ്ടതില്ലല്ലോ.അതു തന്നെയായിരിക്കണം ഇറാൻ ലക്ഷ്യമാക്കുന്നത്. മദ്ധ്യേഷ്യൻ സംഘർഷം ഒരാഗോള പ്രശ്നമാക്കുക, അതുവഴി ദീർഘകാലമായുള്ള അസ്ഥിരതയ്ക്കും അക്രമങ്ങൾക്കും അമേരിക്കൻ -ഇസ്രായേൽ സഖ്യത്തിന്റെ ഇടപെടലുകൾക്കും തങ്ങൾക്ക് സ്വീകാര്യമായ ഒരു തീരുമാനം ഉണ്ടാക്കാൻ ബന്ധപ്പെട്ട എല്ലാ കക്ഷികളുടെയും മേൽ സമ്മർദ്ദം ചെലുത്തുക. ഒരു ബി.ബി.സി ചർച്ചയിൽ യു. എൻ വക്താവ് പറഞ്ഞത് , യുദ്ധം ബാധിച്ച സർക്കാരുകൾ ഇപ്പോൾ ദിനം പ്രതി ഒരു ബില്യൺ ഡോളർ വരെ ചിലവഴിക്കുന്നുണ്ട് എന്നാണ്!

ഇറാനെ അടിയറവ് പറയിച്ചു ഇപ്പോഴത്തെ സർക്കാരിനെ നിലത്തിറ ക്കി പാവഭരണം സ്ഥാപിക്കാനുള്ള അമേരിക്കയുടെ ശ്രമം വിജയിക്കുമോ ?

അതോ ഗൾഫ് രാജ്യങ്ങൾ ഭിന്നതകൾ മാറ്റിവെച്ച് പ്രദേശത്തുള്ള ദീർഘകാല പ്രശ്നങ്ങൾക്ക് ശാശ്വത പരിഹാരം കാണാൻ ക്രിയാത്മകമായ പങ്കുവഹിക്കുമോ? ചൈന,റഷ്യ,നാറ്റോ പങ്കാളികൾ എന്നിവർ ലോകതാല്പര്യത്തിന് മുൻ‌തൂക്കം നൽകി ഇടപെടുമോ?

ലോകം ഒരു മൂന്നാം മഹായുദ്ധത്തിന്റെ വാതിൽക്കൽ എത്തുകയും സമാധാന സംഘടനകൾ മൃതപ്രായരാവുകയും അമേരിക്ക മാത്രം എന്ന് ഊറ്റം കൊള്ളുന്ന ഒരു പ്രസിഡന്റ് ആരാജ്യത്തിൽ ഭരണം തുടരുകയും തങ്ങളുടെതുമാത്രമായ ദൈവം അരുളിച്ചെയ്ത വാഗ്ദത്തഭൂമി സാക്ഷാത്കരിക്കാൻ ഇസ്രായേൽ കുതന്ത്രങ്ങൾ മെനയുകയും ചെയ്യുമ്പോൾ ഈ കാലം എന്താണ് നേടുക? നാളേയ്ക്ക് ബാക്കിവെയ്ക്കുക?

_{(സുഹൃത്തുക്കളിൽ നിന്നും പരിചയക്കാരിൽ നിന്നും ലഭിച്ച വിവരങ്ങളെ അടിസ്ഥാനമാക്കി തയ്യാറാക്കിയത്)}

_{കവര്‍: ജ്യോതിസ് പരവൂര്‍}