CINEMA

ലോകത്തെവിടെയായാലും സ്ത്രീകളുടെ കഥ പറയുമ്പോൾ ഒരേ ഭാഷയായിരിക്കും. അവരുടെ ദൃശ്യാവിഷ്കാരത്തിന് ഒരേ നിറവുമായിരിക്കും. നിസ്സഹായത , പീഡനം, സ്വാതന്ത്ര്യമില്ലായ്മ, അവഗണന… അങ്ങനെ കുറേ ദുരിതക്കടലുകൾ നീന്തിയ കഥ പറയാനുണ്ടാവും അതിജീവിച്ച പെൺ മനസ്സുകൾക്ക്. ഹിന്ദി, പേർഷ്യൻ , പോളിഷ്, ഗുജറാത്തി എന്നീ ഭാഷകളിലെ നാലു സ്ത്രീപക്ഷ സിനിമകൾ കണ്ട് നോക്കാം. അവരുടെ ജീവിതം കാണാം….

1 പാർച്ചെഡ് (2016) സംവിധാനം : ലീന യാദവ് ഭാഷ : ഹിന്ദി

ലീന യാദവ് , എഴുതി സംവിധാനം ചെയ്ത പാർച്ചെഡ് എന്ന സിനിമ വരണ്ട ഒരു ഗ്രാമത്തിൽ ജീവിതം കുടുങ്ങിപ്പോയ നാല് സ്ത്രീകളുടെ കഥ പറയുന്നു. അവരെ പരിചയപ്പെടാം

ബിജ്ലി:

ശരീരം സംഗീതമാക്കി കാമുകന്മാരുടെ ഹൃദയത്തിൽ നൃത്തമാടുന്നവൾ. അടുത്ത സുഹൃത്തുക്കളായ ലജ്ജോവിനും റാണിക്കും വേണ്ടി സ്വാതന്ത്ര്യത്തിലേക്ക് വഴി വെട്ടി കൊടുക്കുന്നതവളാണ്. അവരിലൂടെ തന്നെ സ്വതന്ത്രയാവുകയും ചെയ്യുന്നു.

റാണി:

35 വയസുള്ള വിധവ . 19 വയസുള്ള ഗുലാബിൻ്റെ അമ്മ. മകനു വേണ്ടി കല്യാണം ഉറപ്പിച്ച് മഹർ നൽകുന്നതിനായി സ്വന്തം വീടു തന്നെ പണയപ്പെടുത്തേണ്ടി വന്നു. ഭർത്താവിൻ്റെ പീഡന വൈകൃതങ്ങൾ സ്വന്തം മകനിലേക്ക് പകർന്നു കിട്ടിയതു കണ്ട് തകർന്നു പോകുകയും മരുമകളെ ഇഷ്ടമുള്ള ജീവിതത്തിലേക്ക് അനുഗ്രഹത്തോടെ പറഞ്ഞയക്കാൻ മനസ്സു കാണിക്കുകയും ചെയ്ത അമ്മ യൗവ്വനം കൊഴിഞ്ഞുപോകുകയാണെന്ന് ആകുലപ്പെടുകയും ഒരു മൊബൈൽ പ്രണയത്തിലൂടെ കാമുകിയാവുകയും ചെയ്യുന്നു.

ലജ്ജോ :

ഭർത്താവിനാൽ കൊടിയ പീഡനത്തിലുടെ കടന്നുപോകുമ്പോഴും പാറി നടന്നു ലസിക്കുന്ന ഒരു വർണ തുമ്പി. മുറിപ്പെടുന്ന ദിവസങ്ങളിൽ റാണിയാണ് അവൾക്ക് ആശ്വാസമേകുന്നത്. താൻ മച്ചിയാണെന്ന് വിശ്വസിച്ചിരുന്ന അവൾ ബിജ്ലിയുടെ ഉപദേശത്താൽ മറ്റൊരാളുമായി ശരീരം പങ്കുവെക്കുന്ന നിമിഷങ്ങളിൽ ആദ്യമായി സ്വന്തം ശരീരത്തിന്റെ മാന്ത്രികത തിരിച്ചറിയുന്നു. ആ സംഗമത്തിന്റെ ആനന്ദത്തെ അവളുടെ കണ്ണുകളിൽ നമുക്ക് കാണാം. ഭർത്താവിനോട് താൻ ഗർഭിണിയാണെന്നറിയിക്കുന്ന നിമിഷം അയാളിൽ നിന്നും അവൾക്ക് ക്രൂരമായ മർദ്ദനം ഏൽക്കേണ്ടി വരുന്നു. തൻ്റെ വയറ്റിലുള്ളത് മറ്റൊരാളുടെ കുഞ്ഞാണെന്ന് തുറന്നു പറയാനുള്ള ആർജ്ജവം അവൾ കാണിക്കുന്നുണ്ട്.

ജാനകി:

റാണിയുടെ 15 വയസു മാത്രം പ്രായമുള്ള മരുമകൾ . മഹർ കൊടുക്കാനുള്ള സ്വത്തില്ലാത്തതിനാൽ പ്രണയം നഷ്ടപ്പെട്ട കൗമാരക്കാരി. കല്യാണം മുടക്കാൻ വേണ്ടി മുടി മുറിക്കുന്നു. കല്യാണത്തിൻ്റെ ആദ്യ ദിവസങ്ങളിൽ ഭർത്താവിനാൽ ചവിട്ടിയരക്കപ്പെട്ട അവളെ റാണിയും മുറിപ്പെടുത്തുന്നുണ്ട് . അവസാനം തൻ്റെയൊരു പ്രതിരൂപമായി കാണുന്ന ജാനകിയെ റാണി സ്വന്തം മകളെ പോലെ ഇഷ്ടമുള്ളയാളുടെ കൂടെ പറഞ്ഞയക്കുന്നു.

ഉള്ളിൽ തൊടുന്ന വൈകാരിക മുഹൂർത്തങ്ങളാൽ സമ്പന്നമാണ് ഈ ചലച്ചിത്രം. തീവ്ര സൗഹൃദങ്ങൾ ഏതു മുറിവിനേയും സുഖപ്പെടുത്തുമെന്നും ഏതു പ്രശ്നത്തിനും അവരിലൂടെ പരിഹാരം കാണാമെന്നും അവർ തിരിച്ചറിയുന്നു. ‘പുല്ലിംഗതെറിക’ളിലൂടെ ആൺമേൽകോയ്മയെ അവർ പ്രതിരോധിക്കുന്നുണ്ട്. ഇവരുടെ ജീവിതത്തിലൂടെ ആ ഗ്രാമത്തിലെ സാമൂഹിക പശ്ചാത്തലം മനസിലാക്കാം. അതിൽ ബാലവിവാഹമുണ്ട്, ഭർതൃവീട്ടുകാരാൽ പീഡിക്കപ്പെട്ട് സ്വന്തം ഗ്രാമത്തിൽ അന്യരാക്കപ്പെട്ട് ഏതെല്ലാമോ വിധത്തിൽ കൊഴിഞ്ഞു പോകുന്ന ചമ്പമാരുണ്ട് , ലൈംഗിക സുഖത്തിനു വേണ്ടി മാതൃസ്ഥാനത്തുള്ള ബിജ്ലിയെ തേടി പോകുന്ന ഗുലാബുമാരുണ്ട് , മകൻ്റെ ധൂർത്തിനു വേണ്ടി വീടുവിൽക്കേണ്ടി വരുന്ന റാണിമാരുണ്ട്, കുട്ടികളില്ലാത്തത് തൻ്റെ മാത്രം കുറ്റമാണെന്ന് കരുതി ഭർത്താവിനാൽ പീഡിപ്പിക്കപ്പെട്ടു കഴിയുന്ന ലജ്ജോമാരുണ്ട് ഇവരെ രക്ഷിക്കാൻ ഒരു കിഷനോ അവരുടെ ഭാര്യക്കോ സാധിക്കുകയില്ല. സ്വയം തിരിച്ചറിവിലൂടെ സ്വതന്ത്രരാക്കപ്പെടുകയേ നിവൃത്തിയുള്ളൂ. അങ്ങിനെ സ്വതന്ത്രരാക്കപ്പെട്ടവർ കടന്നു പോയ മുള്ളുവേലികളിൽ കുരുങ്ങിയ ചേലത്തുമ്പുകൾക്കൊക്കെ കുറേ കഥകൾ പറയാനുണ്ടാവും. … ചോരയും കണ്ണീരും വേദനകളും , ഉണങ്ങാത്ത മുറിവുകൾ തീർത്ത വ്രണങ്ങളും പറഞ്ഞു തന്ന കഥകൾ ….

2 .The Patience stone. സംവിധാനം : Atiq Rahimi ഭാഷ പേർഷ്യൻ

യുദ്ധക്കെടുതിയാൽ വികൃതമാക്കപ്പെട്ട ഒരു പട്ടണത്തിൽ കഴിയുന്ന ഒരു യുവതി. അവൾക്ക് കഴുത്തിൽ വെടിയുണ്ടയേറ്റ് കോമയിലായ ഭർത്താവിനെ പരിചരിക്കേണ്ടതുണ്ട്. രണ്ടു മക്കളെ പോറ്റേണ്ടതുണ്ട്. വെടിയുണ്ടകളിൽ നിന്ന് ഭർത്താവിനേയും മക്കളെയും സംരക്ഷിക്കേണ്ടതുണ്ട്. യുദ്ധഭീതിയിൽ ബന്ധുക്കളെല്ലാം പലായനം ചെയ്തിട്ടും ഭർത്താവിൻ്റെ ജീവിതത്തിലേക്കുള്ള തിരിച്ചുവരവ് പ്രതീക്ഷിച്ച് എപ്പോൾ വേണമെങ്കിലും തകർക്കപ്പെടാവുന്ന വീട്ടിൽ കഴിയുകയാണ്. ദാരിദ്ര്യത്തിലും ഭീതിയിലും ഏകാന്തതയിലും കഴിയുന്ന അവൾക്ക് ആകെ ആശ്രയിക്കാനുള്ള ബന്ധു അവളുടെ അമ്മായി ആണ് . അമ്മായിയാണ് അവർക്ക് ‘ക്ഷമയുടെ ശില ‘യെ പറ്റി പറഞ്ഞു കൊടുക്കുന്നത്.
” നിൻ്റെ സഹനങ്ങളെ പറ്റി, മറ്റൊരാളോടും വെളിപ്പെടുത്താത്ത രഹസ്യങ്ങളെ പറ്റി ശിലയോടു പറയുക ; ശില എല്ലാം കേൾക്കും സഹിക്കാൻ പറ്റാതെയാവുമ്പോൾ ഒരുനാൾ ശില പിളരും. നീ സ്വതന്ത്രയാവും “

അവളയാളെ ശിലയായ് കണ്ടു നിരന്തരം സംസാരിച്ചു. പത്തു വർഷത്തെ ദാമ്പത്യത്തിൽ അവളൊരിക്കലും ചുംബിച്ചിട്ടില്ലാത്ത, അവൾക്കിഷ്ടമുള്ള രീതിയിൽ ഒരിക്കലും ഇണചേർന്നിട്ടില്ലാത്ത, വെറും മാംസപിണ്ഡമായി മാത്രം തന്നെ കാണുന്ന, പ്രണയിക്കാനറിയാത്തതുകൊണ്ട് യോദ്ധാവായി മാറിയ അയാളോട് …. അവൾ പറഞ്ഞതോ അയാൾക്കറിയാത്ത അവളെ പറ്റി, അവളനുഭവിച്ച വേദനകൾ ,ചൂഷണങ്ങൾ, നിസ്സഹായതകൾ ,പ്രതീക്ഷകൾ എല്ലാം തുറന്നു വച്ചു ; ഒടുവിലാ രഹസ്യവും…. Golshifteh Farahani യുടെ ഒറ്റയാൾ പ്രകടനത്തിലൂടെ മനോഹരമാക്കിയ ഈ സിനിമയുടെ കഥ ഇതേ പേരിലുള്ള നോവലിൽ നിന്നാണ് .

3 Ida 2013 . സംവിധാനം : Pawel Pawlikowski ഭാഷ : പോളിഷ്

കന്യാസ്ത്രീയാവുന്നതിന് തൊട്ടു മുൻപുള്ള, പ്രതിജ്ഞാ ചടങ്ങിന് ദിവസങ്ങൾക്ക് മുൻപ് അന്നയോട് മഠത്തിലെ മദർ ഒരു രഹസ്യം പറയുന്നു.

“നിനക്ക് Wanda എന്ന ഒരമ്മായിയുണ്ട്, ജീവിച്ചിരിക്കുന്ന ഒരേയൊരു ബന്ധു . പ്രതിജ്ഞാ ചടങ്ങിന് മുന്നെ നീ അവരെ കണ്ടു വരണം”

മദറിൻ്റെ നിർബന്ധത്തിന് വഴങ്ങി അമ്മയുടെ സഹോദരിയായ Wanda യുടെ വീട്ടിലെത്തുകയാണ് Anna.
“നീയൊരു ജൂത കന്യാസ്ത്രീയാണല്ലേ .?..”എന്ന Wanda യുടെ ചോദ്യത്തിന് പ്രതികരണമായി ആകാംക്ഷയോടെ നോക്കിയ നോട്ടത്തിന് അവൾക്ക് കുറേ തിരിച്ചറിവുകൾ ലഭിച്ചു. അതിലൊന്നാണ് Ida എന്ന പേര് . തൻ്റെ സ്വഭാവത്തിന് വിപരീത സ്വഭാവമുള്ള (wanda യുടെ ഭാഷയിൽ “I ‘m slut and you’re a little saint”) Wanda യോടൊപ്പം Ida ഒരു ലക്ഷ്യത്തിനായി യാത്ര തിരിക്കുന്നു. തൻ്റെ മാതാപിതാക്കളെ അടക്കം ചെയ്ത കുഴിമാടം കണ്ടുപിടിക്കുക ;അതായിരുന്നു അവളുടെ ലക്ഷ്യം.തൻ്റെ ലക്ഷ്യം പൂർത്തിയാക്കി മഠത്തിലെ താളങ്ങളിലേക്ക് മടങ്ങിപ്പോയ Ida ക്ക് വീണ്ടും തിരിച്ചുവരേണ്ടി വന്നു. അന്നു പക്ഷേ Wanda കാത്തിരിക്കുന്നുണ്ടായിരുന്നില്ല. ഒറ്റപ്പെടലിൻ്റെ തീവ്രവേദനയിൽ Wanda അതിനു മുൻപേ ഒരു കാറ്റൊഴിഞ്ഞു പോകും പോലെ പറന്നു പോയിരുന്നു. കന്യാസ്ത്രീ മഠത്തിൽ അനാഥയായി വളർന്ന് അന്നേ വരെ ഒരേ വഴിയിൽ കൂടി സഞ്ചരിച്ചിട്ടുള്ള Ida ,Wanda യുടെ വീട്ടിലെ സ്വാതന്ത്ര്യത്തിൽ വഴിമാറി സഞ്ചരിച്ചു നോക്കുന്നു .ആ സഞ്ചാരം ഒരു വഴി തെറ്റലായി Ida കാണുന്നുണ്ടോയെന്ന ചോദ്യം പ്രേക്ഷകർക്കുള്ളിൽ ഉയർത്തിയാണ് സിനിമ അവസാനിക്കുന്നത്. Pawel Paulikowski എന്ന സംവിധായകൻ Black & white ൽ വരച്ച ഈ സിനിമയുടെ ദൃശ്യഭംഗിയാണ് ഇതിനെ മികവുറ്റതാക്കുന്നത് . Agata Trzebuchowska (lda), Agata kulesza(Wanda) എന്നിവരാണ് മുഖ്യ കഥാപാത്രങ്ങളായി വരുന്നത്.

4 Hellaro . സംവിധാനം അഭിഷേക് ഷാ ഭാഷ :ഗുജറാത്തി .

ഒരു നാടോടിക്കഥ. അഭിഷേക് ഷാ അതിനെ ഒരു സിനിമയാക്കി മാറ്റി – ത്രിഭുവൻ സാബു സദിനേനിയുടെ ഛായാഗ്രഹണത്തിലൂടെ മനോഹരമായ ഒരു ദ്യശ്യവിരുന്നാക്കി ‘ഹെല്ലാറോ’. ഗുജറാത്തിലെ കച്ചിലെ ഏതോ ഉൾനാട്ടിൽ നടന്ന കഥ. പുരുഷ മേൽകോയ്മയുടെയും, ജാതി വ്യവസ്ഥയുടെയും , അടിച്ചമർത്തപ്പെട്ട സ്ത്രീ സമൂഹത്തിൻ്റെയും, പ്രകൃതി ദുരന്തത്തിൻ്റെയും, അനാചാരങ്ങളുടെയും അനേകമനേകം വിഷയങ്ങളിലൂടെ കടന്നുപോകുന്ന ചിത്രം . കാലങ്ങളായുള്ള അടിച്ചമർത്തലിൽ ഒരേ പോലെ ചിന്തിക്കുന്ന കുറേ സ്ത്രീകൾ ; അവരുടെ ഇടയിലേക്ക് വരുന്ന ഏഴാം ക്ലാസ് വരെ പഠിച്ച മഞ്ജരി . സ്ത്രീകൾക്ക് ചിത്രത്തുന്നലിനും ഗർഭ നൃത്തത്തിനും വിലക്കേർപ്പെടുത്തിയിട്ടുള്ള ആ നാട്ടിൽ ജീവിക്കണമെങ്കിൽ സ്വയം ചിറകരിഞ്ഞു കളഞ്ഞേക്കാൻ മുന്നറിയിപ്പു നൽകുന്ന ഭർത്താവ്. മഴ അനുഗ്രഹിച്ചിട്ടില്ലാത്ത ആ നാട്ടിൽ കുടങ്ങൾ തലയിലേന്തി വെള്ളത്തിനു വേണ്ടി കിലോമീറ്ററുകളോളം നടന്നു പോകുന്ന ഒരു കൂട്ടം സ്ത്രീകളിലൊരാളായി മഞ്ജരിയുമെത്തുന്നു. വഴിയിൽ തളർന്നു കിടക്കുന്നയാളുടെ ജീവൻ രക്ഷിക്കാൻ വെള്ളം കൊടുക്കാനുള്ള ധൈര്യം അവൾക്കേയുണ്ടായിരുന്നുള്ളൂ. അതിനു പ്രതിഫലമായി അയാൾ കൊട്ടിയ ഡോലക്കിൻ്റെ ഈണത്തിന് ചുവടുവക്കുന്നതിലൂടെ അവരുടെ അരിഞ്ഞ ചിറകുകൾക്ക് പകരം പുതിയ ചിറക് മുളക്കുന്നു .ഒരുമിച്ച് പറന്ന് അവരൊരു ശക്തി പ്രവാഹമായി മാറുമ്പോൾ അതിന് കൂട്ടായി പ്രകൃതിയും ഉണരുന്നു. സിനിമ സ്ക്രീനിൽ അവസാനിക്കുമ്പോഴും അവർ പ്രേക്ഷകന്റെയുളളിൽ ഗർഭനൃത്തം തുടർന്നുകൊണ്ടേയിരുന്നു . ഒരേ ചുവടുമായി താളത്തിനൊപ്പം നൃത്തം ചെയ്യുമ്പോൾ നമ്മളും അതിനൊപ്പം ചേരുകയാണ്. കഴുത്തിലും കയ്യിലും പച്ചകുത്തി വർണ്ണാഭമായ ദുപ്പട്ടയിൽ എന്തൊരു സൗന്ദര്യമാണ് ഓരോരുത്തർക്കും സിനിമ കണ്ട് ഉറങ്ങി പോയ രാത്രിയിൽ ഞാൻ കണ്ട സ്വപ്നം മഴയുടെ നനവിൽ ഗർഭനൃത്തം കളിക്കുന്ന എന്നെയായിരുന്നു!!

കവർ ഡിസൈൻ : വിത്സൺ ശാരദ ആനന്ദ്

തലമുറകള്‍ കൈമാറി താഴേയ്ക്കു വരുന്ന കഥകള്‍ ഓരോ പുതുജന്മങ്ങള്‍ക്കും വിസ്മയങ്ങളാണുണ്ടാക്കുന്നത്. മദ്ധ്യ-തെക്കന്‍ തിരുവിതാം‌കൂറില്‍ നിന്നു വയനാടിനും ചുറ്റുവട്ടങ്ങളിലേയ്ക്കും കുടിയേറിയവര്‍ക്ക് കഥകളുടെ ക്ഷണനേരത്തേയ്ക്കുള്ള വെടിവട്ടങ്ങള്‍ മാത്രമായിരുന്നു പണിത്തിരക്കുകള്‍ക്കിടയില്‍ ആശ്വാസം പകര്‍ന്നിരുന്നത്. മാനസികോല്ലാസങ്ങള്‍ക്ക് ഇടവേളകള്‍ കൊടുക്കാനില്ലാത്തത്ര തിരക്കില്‍ അവര്‍ പണിയെടുത്തുകയറുകയായിരുന്നു. ഒരുവശത്ത് കൊടും കാടുകളില്‍ നിന്നിറങ്ങിവരുന്ന മൃഗങ്ങളുണ്ടാക്കുന്ന ഭീതിയും കൃഷിനാശങ്ങളും. മറുവശത്ത് പൂജ്യങ്ങളില്‍ നിന്നാരംഭിച്ച ജീവിതങ്ങള്‍ക്ക് താങ്ങും തണലും നല്‍കി പച്ചപിടിപ്പിക്കാനുള്ള നെട്ടോട്ടങ്ങള്‍. അതിനിടയില്‍ അവര്‍ നന്മകള്‍ പരസ്പരം പങ്കുവച്ചു. അറിഞ്ഞും അറിയാതെയുമായി അസൂയയും പകയും ആ നന്മകള്‍ക്കിടയിലേയ്ക്ക് നുഴഞ്ഞുകയറി. കൂട്ടായ്‌മകളിലേയ്ക്കും പ്രണയങ്ങളിലേയ്ക്കും അവ വിഷം കലര്‍ത്തി. ശീതയുദ്ധങ്ങള്‍ ഒഴിയാതെ നിലകൊണ്ടു. അങ്ങനെ വല്യമ്മച്ചി പറഞ്ഞ പഴയകാലാനുഭവകഥകളില്‍ നിന്നു വീണുകിട്ടിയ മുത്തുകളെ സ്വാനുഭവങ്ങളുടെ പരുക്കന്‍ നൂലുകളിലേയ്ക്ക് കോര്‍ത്തെടുത്തുണ്ടാക്കിയ കഥയെ ലോകമെമ്പാടുമുള്ള ഇന്ത്യക്കാര്‍ നെഞ്ചിലേറ്റാന്‍ പോവുകയാണ്‌, പക എന്ന ചലച്ചിത്രത്തിലൂടെ നിതിന്‍ ലൂക്കോസ് എന്ന വയനാടുകാരന്‍.

‘പക’ (River of Blood) സെപ്‌റ്റംബര്‍ 9 മുതല്‍ 18 വരെ ടൊറോന്‍റോയില്‍ നടക്കുന്ന രാജ്യാന്തരചലച്ചിത്രമേള (TIFF) യില്‍, ഇതുവരെ പുറത്തുവന്ന പേരുകളിലെ ഒരേയൊരു ഇന്ത്യന്‍ ചലച്ചിത്രമാണ്‌. ചിത്രത്തിന്‍റെ ആഗോളപ്രദര്‍ശനോദ്ഘാടനം ടൊറോന്‍റോയിലാണ്‌ നടക്കുന്നത്. കോവിഡ് 19 മൂലം രാജ്യത്ത് നിലവിലുള്ള നിയമങ്ങളനുസരിച്ചാണ്‌ ചലച്ചിത്രോത്സവം ചിട്ടപ്പെടുത്തിയിട്ടുള്ളത്. നാനൂറോടടുത്ത് ചിത്രങ്ങള്‍ പ്രദര്‍ശിപ്പിക്കാറുള്ള മേളയില്‍ ഇക്കുറി നൂറോളം ചിത്രങ്ങളേയുള്ളു. മുപ്പത്തഞ്ചോളം തീയേറ്ററുകളിലായി നടക്കാറുള്ള ചിത്രപ്രദര്‍ശനങ്ങള്‍ ഇരുപതോളം വേദികളിലും ബാക്കി ഡിജിറ്റല്‍ പ്ലാറ്റ്‌ഫോമുകളിലായുമാണ്‌ നടക്കുന്നത്. സിനിമാപ്രവര്‍ത്തകരും മാധ്യമപ്രതിനിധികളും ഏറിയ പങ്കും ഡിജിറ്റല്‍ പ്ലാറ്റ്‌ഫോമുകളിലാവും മേളയിലെ ചിത്രങ്ങള്‍ കാണുന്നത്. ചര്‍ച്ചകളും അഭിമുഖങ്ങളും അങ്ങനെതന്നെയാവും ജനങ്ങളിലേയ്‌ക്കെത്തുന്നത്.

പൂനെയിലെ ഫിലിം ആന്‍റ് ടെലിവിഷന്‍ ഇന്‍സ്റ്റിട്യൂട്ടില്‍ നിന്ന് ശബ്ദസന്നിവേശത്തില്‍ ഉപരിപഠനം പൂര്‍ത്തിയാക്കിയ നിതിന്‍ ലൂക്കോസ് ഇതിനകം ഇരുപതിലധികം ചിത്രങ്ങളുടെ ശബ്ദസം‌വിധാനം നിര്‍‌വ്വഹിച്ചിട്ടുണ്ട്. അദ്ദേഹം സം‌വിധാനം ചെയ്യുന്ന ആദ്യകഥാചിത്രമാണ്‌ ‘പക’. ചിത്രനിര്‍മ്മാണത്തില്‍ ഇന്‍സ്റ്റിട്യൂട്ടില്‍ കൂടെപഠിച്ചവരും മുന്‍‌ഗാമികളുമായി വളരെപ്പേര്‍ പങ്കാളികളായിട്ടുണ്ട്. ഫൈസല്‍ അഹമ്മദ് സംഗീതസം‌വിധാനമൊരുക്കിയ ‘പക’യുടെ ഛായാഗ്രഹണം ഹൈദരാബാദുകാരനായ ശ്രീകാന്ത് കാബോത്തിന്‍റേതാണ്‌. ജോബിന്‍ ജയനും, അരവിന്ദ് സുന്ദറും, പ്രമോദ് സുന്ദറും ചേര്‍ന്നാണ്‌ പകയുടെ ശബ്ദസന്നിവേശം നിര്‍‌വ്വഹിച്ചിരിക്കുന്നത്. ദില്ലിക്കാരിയും മലയാളിയുമായ അരുണിമ ശങ്കറാണ്‌ ചിത്രത്തിന്‍റെ എഡിറ്റര്‍. അഖില്‍ രവി പദ്‌മിനിയാണ്‌ പ്രൊഡക്‌ഷന്‍ ഡിസൈനര്‍. ചലച്ചിത്രാഭിനയത്തില്‍ ഉപരിപഠനം നടത്തിയ സൂരജ് തിരഞ്ഞെടുക്കപ്പെട്ട അഭിനേതാക്കള്‍ക്കായി അഭിനയക്കളരി ഒരുക്കിയിരുന്നു. മാനന്തവാടിയിലും സമീപപ്രദേശമായ അയിലമൂലയിലുമായി 35 ദിവസത്തെ ചിത്രീകരണമാണ്‌ നടന്നത്.

‘പക’ ദേശീയചലച്ചിത്രവികസന കോര്‍പ്പറേഷന്‍റെ (NFDC) ഫിലിം ബസാര്‍ ലാബ് 2020 ല്‍ നടത്തിയ മത്സരത്തില്‍ ഒന്നാം സ്ഥാനം നേടിയിരുന്നു. ചിത്രത്തിന്‍റെ പ്രാഥമികപതിപ്പ് കണ്ടതോടെ ബോളിവുഡ് സം‌വിധായകനും നിര്‍മ്മാതാവുമായ അനുരാഗ് കാശ്യപ് നിര്‍മ്മാണപങ്കാളിയാകാന്‍ താല്‍‌പര്യം പ്രകടിപ്പിച്ചു. നിതിന്‍ തന്നെ ശബ്ദസന്നിവേശം നടത്തിയ ‘മല്ലേശം’ എന്ന തെലുങ്ക് ചിത്രത്തിന്‍റെ സം‌വിധായകനായ രാജ് രാച്ചക്കൊണ്ടയാണ്‌ ‘പക’യുടെ മുഖ്യനിര്‍മ്മാതാവ്. അനുരാഗ് കാശ്യപിന്‍റെ, ഭാഷയ്‌ക്കതീതമായി നല്ല സിനിമയ്ക്കായുള്ള അന്വേഷണങ്ങളാണ്‌ ‘പക’യിലേയ്ക്ക് എത്തിച്ചേരുന്നതിനും ടൊറോന്‍റോ മേളയിലേയ്‌ക്കെത്തിക്കുന്നതിനും സഹായകമായത്.

‘എബി’യിലും ‘ലൂക്ക’യിലുമൊക്കെ അഭിനയിച്ച് ‘ഒറ്റമുറിവെളിച്ച’ത്തിലൂടെ സംസ്ഥാനപുരസ്ക്കാരം നേടിയ വിനീത കോശിയെപ്പോലെ അപൂര്‍‌വ്വം ചിലരേ ഈ ചിത്രത്തില്‍ സിനിമാലോകത്തിനു കുറച്ചെങ്കിലും പരിചിതരായുള്ളു. നാട്ടുകാരും സുഹൃത്തുക്കളുമായ ബേസില്‍ പൗലോസ്, നിതിന്‍ ജോര്‍ജ്, ജോസ് കിഴക്കന്‍, അതുല്‍ ജോണ്‍, ജോണ്‍ മണിക്കല്‍ എന്നിവരാണ്‌ മറ്റു പ്രധാനവേഷങ്ങള്‍ ചെയ്തിരിക്കുന്നത്.

വയനാടന്‍ ജീവിതത്തെക്കുറിച്ച് വന്ന ചലച്ചിത്രകഥകളില്‍ കൂടുതലും അവിടുത്തെ ആദിമനിവാസികളെക്കുറിച്ചുള്ളതായിരുന്നു. ‘പക’ അതിനൊരു അപവാദമായി മാറുകയാണ്‌. അങ്ങനെ അനേകം നിഗൂഢതകള്‍ ഒളിപ്പിച്ചൊഴുകുന്ന ഒരപ്പ് പുഴയും പരിസരപ്രദേശങ്ങളും വയനാടന്‍‌ജീവിതവും ആഗോളവ്യാപകമായി പരസ്യപ്പെടാന്‍ പോകുകയാണ്‌, പക എന്ന ചിത്രത്തിലൂടെ. മലയാളികള്‍ക്ക്, പ്രത്യേകിച്ചും വയനാട്ടുകാര്‍ക്ക് അഭിമാനാര്‍ഹമായ ഒരു ആവിഷ്ക്കാരമായിരിക്കും ഈ ചിത്രം എന്നുള്ളതിന്‍റെ മുന്‍‌കൂര്‍ തെളിവാണ്‌ ടൊറോന്‍റോ പോലെയുള്ള ചലച്ചിത്രമേളയിലേയ്ക്കുള്ള ഈ ചിത്രത്തിന്‍റെ യാത്ര. നവാഗതസം‌വിധായകര്‍ക്കുള്ള ‘ഡിസ്‌ക്കവറി വിഭാഗ’ത്തിലാണ്‌ ‘പക’ പ്രദര്‍ശിപ്പിക്കപ്പെടുന്നത്. സം‌വിധായകരുടെ ആദ്യത്തെയോ രണ്ടാമത്തെയോ ചിത്രങ്ങള്‍ മാത്രമേ ഈ വിഭാഗത്തില്‍ പരിഗണിക്കപ്പെടുകയുള്ളൂ.

കോവിഡ് 19 നിലവിലുള്ളതിനാല്‍ കാനഡയിലെ ഒന്‍‌ടേറിയോ പ്രവിശ്യയില്‍ നിലവിലുള്ള നിബന്ധനകള്‍ പാലിച്ചാവും സെപ്റ്റംബര്‍ 9 മുതല്‍ 18 വരെ ചലച്ചിത്രോത്സവം സംഘടിപ്പിക്കപ്പെടുന്നത്.

പോസ്റ്റർ ഡിസൈൻ : വിൽസൺ ശാരദ ആനന്ദ്

”അതേയ്, ചേട്ടായ്യേ… ഈ ഒട്ടുപാലിനുണ്ടായവന്‍ എന്നു വെച്ചാ എന്നാ?”

പാതിരാത്രിക്ക്… ശരിക്കും പറഞ്ഞാ രാവിലെ എന്‍റെ കനേഡിയന്‍ സമയം 2.14 ന്‌ ഒരുത്തന്‍ മീനച്ചിലാറിന്‍റെ തീരത്തുള്ള അരുവിത്തുറേലെ റബര്‍ത്തോട്ടത്തിനു നടുക്കുള്ള വീട്ടീന്ന് എന്നെ വിളിച്ചുചോദിക്കുന്ന ചോദ്യമാണിത്‌.

എനിക്ക് ദേഷ്യം വന്നു : ”പോടാ വെച്ചിട്ട്. നിന്നോടു ഞാന്‍ പലവട്ടം പറഞ്ഞിട്ടുണ്ട്, ഈ സമയത്ത് വിളിക്കരുതെന്ന്‌.”

അവന്‍ : സോറി, ചേട്ടായീ… ഞാനേ.. അറിയാതെ. അവിടിപ്പം പാതിരാത്രിയാ അല്ലേ? ഇവിടെയിപ്പം പകലു പതിനൊന്നേമുക്കാലാ. ന്നാപ്പിന്നെ ഞാന്‍ വെച്ചിട്ട് പിന്നെ വിളിക്കാം കേട്ടോ?”

ഞാന്‍ : ”പിന്നെ വിളിക്കാന്നു നീ പറഞ്ഞാ, നാളെ നീ എന്‍റെ രാത്രി മൂന്നുമണിക്കുവിളിക്കും. പിന്നേം എന്‍റെ ഒറക്കം കളയും. ഇപ്പത്തന്നെ പറഞ്ഞു തൊലയ്ക്ക്. ന്തായാലും ന്‍റെ ഒറക്കം കളഞ്ഞു, നോബീ.”

നോബി എന്ന അവന്‍ : ”ഒരു സംശയാരുന്നേ…. ഈ ഒട്ടുപാലിനുണ്ടായ…”

ഞാന്‍ : ”അപ്പം നീ ജോജി കണ്ടൂല്ലേ?”

നോബി : ”കണ്ടു. എനിക്ക് പയങ്കര ഇഷ്ടായി. നമ്മടെ വീടുകളിലൊക്കെ കാണണ പോലെ….. സമേം കളയാതെ ഓനക്കുട്ടന്‍ചേട്ടായി അതൊന്നു പറഞ്ഞുതന്നേ….”

ഞാന്‍ : ”ഇപ്പം, നിന്നെ ഞാന്‍ വിളിക്കേണ്ടത് ആ പേരാ. അവടെ ആരേം കണ്ടില്ലേടാ ഇതിന്‍റെ അര്‍ത്ഥം ചോദിക്കാന്‍? നിന്‍റെ അപ്പനോട് ചോദിച്ചോ? അപ്പന്‍ നിന്‍റെ ബെസ്റ്റ് ഫ്രെണ്ടാന്നാണല്ലോ എന്നോടു പറഞ്ഞേക്കണെ.”

നോബി: ”ഞാന്‍ അപ്പനോടാ ആദ്യം ചോദിച്ചത്. എന്നെ ഓടിച്ചു. തല്ലീല്ലെന്നേയൊള്ളു.”

ഞാന്‍ : ”എടാ നോബീ… നിന്‍റെ അപ്പന്‍റെ അനിയന്‍റെ പ്രായേ എനിക്കുള്ളൂ. രണ്ടുവര്‍ഷത്തെ വെത്യാസം. എന്നിട്ടും അവന്‍റെയൊരു ചേട്ടായി വിളി. നീ കൂട്ടുകാരെയാരേം വിളിച്ചില്ലേ?”

നോബി : ”ഓ എനിക്കത്ര കൂട്ടുകാരൊന്നും ഇല്ലെന്നേ. ഒന്നുരണ്ടുപേരോടൊക്കെ ചോദിച്ചു. ഓ അവമ്മാര്‍ക്കൊന്നും അറിയാമ്മേല.”

ഞാന്‍ : ”അസമയത്ത് ഇന്‍റര്‍ കോണ്ടിനെന്‍റല്‍ ടോക് റ്റൈമെടുത്ത് ചോദിക്കാന്‍ കണ്ട ചോദ്യം!”

നോബി : ”ഓ… ഇതിപ്പം വാട്ട്സാപ്പല്ലേ? ചെലവൊന്നും ആകത്തില്ല. ചുരുക്കത്തില്‍ ഓനക്കുട്ടന്‍ ചേട്ടായിക്കും ഇതറിയാമ്മേലെന്നാ തോന്നണെ. അതിനാ ഈ ഉരുണ്ടുകളിം, ദേഷ്യോം..”

ഞാന്‍ : ”അല്ലടാ… അതൊരു വെല്യ തെറിയാ….എനിക്കിപ്പം ഫോണിലൂടെയൊന്നും അത് പറഞ്ഞുതരാന്‍ മേല.”

നോബി വിടാന്‍ ഭാവമില്ലായിരുന്നു : ”ന്നാലും… റഫ് ആയിട്ട്,,,ഒന്ന്…..”

എതാണ്ട് അര നൂറ്റാണ്ട് മുമ്പ് ചീങ്കല്ലേല്‍ ഷാപ്പില്‍ വച്ചു നടന്ന ഒരു വാക്കേറ്റത്തില്‍ പിള്ളേച്ചന്‍ എന്നു വിളിക്കപ്പെട്ടിരുന്ന ഒരാളെ കൊലപ്പെടുത്തിയത് ഈ ഒരു വിളിയായിരുന്നെന്നും, ഇതുവരെയുണ്ടായിട്ടുള്ള തെറിവിളികളുടെയെല്ലാം വെല്യപ്പനാണിതെന്നും, അതിലല്പം ഡി.എന്‍.എ പ്രശ്നമുള്ളതിനാല്‍ ഇപ്പോള്‍ പറയാനാവില്ലെന്നും, അടുത്ത ഡിസംബറിനുള്ളില്‍ നോബിക്ക് ഇതിന്‍റെ ഉത്തരം കിട്ടാത്തപക്ഷം ഞാന്‍ വന്നു ചെവിയില്‍ പറഞ്ഞുതരാമെന്നും, ഇത് ശ്യാം പുഷ്ക്കരന്‍റേതാവില്ലെന്നും, ഉറപ്പായും ദിലീഷ് പോത്തന്‍റെ വികൃതിയാവും എന്നു ഞാന്‍ സംശയിക്കുന്നതായും പറഞ്ഞ് ഞാന്‍ ഫോണ്‍ വച്ചു.

***

അങ്കിത നാരംഗിയുടെ രചനയിൽ പുഷ്കർ മഹാബൽ സംവിധാനം ചെയ്ത് 2019 നവംബറിൽ, സോണി ലൈവ് പ്ലാറ്റ് ഫോമിൽ പുറത്തിറങ്ങിയ ഹിന്ദി സിനിമയാണ്, വെൽക്കം ഹോം. ഈ ക്വാറന്റൈന്‍ ദിനങ്ങളിലാണ് സിനിമ കണ്ടത്. പോസ്റ്ററിൽ പറയുന്നത് പോലെ, ഇത് ലോലഹൃദയമുള്ളവർക്കുള്ള സിനിമയല്ല. പ്രേതം പരത്തുന്ന ഭീതിയല്ല യാഥാർത്ഥ്യത്തിന്‍റെ കടുംവർണ്ണങ്ങൾ. ഇന്ത്യൻ അവസ്ഥയിൽ ആൺ മേൽക്കോയ്മയിൽ ഞെരിഞ്ഞമരുന്ന സ്ത്രീത്വം. കണ്മുന്നില്‍ നടക്കുന്ന സംഭവങ്ങളുടെ പരമ്പര നമ്മളെ അസ്വസ്ഥരാക്കും .

മഹാരാഷ്ട്രയിലെ സ്കൂൾ അധ്യാപികമാരാണ് അനൂജയും, നേഹയും ( കശ്മീര ഇറാനി, സ്വർദാ തിങ്ക്ളേ ) ഹൈദ്രബാദിൽ നിന്ന് സ്ഥലം മാറിവന്ന്‍ ഒറ്റയ്ക്ക് താമസിക്കുന്ന അനൂജയെ, സ്ഥിരമായി വിളിക്കുന്നത് കല്യാണം കഴിയ്ക്കാൻ പോകുന്നയാളാണ്, ജോലി ഉപേക്ഷിക്കാന്‍ അയാൾ ആവശ്യപ്പെടുന്നുണ്ട്. അയാളുടെ ആജ്ഞ അനുസരിക്കാൻ അച്ഛനും നിര്‍ബന്ധിക്കുന്നുണ്ട്. നേഹയാണെങ്കിൽ സഹോദരന്‍റെ കടുത്ത നിർദേശങ്ങൾ അനുസരിക്കാൻ ബാധ്യസ്ഥയാണ്.

അനൂജയും, നേഹയും സ്കൂളിൽ നിന്ന് സെൻസസ് ജോലിയുടെ ഭാഗമായി, നഗരത്തിൽ നിന്ന് മാറി കാടിനുള്ളിലുള്ള ഒറ്റപ്പെട്ട ഒരു വീട്ടിലെത്തുന്നു. സ്‌കൂട്ടിയിലാണ് അവരുടെ യാത്ര. ആദ്യ ദിവസം വാതിൽ തുറയ്ക്കുന്നത്, പ്രേരണ എന്ന സ്ത്രീയാണ്. വളരെ വിചിത്രമായ രീതിയിലായിരുന്നു അവരുടെ പെരുമാറ്റം, കുട്ടികൾ ഉണ്ടോ എന്ന ചോദ്യത്തിന്, ‘ അവരൊക്കെ ജനിച്ചയുടൻ മരിച്ചു’ എന്ന വിചിത്രമായ മറുപടി അവരെ അത്ഭുതപ്പെടുത്തി. ആദ്യ ദിവസം അവർ മടങ്ങുന്നു. ഒരിക്കൽ കൂടി, അവിടെ ചെന്ന് കാര്യങ്ങൾ അന്വേഷിക്കണമെന്ന് അനൂജ, നേഹയോട് പറയുന്നു. അനൂജയുടെ നിർബന്ധത്തിന് വഴങ്ങി, നേഹ കൂടെ ചെല്ലുന്നു.

അവിടെ പ്രേരണയെകൂടാതെ ഘന ശ്യാം എന്നൊരാളും, അയാളുടെ അമ്മയും, ഭോല എന്ന പാചകക്കാരനുമുണ്ട്. അവിടെ നിന്ന് ഇറങ്ങുമ്പോൾ ശക്തമായി മഴ പെയ്യുന്നു. ആ രാത്രി അവിടെ കഴിച്ചു കൂട്ടാൻ അവർ തീരുമാനിക്കുന്നു. ഇടയ്ക്ക് ആരുടെയോ കരയുന്ന ശബ്ദം കേട്ട് ടോർച്ചും താക്കോലുമെടുത്ത് അവർ രക്ഷപ്പെടാൻ പുറത്തിറങ്ങുന്നു. ഇരുട്ടിൽ, കാട്ടിന് നടുവിൽ വന്യ മൃഗങ്ങളെ ഭയന്ന്‍ അവര്‍ തിരികെ വീട്ടിലേക്ക് പോകുന്നു. രാവിലെ പെട്ടെന്നിറങ്ങുന്നു. പക്ഷെ അവിടത്തെ സ്ത്രീ, ഘന ശ്യാമിനോട് അവർ രാത്രി പുറത്തിറങ്ങിയ കാര്യം പറഞ്ഞു. സ്‌കൂട്ടിയിൽ അവർ പോകാൻ ശ്രമിച്ചെങ്കിലും ഘന ശ്യാമും ഭോലയും കൂടി അവരെ ഒരു മുറിക്കുള്ളിൽ ആക്കുന്നു. ഭോല എന്ന കഥാപാത്രം ലൈംഗിക ദാരിദ്ര്യം അനുഭവിക്കുന്ന വിചിത്രസ്വഭാവിയായ ഒന്നാണ്.

പിന്നീട് അരങ്ങേറുന്ന സംഭവങ്ങൾ ഏറെ ക്രൂരത നിറഞ്ഞതാണ് . ഘന ശ്യാം പ്രേരണ പ്രസവിക്കുന്ന പെൺകുട്ടികളെയെല്ലാം കൊല്ലുകയാണ് . ആൺകുട്ടിക്കുള്ള കാത്തിരിപ്പാണ് .

നീണ്ട പോരാട്ടത്തിനൊടുവിൽ അവിടെ നിന്ന് രക്ഷപ്പെടുന്ന അനൂജയെയും , നേഹയെയും സിനിമയുടെ ക്ലൈമാക്സിൽ നമുക്ക് കാണാം.

ഇരുട്ടിലെ കാഴ്ചകളാണ് കൂടുതൽ. യഥാർത്ഥ സംഭവവുമായി ബന്ധമുള്ള കഥകൂടിയാണിത്. കഥാപാത്രങ്ങളുടെ സ്വഭാവ സങ്കീർണ്ണത കാണിക്കുന്ന രംഗങ്ങൾ നമ്മളിൽ അറപ്പും വെറുപ്പുമുണ്ടാക്കും. നീണ്ട വയലൻസ് രംഗങ്ങൾ.

എങ്കിലും ധീരമായ, നവ്യമായ, സത്യസന്ധമായ ഒരു സിനിമ അനുഭവം

സമീപ കാല ബോളിവുഡ് ചിത്രങ്ങൾ പ്രമേയത്തിന്‍റെ തിരഞ്ഞെടുപ്പിൽ വ്യത്യസ്തത പുലർത്തുന്നത് ശുഭ സൂചകമാണ് . പാട്രിയാർക്കിയിൽ കുരുങ്ങിയ മുൻകാല ചിത്രങ്ങളിൽ നിന്ന് വേറിട്ടതാണ് ഥപ്പഡ് , സെക്ഷൻ 375. ഏക് അകെലി രാത് തുടങ്ങിയവ . അത് കൊണ്ട് തന്നെ സമാന്തര സിനിമകളിലും , unholy ആയ വിഷയങ്ങൾ വച്ചുകെട്ടലുകൾ ഇല്ലാതെ അവതരിപ്പിക്കുന്നുണ്ട് . സദാചാര ബോധത്തിന്‍റെ ഭാരമില്ലാത്ത സിനിമകൾ നല്ലൊരു തുടക്കമാണ് , കഥ പറയുന്ന രീതിയിലും മറ്റ്‌ സാങ്കേതിക ഘടകങ്ങളിലും . ഓ ടി പി പ്ലാറ്റ് ഫോം വഴി അതിനുള്ള നല്ലൊരു അവസരം കോവിഡ് കാലം നൽകി .