ലേഖനം

ഇരുപതാംനൂറ്റാണ്ടിന്റെ തുടക്കത്തിൽത്തന്നെ തിരുവിതാംകൂറിൽ രാജഭരണത്തിനെതിരെയുള്ള സ്വരങ്ങൾ ഉയർന്നുതുടങ്ങിയിരുന്നു. സ്വദേശാഭിമാനി രാമകൃഷ്ണപിള്ളയാണ് അവരിൽ ഏറ്റവും സ്മരണീയനായ മഹാൻ.ദേശീയതലത്തിൽ ഗാന്ധിജിയുടെ നേതൃത്വത്തിൽ ഇന്ത്യൻ നാഷണൽ കോൺഗ്രസ് ബ്രിട്ടീഷ്‌ ഭരണത്തിനെതിരെയുള്ള സ്വാതന്ത്ര്യസമരത്തിന്റെ ജിഹ്വയായി മാറി. പക്ഷേ നാട്ടുരാജ്യങ്ങളിലെ ജനങ്ങളെ പ്രക്ഷോഭത്തിൽ പങ്കുചേരാൻ ഗാന്ധിജി അനുവദിച്ചില്ല.

ആ സാഹചര്യത്തിലാണ് പുരോഗമനചിന്താഗതിക്കാരായ ഒരുകൂട്ടം യുവാക്കൾ 1931ൽ അഖില തിരുവിതാംകൂർ യൂത്ത് ലീഗ് എന്നൊരു പ്രസ്ഥാനത്തിന് തിരുവനന്തപുരം കേന്ദ്രമാക്കി രൂപംകൊടുത്തത്. ജയിൽമോചിതനായി മലബാറിൽനിന്ന് തിരിച്ചെത്തിയ പൊന്നറ ശ്രീധർ ആയിരുന്നു നേതാവ്. തിരുവിതാംകൂറിലെ ആദ്യത്തെ കമ്മ്യൂണിസ്റ്റ് എന്നു വിശേഷിപ്പിക്കാവുന്ന, അക്കാലത്തെ പ്രമുഖ വക്കീൽ കെ സി ജോർജിന്റെ പിന്തുണയും യൂത്ത് ലീഗിന് ഉണ്ടായിരുന്നു.( എൻ സി ശേഖറിന്റെ നേതൃത്വത്തിൽ കമ്മ്യൂണിസ്റ്റ് ലീഗ് എന്നൊരു രഹസ്യസംഘടന അതിനുമുൻപേ രൂപംകൊണ്ടിരുന്നു ). എൻ പി കുരിക്കൾ, പുതുപ്പള്ളി രാഘവൻ, പി ടി പുന്നൂസ് എന്നിവരായിരുന്നു മറ്റു നേതാക്കൾ. തിരുവട്ടാർ താണുപിള്ള, ആർ പി അയ്യർ, വിദ്യാർത്ഥികളായിരുന്ന എൻ ശ്രീകണ്ഠൻ നായർ, ആർ ശങ്കരനാരായണൻതമ്പി തുടങ്ങിയവരായിരുന്നു മറ്റു സജീവപ്രവർത്തകർ.

അക്കാലത്ത് തിരുവിതാംകൂറിൽനിന്ന് കെ പി സി സി യിൽ ഒരു അംഗം മാത്രമാണ് ഉണ്ടായിരുന്നത്. 1935ലെ തെരഞ്ഞെടുപ്പിൽ ജി രാമചന്ദ്രനെതിരെ ഇടതുപക്ഷസ്ഥാനാർഥിയായി എൻ സി ശേഖർ മത്സരിച്ചു. യൂത്ത് ലീഗിന്റെ പിന്തുണയിൽ ശേഖർ 5 വോട്ടിനു ജയിച്ചു.

1938 ഫെബ്രുവരിയിൽ തിരുവിതാംകൂർ സ്റ്റേറ്റ് കോൺഗ്രസ് സ്ഥാപിതമായി. മഹാരാജാവിന്റെ പരമാധികാരത്തിനു കീഴിൽ ഉത്തരവാദഭരണമായിരുന്നു ലക്ഷ്യം. സ്റ്റേറ്റ് കോൺഗ്രസ് യോഗങ്ങൾ റൗഡികളെ ഉപയോഗിച്ചു മർദിച്ചൊതുക്കാനുള്ള ദിവാൻ സർ സി പിയുടെ ശ്രമങ്ങൾ തകർത്തിരുന്നത് യൂത്ത് ലീഗ് നേതാക്കളാണ്.1938 ഓഗസ്റ്റിൽ കൂടിയ യൂത്ത് ലീഗ് സമിതി സ്റ്റേറ്റ് കോൺഗ്രസിന്റെ ‘മഹാരാജാവിന്റെ പരമാധികാരത്തിന് വിധേയമായി’ എന്ന ഉപാധി തള്ളിക്കളഞ്ഞു. ജെയിലിലായ യുത്ത് ലീഗ് നേതാക്കൾ കൊടിയ മർദനത്തിന് ഇരയായി ദുരൂഹസാഹചര്യത്തിൽ എൻ പി കുരിക്കൾ വഴിയരുകിൽ മരിച്ചുകിടക്കുന്നതായി കാണപ്പെട്ടു.1938 ഫെബ്രുവരിയിൽ സ്റ്റേറ്റ് കോൺഗ്രസ് സമർപ്പിച്ച നിവേദനത്തിലെ ദിവാന് എതിരെയുള്ള വ്യക്തിപരമായ ആരോപണങ്ങൾ പിന്നീട് ഗാന്ധിജിയുടെ നിർദേശപ്രകാരം പിൻവലിച്ചു. അതിനെ എതിർത്ത യൂത്ത് ലീഗ് ആ ആരോപണങ്ങൾക്ക് പുറമെ 10 പുതിയ ആരോപണങ്ങൾ കൂടി ചേർത്ത് ഒരു മെമ്മറാണ്ടം അച്ചടിച്ചു 1939 ജനുവരിയിൽ രാജാവിനും വൈസ്‌റോയിക്കും അയച്ചുകൊടുത്തു.

സ്റ്റേറ്റ് കോൺഗ്രസിന്റെ തണുപ്പൻനയങ്ങളിൽ പ്രതിഷേധിച്ചു എം എൻ ഗോവിന്ദൻ നായർ, ടി വി തോമസ് തുടങ്ങിയവർ പാർട്ടി വിട്ടു റാഡിക്കൽ കോൺഗ്രസ് എന്ന പുതിയ പാർട്ടി രൂപീകരിച്ചു.1934ൽത്തന്നെ കോൺഗ്രസിനുള്ളിൽ അഖിലേന്ത്യാതലത്തിൽ കോൺഗ്രസ് സോഷ്യലിസ്റ്റ് പാർട്ടി ജയപ്രകാശ് നാരായൺ, ഈ എം എസ്, എം ആർ മസാനി തുടങ്ങിയവരുടെ നേതൃത്വത്തിൽ രൂപീകരിച്ചിരുന്നു.യൂത്ത് ലീഗിന്റെയും റാഡിക്കൽ പാർട്ടിയുടെയും മിക്ക നേതാക്കളും കോൺഗ്രസ് സോഷ്യലിസ്റ്റ് പാർട്ടിയിലും പിന്നീട് കമ്മ്യൂണിസ്റ്റ് പാർട്ടിയിലും ചേർന്നു.

പുന്നപ്ര വയലാർ സമരം അസമയത്ത്, തെറ്റായി സംഘടിപ്പിക്കപ്പെട്ട ഒന്നായിരുന്നുവെന്നും തൊഴിലാളികളെ നേതൃത്വം കൊലക്കു കൊടുക്കുകയായിരുന്നു എന്നുമുള്ള ശ്രീകണ്ഠൻനായരുടെ പക്ഷത്തിന്റെ അഭിപ്രായം കമ്മ്യൂണിസ്റ്റ് പാർട്ടിയെ അവരെ എതിർക്കാൻ പ്രേരിപ്പിച്ചു. എന്നാൽ സർ സി പി ക്ക് എതിരെയുണ്ടായ വധശ്രമത്തിന്റെ പ്രേരകശക്തി എൻ ശ്രീകണ്ഠൻ നായർ ആണെന്ന വാർത്ത പരന്നതോടെ ശ്രീകണ്ഠൻനായർക്ക് ഒരു വീരപരിവേഷമാണ് ലഭിച്ചത്.അറസ്റ്റ് ഭയന്ന് കൊച്ചിരാജ്യത്തു കഴിഞ്ഞിരുന്ന ശ്രീകണ്ഠൻനായരും കൂട്ടരും മത്തായി മാഞ്ഞൂരാന്റെ സോഷ്യലിസ്റ്റ് ഗ്രൂപ്പുമായി യോജിച്ച് പ്രവർത്തിക്കാൻ തീരുമാനിച്ചു. 1947 സെപ്റ്റംബർ 21ന് കോഴിക്കോട് വെച്ച് കേരളാ സോഷ്യലിസ്റ്റ് പാർട്ടി സ്ഥാപിക്കപ്പെട്ടു. എൻ ശ്രീകണ്ഠൻനായർ കെ എസ് പി ജനറൽ സെക്രട്ടറിയായി. ശ്രീകണ്ഠൻനായർ അറസ്റ്റ് ചെയ്യപ്പെട്ടതിനെത്തുടർന്ന് മത്തായി മാഞ്ഞൂരാൻ ജനറൽ സെക്രട്ടറിയായി.

രാജഭരണവും രാജപ്രമുഖ് ഭരണവുമില്ലാത്ത ഒരു സ്വതന്ത്ര സോഷ്യലിസ്റ്റ് ഐക്യകേരളം എന്ന മത്തായിയുടെ സ്വപ്നത്തോട് ശ്രീകണ്ഠൻനായർക്ക് വലിയ യോജിപ്പുണ്ടായിരുന്നില്ല . സ്വാതന്ത്ര്യ ഇന്ത്യയിൽ കെ എസ് പി പോലുള്ള ഒരു ചെറുപാർട്ടിക്കുള്ള റോൾ ചെറുതാണ് എന്നായിരുന്നു അദ്ദേഹത്തിന്റെ വിലയിരുത്തൽ.കമ്മ്യൂണിസ്റ്റ് പാർട്ടിയിൽനിന്ന് വ്യത്യസ്തമായ, എന്നാൽ മാർക്സിസ്റ്റ്‌ ചിന്താഗതിയുള്ള ഒരു അഖിലേന്ത്യ ഇടതുപാർട്ടിയിൽ ചേർന്നു പ്രവർത്തിക്കുന്നത് നന്നായിരിക്കും എന്ന് ശ്രീകണ്ഠൻനായർപക്ഷം ചിന്തിച്ചു.ശ്രീകണ്ഠൻനായർ, കണ്ണന്തോടത്തു ജനാർദ്ദനൻ നായർ എന്നീ നേതാക്കൾ കൽക്കത്തയിൽപോയി ആർ എസ് പി നേതാക്കളുമായി ചർച്ചകൾ നടത്തി. നിർഭാഗ്യവശാൽ കണ്ണന്തോടത്ത് കൽക്കത്തയിൽ വെച്ചു മസൂരിരോഗം പിടിപെട്ട് 1947 മാർച്ച്‌ 16ന് അകാലചരമം പ്രാപിച്ചു.

1940 മാർച്ചിലാണ് തൃദീപ് ചൗധരിയുടെ നേതൃത്വത്തിൽ റെവലൂഷനറി സോഷ്യലിസ്റ്റ് പാർട്ടി രൂപംകൊണ്ടത്.

ബംഗാളിലെ വിപ്ലവപ്രസ്ഥാനമായിരുന്ന അനുശീലൻ സമിതിയും ഭഗത്ത്‌സിംഗിന്റെ ഹിന്ദുസ്ഥാൻ സോഷ്യലിസ്റ്റ് റിപ്പബ്ലിക്കൻ ആർമിയുമായിരുന്നു ആർ എസ് പി യുടെ മാർഗദീപങ്ങൾ.കെ എസ് പി പിളരുന്നു. ഒരു വിഭാഗം ആർ എസ് പിയിൽ.

കൊല്ലത്തെ ട്രേഡ് യൂണിയനുകൾ കണ്ണൻതോടത്തിന്റെ കാലംമുതലേ കെ എസ് പി യുടെ പൂർണ നിയന്ത്രണത്തിലായിരുന്നു. കൊല്ലത്തെ എ ഡി കോട്ടൺമില്ലിൽ ശ്രീകണ്ഠൻനായർ ആഹ്വാനംചെയ്ത സമരം കെ എസ് പി യുടെ പിളർപ്പിലേക്കു നയിക്കും എന്ന് അന്ന് ആരും കരുതിയില്ല. കോൺഗ്രസ് സർക്കാർ സമരം മർദ്ദിച്ച് ഒതുക്കാനാണ് ശ്രമിച്ചത്. മിക്ക കെ എസ് പി നേതാക്കളും അറസ്റ്റിലായി. ബേബി ജോൺ കൊച്ചിയിലേക്ക് രക്ഷപെട്ടു. കെ ബാലകൃഷ്ണൻ മാത്രമാണ് പുറത്തുണ്ടായിരുന്നത്.സമരം ഒത്തുതീർപ്പാക്കാൻ പിതാവായ സി കേശവന്റെ സഹായത്തോടെ മുഖ്യമന്ത്രി ടി കെ നാരായണ പിള്ളയുമായി രഹസ്യനീക്കം നടത്തി എന്ന് പിന്നീട് ചേർന്ന സംസ്ഥാന സമ്മേളനത്തിൽ തിരുവിതാംകൂറിൽ നിന്നുള്ള ചില പ്രതിനിധികൾ കടുത്ത വിമർശനം ഉന്നയിച്ചു. ബേബി ജോണിന്റെ ചില നടപടികൾ പല തൊഴിലാളികളും പിടിയിലാകാനും ക്രൂരമർദനത്തിന് ഇരയാകാനും വഴിതെളിയിച്ചു എന്നും ആരോപണം ഉയർന്നിരുന്നു. രണ്ടു പേരെയും പുറത്താക്കണം എന്ന ആവശ്യം ഉയർന്നു. ശ്രീകണ്ഠൻനായരുടെ നേതൃത്വത്തിൽ ഒരു വിഭാഗം പ്രതിനിധികൾ യോഗത്തിൽ നിന്ന് ഇറങ്ങിപ്പോയി. ഇത്തവണ കൽക്കത്തയിൽ പോയി ആർ എസ് പി നേതൃത്വവുമായി ചർച്ച നടത്തിയത് കെ ബാലകൃഷ്ണനും ചെങ്ങാരപ്പള്ളി നാരായണൻ പോറ്റിയുമാണ്.1949 ഒക്ടോബറിൽ കെ എസ് പി പിളർന്നു. 1950 ജൂൺ 18ന് കൊല്ലത്തു വിളിച്ചുകൂട്ടിയ സമ്മേളനത്തിൽവെച്ച് എൻ ശ്രീകണ്ഠൻനായർപക്ഷം ആർ എസ് പിയിൽ ചേർന്നു. ടി കെ ദിവാകരൻ, ബേബി ജോൺ, കെ ബാലകൃഷ്ണൻ, കെ കെ കുഞ്ചുപിള്ള, ചെങ്ങാരപ്പള്ളി നാരായണൻ പോറ്റി, ജി ജനാർദനക്കുറുപ്പ്, പ്രാക്കുളം ഭാസി, ടി പി ഗോപാലൻ തുടങ്ങിയവരായിരുന്നു പുതിയ പാർട്ടിയുടെ നേതാക്കൾ. കെ പങ്കജാക്ഷൻ, ആർ എസ് ഉണ്ണി, കെ സി വാമദേവൻ, വക്കം പുരുഷോത്തമൻ, കെ വിജയരാഘവൻ, സദാനന്ദശാസ്ത്രി, എ വി താമരാക്ഷൻ, ടി ജെ ചന്ദ്രചൂഡൻ, വി പി രാമകൃഷ്ണപിള്ള തുടങ്ങി ഒട്ടേറെ ഊർജസ്വലരായ യുവനേതാക്കൾ പുതിയ പാർട്ടിക്ക് കരുത്തുനൽകി. കെ എസ് പി യുടെ തളർച്ചയുടെ തുടക്കംകുറിച്ച സംഭവമായിരുന്നു അത്.

1952ലെ തെരഞ്ഞെടുപ്പിൽ ആർ എസ് പി, കെ എസ് പി കക്ഷികളെ ചേർത്ത് ഐക്യ മുന്നണിയുണ്ടാക്കാൻ കമ്മ്യൂണിസ്റ്റ്പാർട്ടി മുൻകയ്യെടുത്തു. മത്തായി മാഞ്ഞൂരാൻ മുന്നണിയുടെ പിന്തുണയിൽ രാജ്യസഭയിലേക്ക് തെരഞ്ഞെടുക്കപ്പെട്ടു. ആർ എസ് പി യിൽനിന്ന് എൻ ശ്രീകണ്ഠൻനായർ കൊല്ലം – മാവേലിക്കര മണ്ഡലത്തിൽനിന്ന് ലോക് സഭ എം പി യായും തെരഞ്ഞെടുക്കപ്പെട്ടു.

കൊല്ലത്തെ മിനറൽസ്, ഓട്, തടി, കയർ, കശുവണ്ടി വ്യവസായങ്ങളിൽ ആർ എസ് പി യുടെ യു ടി യു സി യൂണിയനുകൾക്കുള്ള വ്യക്തമായ മേൽക്കൈ അവസാനിപ്പിക്കാനുള്ള ശ്രമങ്ങൾ കമ്മ്യൂണിസ്റ്റ് പാർട്ടി ആരംഭിച്ചിരുന്നു. എം കെ കുമാരനെയാണ് അവർ അതിനു നിയോഗിച്ചത്. ക്വയ്‌ ലോൺ ടെക്സ്റ്റൈൽ വർക്കേഴ്സ് യൂണിയൻ പ്രസിഡന്റ്‌ സ്ഥാനത്തേക്ക് എൻ സി ശേഖറിനെ മത്സരിപ്പിച്ചെങ്കിലും ടി കെ ദിവാകരൻ നല്ല ഭൂരിപക്ഷത്തിൽ വിജയിച്ചു.

1954ലെ തെരഞ്ഞെടുപ്പ് കഴിഞ്ഞതോടെ ഐക്യമുന്നണിയിൽ അഭിപ്രായവ്യത്യാസം മൂർച്ഛിച്ചു.പട്ടം മന്ത്രിസഭക്കെതിരെ അവിശ്വാസം വന്നപ്പോൾ ആർ എസ് പി യും കെ എസ് പി യും പട്ടത്തെ പിന്താങ്ങി.പിന്നീട് മുഖ്യമന്ത്രിയായ പനമ്പളളി ചെങ്ങാരപ്പള്ളി നാരായണൻ പോറ്റിയെ ചാക്കിട്ടുപിടിച്ചത് ആർ എസ് പി യുടെ വിശ്വാസ്യതക്കു വലിയ കോട്ടമാണ് ഉണ്ടാക്കിയത്.

കമ്മ്യൂണിസ്റ്റ് പാർട്ടിയുമായുണ്ടായ അകൽച്ച 1956 അവസാനം സീറ്റുവിഭജന ചർച്ചയോടെ പൂർണമായി. അർഹതപ്പെട്ട സീറ്റുകൾ നിഷേധിച്ചു എന്നുപറഞ്ഞ് 31 സീറ്റ് ആവശ്യപ്പെട്ട ആർ എസ് പി മുന്നണിവിട്ടു.കമ്മ്യൂണിസ്റ്റ് പക്ഷവും കോൺഗ്രസ് പക്ഷവും എന്ന് ജനങ്ങൾ ചേരിതിരിഞ്ഞതിനിടയിൽ ചെറുപാർട്ടികൾ മത്സരിക്കുന്നതിന് പ്രസക്‌തിയില്ല എന്നുപറഞ്ഞു കെ എസ് പി മത്സരിക്കുന്നില്ല എന്ന് തീരുമാനിച്ചു. ആർ എസ് പി ഒറ്റക്ക് മത്സരിക്കാൻ തീരുമാനിച്ചു.

മന്നത്ത് പദ്മനാഭന്റെ പ്രത്യക്ഷവും കേരള കൗമുദിയുടെ പരോക്ഷവുമായ പിന്തുണ ഉറപ്പാക്കിയ കമ്മ്യൂണിസ്റ്റ് പാർട്ടി സെക്രട്ടറി എം എൻ ഗോവിന്ദൻ നായർ 1957ലെ തെരഞ്ഞെടുപ്പിൽ പാർട്ടിയെ വിജയത്തിലേക്ക് നയിച്ചു. ആർ എസ് പി 27 സീറ്റുകളിലാണ് മത്സരിച്ചത്. 1957 മാർച്ച്‌ 18ന് ഫലം വന്നപ്പോൾ ആർ എസ് പി തുടച്ചുനീക്കപ്പെട്ടു. കൊല്ലത്തു നിന്നു ലോക് സഭയിലേക്ക് മത്സരിച്ച ശ്രീകണ്ഠൻനായരും തോറ്റു. എല്ലാ സീറ്റിലും തോറ്റെങ്കിലും ആർ എസ് പി പിടിച്ച വോട്ടുകൾ പല കമ്മ്യൂണിസ്റ്റ് സ്ഥാനാർഥികളുടെയും പരാജയത്തിനു കാരണമായി.

ഇ എം എസ് മന്ത്രിസഭ കൊണ്ടുവന്ന വിദ്യാഭ്യാസബിൽ കാത്തോലിക്കാസഭയുടെയും കാർഷികബന്ധബിൽ എൻ എസ് എസിന്റെയും രൂക്ഷമായ എതിർപ്പ് വിളിച്ചുവരുത്തി. എറണാകുളത്ത് വിദ്യാർത്ഥികളെ ക്രൂരമായി മർദിച്ച സംഭവത്തിൽ പ്രതിഷേധിച്ചു കെ എസ് പിയും മത്തായി മാഞ്ഞൂരാനും മന്ത്രിസഭക്ക് എതിരായി. ഈ സംഭവത്തിന്റെ തുടർച്ചയായിരുന്നു കെ എസ് യു ഏറ്റെടുത്ത ഒരണ സമരം.കൊല്ലം ചന്ദനത്തോപ്പിൽ സമരംചെയ്ത 2 തൊഴിലാളികൾ പോലീസ് വെടിവെപ്പിൽ കൊല്ലപ്പെട്ട സംഭവത്തോടെ ആർ എസ് പി യും പൂർണമായി എതിർചേരിയിലായി.വിമോചനസമരം പ്രഖ്യാപിക്കപ്പെട്ടപ്പോൾ കെ എസ് പി അതിൽ പങ്കാളിയായി. ഒറ്റക്ക് സമരം ചെയ്യാനായിരുന്നു ആർ എസ് പി യുടെ തീരുമാനം.

ഈ എം എസ് മന്ത്രിസഭ പിരിച്ചുവിടപ്പെട്ടശേഷം 1960ൽ നടന്ന തെരഞ്ഞെടുപ്പിൽ ആർ എസ് പി ക്ക് ഒറ്റ സീറ്റിൽ, കരുനാഗപ്പള്ളിയിൽ, മാത്രമാണ് ജയിക്കാനായത്. കെ എസ് പി മുഴുവൻ സീറ്റിലും തോറ്റു.കോൺഗ്രസ് 63, പി എസ് പി 20, മുസ്ലിം ലീഗ് 11, കമ്മ്യൂണിസ്റ്റ് പാർട്ടി 29 ഇങ്ങനെയായിരുന്നു കക്ഷിനില. ആർ എസ് പിയിൽനിന്ന് ബേബി ജോൺ മാത്രമാണ് നിയമസഭ കണ്ടത്. കോൺഗ്രസ്, പി എസ് പി, ലീഗ് എന്നീ കക്ഷികൾ യോജിച്ച് പി എസ് പി നേതാവ് പട്ടം താണുപിള്ളയെ മുഖ്യമന്ത്രിയാക്കി. കോൺഗ്രസിലെ ആർ ശങ്കർ ഉപമുഖ്യമന്ത്രി, ലീഗിന്റെ സീതിസാഹിബ്‌ സ്പീക്കർ. 1957ൽ പ്രതിപക്ഷ നേതാവായിരുന്ന പി ടി ചാക്കോ ആഭ്യന്തരമന്ത്രി.

1962ലെ പാർലിമെന്റ് തെരഞ്ഞെടുപ്പിൽ ആർ എസ് പിയുടെ എൻ ശ്രീകണ്ഠൻ നായർ കൊല്ലത്തുനിന്ന് തെരഞ്ഞെടുക്കപ്പെട്ടു. 1980 വരെ അദ്ദേഹം തുടർച്ചയായി കൊല്ലത്തെ പാർലിമെന്റിൽ പ്രതിനിധീകരിച്ചു.ചെറിയ കക്ഷിയുടെ നേതാവായ പട്ടത്തിന്റെ മുഖ്യമന്ത്രിസ്ഥാനം പിടിച്ചുമേടിക്കാൻ കോൺഗ്രസ് പയറ്റിയ തന്ത്രങ്ങളുടെ ഫലമായി 1962ൽ പട്ടം രാജിവെച്ചു പഞ്ചാബ് ഗവർണറായി പോയി. ആർ ശങ്കർ ആയിരുന്നു അടുത്ത മുഖ്യമന്ത്രി.പി ടി ചാക്കോക്ക് എതിരെ ഉയർന്ന ലൈംഗിക ആരോപണത്തെത്തുടർന്ന് കോൺഗ്രസിനുള്ളിൽതന്നെ ഉണ്ടായ ആഭ്യന്തരകലഹം ചാക്കോയുടെ രാജിയിൽ കലാശിച്ചു. കെ പി സി സി പ്രസിഡന്റ്‌ തെരഞ്ഞെടുപ്പിൽ മത്സരിച്ച ചാക്കോ പരാജയപ്പെട്ടു. അധികം താമസിയാതെ ചാക്കോ ഹൃദ്രോഗംമൂലം മരണമടയുകയും ചെയ്തു.

ശങ്കർ ചാക്കോയുടെ കൂടെ നിന്നില്ല എന്നതിൽ ചാക്കോയുടെ അനുയായികൾക്കുണ്ടായിരുന്ന പ്രതിഷേധം അണപൊട്ടിയത് 15 കോൺഗ്രസ് എം എൽ എമാർ പി എസ് പി യിലെ പി കെ കുഞ്ഞ് അവതരിപ്പിച്ച അവിശ്വാസപ്രമേയത്തെ അനുകൂലിച്ചു വോട്ട്ചെയ്തുകൊണ്ടാണ്. ശങ്കർ മന്ത്രിസഭ നിലംപതിച്ചു. കേരളം നീണ്ട പ്രസിഡന്റ്‌ ഭരണത്തിനു കീഴിലായി. മന്നത്ത് പദ്മനാഭന്റെ അനുഗ്രഹാശിസുകളോടെ വിമത കോൺഗ്രസ് എം എൽ എമാർ 1964ൽ കെ എം ജോർജ് ചെയർമാനായി കേരളാ കോൺഗ്രസ് എന്ന പാർട്ടി രൂപീകരിച്ചു.

പലതരം ഉത്തേജക പാക്കേജുകളുടെ കാലത്താണ് നാം ഇന്ന് ജീവിക്കുന്നത് . അങ്ങിനെ ഒരു ഉത്തേജക പാക്കേജ് മതിയാവുമോ കോൺഗ്രസ്സിനെ ഒന്നുണർത്തി, പഴയ പ്രതാപത്തിലല്ലെങ്കിൽ പോലും, ഒരു പ്രതീക്ഷയാക്കി മാറ്റാൻ ? ഒരു കായകല്പ ചികിത്സാ പാക്കേജ് ആണ് സങ്കല്പത്തിൽ എങ്കിൽ ആ പാക്കേജിൽ നാം എന്തെല്ലാം കരുതണം ? അത്ര എളുപ്പമല്ല ഈ പ്രക്രിയ എന്നറിയാം . എങ്കിലും നമ്മുടെ നാടിനെ നാശത്തിലേക്ക് നയിക്കുന്ന മത തീവ്രവാദികളെ, വർഗ്ഗീയത വിറ്റ് ജീവിക്കുന്നവരെ, കശക്കി എറിയാൻ ഈ പ്രസ്ഥാനം ഉണർന്നെഴുന്നേറ്റേ പറ്റൂ. അതിന് ഒരാളോ പത്ത് പേരോ വിചാരിച്ചാൽ പോര; ഭാരതത്തിലെ കോടിക്കണക്കിന് ജനം ഒത്തൊരുമയോടെ നിൽക്കണം.

കോൺഗ്രസ്സ് എന്ന പാർട്ടി വിവിധങ്ങളായ ആശയങ്ങളുടെ സംഗമവേദിയാണ് . തെറ്റും ശരിയും കാണാമതിൽ . ശരികളെ ഉൾക്കൊണ്ട് തെറ്റുകളെ തിരുത്തിയാണ് ആ പാർട്ടി വളർന്ന് മുന്നേറിയത് . ഇനിയും അങ്ങനെത്തന്നെ വേണം താനും . ആർ എസ് എസ് നെയോ സിപിഎം നെയോ പോലെ കേഡർ സംവിധാനം അല്ലാത്തതിനാൽ പല തരം അഭിപ്രായങ്ങൾ പറയാനും കേൾക്കാനും ഇവിടെ സാധിക്കും , അതായത് ഭാരതമെന്ന ജനാധിപത്യ രാജ്യത്തിന് ചേരുന്ന പാർട്ടി , അഭിപ്രായ സ്വാതന്ത്ര്യത്തിന് വില കല്പിക്കുന്ന രാഷ്ട്രീയ കൂട്ടായ്മ. ഇവ എല്ലാം പിൻപറ്റിയാകും നമ്മിൽ പലരും ഇതിൽ മനസ്സ്കൊണ്ട് ചേർന്ന് നിൽക്കുന്നതും.

മതം എന്ന രണ്ടക്ഷരം എല്ലാ മേഖലകളിലും നിറഞ്ഞാടുമ്പോൾ ഞങ്ങൾ മതേതരരാണ് എന്ന രാഷ്ട്ര ശില്പിയുടെ ചിന്ത എത്രത്തോളം പ്രായോഗികമാണ് കോൺഗ്രസ്സിനെ സംബന്ധിച്ച് ? നെഹ്രുവിയൻ ആശയങ്ങളെ പിന്തുടരുമ്പോഴും കാലികമായ മാറ്റങ്ങൾക്ക് നാം തയ്യാറാവണം . 1946 ൽ നെഹ്രുജി വി കെ കൃഷ്ണമേനോന് ലണ്ടനിലേക്ക് അയച്ച കത്തിൽ പറയുന്നുണ്ട് വർഗീയത തന്നെയാണ് നമ്മുടെ ഭാഗത്തുനിന്നുള്ള യഥാർത്ഥ വൈഷമ്യമെന്ന്. മതത്തെ വളരെ ആശ്രയിച്ച് വീണ്ടും അധികാരത്തിലെത്തിയ കേരള CPM അണികൾ പലപ്പോഴും പറയാറുണ്ട് കോൺഗ്രസ്സ് മതേതരം എന്ന വാക്ക് എവിടെയോ ഉപേക്ഷിച്ചെന്ന് , തിരിച്ചൊരു ചോദ്യം അവരോടും ആവാം കമ്മ്യൂണിസത്തിൽ വിശ്വസിക്കുന്നു എന്നവകാശപ്പെടുന്ന നിങ്ങൾക്കും മതവും വർഗ്ഗീയതയും തന്നെ അല്ലേ എപ്പോഴും ഇപ്പോഴും ആശ്രയം എന്ന്.

പറഞ്ഞു വന്നത് ഇതാണ് : ഇന്നത്തെ ഭാരതത്തിൽ മതേതര കോൺഗ്രസ്സ് അത്ര വിജയിക്കില്ല മത തുല്യതയിൽ ഊന്നിയാവണം ഓരോ നയരൂപീകരണവും . എല്ലാം മതങ്ങൾക്കും തുല്യ പ്രാധാന്യം നൽകി മുന്നോട്ട് എന്നതാവണം കോൺഗ്രസ്സ് നയം . മതപ്രീണനം അവിടെ വരാൻ പാടില്ല; ചേർത്ത് പറയാം ജാതി പ്രീണനവും. സാമുദായികമായി പിന്നോക്കം നിൽക്കുന്നവരെ ചേർത്ത് പിടിക്കാൻ നാം മുന്നിലുണ്ടാവണം, സാമ്പത്തിക പിന്നോക്കാവസ്ഥ മറക്കാനും പാടില്ല. സംവരണ വിഷയത്തിൽ മതപരമായും ജാതീയമായും സാമ്പത്തികമായും പിന്നണിയിലുള്ളവരെ വേണം താങ്ങിനിറുത്തേണ്ടത്.

അടുത്തതായി പാർട്ടിയുടെ ഘടനാ മാറ്റം . പാർട്ടിയുടെ നിർജീവമായ താഴെ തട്ട് പുനരുജ്ജീവിപ്പിക്കാൻ യൂത്ത്ബ്രിഗേഡ് രൂപികരിച്ച് അവർ സമൂഹത്തിലേക്ക് ഇറങ്ങണം . ഒരു ശ്രീനിവാസ് മാത്രം പോര അതിന്. നിരവധി ശ്രീനിവാസൻമാരുടെ നിര എല്ലാ സംസ്ഥാനങ്ങളിലും സജ്ജമാക്കണം. താഴെ തട്ട് അനങ്ങിയാൽ മാത്രമേ പാർട്ടിക്ക് നില നില്പുള്ളു. അതാവണം പ്രഥമ പരിഗണനയിൽ വേണ്ടത്. സേവാ ദൾ ഓർമയിലുണ്ട്.

പാർട്ടിയുടെ നയങ്ങളും കാലാകാലങ്ങളായി നടപ്പിലാക്കിയ ജനോപകാര പദ്ധതികളും ജനങ്ങൾ അറിയാതെ പോകാൻ പാടില്ല. അതിനായി സംസ്ഥാനങ്ങൾ തോറും കൺവെൻഷൻ സംഘടിപ്പിക്കണം, അത് സംസ്ഥാനങ്ങൾ കേന്ദ്ര നേതൃത്വവുമായി ചേർന്ന് വേണം നടപ്പാക്കാൻ. അതിൽ താഴെ തട്ടിനുള്ള റോൾ നിർണായകമാണ്.

സംഘടനാ തിരഞ്ഞെടുപ്പ് നടന്നാൽ മാത്രമേ ഇതെല്ലാം കുറ്റമറ്റതാകൂ പക്ഷെ അതിന് കാലതാമസം ഉണ്ട്. 2024 ആകാൻ ഇനി അധികം സമയം ഇല്ല. ഇപ്പോഴേ അനങ്ങിത്തുടങ്ങിയാൽ മാത്രമേ ആ തിരഞ്ഞെടുപ്പിൽ എന്തെങ്കിലും അത്ഭുതങ്ങൾ നടക്കൂ . അതില്ലാ എങ്കിൽ ഈ രാജ്യം ഏതവസ്ഥയിലാകും?

പ്രതിപക്ഷത്തെ എല്ലാ ഈർക്കിൽ പാർട്ടികളുടേയും സ്വപ്നം PM ചെയറാണ് . അവിടെ ഒരു ഐക്യം സൃഷ്ടിച്ച് അവരെ നയിക്കാൻ ഈ ദേശീയ പാർട്ടിക്കേ കഴിയൂ . ഇതവരെ മനസ്സിലാക്കി മുന്നിൽ നിന്ന് നയിക്കണം. അതിനുള്ള നീക്കങ്ങൾ അനിവാര്യമാണ്.

ലോകസഭാ സ്ഥാനാർത്ഥികളെ കഴിവതും ഉടനെ തീരുമാനിച്ച് ജനങ്ങളോടിടപെടാൻ അവരെ സജ്ജരാക്കണം. അവസാന നിമിഷ തീരുമാനങ്ങൾക്ക് വലിയ വിലയാണ് നാം നൽകേണ്ടി വരുന്നത്. കഴിഞ്ഞ കേരള തിരഞ്ഞെടുപ്പിൽ നാമത് കണ്ടതാണ്. മുന്നൊരുക്കങ്ങൾക്ക് വലിയ പ്രാധാന്യം നൽകുക തന്നെ വേണം. ആമയും മുയലും കഥയിലെ ആമയുടെ ജയം മാറിയ കാലാവസ്ഥയിൽ സംഭവ്യമല്ല. ഉണർന്ന്പ്രവർത്തിക്കേണ്ട സമയം അതിക്രമിച്ചു.

വ്യക്തികളല്ല പ്രസ്ഥാനമാണ് വലുതെന്ന ചിന്ത എല്ലാവരിലുംഎത്തിക്കുക, അതനുസരിച്ച് ഗ്രൂപ്പ് കളികൾക്ക് അവധി നൽകി രാജ്യത്തെ കുറിച്ച് മാത്രം ചിന്തിക്കുക. രാജ്യമില്ലെങ്കിൽ പിന്നെ പാർട്ടികൾക്ക് എന്ത് പ്രസക്തി ?

കേന്ദ്ര ഭരണത്തിലെ പാളിച്ചകൾ ജനത്തിന്റെ മുമ്പിൽ തുറന്ന്കാട്ടാൻ ഒരു രാഹുലോ പ്രിയങ്കയോ മാത്രം പോര, സംസ്ഥാനനേതൃത്വങ്ങൾക്കൊപ്പം കേന്ദ്ര നേതാക്കളും അണികളോടൊപ്പം ഇറങ്ങണം. ഖദറിലെ ചുളിവ് അതിന് തടസ്സമാകരുത്. ഇപ്പോഴത്തെ കേന്ദ്ര സർക്കാരിന്റെ ഭരണ പരാജയങ്ങൾ പ്രത്യേകിച്ച് കോവിഡ് നേരിട്ടതിലെ പരാജയം, വില കയറ്റം, തൊഴിലില്ലായ്മ, ബംഗാൾ യുദ്ധം തുടങ്ങി GDP ഇടിവ് വരെ ലളിതമായ രീതിയിൽ പറഞ്ഞ് ജനത്തെ മനസ്സിലാക്കണം. രാമക്ഷേത്രത്തിനും ബാബ്റി മസ്ജിദിനുമപ്പുറം മനുഷ്യന്റെ വിശപ്പകറ്റലാണ് പ്രധാനം, ആ ചിന്തയിലേക്ക് ജനത്തെ നയിക്കാൻ പറ്റണം, അവരെ ചിന്തിക്കാൻ പ്രാപ്തരാക്കണം. അതിന് ജനത്തിനിടയിലിറങ്ങി പ്രവർത്തിക്കാൻ പറ്റിയവർ വരണം.

പാർട്ടിയുടെ ഏറ്റവും ആകർഷകമായ ന്യായ് പദ്ധതിയെ കുറിച്ച് സംസാരിക്കാൻ പാർട്ടിയിൽ എത്ര പേർക്ക് സാധിക്കും? പഠനശിബിരങ്ങളോ ചർച്ചകളോ ഒന്നും തന്നെ നടക്കുന്നില്ല. എന്റെ പഠന കാലത്ത് ചരൽകുന്നിലെ കെ എസ് യു സംഗമം വായിച്ച ഓർമയുണ്ട്. ഇപ്പോൾ അത്തരത്തിൽ എന്തെങ്കിലും നടക്കാറുണ്ടോ ? തികച്ചും നിർജീവമായ അവസ്ഥ.

അടുത്തതായി സൈബർ ലോകം. കേരളത്തിൽ ഇത്തവണത്തെ എൽ ഡി എഫ് വിജയത്തിൽ നിർണ്ണായക പങ്ക് വഹിച്ചത് സൈബർ പോരാളികളാണ്. മാറിയ കാലഘട്ടത്തിൽ ഇതിനോട് അകലം പാലിച്ചിട്ട് കാര്യമില്ല. ഭാരതത്തിലെ ആധുനിക വാർത്താവിനിമയം തൊട്ടുള്ള സാങ്കേതിക വികസനത്തിന്റെ തലതൊട്ടപ്പന്മാരായ ബി ജെ പി യെ വെച്ചു നോക്കുമ്പോൾ വളരെ പിന്നിലാണ് സാങ്കേതിക വിദ്യാ ഉപയോഗത്തിൽ കോൺഗ്രസ്സ്. അതിന്റെ പല പോരായ്മകളും മൊത്തം പ്രവർത്തനത്തെ ബാധിക്കുന്നുണ്ട്. ഐ ടി സെൽ ശക്തിപ്പെടണം. എന്നാലെ തിരിച്ച് വരവിന് ആക്കം കൂടുകയുള്ളു.

നോട്ട് നിരോധിച്ച് കള്ളപ്പണം പിടിച്ചെടുത്തു എന്ന് അവകാശപ്പെടുന്ന ബി ജെ പി ആ നീക്കത്തിലൂടെ കോൺഗ്രസ്സിന്റെ വളർച്ചയാണ് തകർക്കാൻ ശ്രമിച്ചത്, ഏറെക്കുറെ അവരതിൽ വിജയിച്ചു. കോൺഗ്രസ്സ് മുക്ത ഭാരതം എന്ന ബി ജെ പി സ്വപ്നത്തിന് വളമേകാനാണ് മറ്റ് പ്രതിപക്ഷ സംഘടനകളും നില കൊള്ളുന്നത്. അതിരില്ലാത്ത സമ്പത്തിന്റെ ഉടമകളായ ബി ജെ പിയെ എതിരിടാൻ തക്ക സമ്പത്തില്ല എന്നോർത്ത് പതറാതെ തന്ത്രങ്ങളിലൂടെ അവരെ തകർക്കാൻ പറ്റിയ ചാണക്യൻമാരാണ് പാർട്ടിക്ക് വേണ്ടത് മദ്ധ്യപ്രദേശിലെ നഷ്ടം ചാണക്യതന്ത്രം രൂപപ്പെടുത്തുന്നതിൽ വന്ന വീഴ്ചയാണ്.

പഴയ തലമുറ സ്വമേധയാ മാറി നിന്ന് വേണ്ട ഉപദേശങ്ങൾ മാത്രം കൊടുത്ത് ഒരു കഴിവുറ്റ നേതൃനിര ഉയർന്നു വരാൻ വേണ്ട സഹായ സഹകരണങ്ങൾ നൽകുകയാണ് വേണ്ടത്. ശത്രു നിസ്സാരനല്ല എന്ന ബോദ്ധ്യത്തിൽ പട നയിക്കാൻ കെല്പുള്ള ഒരു സംഘം വേണം പാർട്ടിയെ നയിക്കാൻ. സ്വന്തം കീശ മാത്രം ചിന്തിക്കുന്ന നേതാക്കൾ ഇവിടെ ആവശ്യമില്ല. വർദ്ധിത ഊർജത്തോടെ പ്രവർത്തിക്കാൻ പറ്റിയവർ മതി എന്ന് തീരുമാനിക്കണം. പാർട്ടിയെ മുന്നിൽ നിന്ന് നയിക്കാൻ രാഹുലിന് കഴിയും. പക്ഷെ ഉത്തരവാദിത്തങ്ങൾ ഏറ്റെടുത്ത് കഴിഞ്ഞാൽ പിന്നെ പതറരുത്. ശത്രുക്കൾ എന്ത് പറഞ്ഞാലും ആൾക്കൂട്ടത്തെ ആകർഷിക്കാൻ രാഹുലിന് കഴിയുന്നുണ്ട്. അത് ജനഹിതം ആക്കി മാറ്റാനുള്ള കഴിവാണ് ആർജിക്കേണ്ടത്. അതിന് നേരത്തെ സൂചിപ്പിച്ച പോലെ ഒരു ശക്തമായ പിൻനിര വേണം പൂർണ്ണ പിന്തുണയുമായി . കൂടാതെ തുറന്ന മനസ്സോടെ വിമർശനങ്ങൾ കേട്ട് അത് പാറ്റി കൊഴിച്ച് വേണ്ടത് മാത്രം സ്വീകരിക്കാനും കഴിയണം.

ഉപജാപക വൃന്ദത്തെ മാറ്റി നിറുത്തി യുക്തിചിന്തയോടെ പരാതികൾ കേട്ട് വേണ്ട നീക്കങ്ങൾ നടത്തിയിരുന്നെങ്കിൽ ആസ്സാം ഒരുപക്ഷേ ഇത്തവണ പിടിച്ചെടുക്കാമായിരുന്നു. ആ പാളിച്ച ഒരു പാഠമായി എടുത്ത് അണികളെ കേൾക്കാനുള്ള മനസ്സ് നേതൃത്വത്തിൽ വളർന്ന് വരേണ്ടത് അത്യാവശ്യമാണ്. അത് പാർട്ടിക്ക് ഇന്ന് അന്യമാണ്. അതൊരു വലിയ വീഴ്ച തന്നെ.

വനിതകളെ ചേർത്ത് നിറുത്തുന്നതിലും ധാരാളം പാളിച്ചകളുണ്ട്. പ്രിയങ്ക അതിന്റെ ചുമതലക്കാരിയായി മാറിയാൽ തീർച്ചയായും മാറ്റങ്ങൾ വരും. ഇതിലുൾപ്പെടെ എല്ലാ കാര്യങ്ങളിലും ഏകോപനക്കുറവ് മുഴച്ചു നിൽക്കുന്നു.

അടുത്തതായി മാദ്ധ്യമങ്ങൾ. അവരെ ഇണക്കി നിറുത്തേണ്ടത് വളരെ ആവശ്യം തന്നെ . പക്ഷെ അവർ പാർട്ടിയുടെ ജിഹ്വയായി മാറാൻ അനുവദിക്കരുത്, അവർ പറയുന്ന കഥകളിലെ കഥാപാത്രങ്ങളാവാൻ നേതാക്കൾ നിന്നു കൊടുക്കരുത്. ജനാധിപത്യ സംവിധാനമാണെങ്കിലും മിതത്വം പാലിക്കണം മാദ്ധ്യമങ്ങളോടുള്ള ഇടപെടലിൽ.

ആശയ ബാഹുല്യത്തിൽ നിന്ന് നേരും നെറിവും ഉള്ളവ കണ്ടെത്തി ജനഹിതമനുസരിച്ച് നിൽക്കാൻ പാർട്ടിക്ക് സാധിച്ചാൽ തീർച്ചയായും ഒരു മടങ്ങി വരവ് സാധിക്കും, അല്ല സാധിക്കണം. അതാണ് യഥാർത്ഥ ദേശ സ്നേഹിയുടെ പ്രാർത്ഥന.

കേരളത്തിനും ബാധകമാണ് മേൽ പറഞ്ഞ എല്ലാം. ഒപ്പം തന്നെ ചേർക്കട്ടെ ഭരണ രംഗത്തെ തെറ്റുകളും കുറവുകളും ചൂണ്ടിക്കാട്ടി ജനത്തെ അത് ബോദ്ധ്യപ്പെടുത്താൻ ഒത്തൊരുമയോടെയുള്ള പ്രവർത്തനമാണ് വേണ്ടത്, ഗ്രൂപ്പല്ല പാർട്ടിയാണ് വലുതെന്ന് ഉള്ള ചിന്ത അവരിൽ രൂഢമൂലമായാലേ മടങ്ങിവരവ് സാധ്യമാകൂ.

വളരുംതോറും പിളരുകയും പിളരും തോറും വളരുകയും ചെയ്യുന്ന പാർട്ടി എന്ന് സ്വന്തം പാർട്ടിയെ നിർവചിച്ചത് സ്ഥാപക നേതാക്കളിൽ ഒരാളായ കെ എം മാണിയാണ്. അദ്ദേഹം പറഞ്ഞത് അച്ചട്ടാണ് എന്ന് തെളിയിച്ചു കൊണ്ട് മാണി സാറിന്റെ മരണത്തിനു ശേഷം ഒന്നാം ചരമ വാർഷികം ആചരിക്കുന്നതിനു മുൻപ് തന്നെ പാർട്ടി പിളർന്നു. ജോസഫ് പക്ഷവും ജോസ് കെ മാണി പക്ഷവും നിലവിൽ വന്നു.

പിളർപ്പ്‌ അനിവാര്യമായിരുന്നു എന്ന് കെ എം മാണി 52 വർഷം സ്വന്തമാക്കി വെച്ചിരുന്ന പാലാ സീറ്റിലെ ഉപ തെരഞ്ഞെടുപ്പോടെ വ്യക്തമായിരുന്നു. രണ്ടില ചിഹ്നം കൊടുത്തില്ല എന്നു മാത്രമല്ല ജോസിന്റെ സ്ഥാനാർഥിയെ തോൽപ്പിക്കാൻ ജോസഫിന്റെ അണികളും കോൺഗ്രസിലെ ഒരു വിഭാഗവും ശ്രമിച്ചു. അവരുടെ ആഗ്രഹം വിഫലമായില്ല. കേരളാ കൊണ്ഗ്രെസ്സ് എം സ്ഥാനാർഥി വലിയ ഭൂരിപക്ഷത്തിൽ തോറ്റു.

നീണ്ട നിയമയുദ്ധത്തിന് ശേഷം പാർട്ടിയും ചിഹ്നവും ജോസ് കെ മാണി സ്വന്തമാക്കി.

ജോസ് കെ മാണി പക്ഷത്തെ ഇല്ലാതാക്കാൻ കൊണ്ഗ്രെസ്സ് ശ്രമിച്ചത് ദീർഘകാലത്തെ ഒരു ആഗ്രഹത്തിന്റെ ഫലമായാണ്. കോട്ടയം ജില്ലയിൽ കേരളാ കോൺഗ്രസിനുള്ള മേൽക്കൈ അവസാനിപ്പിക്കുക. കെ എം മണിക്കെതിരെ ബാർ കൊഴക്കേസ് പൊലിപ്പിക്കുമ്പോൾ അതിന്റെ വക്കത്ത് എത്തി എന്നു ചില നേതാക്കൾ വിശ്വസിച്ചു. 60 വര്ഷങ്ങളായി പല അങ്കങ്ങൾ കണ്ട കെ എം മാണി ആ പ്രതിസന്ധി അത്ഭുതകരമായി അതിജീവിച്ചു. ഇടതു പക്ഷത്തേക്ക് പോകാനുള്ള ചരടുവലികൾ അദ്ദേഹം ജീവിച്ചിരുന്നപ്പോൾ തന്നെ ആരംഭിച്ചിരുന്നു എന്നു വേണം കരുതാൻ.

മാണി സാറിന്റെ തണലിൽ കഴിയുന്ന ആൾ എന്നായിരുന്നു ജോസ് കെ മാണിയെ പ്പറ്റിയുള്ള കോൺഗ്രസിന്റെ വിലയിരുത്തൽ. മാണിയുടെ മരണത്തോടെ ജോസിന്റെ ഭാവി ഇരുളിലാകും എന്ന വിശ്വാസമാണ് ജോസഫിനെ പിന്തുണക്കുന്നതിന് അവരെ പ്രേരിപ്പിച്ചത്. മാണി സാറിന്റെ ഉറ്റ സുഹൃത്തായ കുഞ്ഞാലിക്കുട്ടി മൗനം പാലിച്ചു.

മേഷയുദ്ധത്തിലെ കുറുനരിയെപ്പോലെ തക്കം പാർത്തിരുന്ന സി പി എം ബുദ്ധിപൂർവം കരുക്കൾ നീക്കി. സി പി ഐ യുടെ ശക്തമായ എതിർപ്പ് അവഗണിച്ചു ജോസ് പക്ഷത്തെ ഇടതു മുന്നണി യിലെത്തിച്ചു.

കേരളാ കോൺഗ്രസിലെ പിളർപ്പുകൾ ആശയപരമല്ല മറിച്ച് ആമാശയ പരമാണ് എന്ന് ലോനപ്പൻ നമ്പാടൻ പണ്ടു പറഞ്ഞത് വെറുതെയല്ല. ഓരോ നേതാവും പക്ഷം പിടിക്കുന്നത് തനിക്ക് ഏതാണ് മെച്ചം എന്നു മാത്രം നോക്കിയാണ്.

കത്തോലിക്ക സഭയും എൻ എസ് എസും യു ഡി എഫ് പക്ഷത്തു നിൽക്കും എന്ന കണക്കുകൂട്ടലാണ് കെ എം മാണിയുടെ ഏറ്റവുമടുത്ത സഹപ്രവർത്തകനായിരുന്ന സി എഫ് തോമസിനെ മറുപക്ഷത്ത് എത്തിച്ചത്. തന്റെ പിൻഗാമിയായി അനുജനെ ജോസ് അംഗീകരിക്കാൻ തയാറാകാഞ്ഞതും കാരണമായി. പൂഞ്ഞാർ സീറ്റിൽ ഉറപ്പു നല്കാഞ്ഞത് യൂത്ത് ഫ്രണ്ട് പ്രസിഡന്റ്‌ സജി മഞ്ഞക്കടമ്പനെ അക്കരെ എത്തിച്ചു.

ചീഫ് വിപ്പ് പദവിക്കുവേണ്ടി നടത്തിയ കളികൾ ഇരിഞ്ഞാലക്കുട എം എൽ എ തോമസ് ഉണ്ണിയാടനെ നേരത്തെ തന്നെ ജോസ് വിഭാഗത്തിന് അനഭിമതനാക്കിയിരുന്നു.തിരുവല്ല സീറ്റ് കിട്ടില്ല എന്ന് മനസ്സിലായത് ജോസഫ് എം പുതുശേരിയെ അവസാനനിമിഷം കാലുമാറാൻ പ്രേരിപ്പിച്ചു. ജോസ് കെ മാണിയുടെ ഉറ്റ സഹപ്രവർത്തകനായിരുന്ന വിക്ടർ സി തോമസും കളം മാറിയത് സീറ്റ് കിട്ടും എന്ന ഉറച്ച വിശ്വാസത്തിലാണ്.പക്ഷേ എല്ലാം വെറുതെയായി. ജോസഫ് സീറ്റ് കൊടുത്തത് സ്വന്തം ഗ്രൂപ്പുകാരനായ കുഞ്ഞു കോശി പോളിനാണ്.

സുഹൃത്തുക്കളെ കൈ വെടിഞ്ഞു ഫ്രാൻസിസ് ജോർജ് തിരിച്ചു ജോസഫിന്റെ പാളയത്തിൽ എത്തിയത് രണ്ട് ഉദ്ദേശത്തിലാണ്. ജോസിന്റെ അഭാവത്തിൽ പാർട്ടിയിലെ രണ്ടാമൻ പദവി തിരിച്ചു പിടിക്കുക. കോതമംഗലത്ത് മത്സരിച്ചു എം എൽ എ യാകുക.വിധി പക്ഷേ എതിരായിരുന്നു. ഇടുക്കിയിൽ മത്സരിച്ച് റോഷി അഗസ്റ്റിനോട് വീണ്ടും തോറ്റു. രണ്ടു പേരും മുന്നണി മാറിയത് മാത്രമാണ് ഉണ്ടായ മാറ്റം.

കോതമംഗലം സീറ്റ് ജോസഫ് ടി യു കുരുവിളയുടെ അനുയായി ഷിബു തെക്കും പുറത്തിനാണ് നൽകിയത്. ഒരു വമ്പൻ ഫിനാൻസ് കമ്പനി നടത്തുന്ന ഷിബുവിന്റെ പണവും പ്രചോദനമായി. സഭാ തർക്കം ഉൾപ്പെടെ പല കാരണങ്ങൾ കൊണ്ട് ഷിബു കത്തോലിക്കനായ സിറ്റിംഗ് എം എൽ എ ആന്റണി ജോണിനോട് തോൽക്കുകയും ചെയ്തു.

കേരളാ കോണ്ഗ്രസ് ജേക്കബ്‌ പിറവത്തേക്ക് ചുരുങ്ങുകയും പാർട്ടി ചെയർമാന് പ്യൂണിന്റെ വില പോലും ഇല്ല എന്ന സ്ഥിതിയിൽ ജോണി നെല്ലൂർ ജോസഫിന്റെ കൂടെ കൂടിയതിൽ അനൂപ് ജേക്കബിനും കോൺഗ്രസിനും ഒരു എതിർപ്പുമില്ലായിരുന്നു. ഒന്നുമില്ലെങ്കിലും പ്രസംഗിക്കാൻ ഒരാളെ കിട്ടിയല്ലോ.

ജോസ് കെ മാണിയുടെ യും കൂട്ടരുടെയും ഏറ്റവും വലിയ ഭയം 40 കൊല്ലം പ്രവർത്തിച്ച യു ഡി എഫിൽ നിന്ന് മാറുമ്പോൾ തങ്ങളെ പിന്തുണച്ചിരുന്ന കത്തോലിക്കസഭ അധികാരികൾ ആ മാറ്റം അംഗീകരിക്കുമോ എന്നതായിരുന്നു. പാലാ ഉപ തെരഞ്ഞെടുപ്പ് ഫലം ഒട്ടും ആത്മ വിശ്വാസം നൽകുന്നതായിരുന്നില്ല. പോരെങ്കിൽ കത്തോലിക്കർ തലമുറകളായി കമ്മ്യൂണിസ്റ് വിരോധികളാണ് താനും.

സിപി എമ്മിന്റെ ഉറച്ച പിന്തുണയും ചിട്ടയായ പ്രവർത്തനശൈലിയും ജോസ് പക്ഷത്തെ കാര്യമായി സഹായിച്ചു. തദ്ദേശ സ്ഥാപനങ്ങളിലക്കുള്ള തെരഞ്ഞെടുപ്പിൽ നല്ല വിജയം നേടാനായി. ചരിത്രത്തിൽ ആദ്യമായി മലബാർ മേഖലയിൽ മിക്ക ജില്ലകളിലും ജില്ലാ പഞ്ചായത്ത്‌ മെമ്പർമാർ വരെയുണ്ടായി.

ശക്തി കേന്ദ്രങ്ങളായ പാലായും കടുത്തുരുത്തിയും കൈവിട്ടെങ്കിലും ജോസഫിന്റെ 2ന്റെ സ്ഥാനത്ത് 5 സീറ്റുകൾ ജയിച്ചു പാർട്ടി തന്റെ കയ്യിൽ ഭദ്രമാണ് എന്ന് ജോസ് കെ മാണി തെളിയിച്ചു.

കേരളാ കോൺഗ്രസിൽ എക്കാലവും ഭിന്നത യുണ്ടാക്കിയിട്ടുള്ള മന്ത്രി സ്ഥാനം ഒരു പ്രശ്നവുമില്ലാതെ തീർപ്പാക്കി കേരളാ കോൺഗ്രസിന്റെ മുഖ്യധാര തന്റെ പാർട്ടിയാണ് എന്ന് അസഗ്നിഗ്ദ്ധമായി തെളിയിക്കാനും ജോസിന് കഴിഞ്ഞു.

സ്വാഭാവികമായും ഉയരുന്ന ഒരു ചോദ്യമുണ്ട്. വളർന്ന സ്ഥിതിക്ക് പിളരുമോ? കാലം ജോസ് കെ മാണിക്ക് അനുകൂലമാണ് എന്ന് വേണം കരുതാൻ. പാർട്ടി വിട്ടതോടെ പെരുവഴിയിലായ നേതാക്കൾ മിക്കവരും തിരിയെ കയറാനുള്ള തീവ്ര ശ്രമത്തിലാണ്. തന്നോട് മാത്രം കടപ്പാടുള്ള ഒരു യുവനേതൃത്വവും ജനപ്രതിനിധികളും സ്വന്തമാക്കിയ ജോസ് അതിനു തയാറാകുമോ എന്നതാണ് അറിയേണ്ടത്.

പാർലിമെന്റ് തെരഞ്ഞെടുപ്പിൽ ഇപ്പോൾ കിട്ടിയ മേൽക്കൈ നില നിർത്താൻ പ്രയാസമാണ് എന്ന് സി പി എമ്മിന് നന്നായി അറിയാം. ഒരു അഖിലേന്ത്യാ പാർട്ടി എന്ന സ്ഥാനം നിലനിർത്താൻ കൂടുതൽ എം പി മാർ കൂടിയേ തീരു. കേരളം മാത്രമാണ് ആശ്രയം. ക്രിസ്ത്യൻ നായർ സമുദായങ്ങളുടെ ഇടയിൽ സ്വാധീനം വർധിപ്പിക്കാനുള്ള വാഹനം കേരളാ കൊണ്ഗ്രെസ്സ് എം ആണ് എന്ന് പിണറായി തിരിച്ചറിഞ്ഞുകഴിഞ്ഞു. കൊണ്ഗ്രെസ്സ് കേരളാ കൊണ്ഗ്രെസ്സ് ജോസഫ് പക്ഷ അണികളെയും നേതാക്കളെയും ഇടതു പക്ഷത്ത് എത്തിക്കാനുള്ള ശ്രമങ്ങൾ തുടങ്ങിക്കഴിഞ്ഞു എന്ന് വ്യക്തം.

ഉമ്മൻ ചാണ്ടിയും പി ജെ ജോസഫും 80നോട് അടുത്തു കഴിഞ്ഞു. ഈ നിയമസഭ പിരിയുമ്പോൾ അവർ കളം വിടും എന്നുറപ്പാണ്. ജോസഫിന്റെ ആരോഗ്യസ്ഥിതി സജീവ നേതൃത്വത്തിന് അദ്ദേഹത്തെ അശക്തനാക്കുന്നു. മോൻസ് ജോസഫിനെ രണ്ടാമനാക്കിയതിൽ ഫ്രാൻസിസ് ജോർജ് ഖിന്നനാണ്. ഒരു എം എൽ എ മാത്രമുള്ള, മന്ത്രിസ്ഥാനം കിട്ടിയ ജനാധിപത്യ കേരളാ കോൺഗ്രസും കിട്ടുമെന്ന് ഗ്യാരണ്ടിയുള്ള പിള്ള ഗ്രൂപ്പും കേരളാ കോൺഗ്രസ് എമ്മിൽ ലയിക്കേണ്ട കാര്യമില്ല.

സംസ്ഥാന പാർട്ടി എന്ന നില നിൽപ്പിനു വേണ്ടി മാത്രമാണ് പി സി തോമസിനെ ജോസഫ് കൂടെ കൂട്ടിയിരിക്കുന്നത്. അത് പി സി ക്കും നന്നായി അറിയാം.

പി സി ജോർജിന് യു ഡി എഫിൽ കയറിക്കൂടുക എന്നത് മാത്രമാണ് രക്ഷമാർഗം. ജോർജ്ജ് വന്നാൽ പൂഞ്ഞാർ, കാഞ്ഞിരപ്പള്ളി, പാലാ മണ്ഡലങ്ങളിൽ അത് ഗുണം ചെയ്യുമെന്നത് കൊണ്ട് ജോർജിന്റെ മുന്നണി പ്രവേശം ഉറപ്പാണ്.

എന്തായാലും ഇനിയുള്ള കാലത്തും കേരളാ കൊണ്ഗ്രെസ്സ് ഇരുമുന്നണികളിലും കാണും എന്നത് മാത്രമാണ് ഉറപ്പുള്ള ഏക വസ്തുത.

സംഭവാമി യുഗേ യുഗേ.

കോവിഡ് കാലത്തെ ദേബ്ജീത്തിന്‍റെ (ദേബ്ജീത് സാരംഗി) അപ്രതീക്ഷിതമായ വേർ‍പാട്‌ ഒഡീഷയിലെ ആദിവാസി സമൂഹത്തിനൊരു വലിയ നഷ്ടമാണ്. ഒഡീഷയിലെ ആദിവാസി സമൂഹത്തോടൊപ്പം പ്രവർ‍ത്തിച്ച് അവരോടൊപ്പം ജീവിച്ച് അവരുടെ ജീവിതരീതിക്ക് സ്വാശ്രയത്വത്തിന്റെ വിവരണങ്ങൾ നിർമ്മിക്കുന്നതിൽ സജീവ പങ്കാളിയായിരുന്നു ദേബ്ജിത്. ലിവിങ് ഫാംസ് എന്ന സർക്കാരിതര സംഘടനയുടെ തേരാളിയായിരുന്ന ദേബ്‌ജിത്‌ ഈ ലേഖനം എഴുതിയത് 2019 ല്‍ ആണെങ്കിലും ഇതിലുന്നയിക്കുന്ന വിവിധ പ്രശ്നങ്ങളും അതിനുള്ള പരിഹാര നിർദ്ദേശങ്ങളും ഇന്നും വളരെ പ്രസക്തമാണ്‌. ഇത് ഒഡീഷയുടെ പശ്ചാത്തലത്തില്‍ എഴുതിയതാണെങ്കിലും ഒരു പരിധിവരെ മറ്റ് സംസ്ഥാനങ്ങളിലും ലോകത്തിലെ മറ്റ് ആദിവാസി സമൂഹങ്ങള്‍ നേരിടുന്നതുമായ പ്രശ്നങ്ങളോട് ചേർന്ന് നില്‍ക്കുന്നതുമാണ്. ഈ പരിഭാഷ അദ്ദേഹത്തിന്റെ സ്മരണയ്ക്ക് സമർപ്പിക്കുന്നു.

ആദിവാസികളും വികസന പരിപ്രേക്ഷ്യവും

ആദിവാസി സമൂഹത്തിന്റെ ജീവിത വീക്ഷണവും കാഴ്ചപ്പാടുകളും ശരിയായ രീതിയിൽ ഉൾക്കൊള്ളാതെ അധികാര സംവിധാനങ്ങളിലൂടെ അവരെ അടിമുടി മാറ്റുന്ന തെറ്റായ വികസന നയങ്ങളും പദ്ധതികളും ആ ജനതയുടെ തനതായ നിലനില്പിനെ കാര്യമായി ബാധിക്കുന്നു എന്നത് പറയേണ്ടതില്ലല്ലോ. മുഖ്യധാരാ വികസനമെന്ന പേരിൽ നടപ്പാക്കുന്ന മിക്ക പദ്ധതികളും അവർക്കിടയിൽ ഉത്കണ്ഠയും രോഷവും വർദ്ധിപ്പിക്കാനേ ഇടയായിട്ടുള്ളൂ. അതിനുള്ള കാരണങ്ങൾ വളരെ ലളിതമാണ്. മത്സരാധിഷ്ഠിത വ്യവഹാര രീതികളിലൂടെ ആദിമ ജനതയുടെ ഭൂമിയിലേക്കും ജീവിതത്തിലേക്കുമുള്ള കടന്നു കയറ്റങ്ങൾ ‍ അവരുടെ സാംസ്‌കാരിക പൈതൃകത്തെയും നിലനിൽപ്പിനെയും വലിയ രീതിയിൽ ബാധിക്കുന്നു.

വനവും ഭൂമിയും

ആദിമ ഗോത്ര ജനതയെ അവരുടെ ആവാസ വ്യവസ്ഥയിൽ നിന്നും പറിച്ചെറിയുന്ന പ്രക്രിയ എത്രയോ നൂറ്റാണ്ടുകളായി തുടരുന്നതാണ് എന്ന് ചരിത്രപരമായ പഠനങ്ങൾ കാണിക്കുന്നു. നിരന്തരമായി ആട്ടിയോടിക്കപ്പെടുകയും തങ്ങൾക്കന്യമായ സ്ഥലങ്ങളിലേക്ക് പുനരധിവാസം എന്ന പേരിൽ വേരുകൾ അറുത്ത് മാറ്റപ്പെടുകയും ചെയ്യുമ്പോള്‍ അവർക്ക് അവരുടെ ലോകവും ജീവിതവും നഷ്ടപ്പെടുകയാണ്. കണക്കുകൾ നമ്മോട് പറയുന്നത് ഒരു തുണ്ടു ഭൂമി പോലുമില്ലാത്ത ആദിവാസി കുടുംബത്തിന്റെ അനുപാതം 1987-88 ലെ 16 ശതമാനത്തില്‍ നിന്ന് 2011-12 ൽ 24 ശതമാനം ആയി ഉയർന്നു എന്നതാണ്. നിലനിൽപ്പിനായുള്ള വനവിഭവങ്ങളുടെ ഉപയോഗവും വനങ്ങളിലെ അവരുടെ സഹവർത്തിത്വവും സർക്കാരുകൾ കടന്നുകയറ്റമായി കണക്കാക്കുന്നു എന്നത് എന്തൊരു വിരോധാഭാസം.

2006 ലെ Scheduled Tribes and Other Traditional Forest Dwellers (Recognition of Forest Right) Act ൽ ആദിവാസികളുടെ അവകാശങ്ങളെ അംഗീകരിച്ച് ഈ നിയമം ഭേദഗതി ചെയ്യാൻ ശ്രമിച്ചിരുന്നു, അതായത് വനവിഭവങ്ങൾ ശേഖരിക്കാനും ഉപയോഗിക്കാനുമുള്ള ആദിവാസികളുടെ അവകാശത്തെ സംരക്ഷിക്കാൻ ഉതകുന്നതായിരുന്നു ഈ ഭേദഗതി. പക്ഷെ ഈ വനാവകാശ നിയമം (Forest Rights Act ) അപര്യാപ്തമായ സാമൂഹ്യ അവബോധത്താലും പരസ്പരവിരുദ്ധമായ നിയമങ്ങൾ കൊണ്ടു വന്നതിലൂടെയും സമർപ്പണ മനോഭാവമില്ലാതെ നടപ്പാക്കാൻ ശ്രമിച്ചതിനാൽ ഉണ്ടായ ഭരണപരമായ തടസ്സങ്ങളുടെയും ഇടയിൽ പരാജയപ്പെട്ടു.

അധികാര നിയന്ത്രണങ്ങൾ ഉപേക്ഷിക്കാൻ വിമുഖത കാണിക്കുന്ന ഫോറസ്റ്റ് ബ്യൂറോക്രസിവൃന്ദം ഈ നിയമത്തെ ‘കയ്യേറ്റം’ ക്രമീകരിക്കുന്നതിനുള്ള ഒരുപകാരണമായി വ്യാഖ്യാനിച്ചു. ഇതിനു പുറമെ പരിസ്ഥിതി -വനം- കാലാവസ്ഥാ മന്ത്രാലയം വനാവകാശ നിയമത്തെ (FRA) ദുർബ്ബലപ്പെടുത്തുന്നതും ഗ്രാമസഭ പോലുള്ള പ്രാദേശിക ഭരണ സമിതികളുടെ അധികാരം പരിമിതപ്പെടുത്തുന്നതുമായ പുതിയ നിയമങ്ങൾ നടപ്പാക്കാൻ ശ്രമിക്കുന്നതായി (ഗിരിജന വകുപ്പ് തടസ്സവാദം ഉന്നയിച്ചിട്ടു കൂടി) റിപ്പോർട്ടുകൾ ഉണ്ട്.

എന്തൊക്കെ ചെയ്യാന്‍ കഴിയും?

കൂട്ടായ മനുഷ്യവാസത്തിന്റെ കീഴിൽ ഓരോ ചെറിയ തീരുമാനങ്ങളുമെടുക്കുന്ന താഴെത്തട്ടിലുള്ള ഭരണ സംവിധാനങ്ങളിലും ഓരോ വ്യക്തിക്കും തന്റേതായ അവകാശവും ശേഷിയുമുണ്ടെന്നും അതിൽ പങ്കെടുക്കാനുള്ള അവസരവും സുതാര്യതയും സജീവമായി നിലനിർത്തുന്നുണ്ടെന്നും ഉറപ്പു വരുത്തണം. തദ്ദേശീയമായ സമൂഹങ്ങൾ ‍ തങ്ങളുടെ വനവകാശത്തെ തിരിച്ചറിയുകയും വനാവകാശത്തിനായി വിവിധ സമൂഹങ്ങൾ തങ്ങളുടെ കമ്മ്യൂണിറ്റി ഫോറസ്റ്റ് റൈറ്റ്സ് ക്ലെയിമുകൾ എഫ്‌ആർ‌ഏ ക്ക് കീഴിൽ സമർപ്പിക്കുന്നതിന് അണിനിരക്കുകയും അനീതികൾ നിയമപരമായി ചോദ്യം ചെയ്യുകയും വേണം. അതേ സമയം വന സമ്പത്തുകളുടെ പുനരുജ്ജീവനത്തിലും വനങ്ങളുടെ സ്വാഭാവിക സവിഷേതകൾ നിലനിർത്തുന്നത്തിലുമുള്ള പ്രവർത്തനങ്ങളിൽ ഇടപെടുകയും വേണം.

സംസ്കാരവും വിദ്യാഭ്യാസവും

വിദ്യാഭ്യാസവും സാക്ഷരതയും അനിവാര്യമാകുമ്പോൾ തന്നെ തങ്ങളുടെ ഗ്രാമം വിട്ടുള്ള റസിഡൻഷ്യൽ സ്‌കൂൾ സമ്പ്രദായം തങ്ങളുടെ കുട്ടികളെ ഭൂമിയിൽ നിന്നും വനത്തിൽ നിന്നും പരമ്പരാഗത കൃഷിയിൽ നിന്നും സംസ്കാരത്തിൽ നിന്നും അന്യമാക്കുമെന്ന് മാതാപിതാക്കൾ ആശങ്കപ്പെടുന്നു. മുഖ്യധാരാ വിദ്യാഭ്യാസം തുടരുന്ന റസിഡൻഷ്യൽ സ്‌കൂളിൽ നിന്ന് തങ്ങളുടെ വീട്ടിലേക്കും കാട്ടിലേക്കും പോകാൻ കഴിയുന്നത് വർഷത്തിൽ ഒരിക്കൽ മാത്രമാണ്. ഇങ്ങിനെ ചെല്ലുന്ന കുട്ടികൾ തികച്ചും വിച്ഛേദി ക്കപ്പെട്ട രണ്ടു ലോകങ്ങളെ കൂട്ടി ബന്ധിപ്പിക്കാൻ പാടുപെടുന്നു. മുഖ്യധാരാ ജീവിതത്തിന്റെ ഭാഗമാകാനുള്ള ശ്രമത്തിൽ പലർക്കും തങ്ങളുടെ ആദിവാസി അസ്തിത്വം നഷ്ടപ്പെടുന്നു. മേലെനിന്ന് താഴേക്കടിച്ചേൽപ്പിക്കുന്ന വിദ്യാഭ്യാസ രീതി പ്രകൃതിയുമായി ചേർന്ന് മുന്നോട്ട് പോകുന്ന അറിവിനെ നിഷേധിക്കുന്നു എന്നതൊരു യാഥാർഥ്യമാണ്.

“ഞങ്ങളുടെ മുത്തശ്ശനും മുത്തശ്ശിയും ഞങ്ങൾക്ക് കൈമാറിയത് പോലെ ആചാരങ്ങളും നിയമങ്ങളും ജീവിത രീതികളും ഞങ്ങളുടെ കുട്ടികൾക്കും കൈമാറേണ്ടതുണ്ട്. ഒരു ആദിവാസി എന്ന അഭിമാനത്തോടെ അവർ കടന്നു പോകേണ്ടതുണ്ട്. ഈ പരമ്പരാഗത അറിവില്ലാതെ കുട്ടികൾ ഭാവിയിൽ ദുർബ്ബലമായ ‘വിദ്യാഭ്യാസം’ ലഭിച്ച് ഭൂമിയിൽ നിന്നന്യമാകും” എന്നൊരമ്മ പറയുന്നു.

എന്തൊക്കെ ചെയ്യാന്‍ കഴിയും?

സാധ്യമായ സങ്കീർണമല്ലാത്ത ബദലുകൾ ആലോചിക്കുകയും പുതിയ വികസന പ്രക്രിയയുടെ ഭാഗമായ വിദ്യാഭ്യാസവും ആദിവാസികളുടെ ജീവിതത്തിന്റെ ഭാഗമായ അറിവും ഒന്നിച്ചു ചേർ‍ത്ത് അവരുടെ ഭാവി ഭാവനയിൽ കാണാനുള്ള ശ്രമങ്ങൾക്കായി സത്യസന്ധമായ ഇടപെടലുകളും കൂട്ടായ ചർച്ചകളും സാധ്യമാവണം.

ആദിവാസി സമൂഹത്തിലെ മുതിർന്നവരും പുതിയ തലമുറയും തമ്മിലുള്ള പരസ്പര സംവാദത്തിനും അറിവിൻ്റെ കൊടുക്കൽ വാങ്ങലുകൾക്കും വിദ്യാഭ്യാസ മേഖലയിൽ ഒരു കൃത്യമായ ഇടം ഉണ്ടാകണം. സമൂഹത്തിൽ ഒന്നിച്ച് ജീവിക്കുന്നതിന്റെ പ്രാധാന്യവും അതിൽ പ്രകൃതിയുടെ ബന്ധവും പുതിയ തലമുറയിലേക്ക് പകരാൻ മുതിർന്നവർ അധ്യാപകരായി മാറണം.

പുതിയ ആദിവാസി സമൂഹങ്ങൾക്ക് ഇണങ്ങുന്ന പാഠ്യപദ്ധതി നിർമ്മിക്കുന്നതിന്, ആദിവാസികളുടെ നേതാക്കളും ചിന്തകൻമാരുമായി മുഖ്യധാരാ സ്ഥാപനങ്ങളിലെ ശാസ്ത്രജ്ഞരും പണ്ഡിതന്മാരും തുടർ‍ച്ചയായി സംവദിക്കണം. പാഠ്യപദ്ധതികൾ തങ്ങളുടെ ആവാസ വ്യവസ്ഥയ്ക്ക് ഇണങ്ങിയും പ്രാദേശിക പ്രശ്നങ്ങളെ അടിസ്ഥാനമാക്കിയും തങ്ങളുടെ ജീവിത രീതിയോടൊത്തു പോകുമ്പോഴാണ് വിദ്യാഭ്യാസം ആദിവാസികളോട് നീതി പുലർത്തുന്നത്.

കൃഷിയും ഉപജീവനവും

ആദിവാസികളുടെ മണ്ണിന്റെയും പ്രകൃതിയുടെയും ജൈവിക ബന്ധവും നവീനവും പരമ്പരാഗതവുമായ സാമ്പത്തിക ഉല്പാദനക്രമങ്ങളും ശാസ്ത്രവും ആരോഗ്യവും ഒക്കെ ഒന്നായൊഴുകുന്ന ധാരയായിരിക്കണം കൃഷിയുടെ അടിസ്ഥാന വിദ്യാഭ്യാസം . എന്നിരുന്നാലും, കഴിഞ്ഞ കുറെ വർഷങ്ങളായി ജൈവ വൈവിധ്യ കാർഷിക രീതികൾ അപകടത്തിലാണ്. ആധുനികവൽക്കരണത്തിന്റെ പേരിൽ നാടൻ വിത്തിന്റെ വൈവിധ്യങ്ങൾ ഇല്ലായ്മ ചെയ്യുകയും ഉയർന്ന വിള ലഭിക്കുന്ന വിത്തുകൾ പ്രചരിപ്പിക്കുകയും വാണിജ്യ താല്പര്യത്തോടെയുള്ള ഏക വിളകളും പ്ലാന്റേഷനുകളും ഉയർന്നു വരികയും ചെയ്തു. അതിലൂടെ ആദിവാസി ജനതയുടെ കൃഷിയിടങ്ങളും വനങ്ങളും അന്യംനില്‍ക്കുന്നതിലെക്ക് എത്തിച്ചു.

എന്തൊക്കെ ചെയ്യാന്‍ കഴിയും?

ആദിവാസി ജനതയുടെ ജീവിതരീതിക്കും അറിവിനും അനുസൃതമായി അവരുടെ കാർഷിക പരിസ്ഥിതിയുടെ സത്തയെ അടിസ്ഥാനമാക്കിയുള്ള ഉപജീവനമാർഗങ്ങൾ സൃഷ്ടിക്കണം. ഉൽപാദനവും ഉപഭോഗവും ജനാധിപത്യവൽക്കരിക്കുകയും, പ്രാദേശിക സ്വാശ്രയത്വം വർദ്ധിപ്പിക്കുന്നതിന് പൊതുവായ പാരിസ്ഥിതിക സവിശേഷതകളുള്ള ഗ്രാമങ്ങളുടെ ക്ലസ്റ്ററുകൾ ഉൾപ്പെടുന്ന ഗോത്രവർഗ ഗ്രാമങ്ങൾക്ക് പരസ്പരം ചരക്കുകളും സേവനങ്ങളും വ്യാപാരം ചെയ്യാൻ വഴിയൊരുക്കുകയും പുറത്തുനിന്നുള്ള കമ്പോളത്തെയും സർക്കാരിനെയും ആശ്രയിക്കുന്നത് കുറയ്ക്കുകയും ചെയ്യുന്ന സംവിധാനങ്ങളും പദ്ധതികളും ആസൂത്രണം ചെയ്യണം.

ആരോഗ്യവും പോഷണവും

ആദിവാസികൾ ഇന്ത്യൻ ജനസംഖ്യയുടെ 8.6 ശതമാനം മാത്രമേ ഉള്ളുവെങ്കിലും, ദാരിദ്ര്യരേഖയ്ക്ക് താഴെയുള്ള ഇവരുടെ ആരോഗ്യപ്രശ്നങ്ങള്‍ അടിയന്തിര ശ്രദ്ധ കൊടുക്കേണ്ട ഒന്നാണ്. ഭക്ഷ്യ, പോഷകാഹാര സുരക്ഷയെക്കുറിച്ച് പറയുമ്പോൾ, ആദിവാസികൾക്കിടയിൽ ഇതൊരു വെല്ലുവിളിയാണ്. വനത്തിലെ പരമ്പരാഗത ഭക്ഷ്യ സ്രോതസ്സുകൾ നഷ്ടപ്പെടുന്നത് മുതൽ കൃഷി ഭൂമിയുടെ ഇടങ്ങൾ കുറയുന്നതും വിഷലിപ്തമായ വളങ്ങളും കീടനാശിനികളുടെ കടന്നുവരവും ഭൂമിയുടെ മണ്ണിനും ആരോഗ്യത്തിനും ആദിവാസികളുടെ തനത് കൃഷിരീതികൾക്കും വലിയൊരു ഭീഷണിയായി വളർന്നിട്ടുണ്ട്. ഇതെല്ലാം ആദിവാസി സമൂഹങ്ങളിലെ ഗണ്യമായ ഒരു വിഭാഗത്തെ ഭക്ഷ്യക്ഷാമത്തിലും പട്ടിണികളിലും എത്തിക്കുന്നു.

എന്തൊക്കെ ചെയ്യാന്‍ കഴിയും?

ബാഹ്യ സംസ്കാരത്തിലൂടെ മാറുന്ന ഭക്ഷണക്രമങ്ങളെ അഭിസംബോധന ചെയ്യുന്നതിനും, തനതായ ആരോഗ്യ സമ്പ്രദായങ്ങളുടെ പുനരുജ്ജീവനവും ആരോഗ്യ സുരക്ഷയും ഉറപ്പു വരുത്തുന്നതിനും ഒപ്പം സുരക്ഷിതവും പോഷകസമൃദ്ധവുമായ നല്ല ഭക്ഷണം ഉൽ‌പാദിപ്പിക്കുന്നതിനും ഭക്ഷണ വൈവിധ്യത്തെ പ്രോത്സാഹിപ്പിക്കുന്നതിനും സമീകൃതാഹാരം ഉറപ്പാക്കുന്നതിനും പ്രാദേശിക ഭക്ഷ്യ സംവിധാനങ്ങൾ പുനക്രമീകരിക്കേണ്ടതുണ്ട്. ആദിവാസി ജനതയെയും പാർശ്വവത്കരിക്കപ്പെട്ട മറ്റ് സമൂഹങ്ങളെയും ബാധിക്കുന്ന പോഷകാഹാരക്കുറവ് പരിഹരിക്കുന്നതിന്, അവരുടെ അടിസ്ഥാന പ്രശ്നങ്ങൾ പരിശോധിക്കേണ്ടതും അത്യാവശ്യമാണ്.

ദാരിദ്ര്യം, കടബാധ്യത, ഭക്ഷ്യ അരക്ഷിതാവസ്ഥ, ഉൽപാദന സ്രോതസുകളിൽ ഉള്ള അവകാശങ്ങളിലെ നിയന്ത്രണം തുടങ്ങിയവയെല്ലാം അവരുടെ ആരോഗ്യത്തെ സാരമായി ബാധിക്കുന്നു. ആധുനിക ചികിത്സാ രീതികളും ഡോക്ടർമാരും ഗോത്രവിഭാഗത്തിന്റെ പരമ്പരാഗത ആരോഗ്യ രീതികളുമായി ചേർന്ന് പ്രവർത്തിക്കുകയും, ആരോഗ്യ സംരക്ഷണം ആവശ്യമുള്ള രോഗങ്ങളെയും ക്ലിനിക്കൽ സഹായം ആവശ്യമുള്ള രോഗങ്ങളെയും വേർതിരിച്ചറിയാനുള്ള ഒരു സംവിധാനം കൊണ്ടുവരികയും ചെയ്യേണ്ടത് നമ്മുടെ കടമയാണ്.

Originally published on India Development Review and can be viewed here.

ലിവിങ് ഫാംസ്
നഷ്ടപ്പെട്ട ഇടങ്ങൾ വീണ്ടെടുക്കുന്നതിനും സമൂഹത്തിനുള്ളിൽ ഐക്യദാർ‍ഢ്യം ശക്തിപ്പെടുത്തുന്നതിനും പ്രാദേശിക ഭക്ഷ്യ സമ്പ്രദായങ്ങളിൽ നിയന്ത്രണം വീണ്ടെടുക്കുന്നതിനും മനുഷ്യരുമായും പ്രകൃതിയുമായും സഹകരിച്ച് വർ ത്തിക്കുന്ന രീതികളെ പ്രോത്സാഹിപ്പിക്കുന്ന, ദേബ്ജീത് തുടങ്ങിവെച്ച ലിവിംഗ് ഫാംസ് ഒഡീഷയിലെ റയഗഡയില്‍ പ്രവർത്തിക്കുന്നു.

ഞാൻ ഈ കുറിപ്പ് എഴുതുമ്പോൾ ചെല്ലാനം-കൊച്ചി തീരത്തെ ജനങ്ങൾ നിലനിൽപ്പിനു വേണ്ടിയുള്ള നെട്ടോട്ടത്തിലാണ്. ചെല്ലാനം തീരം കണ്ട ഏറ്റവും വലിയ കടൽകയറ്റങ്ങളിൽ ഒന്നാണ് ഇപ്പോൾ സംഭവിച്ചു കൊണ്ടൊരിക്കുന്നത്. ചെല്ലാനം പഞ്ചായത്തിലെ ഡിവൈൻ ചാപ്പലിനു പടിഞ്ഞാറ് രണ്ടു വീടുകൾ കടൽ കയറ്റത്തിൽ തകർന്നു എന്ന സ്ഥിരീകരിക്കാത്ത വാട്സ് ആപ്പ് സന്ദേശങ്ങൾ വന്നിട്ട് അൽപ നേരം ആയിട്ടേ ഉള്ളു. എങ്ങും കടൽ കലികൊണ്ട് സംഹാര താണ്ഡവമാടുന്ന വിഡിയോ ക്ലിപ്പുകൾ കൊണ്ട് വാട്സ് ആപ്പ് നിറഞ്ഞിരിക്കുന്നു. അപ്രതീക്ഷിതമായെത്തിയ ന്യൂനമർദ്ദവും ചുഴലിക്കാറ്റും കേരള തീരത്താകെ ശക്തമായ കടൽ കയറ്റത്തിന് കാരണമായിട്ടുണ്ട്. എന്നാൽ ചെല്ലാനം-കൊച്ചി തീരത്തെ സംബന്ധിച്ചിടത്തോളം ഈ കടൽകയറ്റം അപ്രതീക്ഷിതം എന്ന് പറയാൻ കഴിയില്ല. അവർ അത് പ്രതീക്ഷിച്ചതാണ് . ഇന്നല്ലെങ്കിൽ നാളെ ചെല്ലാനത്തു കടൽ കയറും എന്ന് ജനങ്ങൾക്കറിയാം. ന്യൂനമർദ്ദവും ചുഴലിക്കാറ്റും ഒന്നുമില്ലെങ്കിലും ചെല്ലാനത്ത് കടൽ കയറും എന്നത് സർക്കാരിനും അറിയാം. അതാണ് ചെല്ലാനം-കൊച്ചി തീരത്തെ ജനങ്ങളുടെ ദുരിതത്തെ കൂടുതൽ പ്രതിഷേധാർഹവും രോഷജനകവുമാക്കുന്നത്.

ചെല്ലാനം-കൊച്ചി തീരത്തിന്റെ കടൽകയറ്റത്തിനു പതിറ്റാണ്ടുകളുടെ പഴക്കമുണ്ട്. ഈ തീരം നേരിടുന്ന ശക്തമായ തീരശോഷണം ആണ് ഇത്ര രൂക്ഷമായ കടൽകയറ്റത്തിന് കാരണം. ആദ്യകാലങ്ങളിൽ കടൽകയറ്റത്തിനും തീരശോഷണത്തിനും കാരണമായത് കേരളതീരത്തെ ‘മഡ്ബാങ്കുകൾ, എന്നറിയപ്പെടുന്ന പ്രതിഭാസമായിരുന്നു. നമ്മുടെ തീരക്കടലിലെ ഒഴുക്ക് വർഷത്തിൽ മഹാഭൂരിപക്ഷം സമയത്തും സാധാരണ ഗതിയിൽ വടക്കു നിന്നും തെക്കോട്ടാണ്. ഇടയ്ക്കു ഈ ഒഴുക്ക് നേർ വിപരീതമായും വരും. ഈ ഒഴുക്കിനോടൊപ്പം തീരത്തെ മണ്ണും തീരത്തിന് സമാന്തരമായി സഞ്ചരിക്കും. ആലപ്പുഴ തീരത്ത് രൂപം കൊള്ളുന്ന മഡ്ബാങ്ക് തെക്കോട്ട് ഒഴുകി പോകുന്ന മണലിന്റെ തിരിച്ചൊഴുക്കിനെ തടസ്സപ്പെടുത്തുന്നതിനാൽ ചെല്ലാനം-കൊച്ചി തീരം കടുത്ത തീരശോഷണം അനുഭവിച്ചിരുന്നു. ഇതായിരുന്നു ആദ്യകാലങ്ങളിൽ ഈ പ്രദേശത്തെ കടൽകയറ്റത്തിന് കാരണമായിരുന്നത്. എന്നാൽ പിന്നീട് ഈ മഡ് ബാങ്ക് പ്രതിഭാസം നമ്മുടെ തീരത്ത് നിന്നും അപ്രത്യക്ഷമായി. പക്ഷെ അപ്പോഴേക്കും ഈ തീരത്ത് തീരശോഷണത്തിനും കടൽകയറ്റത്തിനും പുതിയ കാരണങ്ങൾ മനുഷ്യർ ഒരുക്കി കഴിഞ്ഞിരുന്നു.

കൊച്ചി കപ്പൽച്ചാലിന്റെ നിർമ്മാണവും അതിന്റെ ആഴം നിലനിർത്തുന്നതിനും വർദ്ധിപ്പിക്കുന്നതിനും വേണ്ടി നടത്തുന്ന ഡ്രഡ്ജിങ്ങും ആണ് ചെല്ലാനം-കൊച്ചി തീരം ഇന്ന് നേരിടുന്ന കടൽ കയറ്റത്തിനും തീരശോഷണത്തിനും പ്രധാന കാരണം. കപ്പൽച്ചാൽ നിർമ്മിക്കുന്ന സമയത്തു തന്നെ ഈ അപകടം അധികാരികൾക്ക് ബോധ്യപ്പെട്ടിരുന്നു. സർ.ജോൺ വോൾഫ് ബാരി ലൈസ്റ്റർ ആൻഡ് പാർട്ണർ 18.1.1918 ന് സമർപ്പിച്ച റിപ്പോർട്ടിൽ കപ്പൽച്ചാൽ നിർമ്മാണം മൂലം അതിനു ഇരുവശത്തുമുള്ള കരകൾക്ക് ഉണ്ടാകുന്ന അപകടം പരിഹരിക്കാൻ കപ്പൽചാലിന് ഇരുവശത്തുമായി, ഫോർട്ട് കൊച്ചി-വൈപ്പിൻ കരകളിൽ, 2 മൈൽ ദൂരത്തിൽ പുലിമുട്ട് സ്ഥാപിക്കണമെന്ന് നിർദ്ദേശിച്ചിരുന്നു. എന്നാൽ ഈ നിർദ്ദേശം നടപ്പിലാക്കപ്പെട്ടില്ല. മാത്രവുമല്ല, ഇന്റർനാഷണൽ ട്രാൻസ്ഷിപ്പ്മെന്റ് ടെർമിനൽ വല്ലാർപാടത്ത് സ്ഥാപിക്കുന്നതിന് ഭാഗമായി യാതൊരു ശാസ്ത്രീയ പഠനങ്ങളോ, മുൻകരുതലുകളോ കൂടാതെ കപ്പൽച്ചാലിന്റെ ആഴം 11.7 മീറ്ററിൽ നിന്നും 17.5 മീറ്ററായി കൂട്ടുകയാണ് പോർട്ട് ചെയ്തത്. കപ്പൽ ചാലിന്റെ തെക്ക് ഭാഗത്തായി അന്ധകാരനഴി വരെ നീണ്ടു കിടക്കുന്ന തീരത്തിനാവശ്യമായ എക്കൽ പ്രദാനം ചെയ്യുന്ന സ്രോതസ്സുകൾ ഒക്കെ ഇന്ന് ഏതാണ്ട് അടഞ്ഞു പോയി കഴിഞ്ഞു. കപ്പൽ ചാലിന്റെ വടക്കു പെരിയാർ ഒഴുകി കടലിൽ ചേരുന്നതു വഴി എത്തുന്ന എക്കൽ കപ്പൽ ചാലിൽ വച്ച് തടയപ്പെടുന്നു. അങ്ങനെ ചെല്ലാനം-കൊച്ചി തീരത്തിനാവശ്യമായ എക്കൽ സ്രോതസ്സുകൾ ഇല്ലാതാകുന്നു. കപ്പൽച്ചാലിൽ കൂടി വേലിയിറക്ക സമയങ്ങളിൽ ഉണ്ടാകുന്ന കുത്തൊഴുക്കും തീരക്കടലിലെ സ്വാഭാവികമായ തെക്കോട്ടൊഴുകും കൂടി ചേർന്ന് കപ്പൽച്ചാലിന്റെ തെക്ക് ഒരു ചുഴി രൂപപ്പെടുന്നു.ഇതിന്റെ പ്രഭാവത്തിൽ കപ്പൽച്ചാലിനു തെക്കു ഏതാണ്ട് അന്ധകാരനഴി വരെ കടലിലെ സ്വാഭാവികമായ ഒഴുക്കിന്റെ ദിശ തന്നെ മാറി നേർ വിപരീതമായിരിക്കുന്നു . അതായത് കേരളത്തിലെ തീരക്കടലിൽ ഒഴുക്ക് പൊതുവിൽ വടക്കു നിന്ന് തെക്കോട്ടാകുമ്പോൾ ഈ പ്രദേശത്ത് അത് വടക്കോട്ടാണ്. ഈ വടക്കോട്ടൊഴുക്കിൽ ഒഴുകി പോകുന്ന മണ്ണ് തിരിച്ചൊഴുകി വീണ്ടും ഈ തീരത്തെത്താൻ തക്ക വിധം ശക്തമായ ഒഴുക്ക് തിരിച്ചു രൂപപ്പെടുന്നുമില്ല. ഈ സാഹചര്യം ചെല്ലാനം-കൊച്ചി തീരത്ത് നിന്നും 365 ദിവസവും മണ്ണ് ഒഴുകി നഷ്ടപ്പെടാൻ കാരണമാകുന്നു. ഇതാണ് ചെല്ലാനം-കൊച്ചി തീരത്തെ ഇന്നത്തെ ദുരവസ്ഥക്ക് കാരണം.

ചുരുക്കത്തിൽ മനുഷ്യനിർമ്മിതമായ ഒരു പാരിസ്ഥിതിക പ്രതിസന്ധിയാണ് ഇന്ന് ചെല്ലാനം-കൊച്ചി തീരം നേരിടുന്നത്. ഈ അവസ്ഥക്ക് പരിഹാരം ആവശ്യപ്പെട്ടു കൊണ്ട് കഴിഞ്ഞ ഒന്നര വർഷത്തോളമായി ചെല്ലാനം-കൊച്ചി ജനകീയവേദി എന്ന ജനകീയ കൂട്ടായ്മ രൂപീകരിച്ചു കൊണ്ട് ജനങ്ങൾ സമരത്തിലാണ്. എന്നാൽ ഒരവസരത്തിൽ പോലും ഈ ജനകീയ കൂട്ടായ്മയുടെ ആവശ്യങ്ങൾ പരിഗണിക്കാൻ ഇന്നേവരെ സർക്കാർ തയാറായിട്ടില്ല.വാസ്തവത്തിൽ ഇത് പരിഹാരമില്ലാത്ത ഒരു പ്രശ്നമല്ല. പക്ഷെ അതിനു വേണ്ട രാഷ്ട്രീയ ഇച്ഛാശക്തിയും പാരിസ്ഥിതിക അവബോധവും നമ്മുടെ സർക്കാരിനും വ്യവസ്ഥാപിത രാഷ്ട്രീയ പ്രസ്ഥാനങ്ങൾക്കും ഇല്ലാ എന്നിടത്താണ് പ്രശ്നം. അനാസ്ഥയുടെ കാര്യത്തിൽ കേരളം ഭരിച്ച രണ്ട് മുന്നണികളും കടുത്ത അവഗണനയും കുറ്റകരമായ അനാസ്ഥയുമാണ് ചെല്ലാനം-കൊച്ചി തീരത്തോട് കാണിച്ചിട്ടുള്ളത്. കേന്ദ്രം ഭരിക്കുന്ന ബിജെപി എൻഡിഎ മുന്നണിയുടെ സമീപനവും വ്യത്യസ്തമല്ല.

ചെല്ലാനം-കൊച്ചി തീരം പുനർനിർമ്മിക്കുകയും അതോടൊപ്പം തീരം സംരക്ഷിക്കാൻ പുലിമുട്ട് പാടവും നിർമ്മിക്കുകയാണ് ഈ തീരം സംരക്ഷിക്കാൻ വേണ്ടത്. കൂടാതെ നിലവിലുള്ള കടൽഭിത്തി ബലപ്പെടുത്തുകയും തകർന്നിടങ്ങളിൽ അത് പുനർനിർമ്മിക്കുകയും വേണം. തീര പുനർനിർമ്മാണത്തിനാവശ്യമായ മണ്ണ് കൊച്ചിൻപോർട്ടിൽ നിന്നും ലഭ്യമാക്കാവുന്നതാണ്. കപ്പൽ ചാലിന്റെ ആഴം നിലനിർത്താനും കൂട്ടുന്നതിനും വേണ്ടി വർഷത്തിൽ എല്ലാ ദിവസവും പോർട്ട് കപ്പൽ ചാലിൽ വന്നടിയുന്ന എക്കൽ നീക്കം ചെയ്യുകയും അത് പുറംകടലിൽ കൊണ്ട് പോയി നിക്ഷേപിക്കുകയും ചെയ്യുന്നുണ്ട്. വെറുതെ കടലിൽ തള്ളുന്ന ഈ എക്കൽ ചെല്ലാനം-കൊച്ചി തീരത്തിന്റെ പുനർനിർമ്മാണത്തിനു ഉപയോഗിക്കണം എന്നതാണ് ചെല്ലാനം-കൊച്ചി തീരവാസികളുടെ ആവശ്യം.

പക്ഷെ കേന്ദ്ര-കേരള സർക്കാരുകൾ പിന്തുടരുന്ന പുത്തൻ സാമ്പത്തിക നയങ്ങളാണ് ഇന്ന് ഈ ജനകീയ ആവശ്യങ്ങൾക്ക് ഏറ്റവും വെല്ലുവിളി ഉയർത്തുന്നത്. പുറം കടലിൽ വെറുതെ കളയുന്ന മണ്ണ് തീര സംരക്ഷണ നടപടികൾക്കു വേണ്ടി ഉപയോഗിക്കാനുള്ള പാരിസ്ഥിതിക അനുമതി പോലും പോർട്ടിനുണ്ട്.പക്ഷെ എന്നിട്ടും പോർട്ട് അത് ചെയ്യുന്നില്ല എന്ന് മാത്രമല്ല ഈ മണ്ണ് ശുദ്ധീകരിച്ചു നിർമ്മാണ മേഖലക്ക് വിറ്റു കാശാക്കാനുള്ള നിർദ്ദേശങ്ങൾ സർക്കാരിന് സമർപ്പിച്ചിരിക്കുകയാണ് കൊച്ചിൻ പോർട്ട്. മൂലധനത്തിന് ലാഭം മാത്രം നോക്കിയാൽ മതിയല്ലോ. ഇത് കൂടാതെ മോഡി സർക്കാർ അധികാരത്തിൽ വന്നതിനു ശേഷം ആവിഷ്‌ക്കരിച്ചിട്ടുള്ള സാഗരമാല എന്ന വൻകിട വികസന (?) പദ്ധതിയും അതിന്റെ ഭാഗമായുള്ള മൂലധന താൽപര്യങ്ങളും ചെല്ലാനം-കൊച്ചി തീരസംരക്ഷണ നടപടികളെ പ്രതികൂലമായി ബാധിച്ചിരിക്കുന്നു. പോർട്ട് നവീകരണം, കമ്മ്യുണിറ്റി വികസനം, പോർട്ട് അനുബന്ധ വികസനം, തീരദേശ ഹൈവേ എന്നിങ്ങനെ 4 മേഖലകളിലായി വൻകിട വികസന പദ്ധതികളാണ് സാഗരമാല പദ്ധതിയിലൂടെ ആസൂത്രണം ചെയ്യപ്പെടുന്നത്. 2016 ൽ കേന്ദ്ര സർക്കാർ സാഗരമാല പദ്ധതിയുടെ ഭാഗമായി കൊച്ചിൻ പോർടിനു വേണ്ടിയുള്ള ഒരു മാസ്റ്റർപ്ലാൻ തയാറാക്കിയിരുന്നു. അതനുസരിച്ച് പോർട്ട് കണക്ടിവിറ്റി വികസിപ്പിക്കാൻ, പോർട്ടിനോട് അനുബന്ധിച്ച് ലോജിസ്റ്റിക്ക് പാർക്കുകൾ, പ്രത്യേക സാമ്പത്തിക മേഖല, കൊച്ചി-മംഗലാപുരം, കൊച്ചി-ബാംഗ്ലൂർ വ്യവസായ ഇടനാഴിയുടെ പോർട്ടിനെ ബന്ധിപ്പിച്ചു കൊണ്ടുള്ള വികസന പദ്ധതികൾ, വെല്ലിങ്ടൺ ഐലൻഡ് കേന്ദ്രീകരിച്ച് കൊണ്ടുള്ള പോർട്ട്സിറ്റി വികസനം എന്നിങ്ങനെ ഒരുപിടി വൻകിട പദ്ധതികൾ ആവിഷ്‌ക്കരിച്ചിട്ടുണ്ട്. ഈ പദ്ധതികൾക്കാവശ്യമായ ഭൂമി ചുളുവിൽ കണ്ടെത്തുന്നതിനുള്ള നീക്കത്തിന്റെ ഭാഗമാണ് ചെല്ലാനം-കൊച്ചി തീരത്തോട് കാണിക്കുന്ന അവഗണന എന്ന് ന്യായമായും സംശയിക്കാവുന്ന വിധമാണ് കാര്യങ്ങൾ.

ഈ വസ്തുതയിലേക്കു വിരൽ ചൂണ്ടുന്നതാണ് കേരള ഹൈക്കോടതിയിൽ അന്ന് ചെല്ലാനം കൂടി ഉൾപ്പെടുന്ന പള്ളുരുത്തി നിയോജക മണ്ഡലത്തെ പ്രതിനിധീകരിച്ചിരുന്ന ദിനേശ്‌മണി എന്ന സിപിഎം നേതാവ് നൽകിയ കേസിനു സംഭവിച്ച ദുരൂഹമായ അന്ത്യം. ചെല്ലാനം തീരം നേരിടുന്ന ദുരവസ്ഥക്ക് കാരണം കൊച്ചിൻ പോർട്ട് ആണെന്നും അത് കൊണ്ട് ഈ പ്രദേശം പുലിമുട്ടുകൾ ഇട്ടു സംരക്ഷിക്കാൻ വേണ്ട നടപടികൾ സ്വീകരിക്കാൻ കൊച്ചിൻ പോർട്ടിനോടും,കേന്ദ്ര കേരളം സർക്കാരുകളോടും ആവശ്യപ്പെട്ട് ഉത്തരവിടണം എന്നതായിരുന്നു അദ്ദേഹത്തിൻറെ ആവശ്യങ്ങളിൽ പ്രധാനം. അച്യുതാനന്ദൻ നേതൃത്വം നൽകുന്ന എൽഡിഎഫ് മന്ത്രി സഭ അധികാരത്തിലിരിക്കുമ്പോഴാണ് ഒരു ഭരണകക്ഷി എംഎൽഎ ഇപ്രകാരം ഒരു കേസ് നൽകുന്നത് എന്നോർക്കണം. ഒരു പതിറ്റാണ്ടിനപ്പുറം 2020 ഒക്ടോബറിൽ ഈ കേസ്സു വിധിയായി. ചെല്ലാനത്തു കേരളം സർക്കാർ സ്വീകരിക്കാൻ പോകുന്ന ഏതാനും പദ്ധതികൾ വിവരിച്ചു സംസ്ഥാന സർക്കാർ നൽകിയ സ്റ്റേറ്റ്മെന്റ് രേഖപ്പെടുത്തികൊണ്ട് കോടതി കേസ് അവസാനിപ്പിക്കുകയായിരുന്നു. ചെല്ലാനം നേരിടുന്ന പ്രശനങ്ങൾ പരിഹരിക്കാൻ ഒട്ടും തന്നെ മതിയാകാത്ത ഏതാനും പദ്ധതികൾ വച്ച് കൊണ്ട് കേസവസാനിപ്പിക്കാൻ എന്തായിരുന്നു കാരണം? ഒറ്റ കാരണമേ അതിനുണ്ടായിരുന്നുള്ളു. 2016 ൽ കേന്ദ്ര സർക്കാർ പോർട്ട് കേന്ദ്രീകരിച്ചുള്ള സാഗർമാലാ പദ്ധതി പ്രഖ്യാപിച്ചു എന്നതാണ് അത്. ഈ പദ്ധതിയിലൂടെ വരുന്ന മൂലധന നിക്ഷേപത്തിൽ ആകൃഷ്ടരായ സർക്കാരും രാഷ്ട്രീയ നേതൃത്വവും കേസവസാനിപ്പിച്ചു തടിതപ്പി.

മറ്റൊരു ഉദാഹരണം കൂടി നോക്കുക. 2016 ലെ കൊച്ചിൻ പോർട്ട് മാസ്റ്റർപ്ലാൻ പ്രകാരം മുന്നോട്ടു വച്ച ലോജിസ്റ്റിക്ക് പാർക്ക് എന്ന പദ്ധതി എൽഡിഎഫിന്റെ നിയമസഭാ തെരഞ്ഞെടുപ്പ് പ്രകടന പത്രികയിൽ ഇടംപിടിച്ചിട്ടുണ്ട്. അത് പോലെ തന്നെ പോർട്ട് കേന്ദ്രീകരിച്ചു കൊണ്ടുള്ള പ്രത്യേക സാമ്പത്തിക മേഖല യുഡിഎഫ് പ്രകടന പത്രികയിലെ ഇടം പിടിച്ചിട്ടുണ്ട്.മൂലധന താൽപ്പര്യങ്ങൾ സംരക്ഷിക്കുന്നതിനു വേണ്ടി ജനങ്ങളോടുള്ള രാഷ്ട്രീയ വഞ്ചനയാണ് ചെല്ലാനം-കൊച്ചി തീരം ഇന്നനുഭവിക്കുന്നത്. മൂലധനനിക്ഷേപത്തെ സേവിക്കുന്ന രാഷ്ട്രീയ താൽപ്പര്യം, അവർക്കാവശ്യമായ ഭൂമി നേടിയെടുക്കാനായി കടൽകയറ്റത്തെ ഉപയോഗിക്കാൻ ശ്രമിക്കുകയാണ്. സഹികെട്ട ജനങ്ങൾ എല്ലാം ഇട്ടെറിഞ്ഞു എങ്ങോട്ടെങ്കിലും മാറി പൊയ്ക്കൊള്ളും എന്ന മോഹമാണ് അവരെ നയിക്കുന്നത്. പുനർഗേഹം എന്ന പേരിൽ ഒരു പദ്ധതി സർക്കാർ നടപ്പിലാക്കുന്നുണ്ട്. വീട് ഉപേക്ഷിച്ചു മാറി താമസിക്കാൻ താല്പര്യമുള്ള മത്സ്യ തൊഴിലാളികൾക്ക് ഭൂമി വാങ്ങിക്കുന്നതിനും വീടുവെക്കുന്നതിനുമായി പത്തു ലക്ഷം രൂപ അനുവദിക്കുന്നതാണ് പദ്ധതി.സ്വന്തമായി ഭൂമി കണ്ടെത്താൻ കഴിയാത്തവർക്ക് സർക്കാർ നിർമ്മിക്കുന്ന ഫ്ലാറ്റിലേക്ക് മാറാമെന്നും സർക്കാർ പറയുന്നുണ്ട്. മത്സ്യത്തൊഴിലാളികളെ തീരഭൂമിയിൽ നിന്ന് കുടിയിറക്കുകയും,അവരിൽ ഭൂരാഹിത്യം വർദ്ധി പ്പിക്കുകയും, കോളനിവത്ക്കരിക്കുകയും ചെയ്യുന്ന ഒരു പദ്ധതിയാണ് പുനർഗേഹം. മാത്രമല്ല തീരത്ത് നിന്നും മത്സ്യത്തൊഴിലാളികളെ അകറ്റുന്നതോടു കൂടി ആ വിഭാഗത്തിന്റെ ജീവിതം തന്നെ മാറി പോവുകയാണ് ചെയ്യുന്നത്. പരമ്പരാഗതമായി അവർ കൈമാറി പോരുന്ന കടലറിവുകൾ അതോടു കൂടി ഇല്ലാതാകുകയും ചെയ്യും. മത്സ്യത്തൊഴിലാളി സമൂഹത്തെ വംശീയമായി ഉന്മൂലനം ചെയ്യുന്ന നടപടികളായാണ് ഫലത്തിൽ ഇവയെല്ലാം മാറുന്നത്.

ചെല്ലാനം-കൊച്ചി തീരം ഇന്ന് നേരിടുന്ന ഈ രാഷ്ട്രീയ വഞ്ചനക്കും കുറ്റകരമായ അനാസ്ഥക്കും എതിരായി ശക്തമായ പ്രതിഷേധം ഉയര്ന്നുവരേണ്ടതുണ്ട്. അതോടൊപ്പം നമ്മുടെ പരിസ്ഥിതി സംരക്ഷണത്തിൽ തീരസംരക്ഷണത്തിന്റെ പങ്കു സംബന്ധിച്ച അവബോധവും രൂപപ്പെടേണ്ടതുണ്ട്.കടൽ തീരങ്ങൾ മറ്റ് ഭൂഭാഗങ്ങളിൽ നിന്ന് വ്യത്യസ്തമായി നിരന്തരം ചലിച്ചുകൊണ്ടിരിക്കുന്നു എന്ന വസ്തുതയിലാണ് പാരിസ്ഥിതികാവബോധം ഇന്നെത്തി നിൽക്കുന്നത്. ഈ അവബോധത്തെ സ്വാംശീകരിച്ചുകൊണ്ടും തീരങ്ങളുടെ പ്രാദേശിക സവിശേഷതകളും പൊതു ഘടകങ്ങളും പരിഗണിച്ചുകൊണ്ടുമുള്ള ഒരു തീരസംരക്ഷണ പദ്ധതിയാണ് നമുക്ക് വേണ്ടത്. എന്നാൽ അത്തരമൊരു പാരിസ്ഥിതികാവബോധത്തിന്റെ അടുത്തൊന്നും കേരള സർക്കാരും വ്യവസ്ഥാപിത രാഷ്ട്രീയ പ്രസ്ഥാനങ്ങളും എത്തിയിട്ടേയില്ല. ഈ അവസ്ഥയിൽ പാരിസ്ഥിതിക വിവേകത്തിൽ ഊന്നിയ തീര സംരക്ഷണ നടപടികൾ നമ്മുടെ ദൈനംദിന രാഷ്ട്രീയ വ്യവഹാരത്തിന്റെ ഭാഗമാക്കി മാറ്റിയെടുക്കേണ്ടത് അത്യാവശ്യമാണ്. അതിനിയും വൈകിയാൽ കേരളത്തിലെ തീരവും തീരജനതയും പൊതുവെയും, ചെല്ലാനം-കൊച്ചി തീരം പോലുള്ള കൂടുതൽ അപകടാവസ്ഥയിൽ ഉള്ള തീരങ്ങളും തീരജനതയും പ്രത്യേകിച്ചും കടുത്ത ദുരന്തങ്ങളെയാകും നേരിടേണ്ടി വരിക.