POLITICS

2018 ൽ പ്രളയ ജലം കേരളത്തെ വിഴുങ്ങുമ്പോൾ ചെങ്ങന്നൂര്‍ എംഎൽ എ ഗത്യന്തരമില്ലാതെ നിലവിളിക്കുകയുണ്ടായി നാളത്തെ പ്രഭാതം 50000 ത്തോളം ശവങ്ങൾ കണികാണേണ്ടി വരുമെന്നായിരുന്നു ആ വിളി . പ്രതിപക്ഷ നേതാവ് സൈന്യത്തിന്‍റെ സഹായം തേടാത്തതിൽ അരിശം കൊള്ളുകയായിരുന്നു . സൈന്യത്തിനുവേണ്ടി കേന്ദ്രത്തിനോടാവശ്യപ്പെട്ടിട്ടുണ്ട് എന്ന മുഖ്യമന്ത്രി പിണറായി വിജയന്‍റെ മറുപടി കേട്ടുകൊണ്ടാണ് ആ രാത്രി കേരളവും ലോകത്തെമ്പാടുമുള്ള മലയാളികളും ഉറങ്ങാൻ പോയത് അഥവാ ഉറക്കമിളച്ചത് . നേരം പുലർന്നപ്പോൾ കണ്ടത് കൂറ്റൻ മത്സ്യബന്ധന വള്ളങ്ങൾ അതിരുകാണാത്ത ജലപ്പരപ്പിലേക്ക , ഒറ്റപ്പെട്ടതും മുങ്ങാറായതുമായ തുരുത്തുകളെ ലക്ഷ്യമാക്കി തുഴഞ്ഞു നീങ്ങുന്നതാണ് സാധാരണ വാഹനങ്ങൾക്ക് സഞ്ചാരസാധ്യത നഷ്ടപ്പെട്ട നിരത്തുകളിലൂടെ ടോറസ്‌ ലോറികൾ കരുത്തോടെ മുന്നേറുന്നതാണ് .

” ഈ നാട്ടിലെ വെള്ളത്തെ അറിയുന്നവർ വേണം രക്ഷാ പ്രവർത്തനത്തിന് “

പ്രായോഗികമതിയായ ഒരു ഭരണകർത്താവിന്‍റെ ക്രാന്ത ദർശിത്വമാണത് . സർക്കാർ മുന്നോട്ടുവെച്ച 3000 രൂപ നിരക്കിലുള്ള പ്രതിഫലം നിരസിക്കുമ്പോൾ മത്സ്യത്തൊഴിലാളികൾ പറഞ്ഞത് ആരും മറന്നിട്ടുണ്ടാവില്ല . ‘ഞങ്ങൾക്കറിയുന്ന പ്രവൃത്തി ഞങ്ങൾ ചെയ്തു . മത്സ്യത്തൊഴിലാളികളാണ് നമ്മുടെ സൈന്യം എന്ന് മുഖ്യമന്ത്രി പറഞ്ഞുവല്ലോ .അതുമതി ‘ എന്ന അവരുടെ പ്രതികരണം കേരളം മാത്രമല്ല ലോകം തന്നെ കൃതജ്ഞതയോടെ അംഗീകരിച്ചു. ഒരൊറ്റ രാത്രി കൊണ്ടുള്ള ഏകോപനം ആ നേതാവിന്‍റെ നിർവഹണ ശേഷിക്കും സാക്ഷ്യമാണ്

കേരളത്തിന് പ്രളയ സഹായം കൊടുക്കരുതെന്ന് ആഹ്വാനം ചെയ്തവരുണ്ടായി പ്രതിപക്ഷത്ത്. അപ്പോഴും കിട്ടിയ വാഹനങ്ങളിൽ സംസ്ഥാനത്തെ യുവശക്തി കുതിക്കുകയായിരുന്നു രക്ഷാപ്രവർത്തനത്തിന് , ശുചീകരണത്തിന്. വിഭവ സമാഹരണത്തിനും വിതരണത്തിനും .

രണ്ട് വർഷങ്ങൾക്കു ശേഷം കോവിഡ് പിടിച്ചുലച്ചപ്പോൾ ആരോഗ്യ പ്രവർത്തനത്തിന് സന്നദ്ധരായ, ഒന്നും കൂടുതൽ കാംക്ഷിക്കാതെ വാർത്തയുടെ വെള്ളിവെളിച്ചത്തിൽ ഇത്തിരി ഇടം പോലും തേടാതെ , തങ്ങളുടെ അദ്ധ്വാനം പൊതുജനത്തിന് സമർപ്പിച്ച ആരോഗ്യ പ്രവർത്തകരും യുവസൈന്യവുമുണ്ടായി ഇവിടെ . വേതനമില്ലാതെ അഭിനന്ദനസാക്ഷ്യപത്രം മാത്രം പ്രതിഫലം വാഗ്ദാനം ചെയ്ത സർക്കാർ പരസ്യത്തിന് അനുകൂലമായി പ്രതികരിച്ചത് ലക്ഷങ്ങൾ ആണ് . കൊല്ലും കൊലയും സ്ത്രീപീഡനവും ഉണ്ടാവുമ്പോൾ മാത്രം മുഖവും പാർട്ടി വിലാസവും ചാർത്തിക്കിട്ടുന്ന യുവജനത്തിന്‍റെ മറ്റൊരു മുഖം. രാജ്യത്ത് മറ്റൊരു സംസ്ഥാനത്തും സമാനമായ ഒരു ജനകീയ പദ്ധതി കോവിഡ് കൈകാര്യം ചെയ്യുവാൻ വേണ്ടി രൂപീകൃതമായില്ല . ഒരു ജനതയിൽ അന്തർലീനമായ പ്രവർത്തന ക്ഷമതയും മാനുഷികതയും സാമൂഹ്യബോധവും കണ്ടറിയുകയും ആവശ്യം വരുമ്പോൾ ഏറ്റവും കുറഞ്ഞ സമയം കൊണ്ട് സമാഹരിക്കുകയും ഫലപ്രദമായി വിന്യസിക്കുകയും ചെയ്യുക – അതാണ് ഇടതു സർക്കാർ ഈകാലയളവിൽ ചെയ്തത് .

അത് സമൂഹത്തിന്‍റെ എല്ലാ തലങ്ങളിലും മുക്കിലും മൂലയിലും അനുഭവവേദ്യമായി. അത് നമുക്ക് അളക്കാൻ കഴിയുക കോൺഗ്രസിന്‍റേയും ബി ജെ പി യുടേയും തീവ്ര പ്രതികരണങ്ങളിലാണ് . ശബരിമലയിൽ അത് അഴിഞ്ഞാടി മുഖ്യ കക്ഷികളായ മുസ്ലിം ലീഗിനേയും കോൺഗ്രസ്സിനേയും സി പി എം നേയും മാറി മാറി പ്രതിക്കൂട്ടിൽ നിർത്തുന്ന കേന്ദ്ര ഏജൻസി ഇടപെടലുകളിൽ ആ പരിഭ്രാന്തി മറ നീക്കി പുറത്തു വന്നു. ഇത് തിരിച്ചറിയാനുള്ള രാഷ്ട്രീയ വിവേകം പക്ഷേ ഐക്യ ജനാധിപത്യ മുന്നണി കാണിച്ചില്ല .

തുടക്കം മുതൽ മന:സാക്ഷിയെ ഞെട്ടിപ്പിക്കുന്ന പോലീസ് അതിക്രമങ്ങൾ, അടുത്ത അനുയായികളെപ്പോലും വെറുപ്പിച്ച മാവോയിസ്റ്റ് കൊലപാതകങ്ങൾ, സ്ത്രീപീഡന കേസുകളിലെ മെല്ലെപ്പോക്ക്, പ്രകൃതി വിരുദ്ധ വികസന പദ്ധതികളോടുള്ള ആസക്തി എന്നിവ പിണറായി ഭരണത്തിന്‍റെ വിശ്വാസ്യതയെ ദുർബലപ്പെടുത്തുന്ന പിഴവുകളായിരുന്നു . പക്ഷെ പ്രാദേശിക ഭരണ സ്ഥാപനങ്ങളിലേയ്ക്ക് ഉള്ള തെരഞ്ഞെടുപ്പിൽ അവ അത്രതന്നെ സ്വാധീനം ചെലുത്തിയില്ല എന്ന് വേണം നിരൂപിക്കുവാൻ . പ്രതിസന്ധികളെ തരണം ചെയ്യുന്നതിൽ സർക്കാർ പ്രദർശിപ്പിച്ച ദൃഢ നിശ്ചയവും അതിനിടയിലും മന്ദഗതിയിലാവാത്ത വികേന്ദ്രീകൃത വികസനവും ആണ് വോട്ടർ പരിഗണിച്ചത് .

പ്രളയ കാലത്ത് മലയാളി യുവത ആഗോളമായി രക്ഷാപ്രവർത്തനത്തിലും പുനരധിവാസ ശ്രമങ്ങളിലും ഏർപ്പെട്ടപ്പോൾ കോവിഡ് കാലത്ത് എവിടെയും ദൃശ്യമായിരുന്നത് ഡി വൈ എഫ് ഐ പോലെയുള്ള ഇടതു യുവജന സംഘടനകളായിരുന്നു ഈ പരീക്ഷണ ഘട്ടത്തിൽ രണ്ടിടത്തായി നാല് ഇടതു യുവ പ്രവർത്തകർ രാഷ്ട്രീയ ശത്രുതക്ക് ഇരകളായി. അപ്പോഴും മുൻകാലങ്ങളിലെപ്പോലെ പകരക്കൊലകൾ നടത്തി തങ്ങളുടെ സന്നദ്ധപ്രവർത്തനങ്ങളെ താറടിക്കുവാൻ ഇടതു യുവ സംഘടനകൾ മിനക്കെട്ടില്ല എന്നത് പ്രതീക്ഷ നൽകുന്ന മാറ്റത്തിന്‍റെ സൂചനയാണ് . അത് പോലെ സമാനതയില്ലാത്ത സഹകരണ മാതൃകയാണ് കുടുംബശ്രീയുടെ നേതൃത്വത്തിൽ സമൂഹ അടുക്കളകൾ കാഴ്ചവെച്ചത് . മഹാ നഗരങ്ങളും കേന്ദ്ര സർക്കാരും കൈവിട്ട കുടിയേറ്റ തൊഴിലാളികൾ റെയിൽ പാളങ്ങളിലും ഹൈവേയിലും മരിച്ചു വീണപ്പോൾ കേരളസർക്കാർ അവരോട് അർഹമായ കരുതൽ കാണിച്ചു .സംസ്ഥാനത്തിന്‍റെ സർവ സന്നാഹങ്ങളെയും വിഭവങ്ങളെയും സജ്ജമാക്കുകയും ഏകോപിപ്പിക്കുകയും ചെയ്തതിന്‍റെ ക്രെഡിറ്റ് പിണറായി സർക്കാരിന്‍റെ പ്രതിച്ഛായ വർദ്ധിപ്പിച്ചു ജനം എല്ലാം കണ്ടും കേ ട്ടും തന്നെയാണ് തീരുമാനങ്ങൾ എടുക്കുന്നത്.

മഹാമാരിയാണ് ഇടതു മുന്നണിക്ക് അസാധാരണമായ ഒരു ജനസമ്പർക്ക വേദി നൽകിയത് . മുഖ്യമന്ത്രി ജനവുമായി നിത്യവും നടത്തിയ ആശയ വിനിമയം പൊതുവെ വസ്തു നിഷ്ഠമായിരുന്നു . മറ്റു സംസ്ഥാനങ്ങളിൽ ഏതാനും ആഴ്ചകൾക്കു ശേഷം കോവിഡ് പ്രതിരോധവും നിയന്ത്രണവും ഒരു മുൻഗണനാ പദ്ധതി എന്ന സ്ഥാനത്തു നിന്ന് അല്പമെങ്കിലും പുറകോട്ടു പോയപ്പോഴും കേരളത്തിലെ ഇടതു സർക്കാർ സ്ഥിരമായി കണക്കുകളും വിവരങ്ങളും ജാഗ്രതാ നിർദേശങ്ങളും അച്ചടക്ക നടപടികളുമായി ജനത്തെ അഭിമുഖീകരിച്ചു. ആരോപണങ്ങളും റെയ്‌ഡുകളും അറസ്റ്റുകളും കോടതി നടപടികളും ദിവസേന പുതു ബോക്സ് ഓഫീസ് ഹിറ്റുകൾ അവതരിപ്പിക്കുമ്പോഴും സർക്കാർ വൃത്തങ്ങൾ , പ്രത്യേകിച്ച് മുഖ്യമന്ത്രി, പ്രദർശിപ്പിച്ച മന:സാന്നിധ്യം ആരോപണങ്ങളുടെ ആഘാതം കുറക്കുവാൻ സഹായിച്ചിട്ടുണ്ട് തെരഞ്ഞെടുപ്പ് ചുറ്റുപാടിൽ അതിനൊക്കെ വളരെ പ്രാധാന്യമുണ്ട് . കേന്ദ്ര ഏജൻസികളുടെ ഇടപെടലുകൾ ഒരു overkill ആയി എന്ന് പറയാം.

കേരളത്തിന്‍റെ രാഷ്ട്രീയ വഴക്കം അനുസരിച്ചു അടുത്ത നിയമസഭാ വിജയവും മുഖ്യമന്ത്രിസ്ഥാനവും ലഭിക്കുമെന്ന കോൺഗ്രസിന്‍റെ പ്രതീക്ഷയെ പിടിച്ചു കുലുക്കുന്നതായിരുന്നു പിണറായി സർക്കാരിന്‍റെ ക്രിയാത്മക ഭരണം . പക്ഷെ മുൻവിവരിച്ച പ്രതിസന്ധികളിൽ കോൺഗ്രസ് ജനശ്രദ്ധ പിടിച്ചു പറ്റുന്ന പ്രതിപക്ഷമായി മുന്നോട്ടു വന്ന് ആ വെല്ലുവിളിയെ നേരിടാൻ ശ്രമിച്ചില്ല . ജനങ്ങൾ വോട്ടു നൽകി തെരഞ്ഞെടുത്തവരാണ് തങ്ങളെന്ന് വിസ്മരിച്ചതു പോലെ വിമർശനത്തിനു മാത്രം മുൻ‌തൂക്കം നൽകുകയായിരുന്നു പാർട്ടി നേതൃത്വം . പ്രതിപക്ഷ ജാഗ്രത സർക്കാരിന്‍റെ സാഹസികമായ പല തീരുമാനങ്ങളും തിരുത്തുവാനും ഭേദഗതി ചെയ്യുവാനും സഹായിച്ചു എന്നത് അവഗണിക്കുന്നില്ല . എന്നാൽ അതിൽക്കവിഞ്ഞ് പ്രളയ പുനർനിർമ്മാണത്തിലോ കോവിഡ് മാനേജ്മെന്‍റിന്‍റെ ഗ്രൗണ്ട് ലെവൽ പ്രവർത്തനങ്ങളിലോ അവർ സാന്നിധ്യം തെളിയിച്ചില്ല , ഒറ്റപ്പെട്ട പിഴവുകളെ പർവ്വതീകരിച്ചു ആരോഗ്യ പ്രവർത്തകരെ നിരുത്സാഹപ്പെടുത്താൻ അത്യുത്സാഹം കാണിക്കുകയും ചെയ്തു .ചിട്ടയായ ആശുപത്രി /ക്വാറന്റൈൻ അനുഭവങ്ങൾ നേടിയവരിൽ ഭിന്ന രാഷ്ട്രീയക്കാരും രാഷ്ട്രീയമില്ലാത്തവരും ഉണ്ടായിരുന്നു എന്നതോർമ്മിച്ചില്ല . വീണ്ടും അധികാരത്തിൽ വന്നാൽ തങ്ങൾ കേരളത്തെ അപനിർമിക്കും എന്ന അവസാന നിമിഷ സെൽഫ് ഗോളിന് പാർട്ടി വലിയ വിലകൊടുക്കേണ്ടിയും വന്നു .

രാജ്യത്ത് സത്യം ശരശയ്യയിൽ മോക്ഷം കാത്തു കിടക്കുന്ന ഉത്തരായണ കാലത്ത് കൃത്യവും വസ്തുതാപരവുമായ വാക്കുകളെ ജനം സ്വീകരിക്കും . കേരളത്തിലെ ജനങ്ങൾ ബി ജെ പിയെ ശങ്കയോടെ അകറ്റി നിർത്തുന്നുണ്ടെങ്കിൽ അവിടെ സത്യത്തിന് ഒരു റോൾ ഉണ്ട് . നോട്ടു നിരോധനം സാമ്പത്തിക ശുദ്ധീകരണത്തിനാണെന്നും കള്ളപ്പണം തടയാനാണെന്നും ആണയിട്ടതിനു ശേഷം പ്രധാനമന്ത്രിയുടെ പേരിൽ തന്നെ ഉറവിടം ഗോപ്യമായി വെയ്ക്കാവുന്ന പി എം കെയർ ഫണ്ട് തുടങ്ങുക , സംസ്ഥാനങ്ങൾക്ക് നികുതി വരുമാനം വെട്ടിപ്പില്ലാതെ ലഭിക്കുമെന്ന വാഗ്ദാനത്തിനു ശേഷം സംസ്ഥാനങ്ങളെ നികുതി പരാധീനതയിൽ പെടുത്തുക എന്നീ നടപടി ദൂഷ്യങ്ങളിൽ നിഷ്പക്ഷർ സത്യ വിരോധം കാണുന്നുണ്ട് വസ്തുതകൾ മറച്ചു പിടിക്കൽ അഥവാ മുഖംമൂടിയണിഞ്ഞ് അവതരിപ്പിക്കൽ .അതുവഴി അധികാരം കേന്ദ്രീകരിക്കൽ . “ഒരൊറ്റ ഇന്ത്യ ഒരൊറ്റ …”.എന്ന സൂത്രവാക്യം ഫെഡറലിസത്തിനും, സംസ്ഥാനങ്ങളുടെ തനിമക്കും ഭീഷണിയായാണ് കേരളം കണ്ടത്.

സംസ്ഥാനത്തെ ബി ജെ പി ഘടകത്തിന് പറ്റിയ പിഴവ് അവർ തങ്ങളെ കേവലം കേന്ദ്രത്തിന്‍റെ ഒരു foot note ആയി കണ്ടു എന്നുള്ളതാണ് . കേന്ദ്രനേതൃത്വത്തിന്‍റെ പ്രീതി ലഭിക്കാനുള്ള വ്യഗ്രതയിൽ തരം കിട്ടുമ്പോഴൊക്കെ തദ്ദേശീയ ജനതയെ ഇകഴ്ത്തുന്നതിൽ അഭിരമിച്ചു . പ്രകൃതി ക്ഷോഭങ്ങളുടെ മുൻപിൽ പോലും ഈ നാടിനും നാട്ടുകാർക്കും വേണ്ടി കേന്ദ്രത്തിനെ സമീപിച്ചില്ല . വിദേശ സഹായം തടസ്സപ്പെടുത്തിയതിനെ പിൻതുണച്ചു . കേരളത്തിൽ നിന്ന് സഹമന്ത്രി സ്ഥാനം വഹിക്കുന്ന വി മുരളീധരൻ സംസ്ഥാനത്തെ അഭിമുഖീകരിക്കുമ്പോൾ ‘ഞങ്ങൾ ‘എന്ന് കേന്ദ്ര സർക്കാരിനോട് ചേർന്നുനിന്നാണ് വാദിക്കുക .കേരളം മുഴുവൻ ഇടതു രാഷ്ട്രീയക്കാരാണെന്നും മത തീവ്രവാദത്തെ ഊട്ടി വളർത്തുന്നവരാണെന്നും ആവർത്തിച്ചു . സംസ്ഥാനത്തെ ന്യുനപക്ഷങ്ങൾക്കിടയിൽ ഒരു വശത്തു മുസ്ലിമുകളെ വേട്ടയാടുവാനും മറുവശത്തു ക്രിസ്ത്യൻ സഭാ നേതൃത്വത്തെ പ്രീണിപ്പിക്കുവാനും ശ്രമിച്ചു .ശബരിമലയിൽ കോടതി വിധി സ്വീകരിക്കുന്നതിലൂടെ പാർട്ടിക്ക് പോറലേൽക്കാതെ തന്നെ പുരോഗമന ഹിന്ദുവിനെ വശത്താക്കാൻ കഴിയുമായിരുന്നപ്പോൾ വികലമായ നിലപാട് മുറുകെപ്പിടിക്കുകയും സമത്വവാദികളും സ്വതന്ത്ര ചിന്തകളുള്ളവരും ആയ സ്ത്രീകളുടെ മുഴുവൻ വിരോധം സമ്പാദിക്കുകയും ചെയ്തു. കേന്ദ്ര ബി ജെ പി നേതൃത്വത്തിന്‌ വിടുവായന്മാരായ സംസ്ഥാനഭാരവാഹികളെയും ചാനൽ വക്താക്കളെയും കാശിനു വിലയില്ലെന്ന് അവർ സമ്മതിക്കില്ലെങ്കിലും, നാട്ടുകാർക്കറിയാം . തൃശൂർ മേയർ സ്ഥാനാർത്ഥി ബി ഗോപാലകൃഷ്ണനെ തോൽപ്പിച്ചു കൊണ്ടാണ് പ്രേക്ഷകർ അദ്ദേഹത്തിന്‍റെ ചാനൽ സാന്നിദ്ധ്യത്തെ എഴുതി തള്ളിയത്.

തെരഞ്ഞെടുപ്പ് ഫലം മറനീക്കി പുറത്തു കൊണ്ടുവന്നിരിക്കുന്ന ചില അപ്രിയ യാഥാർത്ഥ്യങ്ങളുണ്ട്. ഒന്ന് ബി ജെ പി യുടെ വർദ്ധിക്കുന്ന വോട്ടു ബാങ്ക് . അടിസ്ഥാനതലത്തിൽ പാർട്ടി പ്രവർത്തകർ നടത്തി വരുന്ന സന്നദ്ധ സേവനങ്ങൾ അവരുടെ ജനസ്വാധീനം വർധിപ്പിച്ച പോസിറ്റീവ് ഘടകമാണ്. ജില്ലയിൽ 18 എന്ന കണക്കിൽ സേവാ ഭാരതി പണികഴിപ്പിച്ചു കൊടുത്ത പ്രളയ പുനരധിവാസ ഗേഹങ്ങൾ മികച്ചവയാണ് . ഭരണം കിട്ടിയ പാലക്കാട് നഗര സഭയിലെ വനിതാ അധ്യക്ഷൻ സ്വന്തം പാർട്ടിയിലെ തൊഴുത്തിൽ കുത്തുകാരോടും പ്രതിപക്ഷങ്ങളോടും പൊരുതി നിന്ന് കൊണ്ട് ദൃഷ്ടി ഗോചരമായ വികസന പ്രവർത്തനങ്ങൾ നഗരത്തിന് നൽകുകയുണ്ടായി. അവർ ഇത്തവണ 28 സീറ്റുകൾ നേടി കേവല ഭൂരിപക്ഷത്തിലെത്തിയത് സ്വാഭാവികം .ഒപ്പം ദേശീയ പാർട്ടിയുടെ ഹിന്ദുത്വാഭിമാന പ്രതിച്ഛായയിൽ മോഹിതരായ മധ്യ വർഗം എണ്ണത്തിൽ വർദ്ധിച്ചു വരികയാണ് .അസത്യങ്ങളും അർദ്ധ സത്യങ്ങളും നിറഞ്ഞ വാട്സ് അപ് അക്കാദമിയിലൂടെയും അനുദിനം പങ്കാളിത്തം പെരുകിവരുന്ന ക്ഷേത്ര /ആൾദൈവാശ്രമ സദസ്സുകളിലൂടെയും ജാത്യഭിമാനം നിലനിന്ന അസ്സൽ ഹിന്ദുത്വയുടെ കല്പിത മാഹാത്മ്യം ഒരധിനിവേശ സസ്യത്തെ പോലെ പടർന്നു പിടിക്കുന്നുണ്ട്. ലോക് ഡൌൺ കാലത്തെ കിറ്റുകൾ മോദിജിയുടേതാണെന്ന്‍ ബി ജെ പിയുടെ പ്രചാരണ വാഹനത്തിൽ നിന്നും നാട്ടുകാരായ വോട്ടർമാരുടെ വായിൽ നിന്നും കേൾക്കാനിടയായി .

മറ്റൊരു വശത്ത് ഇസ്ലാമിലെ തീവ്രവാദ സംഘടനകൾ മതമില്ലാ പേരണിഞ്ഞു പൊയ്ക്കാലുകളിൽ ബഹുജനപക്ഷം നിന്ന് വിലപേശുന്നുണ്ട് . സമ്പത്ത് കുന്നുകൂടുന്ന സഭാ നേതൃത്വങ്ങൾ ഹിന്ദുത്വ ശക്തികളുമായി അവസരവാദിത്ത കൊടുക്കൽ വാങ്ങലുകളിൽ ആഭിമുഖ്യം പ്രദർശിപ്പിക്കുന്നുണ്ട് .പ്രാദേശിക സംഘടനകൾ അവിടവിടെ അരാഷ്ട്രീയ കംപാർട്മെന്‍റ് കയ്യടക്കുന്നുണ്ട്. ഇത്തരം പ്രതിലോമ പ്രവണതകൾക്കെതിരെ മുഖ്യ ധാരാ രാഷ്ട്രീയ കക്ഷികൾ ജാഗരൂകരാവുകയില്ല എന്ന് ഏകദേശം വ്യക്തമായിരിക്കുന്നു . പക്ഷെ വോട്ടർ ജാഗ്രത കാണിക്കണം .

കേരളത്തിന്‍റെ മനസ്സിൽ “കാതലുള്ള ഒരു ധിക്കാരമുണ്ട് ” തങ്ങൾ എന്ത്‌ കഴിക്കണമെന്നും എന്ത് കാണണമെന്നും എവിടെയൊക്കെ പോകാമെന്നും ആർക്ക് വോട്ടു ചെയ്യണമെന്നും തീരുമാനിക്കാനുള്ള ധിക്കാരം . അതാണിപ്പോൾ പ്രകടമായത് .

പി എൽ ലതിക

17 ആം ലോക് സഭയിലേക്കുള്ള തെരഞ്ഞെടുപ്പിന്റെ മൂന്നാം ഘട്ടം പൂർത്തിയായിരിക്കുകയാണ്. 13 സംസ്ഥാനങ്ങളിലും 2 കേന്ദ്ര ഭരണ പ്രദേശങ്ങളിലുമായി 116 ലോക് സഭാ മണ്ഡലങ്ങളിൽ തെരഞ്ഞെടുപ്പ് നടക്കുകയുണ്ടായി. ഗുജറാത്ത് (26), കേരളം (20 ), ഗോവ (2 ) എന്നിവിടങ്ങളിലെ എല്ലാ മണ്ഡലങ്ങളിലും തെരഞ്ഞെടുപ്പ് നടക്കുന്നത് മൂന്നാം ഘട്ടത്തിലാണ്. കർണാടകയിലെ (14 ), മഹാരാഷ്ട്രയിലെ (14) , യു പി യിലെ (10 ) , ആസാം (4 ) , ബീഹാർ ( 5 ) ഒഡിഷ (6 ) ഛത്തിസ്ഗഢ് (7 ) , പശ്ചിമ ബംഗാൾ (5 ) , കാശ്മീരിലെ അനന്തനാഗ് (1 ) ദാമം ഡിയു, ഭദ്ര നാഗർ ഹാവേലി എന്നീ കേന്ദ്ര ഭരണ പ്രദേശങ്ങളിലെ ഓരോ മണ്ഡലങ്ങളിൽ — ഇത്രയും ഇടങ്ങളിലാണ് തെരഞ്ഞെടുപ്പ് നടന്നത്. ത്രിപുരയിൽ കഴിഞ്ഞ തവണ നീട്ടി വച്ച തെരഞ്ഞെടുപ്പും ഈ ഘട്ടത്തിൽ നടക്കുകയുണ്ടായി. ഇതോടു കൂടി, തെക്കേ ഇന്ത്യൻ സംസ്ഥാനങ്ങളിലെയും ഗുജറാത്ത്, ഛത്തിസ്ഗഢ് , പശ്ചിമ ബംഗാൾ ഒഴികെ വടക്കു കിഴക്കൻ സംസ്ഥാനങ്ങളിലെയും തെരഞ്ഞെടുപ്പുകൾ പൂർത്തിയായി. മൂന്നാം ഘട്ടം അവസാനിച്ചതോടു കൂടി 300 ലോക്സഭാ മണ്ഡലങ്ങളിലെ വോട്ടുകൾ പോളിംഗ് ചെയ്യപ്പെട്ടു എന്നതും ശ്രദ്ധേയമാണ്. ഹിന്ദി ബെൽറ്റിലെയും പശ്ചിമ ബംഗാളിലെയും 245 സീറ്റുകളിലെ തെരഞ്ഞെടുപ്പ് മാത്രമാണ് അടുത്ത 4 ഘട്ടങ്ങളിൽ ആയി നടക്കുന്നത്.

മൂന്നാം ഘട്ടത്തോടെ പൊതു തെരഞ്ഞെടുപ്പിലെ ആവേശം പൂർണ്ണസ്ഥായിയിലെത്തി. എവിടെയും തെരഞ്ഞെടുപ്പിന്റെ ആരവങ്ങൾ മാത്രം.

16 – ആം ലോക്സഭയിൽ, മൂന്നാം ഘട്ടത്തിൽ തെരഞ്ഞെടുപ്പ് നടക്കുന്ന 116 മണ്ഡലങ്ങളിൽ, 62 സിറ്റിംഗ് സീറ്റുകൾ ബി ജെ പി യുടേതാണ്. കോൺഗ്രസ്സിന് 16ഉം , സി പി എം ന് 7ഉം , ബി ജെ ഡിക്ക് 6ഉം , എൻ സി പി ക്ക് 4ഉം , എസ് പിക്ക് 3 ഉം , ശിവസേന, ആർ ജെ ഡി, ഐ യൂ എം എൽ , എ ഐ യൂ ഡി എഫ് എന്നീ കക്ഷികൾക്ക് 2 വീതവും സീറ്റുകൾ, കേരള കോൺഗ്രസ്, തൃണമൂൽ കോൺഗ്രസ്, ആർ എസ് പി , എൽ ജെ പി, സി പി ഐ, പി ഡി പി, സ്വാഭിമാന പക്ഷ എന്നിവർക്കാണ് ഓരോന്ന് വീതവും സീറ്റുകൾ ഉണ്ട് .

മൂന്നാം ഘട്ടത്തിൽ തെരഞ്ഞെടുപ്പ് നടന്ന പ്രധാന സംസ്ഥാനം ഗുജറാത്ത് ആണ്. 26 സീറ്റുകൾ ആണ് ഗുജറാത്തിൽ ഉള്ളത്, കഴിഞ്ഞ തവണ മോദിക്ക് അനുകൂലമായാണ് ഗുജറാത്ത് വിധിയെഴുതിയത്. 26 സീറ്റും ബി ജെ പി നേടി. കഴിഞ്ഞ നിയമസഭാ തെരഞ്ഞെടുപ്പിൽ ശക്തമായ മത്സരം നടന്ന ഗുജറാത്തിൽ തുടർന്ന് നടന്ന കാലുമാറ്റത്തിലൂടെ ബി ജെ പി വീണ്ടും ശക്തി തിരിച്ചു പിടിക്കുന്ന കാഴ്ച ആണ് കണ്ടത്. ഇക്കുറി 20 മുതൽ 24 സീറ്റുകൾ വരെ ബി ജെ പി നേടിയേക്കും. കോൺഗ്രസിന് പരമാവധി 2 മുതൽ 6 വരെ സീറ്റുകൾ കിട്ടിയേക്കും. ഗുജറാത്തിയായ മോദി ഫാക്ടർ ഒരു പക്ഷെ 26 സീറ്റും വൈകാരികമായി ബി ജെ പി ക്കു നേടിക്കൊടുത്തേക്കാം.

കേരളം ആണ് മൂന്നാം ഘട്ടത്തിൽ കൂടുതൽ സീറ്റുകളിൽ തെരഞ്ഞെടുപ്പ് നടന്ന മറ്റൊരു സംസ്ഥാനം. ഇവിടെ 20 സീറ്റുകളിൽ ആണ് മത്സരം നടന്നത്. കോൺഗ്രസ് നേതൃത്വം കൊടുക്കുന്ന യു ഡി എഫും സി പി എം നേതൃത്വം കൊടുത്ത എൽ ഡി എഫും തമ്മിലാണ് പ്രധാന മത്സരം. തിരുവനന്തപുരം, പത്തനംതിട്ട, തൃശൂർ ഉൾപ്പെടെ ബി ജെ പി യുടെ നേതൃത്വത്തിലുള്ള എൻ ഡി എ യും അര ഡസൻ സീറ്റുകളിൽ എങ്കിലും കടുത്ത മത്സരം നടത്തിയിട്ടുണ്ട്. കോൺഗ്രസ് അഖിലേന്ത്യാ പ്രസിഡണ്ട് രാഹുൽ ഗാന്ധി മത്സരിക്കുന്ന വയനാടും ശശി തരൂർ മത്സരിക്കുന്ന തിരുവനന്തപുരവും ദേശീയ പ്രാധാന്യമുള്ള മണ്ഡലങ്ങൾ ആണ്. വലിയ അടിയൊഴുക്കുകൾ ഇത്തവണ ഇവിടെ നടന്നു എന്നത് ഫല പ്രവചനം തീർത്തും അസാധ്യമാക്കുന്നു. വോട്ടിങ് ശതമാനം ഉയർന്ന പശ്ചാത്തലത്തിൽ 12 മുതൽ 16 വരെ സീറ്റുകളിൽ യു ഡി എഫും 4 മുതൽ 8 വരെ സീറ്റുകളിൽ എൽ ഡി എഫും വിജയിച്ചേക്കാം. എൻ ഡി എ ഇത്തവണയും അവരുടെ അക്കൗണ്ട് തുറക്കില്ല.

ഗുജറാത്തും കേരളവും കഴിഞ്ഞാൽ ഏറ്റവും അധികം സീറ്റുകളിൽ മത്സരം നടന്നത് കർണാടകയിൽ ആണ്. 14 സീറ്റിൽ ആണ് മൂന്നാം ഘട്ടത്തിൽ കർണാടകയിൽ മത്സരം നടന്നത്. ഇതോടു കൂടി 2 ഘട്ടത്തിലായി കർണാടകയിലെ എല്ലാ സീറ്റിലും മത്സരം പൂർത്തിയായി. ഇവിടെ ബി ജെ പി ഒറ്റക്കും, കോൺഗ്രസ്സ്, ജനതാദൾ എസ് കക്ഷികൾ ഒന്നിച്ചുമാണ് മത്സരിച്ചത്. തീ പാറുന്ന പോരാട്ടമായിരുന്നു ഇക്കുറി. നിലവിൽ ഉത്തര കർണാടകയിൽ 11 സീറ്റുകളിൽ ബി ജെ പിയും മൂന്നു സീറ്റുകളിൽ കോൺഗ്രസ്സും ആണ് ഉള്ളത്. കുമാര സ്വാമിയും, ഡി കെ ശിവകുമാറും, സിദ്ധാരാമയ്യയും കൈമെയ് മറന്നാണ് ഇവിടെ ബി ജെ പി യോട് മല്ലിടുന്നത് . രണ്ടു മുൻ മുഖ്യമന്ത്രിമാരുടെ മക്കൾ മത്സരിക്കുന്ന ഷിമോഗയിൽ യെഡിയൂരപ്പയുടെ മകൻ രാഘവേന്ദ്ര ആയിരിക്കും വിജയി. കോൺഗ്രസിലെ മല്ലികാർജുന ഖാർഗ്ഗെ മത്സരിക്കുന്ന ഗുൽബർഗയിൽ അദ്ദേഹം തന്നെ ജയിക്കാൻ ആണ് സാധ്യത. ജനതാദൾ എസ് മത്സരിക്കുന്ന കോൺഗ്രസിന്റെ സിറ്റിംഗ് മണ്ഡലത്തിൽ ജനതാദൾ എസ് ജയിച്ചേയ്ക്കും . കോൺഗ്രസ്സ് 7 സീറ്റുകളിലും ബി ജെ പി 6 സീറ്റുകളിലും ജയിച്ചേക്കാം.

മഹാരാഷ്ട്രയിലെ 14 സീറ്റുകളിലേക്കാണ് രണ്ടാം ഘട്ടത്തിൽ തെരഞ്ഞെടുപ്പ് നടന്നത്. 14 ൽ 6 സീറ്റുകൾ ബി ജെ പി യും 3 എണ്ണം ശിവസേനയും ഒന്ന് ബി ജെ പി ശിവസേന സഖ്യത്തിലെ സ്വാഭിമാനപക്ഷയും നാലെണ്ണം എൻ സി പി യും ജയിച്ചിരുന്നു. കോൺഗ്രസിന് കഴിഞ്ഞ തവണ ഒരു സീറ്റും കിട്ടിയിരുന്നില്ല. അഹമ്മദ് നഗറിൽ കോൺഗ്രസ് നിയമസഭാ കക്ഷിയുടെ നേതാവ് രാധാകൃഷ്ണ വിഖെ പാട്ടീലിന്റെ മകൻ സുജയ് ബി ജെ പി സ്ഥാനാർഥി ആയി മത്സരിക്കുന്നു. ശരദ് പവാറിന്റെ മകൾ സുപ്രിയ സുലെ മത്സരിക്കുന്ന ബാരമതിയും ശ്രദ്ധ പിടിച്ചുപറ്റിയ മണ്ഡലങ്ങൾ ആണ്. ഇക്കുറി കോൺഗ്രസ് – എൻ സി പി സഖ്യം നില മെച്ചപ്പെടുത്തും എന്നാണ് നിരീക്ഷകർ അഭിപ്രായപ്പെടുന്നത്. ബി ജെ പി 4, എൻ സി പി 4, ശിവസേന 3 കോൺഗ്രസ് 2 , കോൺഗ്രസ് മുന്നണിയിൽ മത്സരിക്കുന്ന സ്വാഭിമാൻ പക്ഷ 1 എന്നിങ്ങനെയാകും മത്സര ഫലം.

ഉത്തർ പ്രദേശിലെ യാദവ മേഖലയിലെയും വടക്കേ ഉത്തർ പ്രാദേശിയിലെയും 10 സീറ്റുകളിൽ വാശിയേറിയ തെരഞ്ഞെടുപ്പാണ് നടന്നത്. കഴിഞ്ഞ തവണ പത്തിൽ 7 സീറ്റുകൾ ബി ജെ പി യും 3 സീറ്റുകൾ എസ് പിയും ആണ് ഇവിടെ നേടിയത്. മുലായംസിംഗ് യാദവ് മത്സരിക്കുന്ന മെയിൻപുരി, വരുൺ ഗാന്ധി മത്സരിക്കുന്ന പിലിബത്ത്, തുടങ്ങിയ മണ്ഡലങ്ങൾ പോരാട്ടത്തിനിറങ്ങുന്നതു മൂന്നാം ഘട്ടത്തിലാണ്. കേന്ദ്ര സംസ്ഥാന സർക്കാറിന് എതിരായ വികാരം ആണ് ഇത്തവണ ഈ മേഖലയിൽ നിഴലിക്കുന്നത്. കരിമ്പ് കർഷകരുടെ പ്രശ്‍നങ്ങൾ വൈകാരികവുമാണ്. അതിനാൽ തന്നെ ഇത്തവണ മഹാ ഗഡ്‌ബന്ധനിലെ സമാജ്‌വാദി പാർട്ടി ഈ മേഖലയിൽ 8 സീറ്റുകൾ നേടും, ബി ജെ പി ക്കു ലഭിക്കുക കേവലം 2 സീറ്റുകൾ മാത്രമാവും. കോൺഗ്രസ് മെയിൻപുരി ഒഴികെ എല്ലാ മണ്ഡലങ്ങളിലും സ്ഥാനാർത്ഥികളെ നിറുത്തിയിട്ടുണ്ട് എങ്കിലും വിജയ സാധ്യത തീർത്തും കുറവാണ്. എസ് പി സ്ഥാനാർത്ഥികൾക്ക് എതിരെ മത്സരിക്കുന്ന കോൺഗ്രസ് സ്ഥാനാർത്ഥികൾ ബി ജെ പി യുടെ വോട്ടുകൾ ഭിന്നിപ്പിക്കുന്നതു മൂലം എസ് പി യുടെ സാധ്യതകൾ വർദ്ധിക്കുകയാണ്.

മൂന്നാം ഘട്ടത്തിൽ ഒഡിഷയിലെ 6 സീറ്റുകളിൽ ആണ് ലോക്സഭയിലേക്കു മത്സരം നടന്നത്. ഭുവനേശ്വർ, പൂരി, കട്ടക്ക്, കിയോഞ്ചർ, സമ്പൽപൂർ, ധെങ്കനാൽ എന്നിവയാണ് മണ്ഡലങ്ങൾ. 6 സീറ്റുകളും ഇപ്പോൾ കൈവശം വച്ചിരിക്കുന്നത് ബി ജെ ഡി ആണ്. എന്നാൽ കട്ടക്ക്, പൂരി, ധെങ്കനാൽ സീറ്റുകളിൽ ഇത്തവണ ബി ജെ പി ക്കായിരിക്കും മുൻ തൂക്കം. ഭുവനേശ്വർ, സമ്പൽപ്പൂർ, കിയോഞ്ചർ സീറ്റുകളിൽ ഇത്തവണയും ബി ജെ ഡി ആയിരിക്കും ജയിക്കുക. കോൺഗ്രസ് ചിത്രത്തിലേ ഇല്ല എന്ന് പറയേണ്ടിയിരിക്കുന്നു. മുൻ ഐ എ എസ് ഓഫിസർ ആയ അപരാജിത സിങ് ബി ജെ പി ക്കു വേണ്ടിയും , മുൻ മുംബൈ പോലീസ് കമ്മീഷണർ ആയ അരൂപ് പട് നായിക്ക് ബി ജെ ഡി ക്കു വേണ്ടിയും മത്സരിക്കുന്ന ഭുവനേശ്വർ ആണ് ഏറ്റവും ശ്രദ്ധേയമായ മത്സരം കാഴ്ചവയ്‌ക്കുന്ന മണ്ഡലം. മൂന്നാം ഘട്ടത്തിൽ ബി ജെ പി യും ബി ജെ ഡി യും മൂന്നു വീതം സീറ്റുകൾ നേടിയേക്കും.

ബീഹാറിൽ മൂന്നാം ഘട്ടത്തിൽ മത്സരം നടന്ന ജഞ്ജർപൂർ ബി ജെ പിയും സുപൗൾ ആർ ജെ ഡി യും ഖഗാരിയ എൽ ജെ പി യും മധേപുര, അറാറിയ മണ്ഡലങ്ങൾ ആർ ജെ ഡിയും കൈവശം വച്ചിരിക്കുന്നു. പപ്പു യാദവും ശരദ് യാദവും മത്സരിക്കുന്ന മധേപുരയിലാണ് ശ്രദ്ധേയമായ മത്സരം. ആർ ജെ ഡി രണ്ടു സീറ്റിലും കോൺഗ്രസ്, ബി ജെ പി, എൽ ജെ പി എന്നിവർ ഓരോ സീറ്റിലും ജയിച്ച് നിലവിലെ സ്ഥിതി തുടരാൻ ആണ് സാധ്യത.

ആസാമിൽ മൂന്നാം ഘട്ടത്തിൽ പോളിംഗ് നടന്ന 4 മണ്ഡലങ്ങൾ, ബാർപേട്ട, ധുബ്രി, കൊക്രജാർ, ഗുവാഹത്തി എന്നിവയാണ്. നിലവിൽ എ ഐ യു ഡി എഫ് എന്ന പാർട്ടിക്കു രണ്ടു സീറ്റും ബി ജെ പി സ്വതന്ത്രൻ എന്നിവർക്ക് ഓരോ സീറ്റും ആണുള്ളത് . ഇക്കുറി കോൺഗ്രസ് 2 മുതൽ 3 വരെ സീറ്റുകൾ നേടിയേക്കും. ഒരു സീറ്റു ബോഡോ ലാൻഡ് പാർട്ടിയും.

കോൺഗ്രസിനെ സംബന്ധിച്ചിടത്തോളം ഏറ്റവും പ്രാധാന്യമുള്ള മൂന്നു മണ്ഡലങ്ങളിൽ ആണ് പശ്ചിമ ബംഗാളിൽ തെരഞ്ഞെടുപ്പ് നടന്നത്. ബംഗാളിലെ കോൺഗ്രസിന്റെ അതികായനായിരുന്ന മാൽഡയുടെ ഘനിഖാൻ ചൗധരിയുടെ സ്വാധീനമുള്ള രണ്ടു മണ്ഡലങ്ങൾ. മാൽഡ ഉത്തർ, മാൽഡ ദക്ഷിൺ. രണ്ടിലും കഴിഞ്ഞ തവണ വിജയിച്ചത് കോൺഗ്രസ് ആണ്. ഇന്ത്യൻ പ്രസിഡണ്ട് ആയിരുന്ന പ്രണാബ് കുമാർ മുക്കർജിയുടെ മകനും നിലവിലെ കോൺഗ്രസ് സിറ്റിംഗ് എം പി യുമായ അഭിജിത് മുഖർജി മത്സരിക്കുന്ന ജംഗിപൂർ, സി പി എമ്മിന്റെ നിലവിലെ സീറ്റും, കോൺഗ്രസിന് സ്വാധീനവുമുള്ളതുമായ മുഷിദാബാദ്, തൃണമൂൽ കോൺഗ്രസിന്റെ നിലവിലെ സീറ്റായ ബലൂർഘട്ട എന്നിവയാണ് മറ്റു രണ്ടു മണ്ഡലങ്ങൾ. ഈ മണ്ഡലങ്ങളിൽ കോൺഗ്രസിനും സി പി എമ്മിനും ആർ എസ് പി ക്കും വലിയ സ്വാധീനമുണ്ട് . മാൽഡ ഉത്തർ മണ്ഡലത്തിൽ നിലവിലെ കോൺഗ്രസ് എം പി മൗസും നൂർ തൃണമൂൽ കോൺഗ്രസിൽ ചേർന്ന് ജനവിധി തേടുമ്പോൾ കോൺഗ്രസിനായി നിലവിലെ എം എൽ എ യും മൗസും നൂറിന്റെ കസിനുമായ ഇഷ ഖാൻ ചൗധരിയാണ് മത്സരിക്കുന്നത്. സി പി എം എം എൽ എ, ഖാഗം മുർമു ആണ് ബി ജെ പി ക്കുവേണ്ടി ഇവിടെ മത്സരിക്കുന്നത്. പ്രവചനാതീതമാണ് ഇവിടത്തെ മത്സരഫലം .ജംഗിപ്പൂരിലും മുർഷിദാബാദിലും കോൺഗ്രസ് ശക്തമായ മത്സരമാണ് കാഴ്ച വയ്ക്കുന്നത്. ഇത്തവണ കോൺഗ്രസിന് ഇവിടെ നിന്നും 3 സീറ്റുകൾ വരെ ലഭിച്ചേക്കും, ടി എം സി, ബി ജെ പി എന്നിവർ ഓരോ സീറ്റിലും വിജയിക്കും.

ഛത്തിസ്ഗഡിൽ 7 സീറ്റിൽ ആണ് മൂന്നാം ഘട്ടത്തിൽ മത്സരം നടക്കുന്നത്. ഇതോടെ ഛത്തിസ്ഗറിലെ 11 മണ്ഡലത്തിലെയും തെരഞ്ഞെടുപ്പ് കഴിയും. കഴിഞ്ഞ തവണ ദുർഗ് മണ്ഡലത്തിൽ മാത്രമാണ് കോൺഗ്രസ്സ് ജയിച്ചത്. ഇത്തവണ 7 സീറ്റിലും വിജയ പ്രതീക്ഷയിലാണ് കോൺഗ്രസ്സ്.

ഗോവയിലെ രണ്ടു മണ്ഡലങ്ങളിൽ ഓരോ സീറ്റുകൾ വീതം കോൺഗ്രസ്സും ബി ജെ പി യും പങ്കു വയ്‌ക്കും. ത്രിപുരയിലും ഭദ്ര നാഗർവേലിയിലും ദാമം ഡിയു മണ്ഡലങ്ങളിലും വിജയ സാധ്യത ബി ജെ പി ക്കാണ്. കാഷ്മീരിലെ അനന്ത് നാഗ് മണ്ഡലത്തിൽ കോൺഗ്രസിലെ ഗുലാം നബി ആസാദും, പി ഡി പി യിലെ മെഹ്ബൂബ മുഫ്‌തിയും മാറ്റുരക്കുന്നു . 15 ശതമാനത്തിൽ മാത്രം വോട്ടിംഗ് നടന്ന ഇവിടെ പ്രവചനം അസാധ്യമാണ്.

മൂന്നാം ഘട്ടത്തിലെ 116 സീറ്റുകളിലേക്ക് നടന്ന തെരഞ്ഞെടുപ്പിൽ കോൺഗ്രസും ബി ജെ പിയും 41 വരെ സീറ്റുകളിൽ വീതം വിജയിച്ചേക്കാം, എസ് പി 8, സി പി എം 6 , എൻ സി പി 4 , ശിവസേന 3 ബി ജെ ഡി 3 , ആർ ജെ ഡി 2 , മുസ്‌ലിം ലീഗ് 2 , ടി എം സി, സ്വാഭിമാൻ പക്ഷ, കേരള കോൺഗ്രസ്, ആർ എസ് പി , ബോഡോ നാഷണൽ പാർട്ടി, എൽ ജെ പി , ജനത ദൾ എസ് എന്നിവർ ഓരോ സീറ്റ് എന്നിങ്ങനെ നേടിയേക്കും. ബി ജെ പി ക്കു 21 സീറ്റുകൾ വരെ ഈ ഘട്ടത്തിൽ നഷ്ടപ്പെട്ടേയ്ക്കും കോൺഗ്രസിന് 25 അധിക സീറ്റുകൾ ലഭിക്കുവാനാണ് സാധ്യത. സമാജ്‌വാദി പാർട്ടിയും ശിവസേനയും നില മെച്ചപ്പെടുത്തും.ബി ജെ ഡി ക്ക് കോട്ടം തട്ടിയേക്കും.

“സത്യം മയക്കു മരുന്നിൻറെ ചിറകിൽ
സ്വർഗ ത്തു പറക്കുമീ നാട്ടിൽ – ഇല്ലാത്ത
– സ്വർഗത്തു പറക്കുമീ നാട്ടിൽ
സത്യം മരിക്കുമീ നാട്ടിൽ
മനുഷ്യാ ….ഹേ മനുഷ്യാ
വലിച്ചെറിയൂ നിൻറെ മുഖം മൂടി.”

നുണകളുടെ രാജവാഴ്ചക്കാലത്താണ് രാജ്യം തിരഞ്ഞെടുപ്പിനെ നേരിടുന്നത് . ഒറ്റ തുട്ടു ചിലവാക്കാതെ ഒരു ക്ലിക്ക് കൊണ്ട് വിതയ്‌ക്കുന്ന നുണകൾ. നെഹ്‌റു മുസ്ലിം ആണെന്നും, കശ്യപ മഹർഷി തപസ്സു ചെയ്തത് കൊണ്ടാണ് കാശ്‌മീർ എന്ന് പേരുവന്നത് എന്നും, അഞ്ചു കൊല്ലത്തെ എൻ ഡി എ ഭരണകാലത്തു രാജ്യത്തു അഴിമതി ഉണ്ടായിട്ടില്ലെന്നും നിരന്തരമായി നുണപറയുന്നവരിൽഅ ഭ്യസ്ഥ വിദ്യരും പ്രൊഫഷണലുകളും ഉണ്ട്. സത്യത്തിൻറെ വികൃത മുഖം വോട്ടർമാരിൽ നിന്ന് മറച്ചു പിടിക്കപ്പെടുന്നു. അതിനെ പൊളിച്ചെഴുതുവാനുള്ള സമയമായാണ് ക്രാന്ത ദർശിയായ വോട്ടർ ഈ അവസരം ഉപയോഗിക്കേണ്ടത് .

മലയാളനാട് ജേർണൽ പ്രസിദ്ധീകരിച്ച തിരഞ്ഞെടുപ്പ് പരമ്പരയിൽ വെളിപ്പെട്ടത് തികച്ചും ബഹുമുഖമായ വീക്ഷണങ്ങളും അഭിലാഷങ്ങളും നിർദേശങ്ങളും ആണ്. പ്രമുഖ മുഖ്യധാരാ രാഷ്ട്രീയ കക്ഷികളും നേതാക്കളും വിലയിരുത്തപ്പെടുകയും വിമർശിക്കപ്പെടുകയും ചെയ്തു. എല്ലാറ്റിനും നടുവിൽ ഉയർന്നു നിന്നത് ജനാധിപത്യവും,അഭിപ്രായ സ്വാതന്ത്ര്യവും മത നിരപേക്ഷതയുംസാംസ്‌കാരിക വൈവിധ്യവും നിലനിൽക്കണമെന്ന പൊതു താല്പര്യമാണ്.
അഞ്ചു വർഷത്തെ എൻ ഡി എ ഭരണ കാലത്തു അടിസ്ഥാന സൗകര്യ വികസനത്തിൽഗതിവേഗം ദൃശ്യമായി എന്ന് ഭൂരിപക്ഷം പേരും അംഗീകരിക്കുന്നു. എന്നാൽ ഇതേ കാലയളവിൽ രാജ്യത്തു ഭയം ഉൽപ്പാദിപ്പിക്കപ്പെടുകയും പ്രസരിപ്പിക്കപ്പെടുകയും ചെയ്തു എന്ന ആശങ്ക മിക്കവരും പങ്കുവെക്കുന്നുമുണ്ട് സംസ്ഥാനത്തിനകത്തും പുറത്തും അതിനു അറുതിവരണമെന്നു ജനം ആഗ്രഹിക്കുന്നു. അതിർത്തിയി ലെ മനുഷ്യ ക്കുരുതി ഇന്ത്യക്കു അഭിമാനക രമല്ല .പൗരത്വബില്ലിലൂടെ രാജ്യത്തിനകത്ത് ചൈനീസ് മോഡൽ സിന്ജാങ് ക്യാമ്പുകൾ ഉണ്ടാവരുത്. അടിസ്ഥാന വികസനത്തിൻറെ സ്ഥിതി വിവരക്കണക്കുകൾകൊണ്ട് മൂടി വെക്കാൻ കഴിയാത്തത്ര ഭീമമായിരുന്നു, കാർഷിക ദുരിതങ്ങളും,ചെറുകിട മേഖലയിലെ തൊഴിൽ നഷ്ടവും .

ഈ വസ്തുതകൾക്ക് മേലാണ് ലോക സഭ തിരഞ്ഞെടുപ്പ് നടക്കുന്നത്

1. എന്ത് കൊണ്ട് കേരളം ബി ജെ പിയെ പുറത്തു നിർത്തണം

വിശ്വാസത്തിനും, ആചാര സംരക്ഷണത്തിനും വേണ്ടി വോട്ടു ചോദിക്കുന്നതുവഴി ബി ജെ പി കേരളത്തിൻറെ തനിമയെയും സാമൂഹ്യപുരോഗതിയെയും അവഗണിക്കുകയാണ്. ശൗചാലയത്തിന്റെയും പാചക വാതകത്തിന്റെയും കണക്കുകൾ ഈ ജനതയിൽ മതിപ്പുളവാക്കുകയില്ല. പാകിസ്ഥാനോടുള്ള എതിർപ്പ് അയല്പക്കത്തെ മുസ്ലിമിലേക്കു തിരിച്ചു വിടാനുള്ള തന്ത്രം ഇവിടെ ഇനിയും കാര്യമായി സ്വീകരിക്കപ്പെട്ടിട്ടുമില്ല. മാത്രമല്ല പ്രളയാനന്തരം പരിമിത വിഭവയായ സംസ്ഥാനത്തോട് പ്രത്യക്ഷമായ വിവേചനം പ്രദർശിപ്പിക്കുകയും ചെയ്തു. എം പി യായി ദില്ലിയിലേക്ക് പോയ സുരേഷ് ഗോപി പ്രളയ കാലത്തു അവലംബിച്ച മൗനം, ഒരു സൂചകമാണ്. ഉത്തരേന്ത്യൻ പ്രാമാണിത്തം പുലരുന്ന ആ പാർട്ടിയുടെ കണ്ണിൽ കേരളം എന്നും അപ്രധാനമായിരുന്നു. ആ സാഹചര്യത്തിലാണ് എന്നോ ഉപേക്ഷിച്ച പഴഞ്ചത്തരങ്ങളെ പൈതൃകത്വത്തിൻറെ പൊയ്‌ക്കോലം കെട്ടി എഴുന്ന ള്ളിച്ചു വോട്ടു തേടാൻ പാർട്ടി നിർബന്ധിതമായത്. പ്രധാനമന്ത്രി പ്രഖ്യാപിക്കുന്നതുവരെ വയനാട് ഒരു മുസ്ലിം ഭൂരിപക്ഷമുള്ള പ്രദേശമാണെന്നു മലയാളി ചിന്തിച്ചിട്ടില്ല. വിശ്വാസവും ആചാരവും ഇത്രയേറെ അലങ്കോലപ്പെട്ട ഒരു കാലം നാം കണ്ടിട്ടുമില്ല. ഈ സാഹചര്യത്തിൽ കേരളം അതിന്റെ ‘താന്തോന്നിത്ത’ങ്ങളോടെ നിലനിൽ ക്കാനായിരിക്കണം നാം വോട്ടു ചെയ്യേണ്ടത്.

  2. എന്ത് കൊണ്ട് രാഹുൽ ഗാന്ധി വയനാട്ടിൽ ജയിക്കണം

ഒരു തവണ കൂടി കേന്ദ്രം ബി ജെ പി മുന്നണി ഭരിക്കുകയാണെങ്കിൽ ഇപ്പോഴുള്ള ജനപിന്തുണ തുലോം കുറയുമെന്നതിനു സംശയമില്ല. രാഹുൽ ഗാന്ധിയും അദ്ദേഹത്തിൻറെ നേതൃത്വത്തിലുള്ള കോൺഗ്രസ്സും പതിന്മടങ്ങു ജനവിശ്വാസം ആർജ്ജിക്കുകയും ചെയ്യും. എങ്കിലും സർക്കാർ സ്ഥാപനങ്ങളെയും, സർവകലാശാലകളെയും ഉടച്ചു വാർത്തു വികൃതവും ദുർബലവുമാക്കുന്ന പ്രക്രിയ ബഹുദൂരം മുന്നോട്ടു പോകുമെന്ന അപകടം ഉണ്ട്. താൻ ഒരു ചൗക്കിദാർ മാത്രമാണെന്ന് പ്രധാനമന്ത്രി തന്നെ ആത്മ വിശകലനം നടത്തിയിരിക്കുന്നു. ജനങ്ങൾ തിരഞ്ഞെടുക്കേണ്ടത് വൈജാത്യങ്ങളുടെ വിളഭൂമിയായ ഈ രാജ്യത്തെ ഐക്യത്തോടെ മുന്നോട്ടു കൊണ്ട് പോവുന്ന ജനപ്രതിനിധികളെയും നേതാവിനെയുമാണ്. തൊഴിലില്ലായ്മയാണ് രാജ്യത്തെ ഏറ്റവും വലിയ സുരക്ഷാ ഭീഷണി എന്ന് തിരിച്ചറിഞ്ഞ രാഹുൽ ഗാന്ധി ക്രിയാത്മക മായ ഒരു രാഷ്ട്രീയ ഭാവിയെകുറിച്ചു പ്രതീക്ഷ നൽകുന്നു. ഒരു മുഖ്യധാരാ കക്ഷിയുടെ ദേശീയ നേതാവ് ഒരു ദക്ഷിണേന്ത്യൻ സംസ്ഥാനത്തിലെ പിന്നോക്ക മേഖലയിൽ നിന്ന് മത്സരിക്കുകയാണെന്നതും പ്രധാനമാണ് .

 3. എന്ത് കൊണ്ട് ഇടതു സ്ഥാനാർത്ഥികളെ വിജയിപ്പിക്കണം .

കേരളത്തിലെ മറ്റു മണ്ഡലങ്ങളിൽ കോൺഗ്രസ് ഈ പിന്തുണ അർഹിക്കുന്നില്ല. നടപ്പു നിയമ സഭ കാലത്തു ചെന്നിത്തല യുടെ നേതൃത്വത്തിൽ ആ പാർട്ടി കളിച്ച നിഷേധാത്മാക രാഷ്ട്രീയത്തിനെതിരെ ശക്തമായ മുന്നറിയിപ്പ് നൽകാനാണ് വോട്ടർമാർ ഈ അവസരം ഉപയോഗിക്കേണ്ടത്. പ്രളയകാലത്തുടനീളം അദ്ദേഹം ഭിന്നിപ്പിൻറെ സ്വരമുയർത്തി. രക്ഷാപ്രവർത്തനം സൈന്യത്തെ ഏൽപ്പിക്കണമെന്നും, ജീവനക്കാർ ഒരു ദിവസത്തെ ശമ്പളം പ്രളയ പുനരധിവാസ നിധിയിലേക്ക് നൽകരുതെന്നും ശത്രുതാ മനോഭാവത്തോടെ ആഹ്വാനം ചെയ്തു. ശബരിമലയിൽ ബി ജെ പിയുടെ അവസരവാദത്തിനു കുഴലൂതി പാർട്ടിയുടെ സാംസ്‌കാരിക നിലപാടിൽ നിന്ന് വ്യതിചലിച്ചു ഒടുവിലിതാ ഭീമമായ നിർമ്മാണപ്രവർത്തനങ്ങൾ അനിവാര്യമായിരിക്കുന്നിടത്തു, ആർ ബി ഐ അംഗീകരിച്ച കിഫ്‌ബി ഫണ്ടിംഗ്നെ പറ്റി വിവാദങ്ങളു യർത്തിയിരിക്കുന്നു.
സംസ്ഥാന താൽപര്യങ്ങൾക്കു വിരുദ്ധമാണ് ഈ നിലപാടുകൾ എന്ന് വോട്ടർമാർ ചൂണ്ടിക്കാണിക്കേണ്ട സമയം വന്നുചേർന്നിരിക്കുന്നു. ദേശീയ പ്രാധാന്യം വീണ്ടെടുക്കാനുള്ള കോൺഗ്രസ് യജ്ഞത്തിൽ തങ്ങളുടെ പങ്കു സംസ്ഥാന ഘടകം തിരിച്ചറിയാൻ ഇത് ഇടവരുത്തട്ടെ. കമ്മ്യൂണിസ്റ്റ് പാർട്ടികൾ നിലനിൽക്കേണ്ടത് ഇന്ന് ജനാധിപത്യ അനിവാര്യതയാണ്. കേരളം നിർത്തിയിരിക്കുന്ന മിക്ക ഇടതു പക്ഷ സ്ഥാനാർത്ഥികളും പാർലമെൻറിലും പുറത്തും സൃഷ്ടിപരമായസാന്നിധ്യം കാഴ്ച വെച്ചിട്ടുള്ളവരാണ് തമസ്കരിക്കപ്പെട്ട ദേശീയ കർഷക സമരങ്ങൾക്ക് ഇടതു പാർട്ടികളുടെ പിന്തുണയും ചിലയിടങ്ങളിൽ നേതൃത്വവും ഉണ്ടായിരുന്നു. സംസ്ഥാനത്തെ ഇടതു സർക്കാർ പിന്നിട്ട പകുതിക്കാലം സക്രിയവും പ്രതീക്ഷയുണർത്തുന്നതും ആയിരുന്നു. എന്നതും ഇടതു പ്രതിനിധികളെ ലോകസഭയിലേക്കു തിരഞ്ഞെടുക്കുന്നതിന് പ്രോത്സാഹിപ്പിക്കുന്നു.

ഈ തിരഞ്ഞെടുപ്പിൽ രാഷ്ട്രീയ വിവേകവും ജനാധിപത്യ ബോധവും ആവണം വഴികാട്ടേണ്ടത്. മറ്റെല്ലാം അപ്രധാനമാണ്.

നീതിയെക്കുറി ച്ചുള്ള എന്തെങ്കിലും സങ്കൽപങ്ങൾ മനസ്സിൽ വച്ചു കൊണ്ട് നിങ്ങൾ ഇന്ത്യയിലെ വിവിധ സംസ്ഥാനങ്ങളിലൂടെ സഞ്ചരിക്കൂ. – കമ്മ്യൂണിസ്റ്റ് കേരളം വേറിട്ട് തലയുയർത്തിപ്പിടിച്ചു നിൽക്കുന്നതിന്റെ ഒരാത്മാഭിമാനം നിങ്ങൾക്കുള്ളിൽ അലയടിച്ചുയരും. – സാമൂഹ്യനീതി എന്ന കാഴ്ചപ്പാടിനോട് നിങ്ങളുടെ ജീവിതവീക്ഷണം ഏതെങ്കിലും വിധത്തിൽ ചേർന്നു നിൽക്കുന്നുവെങ്കിൽ ഏത് നാട്ടിടവഴികളുടെ അറ്റത്തും മനുഷ്യ ജീവിതം മുന്നോട്ട് കുതിച്ചതിന്റെ അടയാളങ്ങൾക്കു പിന്നിലെ ഇടതുപക്ഷത്തെ നിങ്ങൾക്ക് തൊട്ടറിയാനാകും. ഇത് മതിയോ എന്ന ചോദ്യത്തിന് തീർച്ചയായും അല്ല എന്നു തന്നെയാണ് ഉത്തരം.
ലോകത്താദ്യമായ് ബാലറ്റ് പേപ്പറിലൂടെ കമ്മ്യൂണിസ്റ്റുകാർ ഒരു പ്രവിശ്യാ ഭരണത്തിന്റെ തലപ്പത്തെത്തിയ നാടാണ് നമ്മൾ. തുടർന്നങ്ങോട്ടുള്ള ചരിത്രം ജനാധിപത്യ വ്യവസ്ഥയെ മാനിച്ചുകൊണ്ടുള്ള ഇടതുപക്ഷ രാഷ്ട്രീയ പ്രവർത്തനത്തിന്റേതാണ്. ലോകത്തെ കഴിഞ്ഞ രണ്ടു നൂറ്റാണ്ടുകളിലെ മാനവ ജീവിത പുരോഗതിയുടെ ചരിത്രം സാക്ഷ്യപ്പെടുത്തുന്നത് രണ്ട് കാര്യങ്ങളാണ്. ഒന്നാമത് ശാസ്ത്ര- സങ്കേതിക വളർച്ചയിലൂന്നിയ നവോത്ഥാനവും ആധുനികതയും. രണ്ടാമത് ദൈവങ്ങളുടെ സ്ഥാനത്ത് മനുഷ്യരുടെ രാഷ്ട്രീയ ബോധത്തെ പ്രതിഷ്ഠിച്ച ഇടതുപക്ഷ രാഷ്ട്രീയ മുന്നേറ്റങ്ങൾ. അതിൽ പാർലമെന്ററി വ്യവസ്ഥയ്ക്കുള്ളിൽ നിന്നു കൊണ്ട് സോഷ്യലിസ്റ്റ് പരിഷ്കാരങ്ങൾ നടപ്പാക്കുകയെന്ന രീതി പിന്തുടർന്ന നാടുകളിലും വമ്പിച്ച സാമൂഹ്യ പുരോഗതി ദൃശ്യമായ്. കേവലമായ വികസനം എന്നതിനേക്കാൾ വിഭവങ്ങളുടെ പുനർ വിതരണത്തിലെ നീതിയുക്തത എന്ന നിലയിലാണെങ്കിൽ കേരളം യൂറോപ്യൻ രാജ്യങ്ങളോട് കിടപിടിക്കുന്ന മുന്നേറ്റമാണ് നടത്തിയിട്ടുള്ളത്. കേരളം ഇങ്ങനെ മാറിയതിനു പിന്നിൽ കമ്യൂണിസ്റ്റ് പാർട്ടികൾ മാത്രമല്ല പങ്കുവഹിച്ചത്. പക്ഷേ, കേരള വികസനത്തെ ഇടത്തോട്ട് നയിക്കുന്നതിൽ ഇടതുപക്ഷത്തിന്റെ സാന്നിധ്യം നിർണ്ണായകം തന്നെയാണ്. ഒരു പാട് പേർക്ക് അലോസരമുണ്ടാക്കുന്ന ഒരു സാന്നിധ്യം കൂടിയാണത്. പശ്ചിമ ബംഗാളിൽ വർഗ്ഗീയ ധ്രുവീകരണത്തെ ചെറുത്തു നിന്ന സാന്നിധ്യമാണത്. ത്രിപുരയിൽ ഇന്ത്യയിലെ ഏറ്റവും ഫലപ്രദമായ ആദിവാസി സ്വയംഭരണ സംവിധാനത്തിന് രൂപം നൽകിയ സാന്നിധ്യമാണത്. തമിഴ്നാട്ടിലും കർണ്ണാടകത്തിലും ജാതിവിവേചനങ്ങൾക്കെതിരെ പൊരുതുന്ന ശബ്ദമാണത്. കാശ്മീരിൽ ദേശീയ ഐക്യത്തിനു വേണ്ടി ഉയരുന്ന മതേതര നിലപാടാണത്. ഹിമാചലിൽ അഴിമതിയ്ക്കെതിരെയുള്ള ജനപക്ഷ നിലപാടാണത്. കർഷക പ്രക്ഷോഭങ്ങൾക്ക് ആവേശമായ് മാറുന്ന ചെങ്കൊടിയാണത്. തങ്ങളുടെ അധികാരം എക്കാലത്തും ഊനം കൂടാതെ നിലനിൽക്കണമെന്നാഗ്രഹിച്ച സവർണ്ണ – സമ്പന്ന വിഭാഗങ്ങളാണ് ആദ്യത്തെ കമ്യുണിസ്റ്റ് സർക്കാരിനെതിരെ വിമോചന സമരങ്ങൾക്ക് നേതൃത്വം നൽകിയത്. മത സാമുദായിക ശക്തികളെ ഇടതുപക്ഷത്തിനെതിരെ അണിനിരത്തിയ വലതുപക്ഷം ഇന്നും അതേ തന്ത്രങ്ങൾ തന്നെയാണ് ഇന്ത്യയിലെ ഇടതുപക്ഷ മുന്നേറ്റങ്ങളെ തകർക്കുവാൻ ഉപയോഗിക്കുന്നത്. ഇനിയൊരു നൂറു കൊല്ലം കൂടി അവർക്കെടുത്തുപയോഗിക്കാൻ കഴിയുന്ന ഒരു സ്ഥിര നിക്ഷേപമാണത്. ഇന്ത്യാ ചരിത്രത്തിൽ അതിന്റെ വേരുകൾ ആഴത്തിൽ ഉണ്ട്. മുഗൾ ഭരണകാലത്തെ സാമുദായിക ഹിംസകൾ, ബംഗാൾ വിഭജനത്തിൽ നിന്ന് തീ കൊളുത്തപ്പെട്ട് ഇന്ത്യയെ കീറി മുറിച്ച വർഗ്ഗീയബ്ഭ്രാന്ത്, ഇന്ത്യൻ ദേശീയതയ്ക്കുള്ളിൽ പുഴുക്കുത്തുകളായി പടർന്നു നിൽക്കുന്ന ജാതിബോധം- ഇതൊക്കെ വലതുപക്ഷത്തിന്റെ വറ്റാത്ത ഊർജ്ജ ഖനികളാണ്. പശ്ചിമ ബംഗാളിൽ ഇടതു പക്ഷത്തെ നേരിട്ടത് ഈ വർഗ്ഗീയ മനസ്സിനെ ഉണർത്തിയെടുത്താണു്. അതുപയോഗിച്ചു തന്നെയാണ് വടക്കുകിഴക്കൻ സംസ്ഥാനങ്ങളിൽ ബി.ജെ.പിയ്ക്ക് വേരോട്ടമുണ്ടാക്കുന്നത്.
സമീപകാലത്ത് ഇന്ത്യയിലുയർന്നു വന്ന യഥാർത്ഥ രാഷ്ട്രീയ മുന്നേറ്റം കർഷക പ്രക്ഷോഭ ങ്ങളാണ്. അതിന് നേതൃത്വം നൽകിയത് ഇടതുപക്ഷവുമാണ്. പക്ഷേ, എന്തുകൊണ്ടാണത് തെരഞ്ഞെടുപ്പ് രാഷ്ട്രീയത്തിൽ പ്രതിഫലിക്കാത്തത്? മൂലധനശക്തികൾ, സമ്പന്ന വിഭാഗങ്ങൾ ജാഗരൂകരാണ്. മൻമോഹൻ സിങ്ങിന്റെ ജനപ്രീതി ഇടിഞ്ഞാൽ അവർ മോദിയെ ഉയർത്തി ക്കൊണ്ടുവരും. മോദിയുടെ കാലിടറുന്നുവെന്ന് തിരിച്ചറിയുമ്പോൾ മുകേഷ് അംബാനി കോൺഗ്രസ്സിനു നേരെ കൈവീശിക്കാണിക്കും. തങ്ങളുടെ താൽപ്പര്യത്തിനൊത്ത് തുള്ളുന്ന ഒരു തൂക്കുസഭയുണ്ടാക്കാൻ സഖ്യരൂപീകരണങ്ങളിൽ ഇടപെടും. മായാവതിയ്ക്കും മമതാ ബാനർജി യ്ക്കും കുട പിടിച്ചു നൽകും. പക്ഷേ, ഇടതുപക്ഷം നിർണ്ണായക ശക്‌തിയാകുന്നത് തങ്ങളുടെ വ്യാപാര – വികസന സങ്കൽപങ്ങൾക്കു് വെല്ലുവിളിയാകുമെന്ന് അവർക്കറിയാം. അത് കൊണ്ട് ചെങ്കൊടിയെ ദൃശ്യങ്ങളിൽ നിന്ന് മറച്ചു പിടിക്കാൻ അവർ മത – സാമുദായിക ചിഹ്നങ്ങൾ ആവർത്തിച്ച് സംപ്രേഷണം ചെയ്യും. നാമജപപ്പേക്കൂത്തുകൾക്ക് മുൻപിൽ ഒ.ബി.വാനുകൾ നിരത്തിയിടും.
കേരളത്തിൽ ഈ തെരഞ്ഞെടുപ്പിൽ കാര്യങ്ങൾ സുവ്യക്തമാണ്. ഇടതുപക്ഷ സർക്കാരിനെതിരെ കാര്യമായ ഒരാക്ഷേപവും ഉന്നയിക്കാനില്ല. സർക്കാരിന്റെ പ്രവർത്തനങ്ങൾ എല്ലാ മേഖലയിലും മികവാർന്നതാണ്. രണ്ട് ലക്ഷത്തോളം വീടുകൾ പൂർത്തിയാക്കുന്നതിന് ചിട്ടയായ പ്രവർത്തന ങ്ങൾ നടന്നുവരുന്നു. സ്കൂളുകളിൽ സമയത്തിന് മുൻപേ സൗജന്യ യൂണിഫോമും പാഠപുസ്തക ങ്ങളും എത്തുന്നു. പ്രൈമറി മുതൽ ഹയർ സെക്കൻഡറി വരെ ആധുനിക ക്ലാസ്സ് മുറികൾ രൂപം കൊള്ളുന്നു. സർക്കാർ വിദ്യാലയങ്ങൾ മെച്ചപ്പെടുന്നു. പൊതുമേഖലാ വ്യവസായം ആധുനിക മാവുന്നു. നഷ്ടത്തിൽ നിന്ന് കരകയറുന്നു. ആരോഗ്യമേഖല ലോക നിലവാരത്തിലേയ്ക്കു യരുന്നു. ക്ഷേമപെൻഷനുകൾ സമയബന്ധിതമായി വിതരണം ചെയ്യപ്പെടുന്നു. റോഡുകൾ നവീകരിക്കപ്പെടുന്നു. വികസന പ്രവർത്തനങ്ങൾ സമയബന്ധിതമായ് പൂർത്തീകരിക്കപ്പെടുന്നു. കാർഷികോൽപ്പാദനം മെച്ചപ്പെടുന്നു. സോളാർ വൈദ്യുതി വ്യാപകമാകുന്നു. വൈദ്യുതി – വിതരണം കാര്യക്ഷമമാകുന്നു. പൊതുഭരണം സുതാര്യമാകുന്നു. തദ്ദേശ സ്ഥാപനങ്ങൾക്ക് സുലഭമായ് ഫണ്ട് ലഭിക്കുന്നു. വികസനത്തിനായുള്ള നിക്ഷേപങ്ങളിൽ വൻവർധന യുണ്ടാകുന്നു. അഴിമതി രഹിതമായ ഭരണം എന്ന് എതിരാളികൾക്കു പോലും അംഗീകരിക്കേണ്ടി വരുന്നു. വലതുപക്ഷ മാധ്യമങ്ങൾ പണം വാങ്ങി നടത്തുന്ന സർവേകളിൽപ്പോലും മികച്ച ഭരണമെന്ന അഭിപ്രായമുയരുന്നു.
ആർ.എസ്സ്.എസ്സ്.നേതൃത്വം നൽകുന്ന മത വർഗ്ഗീയ ഭരണകൂടത്തിനെതിരെ ഉറച്ച മതേതര നിലപാടുകൾ ഇടതുപക്ഷത്തിനുണ്ടെന്ന് എല്ലാവർക്കുമറിയാം. കോൺഗ്രസ്സ് നേതാക്കളെപ്പോലെ ബി.ജെ.പിയിലേയ്ക്ക് ചേക്കേറാൻ കാലെടുത്തു നിൽക്കുന്നവരല്ല ഇടതുപക്ഷത്തുള്ളത്. എന്നിട്ടും രാഹുൽ ഗാന്ധി കേരളത്തിൽ വന്ന് ഇടതുപക്ഷത്തിനെതിരെ പട നയിക്കുന്നത് അംബാനി മാരെയും അദാനിമാരെയും തൃപ്തിപ്പെടുത്തുന്നതിനാണ്. ഇടതുപക്ഷത്തിന്റെ ഉറച്ച മതേതര നിലപാടുകളെത്തന്നെ അതിനെതിരെയുള്ള ആയുധമായ് ഉപയോഗിക്കുകയെന്നതാണ് കേരളത്തിൽ കോൺഗ്രസ്സിന്റെ തെരഞ്ഞെടുപ്പ് തന്ത്രം. ഇസ്ലാമിക വർഗ്ഗീയ പ്രസ്ഥാനങ്ങളെ കോൺഗ്രസ്സിനു പിന്നിൽ അണി നിരത്തുന്നതിനുള്ള ചർച്ചകൾ ദേശീയ തലത്തിൽ മുൻപേ തന്നെ നടന്നു. കേരളത്തിലെ വലതുപക്ഷവൽക്കരിക്കപ്പെട്ട ചില പരിസ്ഥിതിവാദികളും സ്വത്വ രാഷ്ട്രീയക്കാരും ഈ അവിശുദ്ധ സഖ്യത്തിന് അരങ്ങൊരുക്കാനുള്ള ഭഗീരഥപ്രയത്നങ്ങളിൽ മുഴുകി. മറുവശത്ത് ശബരിമല പ്രശ്നത്തിൽ പുരോഗമന നാട്യങ്ങളണിഞ്ഞ് ഹിന്ദു മത വിശ്വാസികൾ ഇടതുപക്ഷത്തിനെതിരെ തിരിയുന്നത് സ്വപ്നം കണ്ടു നീങ്ങി. എൻ.എസ്സ്.എസ്സിനും ആർ.എസ്സ്.എസ്സിനും ഒപ്പം സർക്കാരിനെതിരെ വിശ്വാസികളെ അണിനിരത്താൻ കോൺഗ്രസ്സ് രംഗത്തിറങ്ങിയതിലെ സവർണ്ണ പ്രീണനമോ, ദലിത് വിരുദ്ധതയോ സ്ത്രീവിരുദ്ധതയോ മൃദു ഹിന്ദുത്വ പ്രോത്സാഹനമോ അവർക്ക് വിഷയമായില്ല. പശ്ചിമ ബംഗാൾ മോഡലിൽ ഇടതുപക്ഷത്തെ തൂത്തെറിയുന്നതിന് കളമൊരുക്കുന്നതിനുള്ള പല വിധ ആശയ പ്രചരണങ്ങൾ ഏറ്റെടുത്തിരിക്കുകയാണവർ. ആം ആദ്മി പാർട്ടിയെ വരെ ഇടതുപക്ഷത്തെ തകർക്കുന്നതിനുള്ള ആയുധമാക്കാൻ ശ്രമം നടന്നു.
ഇന്ത്യയിൽ ഇടതുപക്ഷം മുഖ്യ രാഷ്ട്രീയ ധാരയിൽ നിന്ന് പിന്തള്ളപ്പെട്ടാൽ അത് സാമൂഹ്യ നീതിയുടെ രാഷ്ട്രീയത്തെ ദശകങ്ങളോളം പിന്നോട്ടടിപ്പിയ്ക്കും. ഇന്ത്യയിലെ മാവോയിസ്റ്റുകൾ ഉൾപ്പടെയുള്ള കമ്യൂണിസ്റ്റ് പ്രസ്ഥാനങ്ങൾ നേപ്പാൾ മാതൃകയിൽ പാർലമെന്ററി പ്രവർത്തന രംഗത്ത് ഐക്യപ്പെടുകയാണ് വേണ്ടത്. അഭിപ്രായഭിന്നതകൾ സംവാദാത്മകമായി പരിഹരി ക്കുകയാണ് വേണ്ടത്. പകരം വലത് പക്ഷ മാധ്യമങ്ങളുടെ പ്രചാരണങ്ങൾ ഏറ്റെടുത്ത് വർഗ്ഗീയ- വലതുപക്ഷത്തെ വളർത്താൻ സഹായിക്കുന്നത് കേരളീയ നവോത്ഥാനത്തെ പിന്നോട്ട ടിപ്പിയ്ക്കും. വിമോചm സമരത്തിന്റെ ശക്തികളെ കേരളീയ സമൂഹികതയ്ക്കു മേൽ പ്രതിഷ്ഠിക്കുന്നതിനുള്ള ഗൂഢാലോചനകൾ തിരിച്ചറിയേണ്ട ഒരു രാഷ്ടീയ സന്ദർഭമാണിത്. മതേതര ഭാരതം നില നിൽക്കുന്നതിന് , നീതിയുക്ത ഭാരതം ഉണർന്നു വരുന്നതിന് ഇടതുപക്ഷം ഇന്ത്യയിൽ നിലനിൽക്കേണ്ടതുണ്ട്. കേരളത്തിൽ താമര വിരിയാതിരിക്കുക എന്നതു മാത്രമല്ല, രാജസ്ഥാനിലും മഹാരാഷ്ടയിലും യു.പി.യിലും മധ്യപ്രദേശിലുമെല്ലാം കർഷ സമര യാത്രകളിൽ ഉയർന്നു വന്ന ആ ചെങ്കൊടി ഒരു പ്രത്യഭിവാദനമായ് കൂടുതൽ ഉയർന്നു പാറുക തന്നെ വേണം. പണം നൽകുന്ന സ്ഥാനാർത്ഥികളെ വിജയിപ്പിക്കുന്ന തിരഞ്ഞെടുപ്പ് സർവേകളിൽപ്പോലും ഇടതുപക്ഷ മുന്നേറ്റം തെളിഞ്ഞു വരികയാണ്. ഏപ്രിൽ 23 കഴിയുമ്പോൾ അത് പതിനാല് സീറ്റുകളെങ്കിലുമായി ഉയരും . വ്യത്യസ്ത സർവേകളിലെ വൈരുധ്യങ്ങളിൽത്തന്നെ അതിന്റെ ശക്തമായ സൂചനകളുണ്ട്. വലതുപക്ഷ മാധ്യമങ്ങളുടെ തട്ടിപ്പുകളിൽ കുരുങ്ങാതെ ഇടതുപക്ഷ വിജയം സുനിശ്ചിതമാക്കുകയെന്നത് കേരളത്തിന്റെ മാത്രമല്ല ഇന്ത്യയുടെ യൊട്ടാകെ സാമൂഹിക പുരോഗതിയ്ക്ക് വേണ്ടിയുള്ള ഒരിടപെടലാണ്. ജാതിപരവും മതപരവുമായ വിവേചനങ്ങൾക്കെതിരെ മാനവികതയുടെ പക്ഷത്തു നിന്നു കൊണ്ടുള്ള ചെറുത്തു നിൽപ്പാണ്. ഇന്ത്യയെന്ന ആശയത്തെ ശിഥിലമാക്കുന്ന വർഗ്ഗീയ രാഷ്ടീയത്തിനെതിരെയുള്ള വിധി യെഴുത്താണ്. നമ്മുടെ ജീവിതമാണ് നമ്മുടെ രാഷ്ട്രീയം. വിശ്വാസത്തിന്റെ പേരിൽ അരങ്ങേറുന്ന  ചൂഷണങ്ങളല്ല.