ഒരു യാത്ര കഴിഞ്ഞു തിരിച്ചു വന്നാൽ
കൂടെ കൊണ്ടുപോകാത്തതിലുള്ള
പരിഭവത്തോടെ
കുറച്ചു നേരം കൊച്ചു കുട്ടിയെപ്പോലെ
മിണ്ടാതെയിരിക്കും
ക്ഷീണിച്ചുകിടക്കുമ്പോൾ
അരികിൽ വന്നിരുന്ന്
അമ്മയെപ്പോലെ മുതുകും നെറ്റിയും
തടവിത്തരും
വീട്ടിലുള്ളവരുടെ ആഹ്ളാദത്തിൽ
ഒപ്പം ചേർന്ന് നൃത്തം വെക്കും
സങ്കടത്തിൽ മുഖം വാടി മിണ്ടാതിരിക്കും
വീട് ഒരു ജീവിയാണ്
ആരുമില്ലാതെ
ഒറ്റക്ക് നിൽക്കുന്ന വീട്ടിലേക്ക്
ചെന്ന് നോക്കൂ
ഉറക്കം തൂങ്ങിയിരിക്കുന്ന വീട്
നമ്മെ കണ്ട്
ഞെട്ടിയുണരുന്നത് കാണാം
ഒരു പരിചയവുമില്ലാത്തവരുടെ
വീട്ടിൽ ചെന്നാൽ
വീട്ടുകാർ എത്തുന്നത് വരെ
കാവൽ നായുടെ ജാഗ്രതയോടെ
വീടു നമ്മെ അകറ്റി നിർത്തും
ആളില്ലാത്ത വീട്ടിൽ
അതിക്രമിച്ചു കയറിയവന്റെ
എന്തെങ്കിലും ഒരു തെളിവ്
വീട് തന്ത്രപൂർവ്വം എടുത്തു വെക്കും
പല കേസുകളിലും
അത്തരം തെളിവുകളാണ്
നിർണ്ണായകമായത്
പ്രിയപ്പെട്ടവർ വീടും പൂട്ടി
ദൂരയാത്ര പോകുമ്പോൾ
വീടും പിന്നാലെ ഇറങ്ങുന്നുണ്ട്
കാണാനാകില്ലെങ്കിലും
വീട് നമ്മെ സ്പർശിക്കുന്നത്
അറിയാനാകും
അതിനെയാണ് നമ്മൾ
വീടോർമ്മയെന്ന് തെറ്റിദ്ധരിക്കുന്നത്
അമ്മ മരിച്ചു പോയന്ന് മരിച്ചു പോയ,
വീടിന്റെ ജഡം മാത്രം പോരെ
വീടിനു ജീവനുണ്ടായിരുന്നു എന്നറിയാൻ..
കവർ ഡിസൈൻ : വിൽസൺ ശാരദ ആനന്ദ്
