പൂത്തതറിഞ്ഞില്ല.
കായ്ച്ചു തൂങ്ങി-
ക്കനത്ത ചില്ലയിലാണ്
പണ്ടേട്ടൻ മൂപ്പറിയിച്ചത്!
സൂചിയിലത്തലകളേക്കാളുണ്ടി-
ക്കൊല്ലത്തെക്കുലകൾ.
ഏട്ടനെപ്പോലെത്തന്നിളം
കറുപ്പിലേക്കു മൂപ്പെത്തിയത്.
അച്ഛന്റെ
കാണാപ്പുളിവടിയുണ്ട്.
ഒറ്റ പ്പുരികം കൊണ്ടൊരു
നോട്ടപ്പുളച്ചിലുണ്ട്.
” നെല്ലിമേൽ കണ്ണിടരുത്”
കൊല്ലമെത്രയായി
പൂത്തു കായ്ച്ചിട്ട്!
ഏട്ടൻ പോയകൊല്ലം
ഞങ്ങളുപ്പുതേച്ച് പുളിച്ചതാണ്..
———
ഏട്ടൻ
നിലാവ് കെടുത്തുന്നു,
നെല്ലിത്തല താഴ്ത്തുന്നു,
കറുപ്പേറിയ കുലകൾ…!
ഞങ്ങളുപ്പുതേച്ച് പുളിക്കുന്നു.!
Comments
കാസറഗോഡ് ജില്ലയിലെ മീങ്ങോത്ത് സ്വദേശി. ആനുകാലികങ്ങളിൽ കഥ, കവിത എഴുതാറുണ്ട്, ഏറെ അംഗീകാരങ്ങൾ കിട്ടിയ " കാണി " എന്ന ഹ്രസ്വ സിനിമയുടെ സംവിധായകൻ കൂടിയാണ്.
