ചോദ്യം: മതപരമായ അസഹിഷ്ണുതകളിലേയ്ക്കോ തീവ്രവാദങ്ങളിലേയ്ക്കോ എതിരില്ലാത്ത എകാധിപത്യത്തിലേയ്ക്കോ ഒക്കെ രാഷ്ട്രത്തെ നയിച്ചേയ്ക്കാവുന്ന, ഒരു രാഷ്ട്രീയ വിശ്വാസവും അതില് പടുത്തുയര്ത്തപ്പെട്ട രാഷ്ട്രീയ കക്ഷിയും ശരീരഭാഷ കൊണ്ടും സംസാരരീതികൊണ്ടും എതിരാളികളെ അസ്വസ്ഥരാക്കാന് പോന്ന അതിന്റെ നേതാവും ജയിച്ചു നില്ക്കുന്ന ഇന്നത്തെ ചുറ്റുപാടില്, തത്ക്കാലം അസൂയാവഹമായ അവസ്ഥയിലല്ലാത്ത ഇടതു കക്ഷികള്, തന്ത്രപരമായി ഏതു ബഹുമുഖവഴികളിലൂടെയാവും സ്വന്തം പ്രസക്തി അവതരിപ്പിക്കാന് ശ്രമിക്കുക?
ഉത്തരം: ഈ
അവികസിത രാജ്യത്തിലെ നാമമാത്രജനാധിപത്യത്തെ കുറിച്ച് പണ്ടില്ലാത്ത ആശങ്കയോ ശുഭപ്രതീക്ഷയോ എനിക്കില്ല. പ്രത്യയശാസ്ത്രാനന്തര ലോകത്തില് എല്ലാ പ്രത്യയശാസ്ത്രവായ്ത്താരികളും അധികാരത്തിനു വേണ്ടിയാണ്. അതിനപ്പുറം ഇക്കൂട്ടര് പറയുന്ന പ്രത്യയശാസ്ത്രത്തിനൊക്കെ വളരെ കുറച്ചേ പ്രസക്തിയുള്ളൂ വലതു പക്ഷ – ഇടതുപക്ഷ പ്രചരണങ്ങള്ക്ക് ചെവി കൊടുക്കാതെ വസ്തുനിഷ്ഠ യാഥാര്ഥ്യത്തെ ജാഗ്രതയോടെ ആശ്രയിക്കേണ്ടുന്ന ഒരു കാലമാണിത്. എല്ലാ പ്രചാരണങ്ങളും നിക്ഷിപ്തതാല്പ്പര്യങ്ങളോട് കൂടിയതാണ്. ഉദാഹരണത്തിന്, ഹിന്ദുത്വ വികാരം എന്ന ഭൂരിപക്ഷവികാരം ഒരു പാര്ട്ടിയുടെ മാത്രം കുത്തകയല്ല.അധികാരാവശ്യത്തിനായി എല്ലാവരും അത് ഉപയോഗിച്ചിട്ടുണ്ട്. ഇനിയും അത് ഉപയോഗിക്കും..സംഘപരിവാരില് ആരോപിക്കപ്പെടുന്ന കുറ്റങ്ങള് എല്ലാം എല്ലാ ‘മതേതര’കക്ഷികളും ‘ഇടതു’കക്ഷികളും ചെയ്തിട്ടുള്ളവ തന്നെയാണ്. ഉദാഹരണത്തിന്, മീററ്റ്, ഹാഷിംപുര, നെല്ലി കൂട്ടക്കൊലകള് ആസൂത്രണം ചെയ്യുന്നതിലോ കേസുകള് ഒതുക്കുന്നതിലോ ഇന്ദിരാഗാന്ധിയും രാജീവ്ഗാന്ധിയും കാണിച്ച വിരുത് മോഡി ഗുജറാത്തില് പ്രദര്ശിപ്പിച്ചതിന് തുല്യമോ അതില് കൂടുതലോ ആണ്. അതിനാല് മോദിയോ ആദിത്യനാഥോ നാളെ മുതല് പ്രാതലിന് ഒരു മുസല്മാനെയും അത്താഴത്തിന് ഒരു ദളിതനേയും വിഴുങ്ങും എന്ന വിധത്തിലുള്ള പ്രചാരണങ്ങള് ഒക്കെ ഭോഷ്കാണ്. അങ്ങനെയുള്ള നരഭോജനമൊന്നും അധികാരക്കൊതിയുള്ള, ദീര്ഘകാലപദ്ധതികളുള്ള ഒരു ഭരണാധികാരിക്കും തുടരാനാവില്ല .