ഒന്നും എളുപ്പമല്ലെന്ന്
പലവുരു കേട്ടത്
പ്രണയിക്കാൻ
മധുരിയ്ക്കാൻ
ചവർക്കാൻ
പുളിച്ചുതേട്ടാൻ
മുറുക്കിവെയ്ക്കുന്ന
സമയത്തിൽ തന്നെ
പുതപ്പിനുള്ളിൽ നിന്നും
വിടുതലാവാൻ
പ്രഷറും ഷുഗറും
മരുന്നാക്കി
അരച്ചെടുക്കാൻ
വെള്ളത്തിലിട്ടിട്ടും
കുതിരാത്തവരെ
മുളക് പുരട്ടി വറുത്തെടുക്കാൻ
കായക്കറ പിടിച്ച കൈവിരലുകൾ
എണ്ണതൊട്ടു മിനുക്കി വെയ്ക്കാൻ
നീലം കൂടിയ വെള്ളകളെ
പേടിയില്ലാതെ മടക്കി വെയ്ക്കാൻ
തിരക്കിൽ നനച്ച മുടിക്കെട്ടിനെ
ഈറൻതോർത്തി ഉണക്കിയെടുക്കാൻ
തിളച്ചിരിയ്ക്കുന്ന വെള്ളം
കുപ്പി ചുളിയാതെ നിറച്ചുവെയ്ക്കാൻ
വേർപെടാത്ത പെൻസിലും കോമ്പസും
ചെപ്പിലിട്ട് അടച്ചു വെയ്ക്കാൻ
പാകമാവാത്ത ചെരുപ്പിലേക്ക്
നാളെ എന്ന് പറഞ്ഞ് ഒതുങ്ങിക്കൂടാൻ
കിതയ്ക്കാതെ,
മരിക്കാതെ
അഞ്ച് മിനിറ്റ് മുൻപേ ഒന്ന്
പൂട്ടിയിറങ്ങാൻ
ട്രാഫിക്കിലെ ചുവപ്പിൽ
ആധിയോടെ
സ്തംഭിക്കാതിരിയ്ക്കാൻ
ഒന്നും എളുപ്പമല്ലെന്ന്
അകത്തളങ്ങളിൽ
ആരോ പലവുരു
വീശിപ്പോവുന്നു…
തൃശ്ശൂർ ജില്ലയിലെ വലപ്പാട് സ്വദേശം. മത്സ്യഫെഡിന്റെ തൃശ്ശൂർ ജില്ലാ ഓഫീസിൽ ജോലി ചെയ്യുന്നു.