LITERATURE കവിത

ഒറ്റയ്ക്കാവാൻ കൊതിക്കുക



rathi1

 

മണിനാദങ്ങളുടെ പുലർച്ചകളിൽ
ധൃതികളുടെ ദ്രുത വേഗം
കടുകു മണികളായി
പൊട്ടിത്തെറിക്കാതിരിക്കാൻ

കറിയിലെ എരിവും പുളിയും
തീൻ മേശയിൽ തൊലി
പൊള്ളിക്കാതിരിക്കാൻ

രാത്രിയുടെ പുനർവായനകളിൽ
ഭേദഗതി വരുത്തുന്ന
നിയമങ്ങളുടെ സമ്മത പത്രങ്ങളിൽ
ഒപ്പ് വെക്കാതിരിക്കാൻ

പാലപ്പൂമണം ഒഴുക്കുന്ന ഇരുട്ടിന്റെ
സംഗീതം കൂർക്കംവലിയിൽ
മുങ്ങിപ്പോവാതിരിക്കാൻ

എഴുത്ത് മേശയിൽ
അടുക്കിപ്പെറുക്കി വെച്ച
ഹൃദയത്തുടിപ്പുകൾ
പരിഹാസമേറ്റ് ചുളുങ്ങാതിരിക്കാൻ

അവരിലെ രുചികളും
നമ്മളിലെ അരുചികളും
തിങ്ങി നിറഞ്ഞ്
വിയർക്കാതിരിക്കാൻ

ധാർ ഷ്ട്യത്തിന്റെ സിന്ദൂരം
നെറ്റിയിൽ വൃത്തി കേട്‌
വരയ്ക്കാതിരിക്കാൻ

മുന്നറിയിപ്പായി വരുന്ന
അകം പൊരുളിന്റെ
ചുവപ്പിൽ പേടിയില്ലാതെ
ഒന്ന് നീന്തിത്തുടിക്കാൻ

വിവസ്ത്രതയിലെ സ്വാതന്ത്ര്യം കൊണ്ട്
ശരീരത്തെ ഒന്ന് മറന്നുവെയ്ക്കാൻ

അറിവുകേടിലെ ഷണ്ഡത്വം
മീശ മുനകൊണ്ട്
കുത്താതിരിക്കാൻ

തോന്നുന്ന നിറങ്ങളിൽ
തോന്നുംപോലെ
ഒന്ന് പൊതിഞ്ഞിറങ്ങാൻ

പിന്നെ ഇഷ്ടങ്ങളിലൊക്കെയും
വേഗത കൂടിയ യന്ത്രം പോലെ
ഒന്നിടിച്ചു മരിക്കാൻ

ഒറ്റയ്ക്കാവാൻ കൊതിക്കുക നിങ്ങൾ….

Comments

കവിതയുടെ കാർണിവൽ

കാർണിവൽ 2017 ഗ്യാലറി
Published by

Satheesan Puthumana

Chief Editor

e mail: mneditorial@live.com

വാക് വിചിത്രം / UMD

യു. എം. ഡി.